Read Kpelle Ikilisiati 9 Bible Online

Ikilisiati 9 - Kpelle bible

Ikilisiati 9

¹Ŋá ŋ́gili ŋá sìa a zu kôyaa ŋá gɔ́lɔŋ a gɛɛ Ɣâla nɔ́ ƃa pɔ̂ri tɔ̃yâ nuu da táre nuu téniŋ tɔɔ̂i. Díta fé berei kɔ́lɔŋ wɛli kɛ́-maa da kpɔara kpɛtɛ-pere káa lai. Díta fé tela tínaa tuɛ-pere mɛni kɔ́lɔŋ.

²M̀ɛni tɔ̂nɔ nɔ́ ƃé a kɛ̂ a núu kélee, sɔŋ lɛ̂lɛ-nuu kpaa sɔnyɔ̂ŋ nuu, tɔ̃yâ nuu kpaa ŋwana-lɔɔ nuu, diai dímaa waai kpaa diai dímaa fé wàa-nii, diai da sâla kulai da diai dífa sâla kulai, diai da dífòoi kpaa diai dífa dífôoi.

³É kúla nyíŋi pôlu, núu-kpune líi láa fɛ̂ɛi a sɔnyɔ̂ŋ da ƃoo-mɛni. M̀ɛni-ŋai ŋí kélee su núu kélee lì-pere káa nɔ́ tɔnɔ. Ǹyaŋ m̀ɛnii kélee kpɛɛ ŋá nɔ́ ƃa saa nyii gáa a m̀ɛni nyɔ́mɔɔi nyii a kɛ̂ a núu kéleei.

⁴Kili kɛ-zu káa diai yêei díkaa ɣele mai. Ɣîla fulu maa nɛ̃ɛ̂i é tɛ́ɛ yala-sulu poma ma kpɛ́ni fêi, ŋ̀îlai káa nîi a vúlu.

⁵Diai ɣele mai, dí gɔ́lɔŋ da pâi saâi. Kɛ́lɛ zaa-ƃelai dífe mɛni da kɔ́lɔŋ é pîlaŋ díkpîŋ ma. Fela-fei da fé naa dímɛni ma. Núu da fa ŋɔ́nɔ é pîlaŋ dîa.

⁶Wɛli kɛ́-maa, kpɔara da tólo maa kili-ŋa sia da fé ŋɔ́nɔ dîa. Dífe pâi wɔ́lɔ kɛ̂i m̀ɛni-ŋai kélee da su nyii-ŋai da kɛ̂ ɣéniɛi.

⁷Kɛ́ ílaa miî a lii-nɛ̃ɛ pere, íkɛ íŋwã̂ai kpêle a koi-nɛ̃ɛ, kpɛ́ni fêi, m̀ɛnii ŋí ƃé a Ɣâla líi làa.

⁸Seɣe lɛ́lɛɛ tóo yâ a ɣele kélee íkɛ wúru-ya kúŋ-nɛ̃ɛ pu yâ a tãi kélee.

⁹Ka ínɛnîi ka káɣeniɛi ŋãa-nɛ̃ɛ kula gîe ma tãi nɔ́ kákaa la ɣele ma tãi kpuai ŋí su Ɣâla a dɛ̀ɛ kápɔi. Ŋ̀éniɛi ŋí su mɛni-ŋai kélee díkaa nɔ́ kpɛ́ni-kpɛni. Nyíŋi nɔ́ ƃé ǹɛ̂lɛɛi ká gɛ́ kámɔ̃lɛi pôlu ma.

¹⁰M̀ɛnii kélee ya pɔ̂ri gɛ̂i, gɛ́ a íwala-walai kélee, kpɛ́ni fêi, núu a sàa, pɔri mâa da fa ŋɔ́nɔ kɛ̀ ǹyêei a gɛɛ é mɛni da kɛ́. Va ŋɔ́nɔ pɔri tíi da kɛ̂i, é mɛni kpɛtɛɛ da kɛ́, é kili ŋa-pono sɔlɔ ƃó mɛni da su kpaa máŋ é táre da maa kɔ́ri.

¹¹Ŋa ŋɔ́nɔ mɛni da kpɛ́ni maa kɔ̂ri ŋá táre zu. Ŋá gàa a gɛɛ ǹúui a kîrɛ sìɣe a ŋ̀ánaai va nûa yée mɛi ɣâle gbagba fúlɔi su a tãi kélee. Ǹúui ŋ̀wála-walai, fa pɔ̂ri nûa yée mɛi ɣâlei kɔ̂i a tãi kélee. Mii-sɛŋ fa kɛ̂ nɔ́ dáre-ƃelai yêei a ɣele kélee. Zɛŋ kɔ́lɔŋ-ƃelai diai tɔ̂nɔ nɔ́ fa ɣéniɛ lɛ́lɛɛ kɛ̀. Ǹyɛrɛ-ƃelai dia tɔ̂nɔ nɔ́ fa tɔɔ-laa sɔlɔ ƃô. Kɛ́lɛ mɛni kpânaŋ à lâa núu kélee mà ɣéniɛ.

¹²Yɛ̂ɛ berei nyɛ̃ɛ a tôo la tumâi é kpíniŋ lai, kpaa máŋ ŋɔni a kɔ̂ la a ƃárei, bere nɔ́ ƃé m̀ɛni-ŋai ŋí a kûla la a núu-kpune dɛ̂i-pere. Núu da fé tãi kɔ́lɔŋ ŋ̀ɔi a pâ la bɔ́i.

¹³Ŋá ŋɔ́nɔ táre kɔɔŋ maa da kpɛ́ni kàa ŋ̀éniɛi su nyii kɛ̀ a gúlaa a ńyãai.

¹⁴Taa-loŋ tɔnɔ è kɛ̀ naa núu kpɛ́-kpɛɛ nɔ́ ƃɛ́ kɛ̀ zu. Wála-wala kaloŋ tɔnɔ è pà é ǹaa-ƃelai maa tínaŋ é kɔ́ pɛ́lɛ dîa, é díyee mɛi ɣále.

¹⁵Nalôŋ tɔnɔ è kɛ̀ daa-loŋ tí su. È kɛ̀ a gôloɔɔ kɛ́lɛ dáreɛɛ. È daa-loŋ ŋí ŋuŋ ma ƃò a ŋɔtárei. Kɛ́lɛ gôlo naloŋ ŋí maa mɛ̂ni kíli fé lɛɛ ní núu da kíli ŋá ǹaa pôlu ma.

¹⁶Nya ƃe ńyãai a dáre-nuui ŋá mò a gɛɛ táre lɛ̂lɛɛi é tɛ́ɛ wála-wala. Kɛ́lɛ kôlo-nuu ŋɔtárei mɛni fa lɛ̂ɛ núu da kíli ŋá, nûa dífa tela díwoli tɔ̀ɔ ŋ̀óo ma.

¹⁷Ǹɛ̂lɛɛi núu é ŋ̀óli tɔ́ɔ táre-nuu wóo maa yeŋɔɔ ma é tɛ́ɛ la núu kɛ́ɛ é ŋ̀óli tɔ́ɔ ƃoo kâloŋ láɣi-woo ma.

¹⁸Táre lɛ̂lɛɛi é tɛ́ɛ kɔ́ kɔ́-sãa dîa. Kɛ́lɛ pɔara mâa kpua lòŋ a mɛni lɛ́lɛɛ támaa su-kara.