Read Kpelle Wule-ŋa Kélee Mɛi Wûle 1 Bible Online

Wule-ŋa Kélee Mɛi Wûle 1 - Kpelle bible

Wule-ŋa Kélee Mɛi Wûle 1

¹Ŋ̀ule-ŋai mɛi wûle lɛ́lɛɛ-ŋai ŋí, Gâloŋ Saloma ƃé wɔ́lɔ dòo.

²Íla-gbɔ see ŋ́ɔ̂i mâ a wɛli-kɛ́-maa pêre, kpɛ́ni fêi, íwɛli-kɛ-maai nɛ̃ɛ̂i é tɛ́ɛ ŋwã̂ai ma.

³Íkɔlɔ-kûŋ nɛ̃ɛ̂i yɛ̂ɛ wúru ya kúŋ nɛ̃ɛ. Ílaa nɛ̃ɛ̂i nûa wôlii yɛ̂ɛ da wúru-ya kpoo lá ƃò. M̀ɛnii ŋí ƃé ǹɛnî-kpela-ŋai dí íwɛlini la.

⁴Óo Gâloŋ, ńziɣe í lí a ńyãa a maa félaa. Lí a ńyãa ŋá kɛ́ ípɛrɛi mu. Kwa pâi kɛ̂i naa kú kɛ́ lii-nɛ̃̂ɛ kùla. Kwa pâi íwɛli kɛ́-maai ŋ̀aa nɛ̃̂ɛ kulâi é tɛ́ɛ ŋwã̂ai ma. Gáa a tɔ̃yâ mɛni a gɛɛ ǹɛnî-kpela-ŋai dí íwɛli.

⁵Óo Zerusâlɛŋ-nɛyaa, ńgɔlɔ tɛiîɛi, kɛ́lɛ ńɛ̂lɛi. Berei máŋ ńgɔlɔ tɛɣîɛi la yɛ̂ɛ Keda ŋɔƃûui lá-seɣe-ŋai, kɛ́lɛ ńɛ̂lɛi yɛ̂ɛ Saloma ŋɔpɛ́rɛi lá-seɣei.

⁶Káfe káŋɛi nàɣiŋ ḿɛi, ŋ́gɔlɔ tɛi mɛ̂ni ma. Vóloi ƃé ńgɔlɔ tɛ̂i. Ńzaaƃɔ̂lɔ-ni dí dílii ŋwàna ḿâ, dí gɛ́, ŋ́gɛ gbɔmɔ kpâlaŋ-ŋai mɛi kâa. Fé ŋɔ́nɔ pɔrîi ŋ́gbîŋ kpɔmɔ-kpalaŋ mɛ̂i kâai.

⁷Ŋáwɛli kɛ́-maa nuui, mí ƃé ya ítaa-tûlɛ-ŋai ŋáa kɔ̀ŋ naai, da ƃɛ́i da dífii tɔ̀ɔ naa a vólo tɛ́ɛ ŋuŋ mai? Fé ŋ̀wɛ̂lii ŋá ŋ́ɛi mɛi pɛ́lɛ, ŋ́gɛ íkɔ̀ri, ŋ́gɛ tɛ̀, ŋ́gɛ yèŋ, íƃarâa ƃala-mɛi káa-ƃelai sama.

⁸Yá nɛ̂ni lɛ́lɛɛ ŋánaai ŋí nɛyâa sámai, à kɛ̀ ífe ǹaa kɔ́lɔŋ, lɛɛ nɔ́ m̀ála-ŋai kpárɔ ma m̀ála mɛi-kaa-nuui ŋɔƃûui kɔlɛ ma. M̀oli-ŋai kɔ̃́nɔŋ kɛ̂i kɔ́ri, m̀ála-mɛi káa-ƃelai díƃûu-ŋai kɔlɛ ma.

⁹Ŋá wɛli kɛ́-maa nuui, ŋá íwɛli-ni a ŋ̀ánaa. Íkaa nɔ́ ŋ́ɛi yɛ̂ɛ ífe a gâloŋ ŋɔkɔ́-kɔ-keleŋ túɛ sooi dɔnɔ.

¹⁰Ŋ̀ôlii-sãa lɛ́lɛɛ-ŋai da íŋɛi lâai lɛ́lɛ, gwɛyɛ̂ŋ-ŋai lɛ́lɛɛ íkɔŋ ma.

¹¹Kwa pâi gôo wolii-kɔli kpɛtɛ̂i ímɛni ma, kú bɔ̃yɛ tóo a káne.

¹²Ŋáwuru-yai kúŋ è tɛ̀ gâloŋ ma tãi è kɛ̀ laâ-ni la ŋɔsee-sɛ̂ŋ ƃɔ̀ɔ-fuui ŋái.

¹³Ŋáwɛli kɛ́-maa nuui kɔlɔ-kûŋ káa nɔ́ ńzũai yɛ̂ɛ wúru-ya kúŋ nɛ̃ɛ a kɛ̀ lâani ŋíni loai.

¹⁴Ŋáwɛli kɛ́-maa nuui káa nɔ́ ŋ́ɛi yɛ̂ɛ Eŋgidi suai sû wuru-poa ŋai.

¹⁵Ŋá wɛli kɛ́-maa nuui, ílɛ̂lɛɛi kpɔ́ a ŋ̀ánaa. Óo, ílɛlɛ pere kɛ̂ɛi léŋ ŋíi! Íŋɛi-gao káa yɛ̂ɛ tòloŋ.

¹⁶Ŋáwɛlii, ílɛ̂lɛɛi a ŋ̀ánaa. Ímaa mɛ̂ni a ńii láa. Gala ŋûnu-ŋai ƃé pâi kɛ̂i a kúgbìŋ.

¹⁷Kúpɛrɛi yée mu-wuru-ŋai káa a sîda wuru-ŋa, bili-ɣelêi wuru-ŋai kɛ́ ƃò a sapɔrɔ wuru-ŋa.