Read Kpelle Wule-ŋa Kélee Mɛi Wûle 2 Bible Online

Wule-ŋa Kélee Mɛi Wûle 2 - Kpelle bible

Wule-ŋa Kélee Mɛi Wûle 2

¹Ńyãa ƃa Sarɔŋ yeei ma wuru-poai, ŋ́gɛ ƃò a dìŋ-tiŋ su wuru-poai

²Ŋáwɛli kɛ́-maa nuui káa nɔ́ m̀arâa nɛni-kpela-ŋa sáma yɛ̂ɛ ɣalêŋ-kpɔlɔ-ŋa su wuru-poa.

³Ŋáwɛli kɛ́-maa nuui káa nɔ́ m̀arâa nyàŋkpa-ŋai sáma yɛ̂ɛ âpɔ-wuru ƃé wolâ wuru-ŋa sáma. Ŋa ŋ̀wɛli ŋá sée ǹinîŋ mu. M̀á kɛ́-pere lɛ̂lɛɛi a ńîa.

⁴È pà a ńyãa kúu kɛ́tɛ su, ŋɔwɛli kɛ́-maai káa ḿɛi yɛ̂ɛ ƃenâa.

⁵È kpɔmɔ-ƃa kpala nɛ̃ɛ tɛ̀ɛ ḿbɔ é ŋ́gbonôi kpanaŋ, é âpɔ tɛ̀ɛ ḿbɔ ŋá tóo ŋ́gbonôi. Í wɛ̀li kɛ́-maa lîi a tɛɛ ńii pôlu. À kɛ̀ yà wàla íwɛli kɛ́-maai lɛ́ ḿâ, ŋà pâi kɔ̂lɛi.

⁶Gɔ́ɔ-yee káa ŋ́uŋ mu, ǹáa mii-yêe kpíniŋɔɔ a ńyãa.

⁷Zerusâlɛŋ nɛyaa, ka káfoo ńyêei. Kà káfoo a lóma da tôa láa a gɛɛ káfe pâi kúwôlii karâi tãi kwa kɛ̂ lâa-ni lai, é lɛ́ɛ la zu kú kúmu siɣe.

⁸Ŋá ŋáwɛli kɛ́-maa nuui wóo mɛ̀ni. Gáa kîrɛ siɣêi gɛ́ kùla ǹyée kɛ́tɛi tôŋ su, gɛ́ tɛ̂ɛ guro-téi tôŋ su, gɛ́ pà ḿbɔ yɛ̂ɛ lóma kpaa máŋ tôa.

⁹Gáa yɛ̂ɛ tôa, kpaa máŋ yɛ̂ɛ lóma sîrɛ. Ka gáa, gáa tɔɔ̂ni bɛ́rɛ-kaŋ kɔlɛ. A tɔɔ̂ni wônai lá, gɛ́ bɛ́rɛi mu kàa. Ŋ̀ɛ́i káa ƃɔ̂i wônai la-sãai su gɛ́ bɛ́rɛi mu kàa.

¹⁰Ŋá wɛli kɛ́-maa nuui è lòno ḿbɔ ǹyɛɛ, Ímu siɣe í pá ḿbɔ naa kú lí ŋáwɛli kɛ́-maa nuu lɛ́lɛɛi.

¹¹Zama yâi ŋɔtãi a kpɛɛ. Tuna fa ŋɔ́nɔ pù.

¹²Wúru-poa káa niî ɣele ma. Wule too tãi a seri. Tòloŋ-ŋa wóo a kɛ́ tɛ̂i ŋɔlɔii ma.

¹³Fîi wuru-ŋai da ƃâi yɛ̂ɛ berei da kâa gɛ̀ lai, gbɔmɔ-ŋai poa-ŋai kúŋ kɛ́ tɛ̀ yɛ̂ɛ wúru-ya kúŋ nɛ̃ɛ. Ímu siɣe ŋáwɛli kɛ́ maa-nuu lɛ́lɛɛi í pá kú lí.

¹⁴Ŋá wɛli kɛ́-maa nuui, íkaa yɛ̂ɛ tòloŋ nyii a ǹoo gɔni wôloi su ǹyéei pɛ̂rɛ mai. Tɔɔ ŋá íŋɛi káa. Wule tóo, ŋá íwoo mɛ́ni, kpɛ́ni fêi, íwoo nɛ̃ɛ̂i, íŋɛi lâai lɛ́lɛɛ.

¹⁵Gɛlɛ̂ŋ-ŋai sôŋ, da bɛ̀lɛɛ-pɛlɛɛi dífa la kúkpɔmɔ kpâlaŋ-ŋai ŋá kara la kpɛ́ni fêi bòa tãi a seri.

¹⁶Ŋá wɛli kɛ́-maa nuui káa a ḿbɔɔ, ńyaŋ ŋ́gɛ ƃò a bɔ́ɔ. A ŋɔtaa tûlɛ-ŋai ŋáa kɔ̀ŋ ŋ̀úru-pôa-ŋai sáma.

¹⁷Ŋáwɛli kɛ́-maa nuui, ɣele é lɛ́ɛ pâi ƃɔ̂i, kwaa é pono, íkpîŋ kɛ́ yɛ̂ɛ tôa kpaa máŋ lóma-sîrɛ ƃé mãla-mã̂lai yée pɛ̂rɛ ma.