Read Kpelle Azaya 1 Bible Online

Azaya 1 - Kpelle bible

Azaya 1

¹Ŋ̀orɛ̂-woo-ŋai gáa gɔlɔi ŋí sui, Ɣâla è dɛ̀ɛ Zuda da Zerusâlɛŋ-ƃelai pɔ́. È ŋ̀áa lɛ̀ Emɔ ǹóŋ Azaya ma zĩ̂a su. Ɣâla è ŋ̀orɛ̂-woo-ŋai ŋí tɛ̀ɛ ǹûai ŋí pɔ́naa a Gâloŋ Uzia, Zotaŋ, Eeɣa da Ɛsekaya-ni díkâloŋ-laai kɛ́ tãi ma a tɛɛ-ŋa.

²È mò ǹûai dîa a gɛɛ Ɣâla Yâwɛɛ ǹyɛɛi, “Ŋ̀elei da ǹɔii su-ƃelai kélee, ka káwoli tɔ́ɔ m̀ɛnii ma ŋa pâi m̀ôi. Ǹîa-pɛlɛɛi ŋá díkùla zui, da tɔ́ɔ ḿâ.

³Niŋa-ŋa dí dínuu-namu kɔ́lɔŋ. Wɛlɛ-sôo-ŋa dí ƃɛ́i kɔ́lɔŋ dínuu-nâmu a díkɔ̃nɔŋ pù naai. Kɛ́lɛ dáre sii ŋí fé ŋánûai Eezuɛ-ŋai ŋuŋ su. Dífa mɛni ŋá kàa a dɔnɔ kpîŋ.”

⁴Káai a Eezuɛ-ƃelai, kpalo-ƃêlaai kâa. Kákaa a sɔnyɔ̂ŋ-ƃela. Kákaa a wôya-ƃela da ŋwana lɔ̂ɔ-ƃela lônii. Kásɔnyɔ̂ŋ a ká ɣíri. Ka káyee kúla Eezuɛ Ŋɔɣâla Maa Waai Yâwɛɛ mu, ka kápôlu tɔɔ m̀a.

⁵Óo ŋánûa, zɔnyɔ̂ŋ kula maa kɛ́ɛ ka zɔlɔ ƃôi, vé gula kɛ̂ɛ ƃó ní kámɛni ma? Lé mɛni ƃé ka tɔɔ̂i la m̀ai? Ka ŋ̀wɛ̂lii é ká kula maa kɛ́ a ŋ̀ánaa é tɛ́ɛ nyíti ma? Kɔlɔ a kpɛɛ kâa ka fûa.

⁶Kákɔlɔi fé pono ní. Kákpono gwaa kélee ma ɣala-ɣalâŋ ƃôɔɔi. Dífe nîi kápalai ŋá waa-ni dísale pú ŋá, dí ŋ̀á pɛ́lɛ.

⁷Ŋɔ̃ya-ŋa da kálɔii su-kara, da kátaa lêe-ŋai kélee kéreŋ. Dí m̀ɛni-ŋai ŋí kélee kɛ̀ káŋɛi, kálɔii é lɛ́ɛ a bûŋ.

⁸Zerusâlɛŋ taa-leei nɔ́ ƃé lɛ̀ɛ. Kɛ́lɛ maa mɛ̂ni káa yɛ̂ɛ boo-kpânaŋ da sûa su yeŋkeŋ. Gáa nɔ́ yɛ̂ɛ taa-lêe nyii kɔ-kuluƃa-ŋa da ǹaa pere-lee-ŋai kélee sóŋ.

⁹Ŋ̀wála-wâla kélee Ɣalai Yâwɛɛ è ǹúui da-ŋa ŋuŋ ma ƃò naa. Eêi wàla kɛ́ tí, dîi Zerusâlɛŋ taa-leei su kàra nɔ́ yɛ̂ɛ berei dí gɛ̀ la a Sodɔŋ da Gomora taa-lee-ŋai su-ƃelai.

¹⁰Káai a Zerusâlɛŋ taa-leei su-ƃelai, ka kálaa túɛ-ƃelai kákaa nɔ́ yɛ̂ɛ Sodɔŋ da Gomɔra-ƃelai. M̀ɛni ma, ka káwoli tɔ́ɔ Yâwɛɛ wóoi ŋí ma. Ka káwoli tɔɔ Kúɣâlai ŋɔsɛŋ lɛ́ɛi ma.

¹¹A m̀ôi ǹyɛɛi, “Zâla támaai ka gulâi ḿâi, vé a sɛŋ dɔnɔ kpîŋ ŋ́ɛi. Káƃala-sîrɛ da niŋa sîrɛ sala támaai mɛni ƃɛlɛ fé ŋ́goi. Fé wɛ́li ní a niŋa sîrɛ, ƃála sîrɛ da ƃoli sîrɛ ŋãa mɛni.

¹²Gbɛ̂ɛ ƃé m̀o kâa a gɛɛ kà kɛ̀ pâi ḿvɛlîi ká pá a zama-sãai ŋíi? Gbɛ̂ɛ ƃé mò kâa a gɛɛ ká kɔ́ɔ mu tìŋ é kúla a gɛɛ ŋí Ŋápɛrɛ Kɛ́tɛi mu a gɛɛ ŋii?

¹³Ƃâa fé kásama-sãai dîa. Kákereŋ sãa kú nɛ̃ɛi kúŋ ƃɛlɛ fé ŋ́goi. Ka ŋ̀áloŋ nina kuui kûla, ká kɛ́ vii-tɔɔ ɣelei mɛi kâa, ká kɛ́ káɣâla mɛni kɛ́ kpɔŋ-ŋai tôo. Kɛ́lɛ kásɔnyɔ̂ŋ a gɛ̀ ƃâa fé ŋɔ́nɔ gúu-ŋai ŋí kélee dîa.

¹⁴Ka kɛ̀ ŋ̀áloŋ nina kuui kulâi, ká kɛ́ ŋ̀ele maa waa-ŋai mɛi kâa, ńii a kɛ̂ sôlii ŋ́goi. Díkaa a kpîri wuyɛɛ ḿaa mɛ̂ni ma. Ḿvii a nâa kpɛɛ ziɣe mɛ̂ni ma.

¹⁵“A nɛ̃ɛ ma kpîŋ ká kɛ́ ḿvɛ̀li, kákɛ káyee tɛ̀ ɣelêi, ŋa pâi ŋɛ́i loôi kâa, kpɛ́ni fêi, ŋãa támaa káa káyee ma.

¹⁶Ka kpera mɛni nyɔ́mɔɔ kɛ́ɛ ma, ká ǹanii wáa kâa. Tɔ̃yâ ma ka kpera mɛni nyɔ́mɔɔ kɛ́ɛ ma.

¹⁷Ka mɛni lɛ́lɛɛ-ŋa kɛ́-pere maa kɔ́ri. Ka gáa a gɛɛ núu kélee ŋɔtɔ̃yâ-laai é lí bɔ́. Káfe fàa ma dí núu da kula maa kɛ́ mɛni da ma nyii zɔŋ fé zui. Ka dee-noŋ-ŋai maa kɔ̃ɔ, ká lóno bɔɔ-nɛyãai mɛni ma.”

¹⁸Yâwɛɛ a m̀ôi ǹyɛɛi, “Ka pá kwaa kúloai kpɛtɛ kwa káa ni. Berei máŋ kásɔnyɔ̂ŋ a kpɔ̂lui la yɛ̂ɛ dóloi, ŋa pâi káwâai ká kɛ́ kóle yɛ̂ɛ yee fũa. Berei máŋ kásɔnyɔ̂ŋ a kpɔ̂lu la yɛ̂ɛ lólo-mãlaŋ, ŋa pâi káwaâi ká kɛ́ yɛ̂ɛ ƃála leɣa kole.

¹⁹À kɛ̀ kà fàa mà, woo mɛni kɛ́ ƃò káyêei, ka pâi ǹɔii ŋí ŋ̀úlɔ kpelêi.

²⁰Kɛ́lɛ kà wàla fáa ma, kà tɔɔ ḿâ, ka pâi saa tí-ti ƃôi. Ńyãa Yâwɛɛ ƃé mò tí.”

²¹Zerusâlɛŋ taa-leei, tãi tɔnɔ da, í kɛ̀ yɛ̂ɛ ǹɛnîi ńyii a bɔ̂ŋ wóo mɛnii. Tãi tɔnɔ da ínûai kélee dí kɛ̀ a teniŋ ƃô-ƃela. Kɛ́lɛ yâ nâa kɛ́ yɛ̂ɛ wulu-wulu kɛ́-nɛni. Ínûai kélee da kɛ́ a núu paa-ƃela.

²²Zerusâlɛŋ, ímaa mɛni è kɛ̀ a gbanaŋɔɔ yɛ̂ɛ káne, kɛ́lɛ ƃâa fé ŋɔ́nɔ yâ. Íkɛ̀ yɛ̂ɛ ŋwã̂ai nɛ̃ɛ, kɛ́lɛ yâ kɛ́ nɔ́ zɔ̀ti-zɔti.

²³Í lɔii mɛi-ƃelai da tɔɔ Yâwɛɛ ma. Díwɛli kɛ́-maa ƃelai díkaa a ŋúma-ƃela tee-tee. Yee pɛlɛ ǹá-sɛŋ mɛni wɛ́li káa dîa a ŋ̀ánaa. Dífe kpáaŋ ní bɔɔ-nɛyãai da dee-noŋ-ŋai mɛ̂ni ma. Dífa bɔɔ-nɛyâai dímɛni-saai ƃô a tɔ̃yâ-pere.

²⁴M̀ɛni ma, Ŋ̀wála-wâla kélee Yâwɛɛi, Eezuɛ Ŋɔɣâla wála-walaai a m̀ôi ǹyɛɛi, “Káai a ŋ́gbɔara-ƃelai, ŋa pâi kákula maa kɛ̂i. À kɛ̀ tí, káfe ŋɔ́nɔ pâi tɔ̂ɔi ḿâ.

²⁵Ŋa pâi kákula maa kɛ̂i. Ŋá káseɣenîi yɛ̂ɛ da kɔli sêɣeŋ a gɛ́ɛ dí gbó kúla ma.

²⁶À kɛ̀ tí, ŋa pâi gɛ̂i ímɛni-saa ƃó-ƃelai díkɛ a nûa sãa-ŋa yɛ̂ɛ berei dí kɛ̀ la a bɔlɔɔi, ŋá dílîa-woo ƃo kɛ́-ƃelai kɛ́ yɛ̂ɛ berei díkɛ̀ la a gɔ́ɔ pîlanii. Nyíŋi pôlu ma, nûa da pâi ítôlii a daa-lêei nyíi zu-ƃela díkaa a teniŋ ƃô da tɔ̃yâ-ƃela.”

²⁷Yâwɛɛ teniŋ ƃôɔɔi, m̀ɛni ma a pâi Zerusâlɛŋ ƃâloi é pɛ́lɛ diai pâi dílii penêi dîa.

²⁸Kɛ́lɛ a pâi zɔnyɔ̂ŋ-ƃelai su-karâi da diai da tɔ̂ɔ m̀ai. Diai kélee da díyee kùla m̀ui, a pâi dípaâi.

²⁹Ŋumɛ a pâi ká paâi, kpɛ́ni fêi, ka ôo wuru-ŋa sì ká díkɛ a káɣâla-ŋa kákɛ dífɛli. Kákɛ̀ gâai yɛ̂ɛ ka kwaa ma kpɛ̀tɛ ká nàa tɛɛ zí-sɛŋ lɛ́lɛ ɣâlai pɔ́, gɛ̀ ní a pâi lûwa lâai kási-sãai dîa, kɛ́lɛ ŋumɛ a pâi kákɛ̂i gwaa-ŋai ŋí ma mɛni ma.

³⁰Ka pâi fɔ̃̀yâi yɛ̂ɛ ôo wuru a kɛ̀ pâi saâi, kpaa máŋ yɛ̂ɛ sí-sãa nyíi núu da fa yá pú dîai.

³¹Ŋ̀wála-wâla nuui da ŋɔtûa-pere nyɔ̂ŋ dísu a pâi karâi yɛ̂ɛ ŋɔŋ a kala-kpâla kèleŋ. Núu da fé pâi pɔrîi díkula yêei kɛ̂i.