Read Kpelle Azaya 13 Bible Online

Azaya 13 - Kpelle bible

Azaya 13

¹Ŋ̀orɛ̂-wooi ká ŋí Ɣâla è dɛ̀ɛ a Emɔ ǹóŋ Azaya Babelɔŋ mɛni mai.

²Ƃenâ tɛ́ ɣelêi ǹyéei tôŋ su nyii kala fa kpɛ̂tɛ mai a ŋɛi-kɛ-maa gɔ́ kɔ́-ƃelai mɛ̂ni ma! M̀ó dîa ɣelêi pere a gɛɛ dí ǹyoŋka taa-leei ŋɔsiɣãŋ-ŋai lá sóŋ.

³Yâwɛɛ ǹyaa kpîŋ ŋɔnúu maa waa-ŋai tɛ́ɛ a gɛɛ dí kɔ́ diai pɔ́ ǹíi-ŋwânai dîa díyoŋka tua-ŋai mɛ̂ni ma.

⁴Íwoli tɔ́ɔ ǹyêe-ŋaii su tiŋ ma. Lɔii ŋuŋ támaa da kâloŋ-laa lɔii-kpiniŋ támaa díkaa dí ŋáa tɛ̂i gîe ma. Ŋ̀wála-wâla kélee Yâwɛɛ a dípûi díkîe ma kɔ́-kɔ mɛni ma.

⁵Da kulâi lɔii ŋuŋ su kôyaa-ŋa su. Yâwɛɛ líi ŋwânai ŋ̀éniɛi su-ƃelai kélee dîa. A pâi naa gwaa kélee su-karâi.

⁶Malôŋ é tóo kâa, kpɛ́ni fêi, Ŋ̀wála-wâla kélee Yâwɛɛ ŋɔmɛni kula-maai ŋ̀ele a kɛ́ lɛɣɛ̂i.

⁷M̀ɛni ma, núu-kpune kélee kɔlɔ a pâi kpɛɛ̂i dîa, dílii é tóo pôlu a ŋ̀ánaa.

⁸Yao ŋánaa a pâi pâi díkɔlɔi. Dimɛni sôlii a pâi kɛ̂i yɛ̂ɛ nɛnî a kɛ̀ koi-têe su maa mɛni solii. Da pâi kɛ̂i díkîe-ni ŋɛ́i kâai a yao pere, díŋɛi kɛ́ kɛ̀ mãla-mãla yɛ̂ɛ ŋɔŋ-sôŋ.

⁹Yâwɛɛ ŋɔmɛni ŋá-tee ɣelei a pâi. Gáa a mɛni kpɔ̂lu su-kɛ́tɛ ɣele. A pâi m̀ɛni nyɔ́mɔɔ kɛ́-ƃelai su-karâi ǹɔii ma. A pâi gɛ̂i ǹɔii ma é lɛ́ɛ a fɛ̃ɛ-kpâlaŋ.

¹⁰Bɛmɛlɛŋ-kao kpaya-kpayaai da bɛlɛɛ-pɛlɛɛi da fé pâi fôloi ǹɔii ma. Vóloi da ŋ̀áloŋ dífe pâi ŋɔ́nɔ kwaa ponoɔɔ tɛɛ̂i ǹɔii pɔ́.

¹¹Yâwɛɛ è m̀o ǹyɛɛi, “Ŋa pâi mɛni kpɔ̂lu lâai ǹɔii ma ŋá zu-ƃela kélee kula-maa kɛ́ díŋwana-lɔ̂ɔ tua-ŋai mɛni ma. Diai díŋɛi tɛɛ̂i, ŋa pâi dí maa yenîi. Diai díŋwana-lɔ̂ɔi, díŋɛi tɛ́ɛi, ŋa pâi dí kula maa kɛ̂i.

¹²Diai pâi lɛɛ̂i ɣele mai díkaa la a pâi kɛ̂i a ŋ̀wálaa é tɛ́ɛ gôo m̀a. Ŋa pâi gɛ̂i díkaa la é kɛ́ a ŋ̀wálaa é tɛ́ɛ Ɔfɛ gooi ma.

¹³Ŋa pâi gɛ̂i ŋ̀ele-kɔlɔŋ é kpɛ̃lîŋ, ǹɔii é túmo-tûmo yɛ̂ɛ ǹyaa ƃe à kɛ̀ pâi wôloi zu a ŋ̀elei nyíi ńyãa Ŋ̀wála-wâla kélee Yâwɛɛi ŋa pâi ńii ŋwânai la a zu kɛ́tɛi.

¹⁴“Ŋ̀ɔ̃ya-ŋai kélee díkaa Babelɔŋ, ŋa pâi gɛ̂i dí kúla naa dí lí dípɔ-taai. Da pâi kɛ̂i kulâi naa yɛ̂ɛ sua-ŋa ƃé pûi gbâna pili-nuu m̀a, kpaa máŋ yɛ̂ɛ ƃála-ŋa ƃé dímɛi káa-nuu fé ma kɔ́li a too dísama.

¹⁵Ǹúui kélee da pâi zônii, da pâi baâi a ƃóa-sɔ̂kpɔ.

¹⁶Da pâi dílônii paâi, dí dísu tée-têe a gbua-kpûaa díŋɛi. Da pâi dípɛrɛ-ŋai mu sãa kulâi naa, dí nyíi a dínɛyâai a kpala ǹá-pere.”

¹⁷Yâwɛɛ è mò ǹyɛɛi, “Ŋa pâi gɛ̂i Midia-ŋai dí kɔ́ pɛ́lɛ Babelɔŋ-ƃelai dîa. Midia-ŋai dífe kpáaŋ ní gôo mɛni ma, káne mɛni ƃɛlɛ fé tela díkoi.

¹⁸Da pâi ǹyáŋkpa-ŋai paâi a tɔ̃a-ŋa. Dífe pâi lôloŋ da ŋɛ́i malôŋ kâai. Da pâi díkelee dípaâi.

¹⁹Babelɔŋ ƃé gáa a daa-lêe su lɛ́lɛɛi gâloŋ-laa taa-lee-ŋai sáma nyii ǹaa-ƃela da maa yôŋka tèei. Kɛ́lɛ ŋa pâi ǹaa su karâi yɛ̂ɛ berei ŋá gɛ̀ la a Sodɔŋ da Gomora taa-lee-ŋai.

²⁰Ǹaa fé pâi ŋɔ́nɔ kɛ̂i a núu da kɛ̂i. Ǹaa fé ŋɔ́nɔ pâi kɛ̂i a ǹɛ́lɛɛ sia-ƃela tɛɛ̂i mɛni ma. Taa-tûlɛ tɔɔ-ƃela da fa ŋɔ́nɔ lì naa a ŋɔtaa-tûlɛ-ŋai dílaa mii mɛ̂ni ma.

²¹Kɛ́lɛ ǹaa a pâi kɛ̂i a fɛnɛ-sãa kɛ̂i. Dua-too ŋɔ̂ni-ŋa da mûu-ŋa da pâi kɛ̂i naa. Fúlu-sãa sɔŋ nyɔ́mɔɔ-ŋa da pâi kɛ̂i naa máŋ.

²²Kɔ́li-ŋa da lɔɔ-ɣîla-ŋa da pâi kɛ̂i naa. Da pâi kɛ̂i lâɣii ǹyeŋ-kêŋ-ŋai ŋá da gâloŋ-pɛrɛ-ŋai mu. Babelɔŋ ŋɔmɛni kpɔ̂lu ɣelei a seri. Gáa nâa ƃɛ́.”