Read Kpelle Azaya 14 Bible Online

Azaya 14 - Kpelle bible

Azaya 14

¹Yâwɛɛ a pâi ŋɔnûai Eezuɛ-ŋai ŋɛ́i-malôŋ kâai ŋɔ́nɔ é pá a dia pôlu díkpɔɔi lɔii su. Ǹɔii-ŋuŋ da kpɛ́ni-ŋa su-ƃelai da pâi pâi da dîa-ni dí ƃò naa.

²Lɔii-ŋuŋ támaa su-ƃela da pâi kpɔŋ mâa tɛɛ̂i Eezuɛ-ŋai pɔ́ a gɛɛ dí pá pôlu díkaa lɔii su nyii Yâwɛɛ è dɛ̀ɛ dípɔi. Diai wɔ́lɔ Eezuɛ-ŋai sôŋ a luɛ-ŋai, Eezuɛ-ŋai dia máŋ da pâi dílônii sonîi a luɛ-ŋa.

³Yâwɛɛ a pâi ŋɔnûai kulâi m̀ɛni-kpɔ̂lui su díkɛ̀ zui, é gbîri wuyɛɛ-ŋai kúla díŋûa, é díkula díi kpânaŋ-ŋa kɛ́ɛi su nyii nûa dí gɛ̀ díkɛ gɛ̀i.

⁴À gɛ̀ tí, gɛ̀ ní, da pâi ɣɛ́lɛ-maa kulâi Babelɔŋ kaloŋ kponôi dîɛ m̀ai: “Gâloŋ sɔŋ nyɔ́mɔɔi a too! Vé pâi ŋɔ́nɔ mɛni nyɔ́mɔɔ da kélee kɛ̂i a núu da.

⁵Yâwɛɛ a zɔnyɔ̂ŋ kaloŋ-ŋai díwála-walai kúla díyêei, a díkâloŋ wuru-ŋai su ɣále.

⁶Zɔnyɔ̂ŋ kaloŋ ŋí è ǹûai sòŋ a ŋwana lɔ̂ɔ-pere, gɛ́ mɛni nyɔ́mɔɔ sii támaa kɛ̀ a ǹɔii-ŋûŋ-ŋai su-ƃela nyii-ŋai è díyee mɛi ɣâlei.

⁷Ǹûai díkaa nâa lii-see su. Díkelee da lii-nɛ̃ɛ wule-ŋa toôi díkɛ m̀ãla.

⁸Sapurɔ wuru-ŋai da sîda wuru-ŋai Lɛƃanɔŋ dia máŋ da lii-nɛ̃ɛ kulâi. Da m̀ôi a gɛɛ Babelɔŋ gâloŋ sɔŋ nyɔ́mɔɔi a lí, vé ŋɔ́nɔ naa. Va ŋɔ́nɔ dítà pɔ̀ŋ!

⁹“Zaa-ƃela pɔlɔ-ŋai ŋɛ́i káa berêi a gɛɛ dí yee-see mu kɛ́ la. Ŋ̀wála-wâla kaloŋ-ŋai da wɔ́lɔ saai, dímɔlêŋ-ŋai da dímu-siɣe díkâloŋ see-sãai ŋá díkɛ lii-nɛ̃ɛ kùla m̀ɛni ma.

¹⁰Da m̀ôi m̀a dîyɛɛi, ‘Íkaa nɔ́ yɛ̂ɛ kúa! Íwala-walai su fé ŋɔ́nɔ kpanaŋ ní!

¹¹Nûa da kâa ƃaa-kɛ-maa támaa tɛ̀ɛ ípɔ. Da kâa kɛ̀ kɔnîŋ ɣalêi yâ, díkɛ wule tôo. Gáa nâa ya kɛ́ ƃɛ́i ma kwa naai. Kpêle-ŋa da kɛ́ a ígbìŋ kala da ímɛi-pɛlɛ sêɣe-ŋa.’

¹²“Óo Babelɔŋ kaloŋ. Yá ƃé wɔ́lɔ kɛ̀ a bɛmɛlɛŋ-kao fóloɔɔ tɔnɔ kpéŋ Babelɔŋ lɔii mɛi. Í lɔii ŋuŋ-ŋa támaa pù íkɔɔ mu. Berei káa yaâ too lai.

¹³Í m̀o ílii su yɛ̂ɛi, ‘Ŋa pâi tɛ̂i ŋ̀ele-kɔ̂lɔŋ su Ɣâla ŋɔpɛmɛlɛŋ-kao-ŋai mɛi pere ŋá ŋákâloŋ-laa see-sɛŋ pîlaŋ naa. Ńyãa ƃé pâi kɛ̂i ŋ̀âla-ŋai kélee díkpɔŋ gîe mai láa túɛ.

¹⁴Ŋa pâi tɛ̂i ŋ̀ele-kɔ̂lɔŋ-ŋai kélee mɛi pere póŋ-poŋ. Ŋa pâi ŋ́gbîŋ kɛ̂i yɛ̂ɛ Ŋ̀âlai Gɛ́tɛi.’

¹⁵Kɛ́lɛ, gáa ya nâa kɛ́ saa-taa ǹɔii mu pere póŋ-poŋ.

¹⁶“Zaa-ƃela da pâi íkâai sĩ́i, díkɛ díkili ŋá sìa é pîlaŋ yâ dîyɛɛi, ‘Ǹalôŋ wɔ́lɔ ǹɔii kpɛ̃liŋ é kâloŋ-laa-ŋa pene é bɛlɛi, ǹyaa ƃei?

¹⁷Ǹalôŋ wɔ́lɔ daa-lêe-ŋai su-kara é ǹaa kɛ́ a fɛ̃ɛ kpâlaŋ ŋái ƃéi? Ǹalôŋ ƃéi ŋí nyii va kâa ŋɔkpini-pɛrɛ mu-ƃelai da ŋuŋ ma ƃò, kpaa máŋ é ǹɛɛ naa dí líi?’

¹⁸“Gâloŋ-ŋai da wɔ́lɔ saai, da lâani díƃolôŋ lɛ́lɛɛ-lɛlɛɛ-ŋai su.

¹⁹Kɛ́lɛ íƃolôŋ fé ma. Ípoma lâai banaŋ ma gɛ́ lula. Gáa kɔ́ kɔ́-ƃela poma-ŋa sáma nyíi-ŋai dí dípàa kɔ́ su nûa díkɛ ƃɔ̀rɔŋ dîai. Da pâi dípilîi kɔni-wôlo kpóŋ kôya-ŋa su.

²⁰Núu da fé pâi íloôi, kpɛ́ni fêi, í ínûai pàa í ílɔii su-kara. Íkaa-laai su-ƃela sɔŋ nyɔ́mɔɔ-ŋai da fé pâi lɛɛ̂i ɣéniɛ.

²¹Núu paa-ƃela da díkpîŋ kpɛtɛ ísuui su-ƃelai paa mɛ̂ni ma. Da pâi ílônii paâi ísɔnyɔ̂ŋ da zɔnyɔ̂ŋ ínûa pɔlɔ-ŋai dí gɛ̀i mɛ̂ni. Dítà fé pâi lɛɛ̂i ɣele ma a gɛɛ é tínaa kɛ́ lɔii-ŋuŋ da mɛi kpaa máŋ é taa-lêe da tɔɔ.”

²²Ŋ̀wála-wâla kélee Yâwɛɛ a m̀ôi ǹyɛɛi, “Ŋa pâi ŋɔ́nɔ Babelɔŋ su-karâi. Fé pâi sɛŋ da kélee lɛɛ̂i naa a dɔnɔ kpîŋ, nîa-pɛlɛɛ, kpaa máŋ fúlu-sɛŋ da kélee. Fé pâi da ŋɛ́i malôŋ kâai.

²³Ŋa pâi naa kɛ̂i a téli-ŋa kɛ̂i. Ŋa pâi naa kɛ̂i tɛ́-tɛ yɛ̂ɛ núu a kwaa ma kɔ̀ɔ a tɛ̃lɛŋ, ŋá póa-ŋa tée naa. Ńyãa Yâwɛɛ ƃé mò tí.”

²⁴Ŋ̀wála-wâla kélee Ɣalai Yâwɛɛ a vóo ǹyɛɛi, “M̀ɛni-ŋai kélee ŋá gbɛ̀tɛ a gɛɛ ŋá díkɛi, ŋa pâi díkɛ̂i. Da fé pâi lɛɛ̂i pôlu, kpɛ́ni fêi, ŋa díkɛ̂i sâpo ma, ǹyaŋ ŋa pâi gɛ́ tí-ti ƃôi.

²⁵Ŋa pâi Asiria-ŋai su-karâi ŋálɔii Eezuɛ ma. Ŋa pâi dítaŋ-tâni a ŋ́gɔɔ ŋáyee-ŋai su. Ŋa pâi ŋánûai ŋuŋ ma ƃôi díyêei, ŋá díkula m̀ɛni kpɔ̂lu-ŋai su da wɔ́lɔ tɛɛ̂i zu díyee mui.

²⁶Ŋámɛni kpɛtɛɛi ká ŋí ŋ̀éniɛi mɛni ma. Ŋa pâi ǹɔii ŋuŋ-ŋai kélee su-ƃelai kula maa kɛ̂i.”

²⁷M̀ɛni kpɛtɛɛi ŋí ƃé Ŋ̀wála-wâla kélee Yâwɛɛi a gɛ́. Gbɛ̂ɛ ƃa pɔ̂ri m̀aa fálenîi. A núu-kpune kula maa kɛ̂. Sɛŋ da fa pɔ̂ri gɛ̂i é ǹíi maa fáleŋ.

²⁸Gâloŋ Eeɣa saa kôraŋ su ƃé ŋá ŋ̀orɛ̂-wooi ŋí mɛni la.

²⁹Felesia-ŋa, káfe lii-nɛ̃ɛ kùla niî a gɛɛ kákpɔara-ƃelai ŋuŋ lá a pili. Kali nyɔ́mɔɔ à sàa, zu-kulâi fa kali kélee a kpɛɛ ɣele ma. Ŋ̀áloŋ da a pɔ̂ri lɛɛ̂i naa. Ŋ̀áloŋ ŋí a pɔ̂ri pôrɛi. A pòrɛ, a kɛ̀tɛ, a pɔ̂ri kɛ̂i yɛ̂ɛ yûoi zere kali.

³⁰Yâwɛɛ a pâi kɛ̂i ŋɔnûai nyii-ŋai díkaa a kôlo-ƃelai mɛi kâai díŋuŋ ma ƃóɔɔ, díkɛ díkɛ ɣéniɛi kɛ̀ lii-sêe su. Kɛ́lɛ a pâi gɛ̂i puru ŋánaa é káai a Felesia-ŋai ká páa. Kátà fé pâi lɛɛ̂i ɣele ma.

³¹Felesia taa-lee-ŋai kélee su-ƃela, ka yao, ká gbêɣei too, kpɛ́ni fêi, Yâwɛɛ a pá mɛni kpɔ̂lu lâai kâa. M̀ɛni kpɔ̂lui ŋí a pâi kulâi ǹɔii ŋûa-pere. Gɔ-kûluƃa-ŋai pâi, díkaa a kɔ́ kɔ́-ƃela pɔlɔ-ŋa.

³²Gela-ŋai da kûla Felesîai, kwa pɔ̂ri díwoo too pere kɛ̂i léŋ? Kwa pâi m̀ôi dîa a gɛɛ Yâwɛɛ aâ Zãiyɔŋ siɣe zu a ǹaa kpɛtɛ ŋɔnûai mɛni ma nyii-ŋai da mɔ̃lɛi. Ǹaa ƃé da pâi kɛ̂i naa lii-sêe su.