Read Kpelle Azaya 15 Bible Online

Azaya 15 - Kpelle bible

Azaya 15

¹Ŋ̀orɛ̂-wooi ŋí pîlaŋɔɔi Môa ma. Âa taa-leei da Kîɛ taa-leei su-karaa a kpíni tɔnɔ Môa lɔii su mɛni a gɛ́ Môa lɔii a see tɔŋ.

²Dibɔŋ-ƃelai da tɛ́ ǹyéei tôŋ su a gɛɛ dí gbêɣei tóo. Môa-ƃelai da díŋuŋ kálaŋ ma da díla-leɣa pú, díkɛ gbeɣêi tòo Nebo da Medeba mɛni ma.

³Ǹûai bere lêe-ŋai mai, da dímaa ɣíri a maloŋ too-maa seɣe-ŋa. Ǹûai daai sâmai da nyii-ŋai bɛ́rɛ-ŋai tôŋ sui díkaa maloŋ too-maa see ƃôi dí kɛ́ wɔ̀lɔ.

⁴Ɛsibɔŋ da Ele-ale-ƃelai da wɔ̂lɔi ɣelêi pere. Da wɔ̂lɔi Zaɣa lɔii su kôyaai su-ƃelai díkɛ díwoo mɛni. Gɔ́ kɔ́-ƃelai dia máŋ da wɔ̂lɔi a díwoo su kɛ́tɛ. Pɔri maa da kélee fé ŋɔ́nɔ díyêei.

⁵Ŋa wɔ̂lɔi a zu-kɛ́tɛ Môa mɛni ma! Ŋɔnûai dí pù dí lí Zôa. Dí pù dí táa-tâa. Da-ŋa dí lì Egila Selisiya pere, da-ŋa dí lí Lui díkɛ wɔ̀lɔ díkɛ lì. Da-ŋa dí pù dí lí Oronaiŋ perei ma díkɛ maloŋ wɔ̀lɔ kɛ̀ a zu-kɛ́tɛ dísu-kara mɛni ma.

⁶Niriŋ ya ɣɛli-pɛlɛ-pɛlɛɛi dí kpàla, gala-ŋai kélee dí fɔ̃ya. Kala ŋûnu da fé lɛ̀ɛ ní naa.

⁷Zãâi ǹûai dí gɔ̀ri ǹɔii ŋí mai dí gélee sìɣe dí pù a dîa dí lí dí tɛ́ɛ Wilo Yeei loai.

⁸Ǹûai díkɛ̀ wɔ̂lɔi Môa lɔii gwaa kélee Ilagilaiŋ da Bɛɛriliŋ taa-lee-ŋai su-ƃelai díkɛ̀ ŋ̀ɔlɔ-woo-ŋai ŋí mɛnîi.

⁹Dibɔŋ taa-leei ma ya ɣɛli-pɛlɛ-pɛlɛɛi kélee dí pène a ŋãa tee-tee. É kúla nyíŋi pôlu, Ɣâla è mɛni kula maa kpânaŋ da kpɛ́ni támaa-ŋa kpɛ̀tɛ Môa-ƃelai ŋí mɛni ma. Tɔ̃yâ ma, è gbɛ̀tɛ a gɛɛ diai kélee pù dí kúla Môa lɔii sui, é dí páa.