Read Kpelle Azaya 17 Bible Online

Azaya 17 - Kpelle bible

Azaya 17

¹Yâwɛɛ è m̀o ǹyɛɛi, “Fé pâi fâai ma a gɛɛ Dɛmɛika é kɛ́ a taa-lee. Ŋa pâi naa su-karâi.

²Fé pâi ǹɛɛ̂i naa Asiria taa-lee-ŋai da é lɛ́ɛ zu. Ŋa pâi naa kélee su-karâi. Naa a pâi lɛɛ̂i nɔ́ a taa-tulɛ-ŋa kɛ̂i. Núu da fé pâi wɔ́lɔ pɔrîi dímaa yaôi dí kúla naa.

³Ŋa pâi Eezuɛ maa kɔ̃ɔ-sãai kélee wôloi berêi. Dɛmɛika a pâi lɛɛ̂i luɛ-laai. Diai pù dí kúla Siria kɔi sui ŋa pâi ƃâa kulâi dîa yɛ̂ɛ berei ŋá gɛ̀ la a Eezuɛ-ŋai. Ńyãa, Ŋ̀wála-wâla kélee Yâwɛɛ ƃé m̀o tí.”

⁴Yâwɛɛ è m̀o ǹyɛɛi, “Tãi a pâi, ŋa pâi Eezuɛ ŋɔtɔɔ-sãai kélee kúlâi ǹyêei. Ŋa pâi naa-ƃelai dítɔɔ-laai penêi a kôlo-laa.

⁵Naa a pâi lɛɛ̂i yɛ̂ɛ kpâlaŋ ƃé da kpɛ̀ɛ a ŋ̀á mɔlɔŋ téɛɛ dí gbaŋ su kɔ́ri. Naa a pâi lɛɛ̂i fóŋ-kpoŋ yɛ̂ɛ da kpɛ̀ɛ a Lefaiŋ Yee loai si-sãa ƃa kulâi da gbaŋ su kɔ́ri.

⁶Núu kpulu-loŋ nɔ́ ƃé pâi lɛɛ̂i Eezuɛ. Naa a pâi lɛɛ̂i nɔ́ yɛ̂ɛ da ɔle kùla ɔle-wuru-ŋa m̀á tɛi-tɛi a lɛ̀ɛ nɔ́ dôŋ su. Ńyãa Yâwɛɛ, Eezuɛ Ŋɔɣâlai ƃé m̀o tí.”

⁷Maa ɣelei tí, núu kélee da pâi Díkpɛtɛ-nuui kɔ̂lɔni, díŋɛi kɛ́ ƃò nɔ́ Eezuɛ Ŋɔɣâla Maa Waa Tɔnɔi ma.

⁸Gili-kɛ-zui díyêei díɣâla teƃele-ŋai mɛni mai da fé ŋɔ́nɔ pâi lɛɛ̂i díyêei. Laa-la fé pâi ŋɔ́nɔ kɛ̂i díyêei díkpîŋ kpɛtɛ ɣâla-ŋai mɛni ma. Ƃɛ́i-ŋai da díɣâlai Asira pɔɔkɔ̂ŋ kpaa máŋ ƃɛ́i-ŋai da díkereŋ sãa kuŋ nɛ̃ɛ ŋa kèreŋ naai da ƃɛlɛ fé ŋɔ́nɔ pâi lɛɛ̂i díkoi.

⁹Maa ɣelei tí, núu da fé pâi lɛɛ̂i Eezuɛ taa-lee-ŋai su nyíi-ŋai dímaa kóliɛɛi a siɣãŋ kpanaŋ-ŋai. Naa a pâi lɛɛ̂i a pîleŋ ŋa yɛ̂ɛ Iva-ŋai da Amora-ŋai dítaa-lee-ŋai su. Iva-ŋai da Amora-ŋai dí pù Eezuɛ-ŋai dîa dí kúla daa-lee-ŋai ŋí su.

¹⁰Eezuɛ-ƃela, kâa ŋɔ́nɔ nia Káɣâlai ma nyíi káŋuŋ-mâ ƃò é kámaa kɔ̃ɔi yɛ̂ɛ kɔnii. Kákaa nâa si-sãa síi ká kɛ́ kákpîŋ kpɛ̀tɛ ɣâla-ŋai fɛli naa.

¹¹À kɛ̀ zí-sãai ŋí da sòo dí poa nɔ́ a tãi ká dísi lai, ká fé pâi dí ƃá kulâi. Ka pâi kɛ̂i nɔ́ naa mɛni kpɔ̂lu-ŋa tee-tee su lii-too pôlu ŋánaa kɛ́ ƃò kâa.

¹²Áao, kɔ́ kɔ́-ƃela da pâi Ɣâla ŋɔnûai tíŋ kuláa yɛ̂ɛ yúo too tiŋ! Ǹɔii ŋuŋ-ŋai su kɔ-kuluƃa-ŋai da pâi. Dílaɣi-woo a tɛ̂i yɛ̂ɛ ya-ɣîliŋ kɛ́tɛ too tîŋ.

¹³Dílaɣi-woo a tɛ̂i yɛ̂ɛ ya-ɣîliŋ támaa súluŋ tîŋ. Kɛ́lɛ Ɣâla a pâi díŋa-yenii. Ǹyaŋ naa a pâi kɛ̂i tɔ̀ŋ. Da pâi kɛ̂i pûi yɛ̂ɛ muluŋ ƃé fãa a kɛ̀ ǹokwâi gɛ́ yèŋ a yée kpaa máŋ yɛ̂ɛ láa kpala ƃé fãa a tɛɛ̂i la.

¹⁴Ɣele-wulii a kɛ̀ yao ŋánaa a pà díkɔlɔi, ɣele a ƃɔ̀ dísu é kara dítaa yɛ̂ɛ lúu. Diai da Ɣâla ŋɔnûai yée-ŋa sãa kùla díyêei bere ƃé a kɛ̀ la a dia.