Read Kpelle Azaya 22 Bible Online

Azaya 22 - Kpelle bible

Azaya 22

¹M̀ɛnii ŋí ƃé ŋá ǹaa kàa ǹyeei loai zĩ̂a su. Lé ƃé kɛ̂i? Ka liî mí? Gáa léŋ kákelee ká kaa tɛ̂i kápɛrɛ-ŋai tôŋ su ká kɛ́ lii-nɛ̃ɛ kulai?

²Daa-lêei gwaa kélee káa nɔ́ wúlee. Ǹaa kélee káa nɔ́ yóo-yoo, ǹûai kélee kponôi kɛ́ kpɛ̃̀liŋ dîa. Lé kpîŋ ƃé kɛ́i ǹíi-nɛ̃ɛ taa-leei ŋí su nyíi naa-ƃela da tɛ̂i díkɛ yèŋ a ɣele kéleei? Núu támaa poma a lâani naa nyii-ŋai dífe dípaa ní a ƃóa-sɔkpɔi. Ǹûai ŋí dí sàa gɔ́i su kɛ́lɛ dífe kɛ́ ní gɔ́i da kɔ̂i.

³Kálaa túɛ-ƃelai kélee dí pù. Kɛ́lɛ dí dísòŋ nɔ́ mɔ́ɔ-lɛɛ. Pɔri mâa fé kɛ́ ní da mì a gɛɛ é sɔ̀la tɔnɔ kpîŋ pili.

⁴M̀ɛni ma ŋá m̀ôi ńyɛ̃ɛi, “Ŋa pâi wɔ̂lɔi a zu kɛ́tɛ ŋ́ɛi-ya é pú ŋánûai su-kara mɛni ma. Núu da fé pà ŋ́ɛi a gɛɛ é ŋá-nɛnɛ.”

⁵Mɛni-kpɔ̂lu ká ŋí Ǹuu-namui Ŋ̀wála-wâla kélee Yâwɛɛ a ǹáa kûai. Yao támaa káa kúkponôi, kúyee fa ŋɔ́nɔ pɔri núu da ma, kúlii toɔɔ pôlu a ŋ̀ánaa zĩ̂a tiŋ-tiŋ su. Kútaa-lêei ma siɣãŋ kélee su a kara. Kúwɔlɔ-woo a kɛ́ nɔ́ yɛ̂ɛ ŋɔni-ŋa fáa woo wolâ sáma. Ŋ̀wála-wâla kélee Yâwɛɛ ƃé m̀ɛnii ŋí kɛ̀ a kúa.

⁶Elaŋ kɔ kuluƃa-ŋai díkaa díkɔ-kɔ́-soo-ŋai mɛi díkɛ pà. Díkpîŋ kpɛtɛ̂ɛi kɔ́-kɔ mɛni ma. Kerâŋ-ŋa káa díyêei da sɔ̀ala-ŋa. Gɔ-kûluƃa-ŋai kulâi Kîɛi, kpála ŋá-ɣale kɔli-kalaŋ-ŋa káa díyêei.

⁷Ǹûai ŋí da pâi kátiŋ-tiŋ su lɔii lɛ́lɛɛ-ŋai láa fɛ̂ɛi a dí díkɔkɔ́-keleŋ-ŋai dí dísɔɔ-ŋai tɔ́ɔ Zerusâlɛŋ ŋɔsiɣãŋ lá.

⁸Káai a Zuda-ƃelai, Ɣâla a ǹyée kúla kámɛi. Maa ɣêlei tí ka pâi kîrɛ siɣêi ká kɛ́ lì ƃɛ́i ka kákɔ kɔ́-sãai lâai kɛ̀ naa bɛ́rɛi mu ƃɛ́i da kɛ̂ ma ŋ̀olâi su-pɛrɛi.

⁹Ká Zerusâlɛŋ taa-leei ŋɔsiɣãŋ maa kpɛ̀ɛ ka gáa lé tii ƃe maa nɛ̃ɛ̂i ká gɛ́ mai. Ká gàa a gɛ́ɛ lóa támaa káa m̀a. Ǹaa kwára pere poai ƃé ká kɛ̀ yá seêi kɛ̂i naa.

¹⁰Ká bɛ́rɛ-ŋai kélee lòno Zerusâlɛŋ. Ka kpɛɛ dílônoi, ká da-ŋa wòlo ka dítɔɔ-sãa sìɣe a gɛɛ ka ziɣãŋ tɔ́ɔ la a gbanaŋɔɔ.

¹¹Ká yá-seei kpɛ̀tɛ daa-lêei su a gɛɛ yá à kɛ̀ kulâi ǹyá-see kwaai ma pɔlɔi ma gɛ́ yèŋ zu daa-lêei su. Kɛ́lɛ Ɣâla maa mɛni kíli fé tòo ní íkili ŋá nyíi a wɔ́lɔ m̀ɛni-ŋai ŋí kpɛtɛ tãi su kôya tɛɛ pôlu mai.

¹²Maa ɣêlei tí Ǹuu-namui Ŋ̀wála-wâla kélee Yâwɛɛ kátòli a gɛɛ ká káŋuŋ kálaŋ ma, ká maloŋ too-maa-seɣe too kâa, ká maloŋ-see ƃó, ká gbeɣêi tóo kásɔnyɔ̂ŋ-ŋai mɛni ma.

¹³Kɛ́lɛ káfe káwoli tɔ̀ɔ ní m̀a. Ká kɛ̀ kániŋa naɣa-ŋai paâi da káƃala-ŋai kákɛ mìi, kákɛ kpele-sãa kpele kákɛ lii-nɛ̃ɛ kùla. Ká m̀o kákîe-ni dîa kâai, “Kwaa kúlaa míi kú kpele-sãa kpele a kúnîa pere. Saa mɛni káa kûa tínaa.”

¹⁴Ŋ̀wála-wâla kélee Ɣâlai Yâwɛɛ è m̀o mâ ǹyɛɛi, “Tɔ̃yâ ma, zɔnyɔ̂ŋ ŋí su-mɛ̂ni fé pâi wɔ́lɔ lɛɛ̂i. Gula-maa nɔ́ ƃa saa. Ńyãa Ǹuu-namui Ŋ́wala-wala kélee Yâwɛɛ ƃé m̀o tí.”

¹⁵Ǹuu-namui Ŋ̀wála-wâla kélee Yâwɛɛ è m̀o ḿâ ǹyɛɛi, “Pá ŋá ítɛɛ Sêna pɔ́-naa. Ǹyaa ƃa gâloŋ ŋɔpɛ́rɛi mu mɛni-ŋai kélee láa túɛ-nuu. M̀ó m̀a yɛ̂ɛi,

¹⁶‘Ya íkpîŋ kâai yɛ̂ɛ gbɛ̂ɛ? Ƃa íkpîŋ ƃolôŋ têei kɔni su[5] lé mɛni ma?

¹⁷Ƃa íkpîŋ mu-tɛ̂i. Kɛ́lɛ Yâwɛɛ a pâi íkulâi ŋ̀wála-wala-laai tí su é ípili kpɔ́ póŋ.

¹⁸A pâi ípilîi ítoo lɔii da kpɛ́ni su yɛɛ da kɔni pîli wolâ pùŋ su. Ya pâi saâi naa íkɔ kɔ́-keleŋ-ŋai kɔlɛ nyíi-ŋai ya yoŋka têei a diai, kpɛ́ni fêi ya ƃâa kula ínuu-namui ŋɔpɛ́rɛi ma.

¹⁹Yâwɛɛ a pâi íkulâi íwala-wala-laai su é ípîlaŋ.’ ”

²⁰Yâwɛɛ è mò Sêna mà ǹyɛɛi, “Nyíŋi a kɛ̀, ŋa pâi ńyee-mu-nuui Ikiya ǹóŋ Ɛlɛliakiŋ worɛ̂ tɛɛ̂i.

²¹A pà, ŋa pâi m̀aa ɣirîi a ímaa ɣiri-sãai, ŋá záma ɣíri a ísama ɣiri-ɣɛlii, ŋ̀wála-walai kɛ̀ íyêei, ŋá dɛɛ bɔ́. A pâi kɛ̂i a Zerusâlɛŋ da Zuda-ƃelai dínâŋ.

²²Ǹyaa ƃé Deeƃé ŋɔpɛ́rɛi maa mɛ̂ni kélee a pâi pûi ŋ̀ûa. M̀ɛnii kélee a pâi m̀ôi, ǹyaa nɔ́ ƃé pâi kɛ̂i. Núu da kélee fa da kùla ma kpaa máŋ é da pɛlɛ ma.

²³Wála-wala kpanaŋ a pâi kɛ̂i ǹyêei, ǹâŋ ŋɔpɛ́rɛi mu-ƃelai díkɛ ƃaa kɛ́-maa sɔlɔ ƃô zârai.

²⁴“Ŋɔkáa-laai su-ƃelai kélee maa mɛ̂ni a pâi kɛ̂i ŋ̀ûa a kpîri. Diai kélee pâi kɛ̂i ŋɔpɛ́rɛi mui, díkelee dímaa mɛ̂ni a pâi kɛ̂i m̀a. Da pâi kɛ̂i a dísɛlɛŋɔɔ m̀a yɛ̂ɛ da pɛ́rɛ mu-sɛŋ-folo-ŋa sɛ̀lɛŋ wúru ma.

²⁵Nyíŋi à kɛ̀, m̀aa wûrui a pâi ɣâlei é tóo. Ǹyaŋ nyíŋi ƃé pâi kɛ̂i a mɛni kélee kpɛɛ ŋá. Ńyãa Yâwɛɛ ƃé mò tí.”