Read Kpelle Azaya 23 Bible Online

Azaya 23 - Kpelle bible

Azaya 23

¹Ɣâla ŋɔworɛ̂-wooi ká ŋí Taya lɔii mɛ̂ni ma. Káai a tîma su sia-kɛ́-ƃelai, ka wɔ́lɔ a ŋ̀ánaa! Ƃɛ́i kálɔii Taya su tima-ŋai da kpêra naai, ǹaa kélee su a kara. Pɛ́rɛ dɔnɔ kpîŋ fé ŋɔ́nɔ naa. Ka m̀aa tuŋ mɛ̀ni tãi ká kùla la Sapɔrɔ lɔii sui.

²Kpalo-ƃêlaai kâa, káai a bɔni tɔɔ-ƃelai Sidɔŋ Yúo kpono ma perei. Ká nûa tɛ̀ɛ

³Ize a gɛɛ dí mii-sãa yá kâa a gɛɛ ká gɔlɛ ǹɔii-ŋûŋ-ŋai kélee su-ƃelai dîa.

⁴Ƃâa a kùla yâ, Sidɔŋ taa-leei, yáai íkaa a yúo ma taa-lee kɛ́tɛi. Yúo ǹyaa kpîŋ a ǹyée kúla ímu. A m̀ôi yâ ǹyɛɛi, “Fé tá wɔ́lɔ lóŋ da kélee maa sɔlɔ ní kpaa máŋ ŋá lóŋ da kula zu.”

⁵Ize-ƃelai da mɛ̀ni a gɛɛ Taya Lɔii su a kara, dílii a pâi kpɛ̃linîi é tóo pôlu a ŋ̀ánaa.

⁶Káai a Fonisia-ƃelai, ka gbêɣei tóo. Ka pú ká lí yúo ƃela-ma-pere Sipîŋ lɔii su.

⁷Taya taa-leei nɔ́ ƃé ŋí nyíi dí wɔ́lɔ dɔ̀ɔ kóraŋ su-kôya tɛɛ pôlu ma nyii nûa da kâa kɛ̀ lii-nɛ̃ɛ kulâi zui? Daa-lêei ƃé ŋí zu-ƃelai dí wɔ́lɔ lì yúo m̀éla-ŋa ma a gɛɛ dí taa-lêe da kpɛ́ni-ŋa tɔɔ naai?

⁸Gbɛ̂ɛ ƃa m̀ɛni kpɔ̂lui ŋí láa daa-lêei ŋí ma, daa-lêei nyíi zu-ƃela támaa dí kɛ̀ a kâloŋ-ŋa, dí ƃò a pɔni tɔɔ-ƃela, ƃaa kɛ́-maa támaa kɛ́ ƃò dîa ŋ̀éniɛi gwaa kéleei?

⁹Yâwɛɛ, Ŋ̀wála-wâla kélee Ɣalai ƃé mɛni kpɛtɛ́ɛi ŋí kɛ̀. È gɛ̀ tí a gɛɛ é ǹyoka-ƃelai díyoŋka tuai kpéra, é ƃâa kula dîa.

¹⁰Sipîŋ lɔii ma-ƃela, ká lí kálɔii ma ká sí-sãa sí. Tîma da pîlani fé ŋɔ́nɔ naa.

¹¹Yâwɛɛ a ǹyée sã́a yúo mɛi a gâloŋ-laa-ŋai kélee túmo-tûmo. È m̀o a gɛɛ dí Fonisia ŋɔkili tɔɔ-maa kwaa-ŋai ma su kara.

¹²Sidɔŋ-ƃela, kálii-nɛ̃̂ɛ mɛni-ŋai kélee kɔ́yaŋ ká ŋí. Da kánûai luânii. Ka pù kpîŋ kà lì Sapɔrɔ káfe pâi ŋuŋ ma ƃô da sɔlɔ ƃôi.

¹³Babelɔŋ-ƃelai ƃe Taya su-kara dí gɛ́ ǹaa é kɛ́ a fɛnɛ-sãa kɛ̂i. Asiria-ŋai fêi. Dí yeŋkêŋ-ŋa tɔ̀ɔ dí tɛ́ ŋ̀á dí Taya taa-leei wólo, ǹaa é lɛ́ɛ a pilêŋ ŋá.

¹⁴Káai a tîma su sia kɛ́-ƃelai ka gbêɣei tóo, kpɛ́ni fêi, kataa-lêe wála-walai su a kara.

¹⁵Tãi da a pâi pâi nûa da pâi niâi Taya taa-leei mɛ̂ni ma a kóraŋ buu lɔ́ɔlu mɛi feerɛ góraŋ nyii kâloŋ a gɛ̀ ɣele mai. Góraŋ-ŋai ŋí da kpɛ̀ɛ, Taya a pâi kɛ̂i nɔ́ yɛ̂ɛ wulu-wulu kɛ́-nuu ƃé da ǹáa toôi a wule.

¹⁶Wulu-wulu kɛ́-nɛni, gɔnîŋ síɣe, íkɛ ŋ̀ale, íkɛ tìnaŋ daa-lêei ma. Íwɛli kɛ́-maa-ƃelai da wɔ́lɔ nia ímaa mɛni ma. Gɔnîŋ síɣe, íkɛ ŋ̀ale, íkɛ wule tôo, íkɛ tìnaŋ daa-leei ma, a gɛɛ ímaa mɛni kíli é tóo díŋa.

¹⁷Góraŋ buu lɔ́ɔlu mɛi feerɛi a kpɛ̀ɛ, Yâwɛɛ a pâi gɛ̂i nûa dí Taya taa-leei tɔ́ɔ pôlu. Ǹaa-pɔni tɔɔ-ƃelai da pâi kɛ̂i dípɔni-ŋai tɔɔ̂i ŋ̀éniɛi gwaa kélee. Nûa da pâi ŋɔ́nɔ m̀aa mɛ̂ni kɔ́lɔnîi.

¹⁸Ŋ̀uŋ fela-fei kélee bɔni tɔɔ-ƃelai da pâi kɛ̂i gbɛɛ̂i ǹɔii ŋí sui, da pâi ǹâai kɛ̂i Yâwɛɛ ŋɔtíi mɛni ma. Zu ƃé diai da Yâwɛɛ fɛlii, díkɔnɔ̃ŋ da dímaa ɣiri-sãai da pâi kɛ̂i kulâi naa.