Read Kpelle Azaya 25 Bible Online

Azaya 25 - Kpelle bible

Azaya 25

¹Yâwɛɛ, yá ƃa Ŋáɣâlai. Ŋa pâi ƃaa kɛ́-maa tɛɛ̂i ípɔ, ŋá ílaa maa tɛ́. Ya mɛni kpaya-kpayaa mĩli-miliɛɛ támaa kɛ́. M̀ɛni kpaya-kpayaa mĩli-miliɛ-ŋai ŋí káa a m̀ɛnii í gbɛ̀tɛ tãi su-kôyaa tɛɛ pôlu ma.

²Yaâ taa-lêe-ŋa maa kɔ̃ɔ-sãa su-kara, ya maa taa-lee-ŋai ŋí wólo. Gâloŋ-pɛrɛ-ŋai kúkpɔara-ƃelai dí dɔ̀ɔi, dífe ŋɔ́nɔ ɣele ma. Dífe pâi ŋɔ́nɔ pɔrîi ǹaa tɔɔ̂i pôlu.

³M̀ɛni ma, lɔii-ŋuŋ wála-wala-ŋa su-ƃela da pâi ƃaa kɛ́-maa tɛɛ̂i ípɔ. Ǹúu nyɔ́mɔɔ-ŋai dílɔii-ŋuŋ-ŋai su taa-lee-ŋai su-ƃelai da pâi yaôi yâ.

⁴Yá nɔ́ ƃé diai pɔ̂ri mâa fé dîɛi da pâ ípɔ díŋuŋ ma ƃô mɛni ma. Ǹyaŋ ya díkùla dímɛni kpɔ̂lu-ŋai su. Ya dímaa kɔ̃̂ɔ fãa kɛ́tɛ yêei, í ninîŋ tɛɛ dípɔ vóloi ŋɔzizi fé dí kerêŋ. Díkpɔara-ƃela da pɛ̂lɛ dîa yɛ̂ɛ fãa kɛ́tɛ,

⁵yɛ̂ɛ fólo láa-ƃoɔɔ fòlo a lɔii kpâla. Yâwɛɛ, ya kúkpɔara-ƃelai ŋá yéŋ. Ya ŋ̀wana-lɔ̂ɔ-ƃelai ŋá yéŋ, yɛ̂ɛ lúu a fólo ŋɔzizi ŋá yèŋ.

⁶Ŋ̀wála-wâla kélee Yâwɛɛ a pâi kúu kɛ́tɛ kɛ̂i Zãiyɔŋ Yeei ma. A pâi gúui ŋí kɛ̂i ŋ̀éniɛi su-ƃelai kélee mɛni ma. Mii-sãa lɛ́lɛɛ-ŋa da ŋwã̂ai kpanaŋ lɛ́lɛɛ-ŋa támaa da pâi kɛ́i gúui ŋí su.

⁷M̀ɛni-sôlii núu-kpune a tɛɛ̂i zu ŋ̀éniɛi sui, a pâi gɛ̂i gélee mɛni é kperâ gúui ŋí su.

⁸Ǹuu-namui Yâwɛɛ a pâi saa su-karâi. A pâi gɛ̂i núu da fa ŋɔ́nɔ wɔ̀lɔ. A pâi mɛni-sôli mɛni kélee kperâi ŋ̀éniɛi su. Yâwɛɛ ǹyaa kpîŋ ƃé m̀ɛnii ŋí ƃò a gɛɛ a pâi kɛ̂i.

⁹M̀aa ɣêlei tí, núu-kpune kélee da pâi m̀ôi dîyɛɛi, “Kúɣâlai ká ŋí. Ǹyaa ƃe kwa wɔ́lɔ m̀aa kpɛ̂nii a gɛɛ é kúŋuŋ ma ƃó. Ǹyaa ƃa Yâwɛɛ nyii kúkili tɔɔ̂i mai. Kwaa lii-nɛ̃ɛ kula, kpɛ́ni fêi, a kúŋuŋ ma ƃó.”

¹⁰Yâwɛɛ a pâi Zãiyɔŋ Yeei maa kɔ̃ɔ̂i, kɛ́lɛ a pâi Môa lɔii su-ƃelai su-karâi, nûa díkɛ sia dímɛi yɛ̂ɛ túluŋ ŋá.

¹¹Da pâi kɛ̂i díyee tɛ̂i ɣelêi yɛ̂ɛ nûa da kɛ̀ waa-yâi kɛ̂i. Kɛ́lɛ dífe pâi kpɔŋ mâa da sɔlɔ ƃôi Yâwɛɛ yêei. A pâi gɛ̂i díyee su é sáa.

¹²Yâwɛɛ pâi Môa taa-lee-ŋai dísiɣãŋ-ŋai kélee wôloi, é dífũa-fũ̂a.