Read Kpelle Azaya 26 Bible Online

Azaya 26 - Kpelle bible

Azaya 26

¹Ɣele da a pâi pâi nûa da pâi kɛ̂i ŋ̀ulei ŋí toôi Zuda lɔii su: Kútaa-lêei wála-wâlai! Ɣâla ǹyaa kpîŋ ƃa ŋɔsiɣãŋ maa kɔ̃̂ɔ.

²Ka ziɣãŋ-ŋai díkpôŋ-ŋai lá-ƃo, ǹɔii-ŋuŋ ŋí zu-ƃela teniŋ-ƃoɔɔ̂i dí lɔ́ naa.

³Yâwɛɛ, yâ lii-see tɛ̀ɛ diai pɔ́ dí lâai a yá, díkili tɔɔ yâi.

⁴Ka láa a Yâwɛɛ wɔ́lɔ-wɔlɔ da wɔ́lɔ-wɔlɔ. Ǹyaa ƃa kúmaa kɔ̃ɔ-nuu wɔ́lɔ-wɔlɔ da wɔ́lɔ.

⁵Diai díyoŋkai a díŋa-yèŋ, daa-lêei da zui é maa taa-leei su-kara, ǹaa é lɛ́ɛ a muluŋ su.

⁶À kɛ̀ tí, diai kɛ̀ mɔ̃lɛ̂i daa-leei ŋí su-ƃela yée mui, da pâi kɛ̂i sia-siai naa díkɛ naa taŋ-taŋ a díkɔɔ.

⁷Yâwɛɛ, ya lûwa làa ǹaa-laa-ƃelai kɛ́-mɛni kélee ma. Ya díteniŋ tɔ̀ɔ dísia-pêre kélee su.

⁸Yá ƃe kúkaa ípôlu íteniŋ ƃô-laa mɛni ma. Yá nɔ́ ƃé kwa ŋ̀wɛ̂lii kúkɛ ƃaa kɛ́-maa tɛ̀ɛ ípɔ.

⁹Kpíni a pɛ̀lɛ ímaa mɛni kíli káa nɔ́ ńii su. Yà kɛ̀ núu-kpune kula maa kɛ̂i ǹɔii ma, da pâi tɔ̃yâ-laa mɛni maa kɔ̂rii.

¹⁰Berei máŋ ísɔŋ lɛ̂lɛɛi káa la ŋ̀wana-lɔ̂ɔ-ƃelai kélee mɛni mai, dífa wɔ́lɔ dítûa pere maa fâleŋ. Díkaa kpɔ́ nɔ́ ŋwana-lɔ̂ɔ tua-ŋa kɛ̂i. Dífii fa kpɛ̀ɛ. Dífe kpáaŋ ní máŋ íkɛtɛ-laai mɛni ma.

¹¹Óo Yâwɛɛ, ŋ̀wana-lɔ̂ɔ-ƃelai dífe gɔ́lɔŋ a gɛɛ ya pâi díkula maa kɛ̂i. Díkula maa kɛ́ dí mɔ̃lɛ. M̀ɛnii í gbɛ̀tɛ díkula maa kɛ́ mɛni mai gɛ́. Ǹɛ́ dîa berei í ínûai wɛ́li ní lai.

¹²Óo Yâwɛɛ, lûwa láa kúkɛ mɛni kélee dîa díƃûu ƃó. M̀ɛni lɛ́lɛɛ-ŋai kélee kwa zɔlɔ ƃôi da kûla ísɔŋ lɛ̂lɛ tuai su.

¹³Óo Yâwɛɛ Kúɣâlai, wála-wala-laa da kpɛ́ni-ŋa da wɔ́lɔ kɛ́ kú mɛi. Kɛ́lɛ yá nɔ́ ƃé kú íkɔlɔŋ a Yâwɛɛ.

¹⁴Maa wala-wala-laa-ŋai da saa, dífe pâi wɔ́lɔ dímu-siɣêi. Da kɛ́ a mɔ̃leŋ-ŋa, dífe pâi wɔ́lɔ dímu-siɣêi, kpɛ́ni fêi, í díkula maa kɛ̀. Dímaa mɛni da kíli fé pâi wɔ́lɔ lɛɛ̂i núu da kíli ŋá.

¹⁵Óo Yâwɛɛ, ya ǹɔii-ŋuŋ su-kɛtɛ. Ya gɛ́ zu a kɛ̂tɛ m̀éla kélee ma. M̀ɛnii ŋí a gɛ́ ƃaa kɛ́-maa támaa a kɛ́ yâ.

¹⁶Yâwɛɛ, ya ínûai kula maa kɛ̀. Da kɛ̀ kpîŋ maa mɛ̂ni kpɔ̂lui su, yá nɔ́ ƃé da kɛ̂ ífɛlîi.

¹⁷Yâwɛɛ, ya gɛ́ kwa wɔ́lɔ, yɛ̂ɛ berei nɛnî a kɛ̀ koi-têe su a kɛ̂ wɔ̂lɔi lai.

¹⁸Kú kɛ̀ mɔ̃lɛ̂i a ŋ̀ánaa. Kɛ́lɛ kúfe sɛŋ da sɔlɔ ƃó ní kúmɔ̃lɛ-laai su. Kúŋuŋ ma fé niî ƃó ní kúkpɔɔi lɔii ma. Kúlônii da fé pâi lɛɛ̂i ǹɔii ma é kúpɔɔ ŋá síɣe.

¹⁹Kúnûai nyii-ŋai da saai, da pâi dímu-siɣei saa yêei. Da pâi ŋɔ́nɔ kɛ̂i pôlu yɛ̂ɛ berei díkɛ̀ la a bɔlɔɔi. Da pâi dímu-siɣêi dí kúla m̀olôŋ su. Da kùla m̀oloŋ su, da pâi kɛ̂i lii-nɛ̃ɛ wule-ŋa toôi. Yâwɛɛ ŋɔkwaa ponoɔɔi a pâi dímaa ponôi yɛ̂ɛ nɛ̀ŋ a pù kala ŋûnu ŋá a ɣele-wala pɛpɛ.

²⁰Ŋánûa, ka lɔ́ kápɛrɛ-ŋai mu ká ǹá-tɛ. Ka káloo a da-loŋ é lɛ́ɛ la zu Ɣâla líi ŋá é yéŋ.

²¹Yâwɛɛ a pâi a gɛɛ é ŋ̀wana-lɔ̂ɔ-ƃelai kula maa kɛ́ díŋwana-lɔ̂ɔ tua-ŋai mɛ̂ni ma. Diai kélee nûa pàa a ŋwana-lɔ̂ɔ pere loo-pêre-ŋa sui, díkelee dímaa mɛ̂ni a pâi toôi banaŋ ma. Ǹyaŋ diai kélee nûa dí dípàa bere sîi-ŋai ŋí sui, da maa mɛ̂ni fé pâi lɛɛ̂i loo-pêrei.