Read Kpelle Azaya 27 Bible Online

Azaya 27 - Kpelle bible

Azaya 27

¹Maa ɣêlei tí, Yâwɛɛ a pâi yúo zere kalii nyii da kɛ̂ ma Levietaŋ paâi a ŋɔƃóa-sɔkpɔ kɛ́tɛ su-kpanaŋɔɔ̂i. Galii ŋí a kɛ̂ láa-lâai bɛ̂rɛ-ma gɛ́ kpìniŋ-kpiniŋ yúo su.

²Maa ɣêlei tí, Yâwɛɛ a pâi m̀ɛni-ŋai ŋí ƃôi é pîlaŋ ŋɔkpɔmɔ-kpâlaŋ lɛ́lɛɛi ŋí ma nyíi gáa a Eezuɛ lɔii, ǹyɛɛi,

³“Gbɔmɔ-kpâlaŋ ŋí káa a ḿbɔɔ. Ŋa yá pù mà a ɣele kélee, ŋ́gɛ m̀ɛi kâa a kpíni da fólo a gɛɛ núu da fa lâ zu kara la.

⁴Mɛni nyɔ́mɔɔ da fé ŋɔ́nɔ ńii su é pîlaŋ ǹaa mɛni ma. Kala a kùla naa ɣalêŋ kpɔlɔ é kpɛtɛ naa ŋa kɔ́ pɛ̀lɛ dîa. Ŋa dífala ŋá díkereŋ.

⁵À kɛ̀ gbɔara-ƃelai da kɛ̀ ŋ̀wɛ̂lii ŋá dímaa kɔ̃ɔ dí pá ḿbɔ lii-see pere su. Díkɛ a díkpîŋ kpɛtɛɛ lii-see mɛni ma. Dí pá ḿbɔ lii-see pere su.”

⁶Ŋ̀ele-ŋai da pâi pâi Eezuɛ-ƃelai da pâi ŋɔ́nɔ dísame nina-ŋa siɣêi yɛ̂ɛ wúru-ŋa. Zeeka ŋɔsuui su-ƃelai ŋí da pâi ŋɔ́nɔ ƃûu ƃôi dí ǹɔii lá-fɛɛ. Mii-sãa támaa da pâi kɛ̂i naa dímɛni ma.

⁷Yâwɛɛ fé tá Eezuɛ kùla maa kɛ́ ní a ŋ̀ánaa yɛ̂ɛ berei a gɛ́ la a díkpɔara-ƃelai. Vé tá dámaa su-kara ní yɛ̂ɛ berei a gɛ́ la a ǹɔii-ŋuŋ da kpɛ́ni-ŋa su-ƃelai nyii-ŋai kɛ̀ Eezuɛ-ŋai paâi.

⁸Yâwɛɛ a ŋɔnûai kula maa kɛ̀ a dítɛɛ lɔii-ŋuŋ da kpɛ́ni-ŋa su. A díkula naa a vãa su-kpanaŋɔɔi a kûla vóloi kulâi-perei.

⁹Eezuɛ-ŋai da díyee kùla díkpɛtɛ ɣâla-ŋai mɛni su, dí m̀aa têƃele-ŋai wólo dí fũa-fũa, díyee kúla géreŋ sãa kúŋ nɛ̃ɛ-ŋai kéreŋ mɛni su, ŋ̀úrui da lì mu díkpɛtɛ ɣâlai Asira fɛli mɛni mai, dí bɔŋ, dí géreŋ, Yâwɛɛ a pâi dísu-mɛni lɛɛ̂i zɔnyɔ̂ŋ-ŋai da gɛ́i mɛ̂ni ma.

¹⁰Daa-lêe-ŋai sĩɣaŋ tínaŋɔɔ dîai su a kara. Ǹaa a lɛɛ a fɛ̃ɛ-kpâlaŋ su. Ǹaa a lɛ̀ɛ nɔ́ a taa-tûlɛ-ŋa láa miî da dífii-tɔɔ̂i.

¹¹Ǹaa wuru-ŋai kélee da kpála, díkɛ ɣàle-ɣale. Nɛyâai da lî naa dí kɔi síɣe. Ɣâla nyíi ǹûai ŋí kpɛ̀tɛi, dífe kpáaŋ ní m̀ɛni m̀a. M̀ɛni ma, Ɣâla fé pâi wɔ́lɔ dímalôŋ kâai.

¹²Maa ɣêlei tí a pâi, Yâwɛɛ a pâi ŋɔnûai díkaa Yufeletii Ya-leei da Ize goyaŋ perei loai ŋá tɛ̂i gîe ma tɛi-tɛi é dítaŋ yɛ̂ɛ berei da wîi tàŋ lai.

¹³Maa ɣêlei tí a sèri, da pâi Eezuɛ-ŋai tôlii pôlu a túru fɛ́ɛ woo. À kɛ̀ tí, Eezuɛ-ŋai kélee kɛ̀ Ize da Asiria lɔii-ŋuŋ-ŋai sui díkelee da pâi kulâi naa dí pá pôlu. Da pâi pâi pôlu Zerusâlɛŋ díkɛ Yâwɛɛ fɛ̀li naa ŋɔyée maa waai ma.