Read Kpelle Azaya 3 Bible Online

Azaya 3 - Kpelle bible

Azaya 3

¹Ŋ̀wála-wâla kélee Ɣalai Yâwɛɛ a pâi Zerusâlɛŋ da Zuda-ƃelai díkili tɔɔ maa sãai kélee kulâi díyêei. A pâi dímii-sãai da díkpele yai kélee kulâi díyêei.

²A pâi dínuu láa túɛ-ƃelai su karâi da díkɔ kɔ́-ƃelai, dímɛni-sâa ƃó-ƃelai, Ɣâla ŋɔlóno kɛ́-ƃelai, dítɛli kpɛ́-ƃelai da dínuu pɔ̂lɔ-ŋai,

³díkɔ kɔ́-ƃela láa túɛ-ƃelai nyii-ŋai díkaa kɔkuluƃa buu lɔ́ɔlu mɛi, núu láa-tuɛ ƃelai, ǹia-woo-ƃô kɛ́-ƃelai, é pɛ́lɛ boníŋ kɛ́-ƃelai dîa.

⁴Yâwɛɛ a pâi sinâa-nɛyaa kɛ̂i a dínuu kpaya-kpaya, kwatâra-ŋa dí kɛ́ ƃò a dílaa túɛ-ƃela.

⁵Nûa da pâi kɛ̂i díkîe-ni lúanîi. Kpakolo-ŋa da pâi tɔɔ̂i díkîe-ni dîa. Ǹyaŋkpa-ŋai dífe ŋɔ́nɔ pâi ƃaa-kɛ maa tɛɛ̂i ǹúu-pɔlɔ-ŋai pɔ́. Bilaŋ-gɔ́ɔ ma-ƃelai dífe ŋɔ́nɔ pâi kɛ̂i ƃaa-kɛ maa tɛɛ̂i dítɛɛ-maa-ŋai pɔ́.

⁶Maa ɣêlei tí, lee-kaa tɔnɔ su surɔ̂ŋ da a pâi m̀ôi ǹêɣe kpaa ǹîa surɔ̂ŋ ma ǹyɛɛi, “Ímaa sêɣe káa ma. Kɛ́ kúmɛi a kâloŋ, í kúkula m̀ɛni-kpɔ̂lui ŋí su.”

⁷Kɛ́lɛ a pâi m̀ôi m̀a, ǹyɛɛi, “M̀ɛnii ŋí maa pɔ̂ri fé ḿî. Ḿaa seɣe fé m̀a, mii-sɛŋ da fé ńyêei. Káfe ŋ́gɛ̀ a kálaa túɛ-nuu.”

⁸Kpalo a ƃéla Zerusâlɛŋ ma. Zuda kɛ́ wòlo. Ǹaa-ƃela kélee tɔɔ̂i Yâwɛɛ ma a díwoo da dítûa-pere. Da wóo nyɔ́mɔɔ-ŋa ƃò é pîlaŋ Yâwɛɛ ǹyaa kpîŋ m̀a.

⁹Dí su-ɣɛ̂ɛ mɛni kɛ́ɛi a pâi dílɛ̂i. Da dísɔnyɔ̂ŋ-ŋai lɛ́ banaŋ ma yɛ̂ɛ berei Sodɔŋ-ƃelai dí gɛ̀ lai. Kpalo-ƃelâi dîa. Kɛ́lɛ, dia ƃé pà la díkpîŋ pɔ́.

¹⁰M̀ó dɔ̃yâ-ƃelai dîa a gɛɛ díkɛ mɛni kélee ŋ̀aa-see a pâi kɛ̂i a ǹɛ́lɛɛ. Da pâi dísi-sãai kélee m̀á ŋ̀aa-nɛ̃ɛ kulâi.

¹¹Kɛ́lɛ kpalo ƃelâai ŋ̀wana-lɔ̂ɔ ƃelai dîa. Mó dîa a gɛɛ m̀ɛni nyɔ́mɔɔ-ŋai kélee dí gɛ̀ a díƃarâai, da a pâi kɛ̂i a dia.

¹²Nîa-pɛlɛɛ da ŋánûai lúanîi. Nɛyâa ƃa dílaa túɛ-ƃelai. Óo ŋánûa, kálaa túɛ-ƃelai dífe káteniŋ tɔɔ̂i a pere sîi sãa. Da gɛ̂i tí a gɛɛ káfe kɛ̀ a bere sãai kɔ́lɔŋɔɔ.

¹³Yâwɛɛ a tɛ́ ŋɔkâloŋ see-sɛŋ ŋá. A pá dímɛnii ŋá têei.

¹⁴Yâwɛɛ aâ pá mɛnii ŋá têei. A pâi ǹúu-pɔlɔ-ŋai da ǹúu láa túɛ-ƃelai dímɛnii ŋá têei. A dísɔnyɔ̂ŋ ƃôi dîa ǹyɛɛi, “Káa ƃé ŋágbɔmɔ-kpalaŋ su kàra, ká gôlo-ƃelai kɔ̃liŋ kélee síɣe a kápɔɔ.

¹⁵Vé lɛ́lɛ ní kɛ̀ a gɛɛ ká ŋánûai páa, ká gôlo-ƃelai kɔ̃liŋ siɣe. Ńyãai a Ŋ̀wála-wâla kélee Yâwɛɛ, ńyãa ƃé mò tí.”

¹⁶Yâwɛɛ è m̀o ǹyɛɛi, “Zerusâlɛŋ nɛyãai yoŋkai. Da kɛ̀ siâi, da dí díkoôŋ tɔ̀ɔ dîa, díŋɛi piliɛɛ ɣelêi. Da kɛ̀ siâi, dígôo yɔlɛ-ŋai da kɛ̂ díkoo kɔŋna, díyee kaƃaa dípôlu pere, dí kɛ́ ŋɛ́i gbana pìli.

¹⁷Kɛ́lɛ ŋa pâi díkula maa kɛ̂i. Ŋa pâi téɣeŋ kɔlɔ-fela pilîi dîa. Ŋa pâi díŋuŋ kálanîi ma é lɛ́ɛ a gayoŋ.”

¹⁸Ɣele da a pâi pâi, Yâwɛɛ a pâi Zerusâlɛŋ nɛyãai díkpee-lâa kula-sãai kélee kulâi díyêei. Dia ƃa zãa fóloɔ-ŋai da dòo díyee kɔŋnai, gɔyɛŋ-ŋai da gbiniŋ díŋuŋ-leɣa mai, zãâi da gbìniŋ díkɔŋ mai,

¹⁹díwôlii-sãai, díyee kɔŋna koli-ŋai, díŋɛi mɛi pɛlɛ sãai,

²⁰díkpasa-ŋai, díyee ma kɔli-ŋai, díleɣei bɛti-ŋai, díwulɔ kúŋ nɛ̃ɛ kpoo-ŋai, dísale ɣɛli-ŋai da dòo dîai,

²¹dígbono-ŋai da dísũai kɔli-ŋai,

²²díyokpo lɛ́lɛɛ-ŋai, díyɛkɛ-ŋai, dímaa ɣîri-seɣe-ŋai da sɛŋ-kao lâai kɛ́ kolaa-ŋai,

²³díseɣe su ponoɔɔ-ŋai, díseɣe-kôle nɛnɛ-fɛfɛ-ŋai da zòŋ díyee-ŋái, zeɣe-ƃela-ŋai da gbìniŋ díkɔŋ-mai, da díŋuŋ-mɛi pɛlɛ seɣe-ŋai.

²⁴Díwulɔ kúŋ nɛ̃ɛ kpoo-ŋai da pâi penêi a sãa lula tee-tee. Dí bɛ̂ti lɛ́lɛɛ-ŋai da pâi penêi a ɣɛli-ŋa. Díŋuŋ lêɣa lɛ́lɛɛ-ŋai naa pâi a penêi a kpólaŋ. Dímaa ɣiri seɣe lɛ́lɛɛ-ŋai da pâi penêi a maloŋ-too maa seɣe-ŋa. Dílɛ́lɛɛ-laai a pâi pûi.

²⁵Da pâi Zerusâlɛŋ sinaai paâi a ƃóa-sɔkpɔ-ŋa dí díkɔ kuluƃa-ŋai páa kɔ́ su.

²⁶Wɔ́lɔ-woo da maloŋ-too maa da pâi kɛ̂i ŋɔsĩɣaŋ-ŋai lá. Daa-lêei ǹyaa kpîŋ a pâi kɛ̂i yɛ̂ɛ da nɛyaa maa kpôloŋ dí dí sée muluŋ su.