Read Kpelle Azaya 31 Bible Online

Azaya 31 - Kpelle bible

Azaya 31

¹Kpalo-ƃêlaai diai dîa da lì Ize kpɔŋ mâa mɛni mai. Díkili tɔɔ̂i Ize ŋɔkɔ́ kɔ́-soo-ŋai dîa, gɔ́ kɔ́-keleŋ-ŋai da díkɔ kɔ́-ƃelai. Dífe láa ní a Yâwɛɛ, Eezuɛ Ŋɔɣâla Maa Waai. Dífa fúlɔi máŋ m̀arê kɛ̀ kpɔŋ mâa mɛni ma.

²M̀ɛnii a gɛ̂i è gɔ́lɔŋ. A gɛ̀ mɛni kpɔ̂lu é láa nûa dîa. A ǹúu sɔŋ nyɔ́mɔɔ-ŋai kula-maa kɛ̂ da diai da tɔ̂ɔ dípôlui.

³Ize-ƃelai dífe a Ɣâla. Díkaa a núu-kpune. Díkɔ kɔ́ soo-ŋai díkaa a fɛnɛ-sãa. Mɔ̂leŋ fé díkponôi. Yâwɛɛ a ǹíi ŋwàna, lɔii-ŋuŋ da ŋɔkpɔŋ mâa-nuu dífa tɔ̂ɔ berêi. M̀aa fãa a gɛ̀ dífeerɛŋɔɔ dí tóo.

⁴Yâwɛɛ è m̀o ḿâ ǹyɛɛi, “Yala-sûlu a taa-tûlɛ sòŋ a nɛ̃ɛ ma kpîŋ maa taa-tulɛi mɛi káa-nuu é láɣi a ŋ̀óo su-kɛ́tɛ ŋ̀óo fa ǹyala-sûlui maa yâo é tée maa taa-tulɛi ma é pú. Bere nɔ́ ƃé gáa la a ńyãa Yâwɛɛ, ŋ̀wála-wala kélee Ɣâlai. Núu da fa pɔ̂ri gɛ̂i ŋá kpéra Zãiyɔŋ Yeei mɛi kâai.

⁵Yɛ̂ɛ berei ŋɔni a kɛ̀ a bɛlɛɛ la daa lá-ƃerei, gɛ́ ǹônii maa kɔ̃ɔi, bere nɔ́ ƃé ńyãa, Ŋ̀wála-wâla kélee Yâwɛɛi ŋa Zerusâlɛŋ maa kɔ̃ɔ la ŋá gula-yêei kɛ́.”

⁶Yâwɛɛ è m̀o ǹyɛɛi, “Eezuɛ-ƃela, ka sɔnyɔ̂ŋ kɛ́ a ńyãa, ka tela tɔɔ ḿâ. Kɛ́lɛ ka tínaŋ ká pá ḿbɔ-naa pôlu!

⁷Ɣele da a pâi pâi, ka pâi káɣâla pɔɔkɔŋ-ŋai ka díkpɛ̀tɛ a gôo da kánei, da fé pâi lɛɛ̂i káyêei. Ka pâi káyee kulâi gélee mu ká dípili.

⁸Asiria su a pâi karâi kɔ̂i. Kɛ́lɛ vé pâi kɛ̂i a núu-kpune ŋɔwála-wala. Asiria-ŋai da pâi pûi kɔ́ ma. Kɛlɛ da pâi dínyaŋkpa-ŋai sonîi dí lí a dia luɛ-lâa su.

⁹Dílɔii láa túɛ-nuui a pâi yaôi a ŋ̀ánaa é pú. Dílaa túɛ-ƃelai da pâi yaôi a ŋ̀ánaa díkɛ kpɛ̃̀liŋ dí díƃenâ-ŋai lɛ́ɛ naa dí pû.” Yâwɛɛ ƃé m̀o tí. Ŋɔŋɔŋ káa Zerusâlɛŋ taa-leei su gwaa kélee. Ǹyaŋ ǹaa ƃé núu kélee da vɛ̀li naa.