Read Kpelle Azaya 33 Bible Online

Azaya 33 - Kpelle bible

Azaya 33

¹Kpalo-ƃêlai kâa, káai kákaa a kúkpɔara-ƃelai. Kaâ kákɔlɛ ma-ƃelai kélee su-kara, kákɛ ƃò ɣele ma. Kɛ́lɛ káwala-walai kpɛɛ-ŋa ɣelei a pâi. Kákpɔara-ƃelai da pâi kákîrii, dí kápaa.

²Yâwɛɛ, kúmalôŋ káa. Yá nɔ́ ƃé kúkili káa yâ kúmɛni-sôli káai kélee su.

³Lɔii-ŋuŋ da fa pɔ̂ri tɔɔ̂i íwala-walai perêi.

⁴Yɛ̂ɛ berei nɔ́ gotó a sí-sãa láa mìi la dîa kpâlaŋ ŋái, bere nɔ́ kwa pâi gɛ̂i la a kúkpɔara-ƃelai.

⁵Yâwɛɛ kɛ̂tɛi. Gáa sɛŋ kélee mɛi. A pâi Zerusâlɛŋ láa fɛ̂ɛi a teniŋ-ƃô da tɔ̃yâ laa.

⁶A pâi káŋuŋ ma ƃôi. A pâi ká maa kɔ̃ɔ̂i, é táre da kili-ŋa-pôno tɛɛ kápɔ. Yâwɛɛ ƃé ka vɛ̀li.

⁷Ŋ̀wála wala-ƃelai da kpɔŋ mâa wɛ̂lii. Géla-ŋai dí dítɛ̀ɛ a gɛɛ dí ǹûai loai kpɛtɛ lii-sêe mɛni mai, da wɔ̂lɔi a ŋ̀ánaa.

⁸Bere-ŋai su a nyɔ́ŋ. Núu da fa pɔ̂ri tɛɛ̂i naa. Gbanaŋ-wooi fé ŋɔ́nɔ dɔɔ̂i. Woo-mîi mɛni-ŋa su a kara. Nûa dífe ŋɔ́nɔ ŋumɛ-maa tɛɛ̂i díkîe-ni pɔ́.

⁹Ǹɔii a lɛɛ a lɔii kpâla. Va ŋɔ́nɔ sí-sɛŋ da kpɛ̀tɛ. Lɛƃanɔŋ wola-ŋai su wuru-ŋai da kpála. Sarɔŋ tiŋ-tiŋ su lɔii lɛ́lɛɛ-ŋai da pene a fɛ̃ɛ-kpâlaŋ. Basãŋ da Kamɛɛ Yeei ma wuru-ŋai da kpála, dílaa kɛ́ pù.

¹⁰Yâwɛɛ a m̀ôi ǹɔii-ŋûŋ-ŋai dîa ǹyɛɛi, “Ka káwoli tɔ́ɔ. Ŋà pá ŋáwala-walai lɛ̂i kâa.

¹¹Kákpɛtɛ mɛni-ŋai káa nɔ́ kpɛ́ni-kpɛni. Mɛni lɛ́lɛɛ fa kûla da su. Ŋámɔ̂leŋ káa yɛ̂ɛ ŋɔŋ. A pâi kásu karâi.

¹²Ka pâi kérenîi ká fṹa-fũ̂a yɛ̂ɛ ŋɔŋ a kɔni kêreŋ à fũ̀a-fũa. Ka pâi kérenîi yɛ̂ɛ ŋɔŋ a ɣalêŋ kèreŋ a pène a luu tée-tee.

¹³Káai ǹɔii-ŋuŋ su kôya-goya-ŋai sui, ka m̀ɛni-ŋai káa ŋa gɛ̂i. Káai ka lɛɣɛ̂i a ńyãai ká ŋáwala-walai maa mɛni kɔ́lɔŋ.”

¹⁴Mɛni nyɔ́mɔɔ kɛ́-ƃelai Zãiyɔŋ, da yaôi díkɛ kpɛ̃liŋ. Da kɛ̂ m̀ôi dîyɛɛi, “Ɣala ŋɔmɛni kula-maai káa yɛ̂ɛ ŋɔŋ. Kúta a pɔ̂ri kulâi ǹyée mu?”

¹⁵Diai pâi ŋuŋ ma ƃo sɔlɔ ƃôi dia ƃa diai da mɛni ƃô a tɔ̃yâ pere, díkɛ maa tûa kɛ̂i, diai dífe wɛ́lini a fili mɛni da yee-pɛlɛ ǹá-sɛŋ mɛnii. Dia ƃa diai dífe wɛ́lini dí díyee píli núu-kpune ŋãa pu mɛni sui, dífa ŋ̀wɛli dí mɛni nyɔ́mɔɔ da kélee kɛ̂i káai.

¹⁶Ǹûai ŋí ƃé pâi kɛ̂i m̀ɛni-ŋai kélee mɛi, díŋuŋ ma ƃóɔɔ yɛ̂ɛ nûa da kɛ̀ taa-lêe su nyii m̀aa tínaŋɔ̂ɔi a siɣãŋ, díkɔnɔ̃ŋ da díkpele-ya fa wɔ́lɔ kpɛ̀ɛ.

¹⁷Ka pâi ŋɔ́nɔ gâloŋ kâai ŋɔfólo-laai su. A pâi kɛ̂i a kâloŋ lɔii kɛ́tɛ mɛi.

¹⁸À kɛ̀ tí, ka pâi kákili-ŋa siâi é pîlaŋ ǹûai dîa dímaa mɛni ǹyao è wɔ́lɔ kɛ̀ kákɔlɔ̂i ká kɛ́ m̀o kâai, “Ŋ̀uŋ fela-fei kula-ƃelai kɔɔ? M̀ɛni maa-kpɛɛ-ƃelai kɔɔ?”

¹⁹Ǹyaŋ káfe pâi wɔ́lɔ káŋɛi pɛlɛ̂i da ma. Dí kɛ̀ a núu nyɔ́mɔɔ-ŋa, dí yoŋkàa. Da kâa kɛ̀ lônoi kápɔ a sîi-woo da nyíi káfa kâa tàre zui.

²⁰Ka Zãiyɔŋ taa-leei káa. Gáa a daa-lêei nyii kwa kúɣâla mɛni maa kuu kpaya-kpayai kɛ̀ zui. Ka Zerusâlɛŋ taa-leei su káa. Gáa a taa-lêe nyíi núu a kɛ̀ zu, ŋ̀uŋ ma ƃôɔɔi. Gáa yɛ̂ɛ ƃûu nyii va wɔ́lɔ kùla dɔɔ̂i.

²¹Ǹaa ƃé Yâwɛɛ ŋɔwála-wala laai a pâi kɛ̂i a dínaŋɔɔ naa kûa yɛ̂ɛ ya-lêe. Ǹyaŋ wála-wala-laa da fé pâi kɛ̂i ŋwana-lɔ̂ɔ nuu da yêei ǹyá-lêei ŋí tíyeŋ mɛ̂ni ma.

²²Yâwɛɛ ƃa kúkâloŋ da kúmɛni ŋá-tee nuui. Ǹyaa ƃé a tɔ̂ŋ kpɛ̀tɛ kúmɛni ma. A pâi kúŋuŋ ma ƃôi.

²³Kúkpɔara-ƃelai dímɛni kpɛtɛ́ɛi kélee a pâi lɛɛ̂i nɔ́ kpɛ́ni-kpɛni. Kwa pâi dítɔɔ-sãai kélee kulâi díyêei. Dɔ̀ɔ-sãai ŋí a pâi kɛ̂i a zu-kɛ́tɛ nyíi kwa pâi kpîŋ da tɛɛ̂i diai pɔ́ díkɔɔ púɔɔi.

²⁴Diai kélee pâi kɛ̂i Zãiyɔŋ, kɔlɔ-fela fé pâi wɔ́lɔ da sonîi. Yâwɛɛ a pâi dísu-mɛ̂ni lɛɛ̂i dísɔnyɔ̂ŋ-ŋai mɛ̂ni ma.