Read Kpelle Azaya 35 Bible Online

Azaya 35 - Kpelle bible

Azaya 35

¹Vɛ̃ɛ-kpâlaŋ-ŋai da ǹɔii kpâlai da pâi lii-nɛ̃ɛ kulâi, kala-ŋa dí tɛ́niŋ vɛ̃ɛ-kpâlaŋ-ŋai su.

²Vɛ̃ɛ-kpâlaŋ-ŋai da ǹɔii kpâlaŋ-ŋai da pâi kɛ́i wule-ŋa toôi díkɛ lii-nɛ̃ɛ kùla a zu-kɛ́tɛ. Gwaa-ŋai ŋí ma a pâi kɛ̂i a ǹɛ́lɛɛ yɛ̂ɛ Lɛƃanɔŋ Yee-ŋai ma. Ǹɔii a pâi kɛ̂i a ǹɛ́lɛɛ gwaa-ŋai ŋí ma Kamɛɛ Yeei da Sarɔŋ tiŋ-tiŋ su. Ǹaa-ƃelai kélee da pâi Yâwɛɛ ŋɔfólo-laai kâai, dí Ɣâla ŋɔkɛ́tɛ-laai kɔ́lɔŋ da ŋɔwála-walai.

³Gɛ́ diai díyee su-saai, díyee su é kpanaŋ. Diai díkɔɔ su-saai díkɔɔ su é kpanaŋ.

⁴Diai yao káa díkponôi, m̀ó dîa yɛ̂ɛi, “Ka tɔɔ a gbanaŋɔɔ, káfe yào! Káɣâlai a pâi kákulâi kákpɔara-ƃelai yêei, é díkula maa kɛ́.”

⁵À kɛ̀ tí, diai díŋɛi pûɔi da pâi kwaa kâai, diai díwoli tíniŋɔɔ̂i dí mɛni mɛ́ni.

⁶Diai díkɔɔ pûɔi da pâi dímu-siɣêi dí píli ɣelêi dí mã́la. Diai dífa pɔ̂ri lônoi, díla a pâi fúlonîi, dí lóno dí wule-ŋa too a lii-nɛ̃ɛ pere. Ya lêe-ŋa da pâi lâai vɛ̃ɛ-kpâlaŋ-ŋai su.

⁷Ƃɛ́i-ŋai ǹaa káa a ŋãya sui, póa-ŋa da pâi têei naa. Ƃɛ́i-ŋai ǹaa káa a lɔii kpâla-ŋa mai, ya-ɣɛ̂li pɛlɛ-pɛlɛɛ-ŋa da pâi lâai naa. Ƃɛ́i-ŋai lɔɔ-ɣîla-ŋa da kâa kɛ̀ naai, kala a pâi pâra su.

⁸Pere-lêe a pâi kɛ̂i ƃɛ́i nûa da kâa kɛ̀ yaôi a gɛ́ɛ dí tɛ́ɛ naai. Maa pere-leei ŋí láa ƃé pâi kɛ̂i a, “Bere-lêe Maa Waai.” Vé pâi kɛ̂i a sɔnyɔ̂ŋ-nuu tɛɛ pêre. Ɣâla ƃé pâi kɛ̂i nûa téniŋ tɔɔ̂i berei ŋí su. Ǹúui kpîŋ táre da fé ŋ̀uŋ sui, a pâi pɔ̂ri tɛɛ̂i a berei ŋí.

⁹Yala-sûlu-ŋa da kélee fé pâi siâi a berei ŋí, kpaa máŋ maa yâo ŋwana-lɔ̂ɔ fɛnɛ-sɛŋ da. Díta fé pâi wɔ́lɔ tɛɛ̂i la. Diai nɔ́ Yâwɛɛ a díŋuŋ ma ƃôi, dia ƃé pâi kɛ̂i tɛɛ̂i la.

¹⁰Da pâi tɛ̂i Zerusâlɛŋ a lii-nɛ̃ɛ su-kɛ́tɛ. Da pâi kɛ̂i wule-ŋa toôi, díkɛ lâɣi a lii-nɛ̃ɛ pere. Da pâi kɛ̂i lii-nɛ̃ɛ kulâi wɔ́lɔ-wɔlɔ da wɔlɔ-wɔlɔ. Maloŋ tôo-maa da lii-too pôlu fé ŋɔ́nɔ pâi wɔ́lɔ kɛ̂i dîa.