Read Kpelle Azaya 36 Bible Online

Azaya 36 - Kpelle bible

Azaya 36

¹Gâloŋ Ɛsekaya kɛ́ɛ gâloŋ-laai su Zuda lɔii mɛi ŋɔkóraŋ puu-kao náaŋ su, Asiria kaloŋ Sinakari è pà é kɔ́ pɛ́lɛ Zuda taa-lee-ŋai siɣãŋ-ŋa díkɛ̀ a dítinaŋɔɔ diai ma é díkelee sóŋ.

²Zãâi tí sɔlɔ ƃóɔɔ mì pôlu mai, Asiria kaloŋ è ŋɔkɔ́-kɔ-ƃelai gbulu kɛ́tɛ kùla Lakee taa-leei su, é dí tɛ́ɛ a gɛɛ dí kɔ́ pɛ́lɛ Ɛsekaya ma Zerusâlɛŋ taa-leei su. È ŋɔkɔ́-kɔ-ƃelai láa túɛ-nuu kɛ́tɛi tɔ̀ɔ dí mɛi. Tãi dí sèri la naai, gɔ́-kɔ-ƃela mɛi-nûui è tɔ̀ɔ berei su ƃɛ́i zeɣe kpɛtɛ-ƃelai dítii kɛ́ kwaai ma è kɛ̀ naai. Ka pâi gâai berei ma ƃɛ́i ǹûai da seɣe wâa naai. Ǹaa káa ǹya-ɣɛ̂lii kwára nyíi a kûla bóai su ǹyéei ŋûa-perei

³Nya ƃe Iliakiŋ nyii kɛ̀ a Ɛɛkaya ǹóŋ, nyii kɛ̀ gâloŋ-pɛrɛi mu mɛni-ŋai kélee mɛi, da Sebina, nyii kɛ̀ a gɔlɔ-pɔ̃yɛ-nuu kɛ́tɛi, da Zoa nyii kɛ̀ a gɔlɔ-pɔ̃yɛ nûui guro-téi, dí lì a gɛ́ɛ dí Asiria kɔ-kuluƃa kɛ́tɛi lá koyâŋ. Zoa è kɛ̀ a Asa ǹóŋ.

⁴Asiria-ŋai dí kɔ́-kɔ-ƃela mɛi-nûu kɛ́tɛi ŋí è mò dîa ǹyɛɛi, “Worɛ̂-woo káa ńa Ɛsekaya mɛni ma é kúla Asiria kaloŋ kɛ́tɛi yêei. Ka lí ká m̀arê kɛ́ lé kpîŋ ƃé gíli tɔ̂ɔi kpɔ́ tí m̀a ǹâai kpɔ́ tí a gbîŋ a gɛɛ tii.

⁵A gâai núu wóo kpɛ́ni-kpɛni nɔ́ ƃé gíli a kɛ̂ a dɔɔ́ mà kɔ́ kɔ́ mɛni mai? Gbɛ̂ɛ ƃé gíli tɔɔ̂i mà a gɛ́ɛ da ǹyaa dí kɔ́ ḿbɔi?

⁶Ize ƃé gíli káa ma. À kɛ̀ Ize ƃé gíli tɔɔ̂i ma, gáa nɔ́ yɛ̂ɛ núu kɛ́ɛ é kpalo-puruŋ sìɣe é gɛ́ a ŋɔsia-wûru. À kɛ̀ tí, maa nûui é kɛ́ nɔ́ a gbîŋ kpɛtɛɛ doo mɛ̂ni ma. A pɔ̂ri ɣâlei a maa nûui é tóo é ǹyée kpaa máŋ gɔ́ɔ pɔara. Bere nɔ́ ƃé Ize kaloŋ káa la. Diai kélee da díkili tɔ̀ɔ mai, bere ƃé a pâi kɛ̂i la a dia.”

⁷Asiria kɔ-kɔ-ƃela mɛi-nuui è lì tuɛ a ŋ̀óo ǹyɛɛi, “Kpaa Ɛsekaya kíli tɔɔ̂i nâa Yâwɛɛ, Káɣâlai ma? Ɛsekaya fé Yâwɛɛ fɛli kwaa-ŋai ma su kara ní, é ŋɔɣâla-teƃele-ŋai wólo, fɛ̂ɛ nɔ́ Yâwɛɛ fɛli kwaa-ŋai dɔnɔ ma da ǹaa Ɣala-teƃelei? Vé mó ní Zerusâlɛŋ da Zuda-ƃelai dîa a gɛɛ gwaai tí ma nɔ́ ƃé fɛ̂ɛ dí Ɣâla fɛli naa Zerusâlɛŋ?

⁸Ŋánuu-namui Asiria kaloŋ a Ɛsekaya maa fôoi. A pâi soo wála feerɛ (2,000) tɛɛ̂i bɔ́ à kɛ̀ kɔ́-kɔ-ƃela díkaa ǹyêei dí dísia a tɛ̀ɛ-ŋa.

⁹A pɔ̂ri kɔ̂i Asiria-ŋai dí kɔ-kɔ-ƃela mɛi-ƃela yée-mu-ƃelai dɔnɔ kpîŋ pɔ́ é ǹyée mɛi ɣále, a nɛ̃ɛ ma gíli é kɛ́ Ize-ŋai dîa a gɛɛ dí kɔ́-kɔ keleŋ-ŋa da soo-sia-ƃela tɛ̀ɛ bɔ́?

¹⁰Ǹâai la Asiria kaloŋ a pɛlɛ̂i ŋɔlɔii ma é ǹaa su kàra nɔ́ gbɔ́ɔi yee ma, à kɛ̀ Yâwɛɛ fé kpɔŋ-maa tɛɛ ní bɔ́? Yâwɛɛ ǹyaa kpîŋ ƃé mò mà a gɛɛ é kɔ́ pɛ́lɛ Zuda lɔii ma, é ǹaa su kara.”

¹¹È kɛ̀ tí, Iliakiŋ, Sabina da Zôa dí mò Asiria-ŋai dí kɔ́-kɔ-ƃela mɛi-nuu kɛ́tɛi ma dîyɛɛi, “Ńâŋ, lóno kú pɔ́ Aramee sii-wooi su. Kwa ŋ̀áa kàa ma. Ífe Ibulu-woo ƃò, kpɛ́ni fêi, ǹûai kélee lɛɣɛ̂i ziɣãŋ ma díwoli tɔɔ́.”

¹²È díwoo su tòo ǹyɛɛi, “Ká lâai la ka gâloŋ-ni nɔ́ ƃé Asiria kaloŋ è ńdɛ̀ɛ kápɔ naa a gɛɛ ŋá m̀ɛni-ŋai ŋí ƃó kâai? Kpao, ŋ́gaa lônoi máŋ ǹûai kélee pɔ́ díkaa seê-ni ziɣãŋ kɔlɛ, nyii-ŋai díkaa pâi kɛ̂i dí li lɔ̂ɔi miî, díkɛ dí dɔɔ-gɔɔ mai kpèle nɔ́ yɛ̂ɛ berei ká saaƃaŋɔɔ ka pâi gɛ̂i lai.”

¹³È kɛ̀ tí, gɔ́-kɔ-ƃelai mɛi-nuu kɛ́tɛi è mù sìɣe é tɔ́ɔ, é láɣi a ɣêlei-pere Ibulu-wooi su ǹyɛɛi, “Kákelee ka káwoli tɔ́ɔ m̀ɛnii ma Asiria kaloŋ kɛ́tɛi a môi kâai.

¹⁴Káfe nɛ̀ɛ naa Ɛsekaya é ká pɛ́lɛ. Ɛsekaya fa pɔ̂ri kámaa-kɔ̃ɔi a dɔnɔ kpîŋ.

¹⁵Káfe tela nɛ̀ɛ naa vé ká pɛ̀lɛ, ǹyɛɛi, ‘Ka kákili kɛ́ Yâwɛɛ ma, a pâi ká maa-kɔ̃ɔi da kátaa-lêei é ká kúla Asiria kaloŋ yêei.’ Yâwɛɛ fé pâi ká ƃâloi.

¹⁶Káfe káwoli tɔ̀ɔ Ɛsekaya ma. Asiria kaloŋ a m̀ôi kâa a gɛ́ɛ ká kúla daa-lêei su ká pá ká kákpîŋ tɛɛ bɔ́. Ka gɛ̀ tí, a pâi kákpɔɔi kwaa ma-ŋa tɛɛ̂i kápɔ kákɛ sí-sãa sì naa, kákɛ ŋ̀aa-nɛ̃ɛ kùla, kpele-ya lɛ́lɛɛ-ŋa kɛ́ ƃò káyêei gbèle mɛ̂ni ma.

¹⁷Nàa à kɛ̀ tí, a pâi kákulâi naa é lí a káa lɔii lɛ́lɛɛ ma yɛ̂ɛ káwɔ̂i. Gáa a lɔii nyíi a sí-sãa kpɛtɛi.

¹⁸Káfe ǹɛɛ naa Ɛsekaya é káƃòo. A m̀o kâa a gɛ́ɛ Yâwɛɛ a pâi káŋuŋ ma ƃôi, káfe làa-la. Ɣâla da a pɔ̂ri ǹɔii-ŋûŋ-ŋai kula-yêei kɛ̂i Asiria kaloŋ yêei?

¹⁹Ama da Apa ɣala-ŋai kɔɔ? Sefavaiŋ ɣala-ŋai kɔɔ? Ɣâla da a pɔ̂ri Sameria ŋuŋ ma ƃôi?

²⁰Ǹɔii-ŋai kúkâloŋ è wɔ́lɔ dísu karai, nênɛ ƃe ŋɔɣâlai a tá ŋɔnûai kula yêei kɛi? Vé tí! Yâwɛɛ a pɔ̂ri Zerusâlɛŋ kulâi léŋ ǹyée ŋá? Và pɔ̂ri gɛ̂i!”

²¹Kɛ́lɛ díta fé lóno ní yɛ̂ɛ berei Gâloŋ Ɛsekaya è m̀o la dîai. Dí lɛ̀ɛ a dímɛi saá.

²²Nya ƃe Iliakiŋ nyíi kɛ̀ gâloŋ-pɛrɛi mu mɛni-ŋai láa túɛi, Sebina nyii kɛ̀ a gɔlɔ pɔ̃yɛ-nûu kɛ́tɛi da Zoa nyii kɛ̀ a gɔlɔ-pɔ̃yɛ nûui guro-téi, dí pà Gâloŋ Ɛsekaya pɔ́ naa. Dí díseɣei fâla-fàla a maloŋ too-maa dí lí gâloŋ pɔ́naa. Dí m̀ɛni-ŋai kélee ƃò m̀a nyii Asiria kɔ-kɔ́-ƃelai mɛi nûu kɛ́tɛi è m̀o dîai.