Read Kpelle Azaya 4 Bible Online

Azaya 4 - Kpelle bible

Azaya 4

¹Maa ɣêlei tí, nɛnî lɔ́ɔlu mɛi feerɛ da pâi kpakolo tɔnɔ sonîi dîyɛɛ m̀ai, “Kúkula a ínɛyâa. Kwa pâi kɛ̂i kúkpîŋ maa ɣirîi, kúkɛ kúkpîŋ kɔ̃nɔŋ kùla. Kwa wɛ̂lii nɔ́ ílaa kɛ́ ƃò kûa. Ŋ̀umɛi ŋí tée kúŋɛi kúfe kɛ̀ a gòyaŋ-ŋa.”

²Maa ɣêlei tí, Yâwɛɛ a pâi gɛ̂i zí-sãai da ŋ̀úru-ŋai pâi kɛ̂i ǹɔii sui, da pâi kɛ̂i a díkpaya-kpaya, dílɛlɛɛ. Ǹyaŋ diai kélee pâi lɛɛ̂i Eezuɛi, da pâi zí-sãai ŋí m̀á ŋ̀aa-nɛ̃ɛ kulâi.

³Diai pâi lɛɛ̂i Zerusâlɛŋ nyii Ɣâla a dísiɣe zui, da pâi dítôlii a nûa maa waa-ŋa.

⁴É lɛ́ɛ pâi kɛ̂i tí, Ǹuu-namui a pâi ǹɔii-ŋuŋ ŋɔmɛnii ŋá têei é m̀aa waa. A pâi Zerusâlɛŋ ŋɔsɔnyɔ̂ŋ waâi ma, é ŋãai dí bù naai kélee wáa.

⁵À kɛ̀ tí, Yâwɛɛ a pâi Zãiyɔŋ Yeei da ǹûai kélee díkaa naai dí mɛi pɛlɛ̂i a ɣele-kɔ̂lɔŋ kole a fólo ŋá. É gɛ́ ŋɔŋ leŋ da luri kɛ́ ƃò naa dí mɛi a gbínii. Ɣâla ŋɔfólo-laai a pâi kɛ̂i ḿɛi gɛ́ daa-lêei gwaa kélee maa kɔ̃ɔ.

⁶Ŋɔfólo-laai a pâi kɛ̂i daa-lêei mɛi a ninîŋ, vóloi fé pâi dí kérenîi. A pâi ǹaa kɛ̂i a núu mɛi káa kwaa ma. A pâi kɛ̂i a kêre, tuna da fãa kɛ́tɛ mɛni ma.