Read Kpelle Azaya 40 Bible Online

Azaya 40 - Kpelle bible

Azaya 40

¹Kúɣâlai a m̀ôi ǹyɛɛi, “Ka ŋánuâi ŋánɛnɛ. Ka díŋa-nɛnɛ!

²Ka Zerusâlɛŋ-ƃelai kíli kúla. Ka m̀ó dîa a gɛ́ɛ da mɔ̃́lɛ a zu kôyaa. Ŋa dísu-mɛni lɛɛ dísɔnyɔ̂ŋ-ŋai mɛ̂ni ma. Ŋá díkula maa kɛ̂ é seri góyaŋ ma zɔnyɔ̂ŋ-ŋai dí gɛ̀i mɛ̂ni ma.”

³Núu-wòo è kɛ̀ tɛ̂i vɛ̃ɛ-kpâlaŋ su ǹyɛɛi, “Ka Yâwɛɛ ŋɔperei kpɛtɛ vɛ̃ɛ-kpâlaŋ su! Ka berei su-sã́a Kúɣâlai mɛ̂ni ma.

⁴Ka botolo-wolo-ŋai láa fɛ́ɛ. Ka ǹyée kpaya-kpayai wólo, ká bɛlɛ-pɛlɛɛi wólo, ǹaa é kɛ́ a nɛ̃́ɣɛ ŋá. Ƃɛ́i-ŋai kélee kame-ŋa díkaa naai, ka m̀aa kame-ŋai wólo ǹaa é kɛ́ a tiŋ-tiŋ-ŋa su.

⁵À kɛ̀ tí, Yâwɛɛ ŋɔfólo-laai a pâi lɛ̂i, ǹyaŋ núu kélee a pâi gâai. Yâwɛɛ ǹyaa kpîŋ ƃé m̀o tí.”

⁶Ŋá wóo da mɛ̀ni ǹyɛɛ ḿâi, “Ye ŋ̀orɛ̂-wooi ŋí ƃó!” Ŋá m̀arê kɛ̀ ńyɛɛ mai, “Ŋorɛ̂-wooi ƃa lé?” Ǹyɛɛ ḿâi, “M̀ó a gɛ́ɛ núu-kpune kélee káa nɔ́ yɛ̂ɛ kala. Dílɛ̂lɛɛi nɔ́ yɛ̂ɛ wúru-poa.

⁷Kala a kpâla, wúru-poa kɛ́ fɔ̃ya a tãi Yâwɛɛ a pâi fãa tɛɛ̂i la é dí fɛ́ɛi. Nûa dífulu-laai su kpuâi nɔ́ yɛ̂ɛ kala.

⁸Kala a kpâla, wúru-poa kɛ́ fɔ̃ya, kɛ́lɛ Ɣâla ŋɔwóoi káa nɔ́ dɔɔ̂i wɔ́lɔ-wɔlɔ.”

⁹Zerusâlɛŋ, ímu-siɣe, ítɛ ǹyée tɔ̂ɔ kɛ́tɛi tôŋ su, í dùŋ lɛ́lɛɛi ƃó naa! Zãiyɔŋ, ye tóli ƃó naa a ɣelêi pere. Dùŋ lɛ́lɛɛi maa tûŋ too naa. Íwoo tɛ́ ɣelêi, ífe yào. M̀ó Zuda taa-ŋai dîa a gɛ́ɛ Díɣâlai káa pâi.

¹⁰Ǹuu-namui Yâwɛɛi a pâi pâi é ŋɔnûai mɛi káa a wála-wala laa. Diai è díŋuŋ mâ ƃòi, a pâi dia.

¹¹A pâi ŋɔƃála-ŋai ŋá kɔnîi yɛ̂ɛ ƃála mɛi káa-nuu. A pâi ŋɔƃála lônii ŋá tɛ́i gîe m̀a ǹyée-tɔ̃ɔi, é lí a dîa. A pâi tɔ̂ɔi dílee-ni túɛ é lí a dia a gɔlɔ-saá m̀a.

¹²Gbɛ̂ɛ ƃa pɔ̂ri ǹyuoi kɔ̂ɔni ǹyée-ŋá, kpaa é ŋ̀ele-kɔ̂lɔŋ kɔ̂ɔŋ a ǹyée? Núu da a pɔ̂ri ǹɔii kpɛtɛ pɔ̂rɔi kɔ̂ɔnii kpele kɔɛɛ su, kpaa máŋ é ǹyée kpaya-kpayai da ǹyée pɛlɛɛ-pɛlɛɛi díwiɛ kɔ̂ɔŋ a sɛŋ-kɔ̂ɔŋ-sãa?

¹³Núu da a pɔ̂ri Yâwɛɛ táre tɔɔ̂i? Gbɛ̂ɛ ƃa pɔ̂ri sɛŋ lɛ̂i m̀a kpaa máŋ é ǹia-wôo ƃoi?

¹⁴Gbɛ̂ɛ ƃé Ɣâla a ŋuŋ mâ pîlaŋ la, é lɛ́ɛ pâi sɛŋ da kɔlɔnîi kpaa é mɛni-ŋa káa, a gɛ́ɛ é sɛŋ da kpɛtɛ-pere maa kɔ̂ri?

¹⁵Ǹɔii-ŋuŋ-ŋai díkaa nɔ́ Yâwɛɛ ŋɛ́i kpɛ́ni-kpɛni, díkaa nɔ́ yɛ̂ɛ yà kâo tɔnɔ a kùla ya-bɔ̂ki su. Dîŋ-ŋai díkaa kwaa kôyaa mai, díkaa nɔ́ yɛ̂ɛ muluŋ.

¹⁶Vɛnɛ-sãai kélee díkaa Lɛƃanɔŋ wolaai sûi, dífe táma ní a gɛ́ɛ dísâla kula la Ɣâla ma. Ǹaa wuru-ŋai dífe táma ní a gɛ́ɛ dí ŋɔŋ tóo a dia ŋɔkéreŋ salai kéreŋ mɛ̂ni ma.

¹⁷Ǹɔii-ŋuŋ-ŋai díkaa nɔ́ ŋ̀ɛ́i kpɛ́ni-kpɛni. Va díkàa ŋ̀ɛ́i a sɛŋ da.

¹⁸Gbɛ̂ɛ ƃé ya pâi Ɣâla kɔɔ̂ni m̀ai? Ya pɔ̂ri gɛ́-pere lɛ̂i léŋ?

¹⁹Vé yɛ̂ɛ ɣâla-pɔkɔɔŋ nyii ŋ̀úru-saa nuui a gbɛ̀tɛ, gôo kpɛtɛ-nuui é gôo pú m̀a, é dɔɔ káne mɛi.

²⁰Ǹúui nyii va pɔ̂ri káne kpaa máŋ gôo sɔlɔ ƃôi, a kpanáŋ nyii va lûlai sîɣe zu. A wúru-saa núu lɛ́lɛɛ kɔ̀ri a gɛ́ɛ é ɣâla-pɔkɔɔŋ kpɛtɛ la nyii va tôo ǹɔii mai.

²¹Ífe niî gɔ́lɔŋ ní? Dífe niî m̀o ní yâ a tãi su kôyaa? Dífe niî m̀o ní yâ berei ŋ̀éniɛi kɔ́ɔ è pìlaŋ lai?

²²Ǹyaa ƃa ǹúui gáa seê-ni ŋɔkâloŋ sèe sɛŋ ŋá ǹɔii mɛi pere gɛ̀ ƃò ŋ̀ele-kɔlɔŋ mɛi perei, diai díkaa ǹaa m̀u perei, díkaa nɔ́ yɛ̂ɛ pumu pɛlɛɛ-pɛlɛɛ ŋa. A ŋ̀ele-kɔ̂lɔŋ fùlomo nɔ́ yɛ̂ɛ wôna-la seɣe, yɛ̂ɛ berei tí da sua-kɔ̂lɔ seɣe nyii da pɛ́rɛ tɔ̀ɔ lai, fûloŋ la núu kɛ́ nyìi m̀ui.

²³A ǹúu láa túɛ-ƃelai díwala-wala laai kûla díyêei, é díkɛ kpɛ́ni-kpɛni.

²⁴Díkaa nɔ́ yɛ̂ɛ wúru-sôo ŋa, nyii-ŋai dífe niî dísame pîlaŋ níi. Tãi Yâwɛɛ a pâi fãa tɛɛ̂i lai, da pâi kpâlai díkoôŋ yɛ̂ɛ kala kpâla.

²⁵Gbɛ̂ɛ ƃé ya pɔ̂ri Ŋ̀âla Maa Waai kɔ̂ɔni m̀ai? Núu da káa naa nyii m̀oloŋɔ̂ɔi m̀a?

²⁶Íŋɛi tɛ́ ŋ̀elei su í ǹaa káa. Gbɛ̂ɛ ƃé bɛ́mɛlɛ̂ŋ-koa-ŋai kpɛ̂tɛi? Ǹyaa ƃa ǹúui nyii a tɔ̂ɔ díŋɛi túɛ yɛ̂ɛ kɔkuluƃai. È berei kɔ́lɔŋ dítâmaai lai ǹyaŋ è díkelee dílaa kɔ́lɔŋ tɛi-tɛi. Ŋɔwála-wala laai sú kɛ̂tɛi. M̀ɛni ma dɔnɔ kpîŋ fé niî láŋ ní.

²⁷Eezuɛ, lé mɛni ƃé ya mɛni saâi la a gɛɛ Yâwɛɛ fé ímɛni kpɔ̂lu-ŋai kɔ́lɔŋ lai, kpaa máŋ vé kpáaŋ ní a kɛ̀ da ífilîi?

²⁸Ífe niî gɔ́lɔŋ ní? Ífe niî m̀ɛni ní a gɛ́ɛ Yâwɛɛ ƃa ŋ̀wɔ́lɔ-wɔlɔ Ɣalai? Ǹyaa ƃé ŋ̀éniɛi kpɛ̀tɛ. Víi fa kpɛ̂ɛ kpaa máŋ é fôa. Núu da fa târe ŋɔkili-ŋa sîai su.

²⁹Diai dí káa fôai, a wála-wala laa tɛ̀ɛ dí pɔ́. Diai dífe wála-wala níi, a díkponôi kpànaŋ.

³⁰Diai kpîŋ díkaa a ǹúu-tɔɔ-ŋai dífii a kpɛ̂ɛ, dífôa. Ǹyaŋkpa-ŋai dífii a kpɛ̂ɛ máŋ.

³¹Kɛ́lɛ, diai da díkili tɔ̀ɔ Yâwɛɛ ma kpɔŋ-mâ mɛni mai, díwala-wala laai su a pâi kpananîi. Da pâi tɛ̂i ŋ̀elei su yɛ̂ɛ da kɛ̀ kuɛ koôŋ pôlu. Dí máŋ kîrɛ siɣe, dífe pâi fôai. Dí máŋ sía, dífii fé pâi kpɛɛ̂i.