Read Kpelle Azaya 41 Bible Online

Azaya 41 - Kpelle bible

Azaya 41

¹Ɣâla a m̀ôi ǹyɛɛi, “Ka kámɛi sáa ká káwoli tɔ́ɔ ḿâ, káai kélee ká káa lɔii-ŋuŋ su kôyaa-ŋa sui! Ká kákpîŋ kpɛtɛ ká kámɛnii-ŋai láa ŋ́ɛi. Pɔri a pâi kɛ̂i kâa a gɛɛ ká káwoo su kula. Kwaa pá kúkîe ma a gɛ́ɛ kú m̀ɛnii su káa kú gáa ǹúui nyii ŋɔi lɛ̂lɛɛi.

²“Gbɛ̂ɛ ƃé pà a Pɛsia kaloŋ Sarɔ wála-walai é kúla la vólo kulâi perei, é gɛ́ gɛ̀ nûa yée mɛi ɣâle ƃɛ́i kélee a lî naai? Gbɛ̂ɛ ƃé wála-wala tɛ̀ɛ bɔ́ gɛ́ kâloŋ-ŋa da lɔii-ŋuŋ-ŋa yée mɛi ɣâlei? È díyee mɛi ɣâle a ŋɔƃóa-sɔkpɔi yɛ̂ɛ da kɛ̀ a muluŋ. Ŋɔtɔ̃ai è dí tàa yɛ̂ɛ kala-kpâla ƃé fãa su.

³È kɛ̀ díkpɛ̂i, sɛŋ da kélee fé gɛ́ ní. È kɛ̀ díkpɛi, gɔ́ɔ fa pîlaŋ ǹɔii ma.

⁴Gbɛ̂ɛ ƃé gɛ̀ m̀ɛni-ŋai ŋí díkɛ kɛi? Gbɛ̂ɛ ƃé gɛ̀ m̀ɛni-ŋai ŋí dí kɛ́ kɛ̀ a gɔ́ɔ pîlaii? Ńyãa Yâwɛɛ, ŋá kɛ̀ naa a gɔ́ɔ pîlanii. Ǹyaŋ ńyãa, Yâwɛɛ, ŋa pâi kɛ̂i naa a gbɛɛ ŋá ɣele.

⁵“Diai díkaa ǹɔii-ŋuŋ su kôyaa-ŋai sui, da m̀ɛnii káa ŋá gɛ̀i. Da yaôi, díkɛ kpɛ̃liŋ. M̀ɛni ma, da díŋaa tɛ́ ma da lɛɣɛ a ńyãa.

⁶Ǹyɛrɛ-ƃelai dí kpɔŋ mâa tɛ̀ɛ díkîe-ni pɔ́, dí díkîe-ni kili kúla.

⁷Ŋ̀úru saa nuui è gôo ɣale-nuui kíli kùla ǹyɛɛ mai, ‘Ya tíi lɛ́lɛɛ kɛ̂i.’ Ǹúui a ŋ̀âla-pɔkɔɔŋ saa sãai kpɛ̂tɛi, a ǹúui kili kùla a dípu díkîe ma é gbamoi. Da kpɛ̀ɛ bɔkɔɔ̂ŋ kpɛtɛ-sãai saâi dí dípɔ̃yɛ, da m̀o dîyɛɛi, ‘Kútii lɛ̂lɛɛi.’ À kɛ̀ tí, da gélee pù gîe ma, dí gbamo ƃɛ́i ma a kɛ̂ tɔɔ̂-ni naai.

⁸“Kɛ́lɛ Eezuɛ-ŋa, kákaa a ŋátii kɛ́-ƃela. Kákaa a ŋáwɛli kɛ́ maa nuui Eberaɣɛ̃ɛ ŋɔsuui su-ƃela. Ŋá kásìɣe zu a gɛ́ɛ ká kɛ́ a ŋátii kɛ́-ƃela.

⁹Ŋá kákùla kwaa kôya-koyaa-ŋa ma ǹɔii m̀éla kélee ma ŋá pá a káa. Ŋá m̀o kâa ńyɛɛi, ‘Kákaa a ŋátíi kɛ́-ƃela.’ Fé ńyee kùla ní kámu.

¹⁰Ŋ́gaa kákɔlɛ, káfe yào! Ńyãa ƃa Káɣâlai, sɛŋ da fé pâi ká m̀aa yaôi! Ŋá pâi kákponôi kpananîi, ŋá kpɔŋ mâa tɛ̀ɛ ká pɔ́. Ŋá pâi kámaa kɔ̃ɔi ŋá ká káŋuŋ ma ƃó.

¹¹“Lɔii-ŋuŋ-ŋai ńyii-ŋai dísu-ƃela líi ŋwânai kâai, ka pâi díyee mɛi ɣâlei, dí ŋumɛ. Diai da kɔ́ pɛ̀lɛ kâai, ká dísu-kara,

¹²Ka pâi kákpɔara-ƃelai kɔ̂rii, kɛ́lɛ káfe pâi díkâai. Diai pâi kɔ́ pɛlɛ̂i kâai, da pâi lánîi.

¹³Ńyãa ƃa Káɣâlai Yâwɛɛ. Ŋa wála-wala tɛ̀ɛ kápɔ, ŋá m̀ó kâa ńyɛɛi, ‘Káfe yào, ŋa pâi kpɔŋ mâa tɛɛ̂i kápɔ.’ ”

¹⁴Yâwɛɛ a m̀ôi ǹyɛɛi, “Eezuɛ-ƃela, berei máŋ ka kuro-têɛɛi lai káfe yào. Ŋa pâi kpɔŋ mâa tɛɛ̂i kápɔ. Ńyãa ƃa Eezuɛ Ŋɔɣâla Maa Waai. Ńyãa ƃé káŋuŋ mâ ƃò.

¹⁵Ŋa pâi kákɛ̂i yɛ̂ɛ sí-sãa ƃá táŋ-kɔli, ńyii ǹyíŋ káa a nina, ŋ̀á liɛɛi. Ka pâi ǹyée kpaya-kpayai táŋ nîi, ká dí fũa-fũa, ká bɛlɛ-pɛlɛɛi wólo-wôlo, ká dífũa-fũa dí pene a muluŋ.

¹⁶Ka pâi dífɛ̂ɛi, vãai é lí a dia, dítaa-taa. À kɛ̀ tí, ka pâi lii-nɛ̃ɛ kulâi, kpɛ́ni fêi, ńyãa ƃa Káɣâlai. Gɛ̀ ní, ńyáai a Eezuɛ Ŋɔɣâla Maa Waai ka pâi ńaa ma tɛ̂i.

¹⁷“Kpele-wɛ̂li a gôlo-ƃelai da ǹuu doo-mu-ƃelai sòŋ, yá fé naa a gɛ́ɛ dí díkpele la, gɛ̀ ní, ńyãa Eezuɛ Ɣalai, ŋa pâi dífɛli-wôoi mɛnîi, ŋá yá tɛ́ɛ dípɔ. Fé pâi wɔ́lɔ ńyee kulâi dímu.

¹⁸Ŋa pâi gɛ̂i ya-lêe-ŋa dí láa ǹyée pɛlɛ-pɛlɛɛi su, ya-ɣɛ̂li pɛlɛɛ-ŋa dí láa ǹyée-ŋai loai. Ŋa pâi yá lâai vɛ̃ɛ-kpâlaŋ-ŋai su, ŋá gɛ́ ya-ɣɛ̂li pɛlɛɛ-ŋa dí láa ǹɔii kpâla-ŋai dîa.

¹⁹Ŋa pâi gɛ̂i sîda wuru-ŋa, akasia wuru-ŋa, matɔ wuru-ŋa, da ɔle wuru-ŋa dí kpɛtɛ vɛ̃ɛ-kpâlaŋ-ŋai su. Wôla-wuru-ŋa da pâi kpɛtɛ̂i ǹɔii-kpâlai ma. Pãi-wuru, zunipa da sapɔrɔ-wuru-ŋa da pâi kpɛtɛ̂i naa máŋ.

²⁰Ŋa pâi gɛ̂i tí nûa da naa kàa, dí gɔ́lɔŋ a gɛ́ɛ ńyãa Yâwɛɛ ƃé gɛ̀ tí. Da gàa dí gɔ̀lɔŋ da pâi târei zu a gɛ́ɛ ńyãai a Eezuɛ Ŋɔɣâla Maa Waai ƃé gɛ̀ é kɛ́.”

²¹Eezuɛ Ŋɔkâloŋ Yâwɛɛ a m̀ôi ǹyɛɛi, “Káai ǹɔii ŋuŋ-ŋai da kásiɣe a díɣâla-ŋai, ka káwoo ŋáa lɛ́. Ka pá a m̀aa sêre.

²²Ka m̀ɛni-ŋai lɛ́ kûa pâi kɛ̂i tínaa tuɛ-pere, a gɛ́ɛ da kɛ̀, kú kɛ́ a gɔ́lɔŋɔɔ. M̀ɛni-ŋai da wɔ́lɔ kɛ́i, ka maa mɛ̂ni-ŋai ŋáa lɛ́ ŋaŋ kûa da sâpoi dí díkɛ̀ lai.

²³Ka m̀ɛnii lɛ́ kûa pâi kɛ̂i tínaa tuɛ perei. Gɛ̀ ní kwa pâi gɔ̂lɔnii a gɛ́ɛ kákaa a ɣâla-ŋa kpîŋ. Ka mɛni lɛ́lɛɛ da kɛ́, kpaa máŋ kpalo mɛ̂ni da kú naa káa, nyíi pâi gɛ̂i kú yao kpɔ́ a ŋ̀ánaai.

²⁴Ká káa nɔ́ kpɛ́ni-kpɛni, mɛni lɛ́lɛɛ da kélee fa kûla kákɛ mɛni su. Núu nyɔ́mɔɔ-ŋa nɔ́ ƃé da káfɛ̀li.

²⁵“Ŋà núu da sìɣe zu nyii zeɛ́ɛ káa vóloi kulâi pere. A pâi kulâi yá-ŋûa-pere é kɔ́ pɛ́lɛ ǹúu láa túɛ-ƃelai dîa. A pâi díyee mɛi ɣâlei é díkîiŋ, yɛ̂ɛ pɔ̂rɔ-leɣi kpɛtɛ-nuu ƃé pɔ̂rɔ kîinii, a gɛ́ɛ é pɔ̂rɔ leɣi kpɛtɛ la.

²⁶Gbɛ̂ɛ ƃé m̀ɛnii ŋí ƃò a gɛɛ a pâi kɛ̂i é lɛ́ɛ pâi kɛ̂i? Vé tá kɛ́ ní tí. Káta fé tá da kɛ́ ní, kpaa máŋ kpîŋ ká lóno é pîlaŋ m̀a.

²⁷Ńyãa Yâwɛɛ ƃé kɛ̀ a maa-ŋuŋ ŋá kéla tɛ́ɛ Zerusâlɛŋ, a gɛ́ɛ é duŋ lɛ́lɛɛi ƃó ǹaa-ƃelai dîa ǹyɛɛ dîai, ‘Ka gáa, kánûai da kɛ́ pâi. Da kɛ́ pâi pôlu!’

²⁸Ŋá ŋ̀âla-pɔkɔɔŋ-ŋai sáma kàa, da fé pɔ̂ri ní mɛni da ƃôi ḿâ. Ŋà marê kɛ̂ɛ kɛ̀, da fé naa é m̀aa mare kɛɛi su-kula.

²⁹Wála-wala fé da yêei. Dífa pɔ̂ri mɛni da kélee kɛ̂i. Díkaa nɔ́ a ɣâla-pɔkɔɔŋ kpɛ́ni-kpɛni-ŋa.”