Read Kpelle Azaya 42 Bible Online

Azaya 42 - Kpelle bible

Azaya 42

¹Yâwɛɛ a m̀ôi ǹyɛɛi, “Ŋátii kɛ́-nuui ká ŋí. Ǹyaa ƃé ŋá zìɣe zu. Ńii lâai ǹyêei. Ŋa pâi Ŋámɔleŋ pûi gbonôi, ŋá wála-wala tɛɛ bɔ́. A pâi gɛ̂i nûa dí kɛ́ teniŋ ƃô mɛni-ŋa kɛ̀ ǹɔii ŋûŋ-ŋai su.

²Vé pâi kɛ̂i lâɣii, nûa dí kɛ́ ŋ̀óo mɛni ɣelêi-pere, kpaa máŋ bere lêe-ŋai ma.

³Diai dífii kpɛɛ̂i, vé pâi ǹɛɛ̂i naa dí tóo. Diai kili kɛ-zu fé díyêei, a pâi kili-kɛ-zu tɛɛ̂i dípɔ. A pâi pâi a teniŋ ƃô-laa núu kélee mɛni ma.

⁴A pâi gɛ̂i nûa dí kɛ́ teniŋ ƃô mɛni-ŋa kɛ̀ ǹɔii ma ƃɛ́. Vé pâi fɛɣɛ̂i é lɛ́ɛ la zu m̀ɛnii ŋí ŋ̀aa-see é kɛ́. Diai díkaa lɔii-ŋûŋ su kôya-ŋa sui, da pâi kɛ̂i ŋɔsɛŋ lɛ́ɛi maa kpɛ́nîi.”

⁵Ɣâla Yâwɛɛ ƃé ŋ̀elei kpɛ̀tɛ da ǹɔii. È fúlu-sãa kélee kpɛ̀tɛ ǹɔii ma, é núu-kpune kpɛtɛ é ǹyaa Ɣâla ǹɛwo da ŋɔmɔ̂leŋ pú gbonôi. A m̀ôi ŋɔtíi kɛ́ nuui ma ǹyɛɛi,

⁶“Ńyãa ƃa Yâwɛɛ. Ŋaâ ísiɣe zu a gɛ́ɛ í pá a teniŋ ƃô-laa ŋ̀éniɛi su. Ŋa wála-wala tɛɛ ípɔ, ŋ́gɛ ímɛi kâa. Ŋa pâi kpanaŋ-woo kɛ̂i ŋánûai yêei ísarâi, ŋá kwaa ponóɔɔ tɛ́ɛ ǹɔii-ŋai pɔ́ ísârai.

⁷Ŋ̀ɛi pu-ƃelai da pâi kwaa kâai ísârai, diai díkaa kpini-pɛrɛ mui, dí ŋuŋ ma ƃô sɔlɔ ƃó ísârai.

⁸“Ńyãa tɔnɔ kpéŋ nɔ́ ƃa Káɣâlai Yâwɛɛ. Ńaa ká ŋí. Fa ŋáfolo-laai da tɛ̀ɛ ɣâla da kpɛ́ni pɔ́. Fa ŋálaa maa tɛ̂i tɛ̂ɛ ɣâla da kpɛ́ni pɔ́.

⁹M̀ɛnii kélee ŋá m̀o yâ ǹaa túɛ perei, ŋ̀aa-see a kɛ̂. M̀ɛni ma, ŋa pá mɛni nina ƃôi yâ ŋ̀aa-see é lɛ́ɛ pâi kɛ̂i.”

¹⁰Ka wule nina too Yâwɛɛ ma. Káai ŋ̀éniɛi gwaa kéleei, ka laa maa tɛ̂ wule too Yâwɛɛ ma! Káai kélee yúo kpono mai, ka ǹáa maa tɛ́. Káai a vúlu-sãai yúo sui, ka ǹáa maa tɛ́. Káai kélee ǹɔii ŋuŋ-ŋai su kwaa kóya-kôyaa mai, ká ǹáa maa tɛ́.

¹¹Káai vɛ̃ɛ-kpâlaŋ-ŋai su taa-lee-ŋai sui, ka Ɣâla láa ma tɛ́. Káai kélee Keda lɔii sui ka ǹáa ma tɛ́! Káai kélee Sila taa-leei sui, ka tɛ́ ǹyée kpaya-kpayai su, ka lii-nɛ̃̂ɛ kula.

¹²Káai kélee ǹɔii ŋuŋ kôya-koyaa-ŋai sui, ka Yâwɛɛ ŋɔkɛ́tɛ-laai mɛni ƃó, ka ǹáa maa tɛ́!

¹³Yâwɛɛ káa yɛ̂ɛ kɔ-kuluƃa. Gbɛtɛ̂ɛi a tãi kélee yɛ̂ɛ kɔ-kuluƃa kɔ́-kɔ mɛni ma. A ŋ̀óo pilîi ŋɔkɔ-kuluƃa-ŋai dîa a gɛ́ɛ dí díkpîŋ kpɛtɛ. A ŋɔwála-wala-laai lɛ̀ ŋɔkpɔara-ƃelai dîa.

¹⁴Ɣâla a m̀ôi ǹyɛɛi, “Ŋa ḿɛi sáa ŋánûai yêei a zu kôyaa. Fé dífɛli-wooi su toôi. Kɛ́lɛ ŋa pá díwoo su toôi. Ŋa wɔ̂lɔi yɛ̂ɛ nɛnî a kɛ̀ koi-têe su.

¹⁵Ŋa pâi ǹyée pɛlɛ-pɛlɛɛi da gbaya-kpayai wôloi. Ŋa pâi gɛ̂i gala-ŋai da ŋ̀úru-ŋai kélee dí kpála. Ŋa pâi nyá-ŋai kélee kpâlai, ǹaa é kɛ́ a fɛ̃ɛ-kpâlaŋ, ǹya-ɣɛ̂li pɛlɛɛi kélee dí kpála.

¹⁶“Ŋa pâi tɔɔ̂i ŋánûa ŋɛ́i púɔɔ-ŋai túɛ, ŋá tɛ́ɛ a dia a berei dífe tá tɛ̀ɛ ní lai. Ŋa pâi díkpinii kɛ̂i a kwaa ponoɔɔ. Ŋa pâi bere kilɛ-kilɛ-ŋai su sãâi. Ŋákono teei ká ŋí, ǹyaŋ fé pâi wɔ́lɔ m̀aa fálenîi.

¹⁷Diai kélee da ɣâla-pɔkɔɔŋ-ŋa tɔ̀ɔ ḿbɔɔ ŋái, ŋa pâi ǹyée kulâi dímu, ŋá díŋumɛ. Ŋa pâi gɛ̂i tí a diai da ɣâla pɔkɔɔŋ-ŋa tòli a díɣâla-ŋai.”

¹⁸Yâwɛɛ a m̀ôi ǹyɛɛi, “Káŋɛi pûɔɔi, káwoli tíniŋɔɔ. Kɛ́lɛ ka káŋɛi lá ƃó, ká kwaa káa, ká káwoli tɔ́ɔ kpɔ́ a ǹɛ́lɛɛ!

¹⁹Núu da fé naa ŋ̀ɛi púɔɔ yɛ̂ɛ ŋátii kɛ́-nuui. Núu da fé naa ŋ̀óli tíniŋɔɔ yɛ̂ɛ ŋákelai ŋá dɛ̀ɛi. Gbɛ̂ɛ ƃé ŋ̀ɛ́i pûɔɔi yɛ̂ɛ ǹúui nyii ŋá zìɣe zui, kpaa máŋ ŋ̀ɛ́i púɔɔ yɛ̂ɛ ńyãa Yâwɛɛ ŋátii kɛ́-nuui?

²⁰Eezuɛ-ŋa, ka mɛni támaa ŋɛ́i káa, kɛ́lɛ káfa kátûa-pere maa fáleŋ. Káwoli káa kâa, kɛ́lɛ káfa mɛ́ni mɛ̂ni.”

²¹Yâwɛɛ káa a teniŋ-ƃô Ɣala. M̀ɛni ƃé a ŋ̀wɛli la núu kélee dí ŋɔtɔ̂ŋ-ŋai mɛi káa, dí ƃaa kɛ́-maa tɛ́ɛ ŋɔtɔ̂ŋ-ŋai pɔ́.

²²Kɛ́lɛ ŋ̀wana lɔ̂ɔ-ƃelai da ŋɔnûai yêei sãa kélee kúla díyêei. Da dípili kpini-pɛrɛ mu. Dá da-ŋa pú lóa-ŋa su. Da mɔ̃lɛ̂i, núu da fé naa é díkula yêei kɛ́.

²³Kátà a pâi ŋ̀óli tɔɔ̂i m̀ɛnii ŋí ma? É kúla sâa ma, ka pâi káwoli tɔɔ̂i m̀ɛnii ŋí ma a ǹɛ́lɛɛ?

²⁴Kúai a Eezuɛ-ŋai, gbɛ̂ɛ ƃé kú tɛ̀ɛ zãâ kula yêei kɛ́-ƃelai ŋí pɔ́i? Yâwɛɛ ǹyaa kpîŋ ƃé gɛ̀ tí zɔnyɔ̂ŋ-ŋai kú gɛ̀i, mɛni ma. Kúfe kúkɛ̀ ɣéniɛi kɛ́ ní yɛ̂ɛ berei è kɛ̀ ŋ̀wɛ̂lii lai, kpaa máŋ kú ŋ̀óo mɛni.

²⁵È ǹíi ŋwàna kûa yɛ̂ɛ ŋɔŋ a tèe láa kpâla ma, é gɛ́ kú mɔ̃́lɛ kɔ́ su. Ŋɔlii-ŋwânai è kúai a Eezuɛ-ŋai kúkêreŋ yɛ̂ɛ ŋɔŋ. Kɛ́lɛ kúfe m̀ɛnii ŋá káa ní kɛ̀ kɛ̂i. Kúfe mɛni da maa kɔ́ri ní a dɔnɔ kpîŋ.