Read Kpelle Azaya 43 Bible Online

Azaya 43 - Kpelle bible

Azaya 43

¹Eezuɛ-ŋa, Yâwɛɛ nyii núu-kpune kpɛ̀tɛi, a m̀ôi kâa ǹyɛɛi, “Káfe yào. Ŋa pâi káŋuŋ maa ƃôi kákpɔara-ƃelai yêei. Ńyãa ƃé kásìɣe zu a gɛ́ɛ ká kɛ́ a ŋátii kɛ́-ƃela. Kákaa a ḿbɔɔ.

²Kà kɛ̀ tɛɛ̂i ya-ɣiliŋ kpanaŋ su, sɛŋ da fé pâi kɛ̂i a káa. Ŋa pâi kɛ̂i kákɔlɛ. Mɛni kpânaŋ da fé pâi wɔ́lɔ káyee mɛi ɣâlei. Ka sìa ŋɔŋ su vé pâi kákêreni. Su-kɔ̂ɔŋ kpanaŋ da fé pâi wɔ́lɔ káyee mɛi ɣalei.

³Ńyãa ƃa Káɣâlai Yâwɛɛ. Ńyãa ƃa Eezuɛ Ŋɔɣâlai Maa Waai. Ńyãa ƃa kákula yêei kɛ́ Ɣalai. Ŋa pâi Ize-ŋai tɛɛ̂i a fela-fêi kápɔɔ ŋá. Ŋa pâi kámaa fálenîi a Itiopia da Seƃa-ƃelai.

⁴Ŋa pâi lɔii ŋuŋ da kpɛ́ni-ŋa su-ƃela tɛɛ̂i kákpɔara-ƃelai pɔ́ a gɛ́ɛ ká ŋuŋ ma ƃo sɔlɔ ƃó. Ŋa pâi gɛ̂i tí, kpɛ́ni fêi, ŋa káwɛli ni kámaa mɛni kpanaŋɔɔ ḿâ.

⁵Ŋ́gaa kákɔlɛ a ɣele kélee káfe yào. “Ŋa pâi kánûai kulâi vóloi kulâi-pere da vóloi liî-pere kpóŋ ma. Ŋa pâi pâi pôlu a kánûai kákpɔɔi lɔii ma.

⁶Ŋa pâi m̀ôi yá-ŋûa lɔii-kpiniŋ ma a gɛ́ɛ é ŋánûai tɛ́ɛ, ŋá m̀ó séɣai-pere lɔii kpiniŋ ma a gɛ́ɛ vé kànaŋ dîa. Tɔɔ ŋánûai dí kúla ǹɔii ŋuŋ su kôyaa-ŋai su, da ŋ̀éniɛi gwaa kélee.

⁷Díkaa a ŋánûa. Ŋá díkpɛ̀tɛ a gɛ́ɛ díkɛ laa maa tɛ̂ tɛ̀ɛ ḿbɔ.”

⁸Ɣâla ǹyɛɛi, “Ŋánûai ŋáa lɛ́ɣɛ ma kwaa tɔ̂nɔ ma. Díŋɛi káa dîa, kɛ́lɛ dífa kwaa kâa. Díwoli káa díŋuŋ ma, kɛ́lɛ dífa mɛni mɛ̂ni!

⁹M̀ó ŋ̀éniɛi su-ƃelai kélee dîa a gɛ́ɛ dí díŋa lɛ́ɣɛ gîe ma. Díɣâla-ŋai nenɛ̂ ƃé a m̀ɛnii ƃò gáa kɛ̂i sâai? Dí pá a sêre-ŋa dí dímaa sêre faa kɛ́, a gɛ́ɛ é ǹɛ́ a gɛ́ɛ dímɛnii lɛ̂lɛɛi, é díwoo maa sêre faa kɛ́ a gɛ́ɛ gáa a tɔ̃yâ.

¹⁰“Eezuɛ-ƃela, káa ƃa ŋásêre-ŋa. Ŋá kásìɣe zu a gɛ́ɛ ká kɛ́ a ŋátii kɛ́-ƃela, a gɛ́ɛ ká gɔ́lɔŋ ńyãa nɔ́ ƃa Káɣâla tɔnɔi, ká láa a ńyãa. É kúla ḿbôlu, ɣâla da kpɛ́ni kélee fé naa. Da fé naa, ǹyaŋ da fé pâi wɔ́lɔ kɛ̂i naa.

¹¹“Ńyãa nɔ́ ƃa Yâwɛɛ. Ńyãa nɔ́ ƃa kákula yêei kɛ̀ kákpɔara-ƃelai yêei.

¹²M̀ɛni-ŋai kélee kɛ̂i, ńyãa ƃé dímaa mɛ̂ni ƃò ǹaa túɛ. Ŋá kpɔŋ mâa tɛ̀ɛ kápɔ. Ɣâla da kpɛ́ni fé dímaa mɛ̂ni ƃó ní. Káa ƃa ŋásêre-ŋa.

¹³Ŋ́gaa a Ɣâla, ǹyaŋ ŋa pâi kɛ̂i a Ɣâla wɔ́lɔ-wɔlɔ da wɔ́lɔ-wɔlɔ. Núu da fa pɔ̂ri kulâi ŋáwala-walai mu. M̀ɛnii ŋa gbɛ̀tɛi, núu da fa pɔ̂ri m̀aa fálenîi.”

¹⁴Eezuɛ Ŋɔɣâla Maa Waai nyii gáa a káŋuŋ maa ƃó Ɣâlai ǹyɛɛi, “Ŋa pâi káŋuŋ maa ƃôi, ŋá kákula Babelɔŋ-ŋai yêei. Ŋa pâi kɔ-kuluƃa-ŋa tɛɛ̂i naa dí ǹaa siɣãŋ-ŋai lá wólo. Ǹaa-ƃelai dílii-nɛ̃ɛ kula-wôoi a pâi penêi a wɔ́lɔ-wôo.

¹⁵Ńyãa ƃa Yâwɛɛ, Káɣâla Maa Waai. Eezuɛ-ŋa, ńyãa ƃé kákpɛ̀tɛ. Ńyãa ƃa Kákâloŋ.”

¹⁶Yâwɛɛ è wɔ́lɔ pere lâa Yúo Kpɔ̂lu sâmai kámɛni ma.

¹⁷È kɔ-kuluƃa kpulu su-kàra nyíi-ŋai kɛ̀ soo-ŋa mɛi, da soo sia-kêleŋ-ŋai sui. Díkelee dí tòo da fé pɔri ní m̀u-siɣêi. Díkelee dí nìiŋ yɛ̂ɛ da ŋɔŋ lìiŋ.

¹⁸Kɛ́lɛ Yâwɛɛ a m̀ôi ǹyɛɛi, “Ka nia m̀ɛni-pɔlɔ-ŋai dîa. Káfe kànaŋ dîa.

¹⁹Ka m̀ɛni nina-ŋai káa ŋa gɛ̂i. Ŋa pâi pere lâai vɛ̃ɛ-kpâlaŋ su. Ŋa pâi gɛ̂i ya-ɣɛ̂li-pɛlɛɛ dí láa naa.

²⁰Ǹɔɔ fɛnɛ-sãai da pâi ƃaa kɛ́ maa tɛɛ̂i ḿbɔ. Ǹɔɔ ɣîla-ŋai da dua-too ŋɔni-ŋai da pâi laa tɛ tɛɛ̂i ḿbɔ. Ŋá gɛ́ yá é láa vɛ̃ɛ-kpâlaŋ su a gɛ́ɛ ŋánûai ŋá dí sìɣe zui, díkɛ díkpele la.

²¹Ńyãa ƃé ŋánûai kpɛ̂tɛ. Dia máŋ da pâi laa maa tɛ̂ wule-ŋa toôi ḿâ.”

²²Yâwɛɛ a m̀ôi ǹyɛɛi, “Eezuɛ, yâ ŋɔ́nɔ nia ḿâ. Ífe ŋɔ́nɔ ḿvɛlîi.

²³Ífe ŋɔ́nɔ ƃála kulâi ḿâ a kéreŋ sala, kpaa máŋ í ƃaa kɛ́ maa tɛ́ɛ ḿbɔ a ísâla sãai. Fé fũa-fũa tɔɔ̂i yâ a gɛ́ɛ í sâla kula ḿâ a mii-sãa sala sãa, kpaa máŋ í sâla kula ḿâ a kéreŋ sãa kúŋ nɛ̃ɛ.

²⁴Ífe niî sɛŋ kúŋ nɛ̃ɛ da yá ní a sɛŋ-kao ḿɛni ma, kpaa máŋ í ńii láa a ísâla suai ŋ̀úlɔ da. Kɛ́lɛ íkaa nɔ́ sɔnyɔ̂ŋ kɛ̂i a ńyãa. Ya kɔlɔ kpɛ́ɛ ḿâ a ísɔnyɔ̂ŋ ŋánaai.

²⁵Ŋ́gaa a Ɣâla. Ńyãa ƃa núu su-mɛni lɛ̀ɛ. Ŋa gɛ̀ tí, kpɛ́ni fêi, ŋ́gaa a ńyãa Ɣâla. Ŋa pâi ísu-mɛni lɛɛ̂i zɔnyɔ̂ŋ-ŋai ya gɛ́i m̀ɛni ma.

²⁶“Pá kwa kú mɛni kpɛtɛɛ kɛ́ gîe ma. Kú lí m̀ɛni sâa ƃó kerei mu í ímɛnii láa. Ímɛnii lɛ́, dí gáa à kɛ̀ gáa a tɔ̃yâ.

²⁷Kánâŋ pɔlɔ-ŋai dí sɔnyɔ̂ŋ kɛ̀. Kálaa túɛ-ƃelai dí sɔnyɔŋ kɛ̀ a ńyãa,

²⁸dí ŋákwaa ma waai maa tĩa kàra. M̀ɛnii ŋí ƃé gɛ̀ ŋá ǹɛɛ naa kákpɔara-ƃelai dí ƃâa kula kâa, dí ká su-kara.”