Read Kpelle Azaya 45 Bible Online

Azaya 45 - Kpelle bible

Azaya 45

¹Yâwɛɛ a Sarɔ siɣe zu a gɛ́ɛ í kɛ́ a ŋátii kɛ́-nuu. È zìɣe zu a gɛ́ɛ é lɔii ŋuŋ-ŋa mɛi kâloŋ-ŋa yée mɛi ɣále. A pâi daa-lêe-ŋai maa kóli siɣãŋ-ŋai wôloi berêi. Yâwɛɛ è m̀o ŋɔ́nɔ Sarɔ ma ǹyɛɛi,

²“Ńyãa kpîŋ ƃé pâi tɔɔ̂i ítuɛ. Ŋa pâi ǹyée pɛlɛ-pɛlɛɛi da gbaya-kpayai wôloi íperêi, ŋá m̀ara siɣãŋ-ŋai wólo, ŋá ǹá kɔli kôya-goyai fũa-fũa.

³Ŋa pâi tɔɔ-sãa tɛɛ̂i ípɔ nyii núu-kpune da fé pâi kɛ̂i a ǹaa kɔ́lɔŋɔɔi. À kɛ̀ tí, gɛ̀ ní ya pâi gɔ̂lɔni a gɛ́ɛ ńyãa ƃa Yâwɛɛ, Eezuɛ Ŋɔɣâlai nyii a ítòli a ílaai.

⁴Ŋá ísìɣe zu a gɛɛ í kpɔŋ mâa tɛɛ ŋátii-ƃelai Eezuɛ-ŋai pɔ́, ǹûai nyii ŋá dísìɣe zui. Ŋá gɛ́ ƃaa kɛ́ maa támaa kɛ́ ƃò yâ, berei máŋ ífe ŋ́gɔlɔŋ lai.

⁵“Ńyãa ƃa Yâwɛɛ. Ɣâla da kpɛ́ni fé naa é kúla ḿbôlu. Ŋa pâi íkponôi kpanánîi, berei máŋ ífe ŋ́gɔlɔŋ lai.

⁶Ŋa pâi gɛ̂i tí a gɛ́ɛ ŋ̀éniɛi gwaa kélee su-ƃela dí gɔ́lɔŋ a gɛ́ɛ ńyãa ƃa Yâwɛɛ, ǹyaŋ Ɣâla da kpɛ́ni fé naa é kúla ḿbôlu.

⁷Ńyãa ƃé kpíni da kwaa ponóɔɔ kpɛ̀tɛ. Ŋa lûwa làa nûa dîa, ŋ́gɛ mɛni kpɔ̂lu làa da-ŋa dîa. Ńyãa ƃa Yâwɛɛ. Ńyãa ƃa m̀ɛni-ŋai ŋí kɛ̀.

⁸Ŋa pâi ŋ̀ele-kɔ̂lɔŋ lá ƃôi teniŋ-ƃo mɛni é kúla naa é yéŋ ǹɔii ma yɛ̂ɛ tuna a pù. Ŋa pâi ǹɔii ŋuŋ ma ƃôi, ŋá tɔ̃yâ mɛni-ŋa kɔ́ɔ pîlaŋ naa. Ńyãa Ǹuu-namui Yâwɛɛ ƃé pâi m̀ɛni-ŋai ŋí kɛ̂i.”

⁹Kpalo-ƃêlai ǹúui ma a tɔ̂ɔ gbɛtɛ nûu lai. Íkaa nɔ́ yɛ̂ɛ pɔ̂rɔ-leɣi. Pɔ̂rɔ-leɣe fa mò gbɛtɛ nuu ma ǹyɛɛi, “Ya ŋ́gɛtɛ-pere kɛ̂i léŋ tí?” Pɔ̂rɔ-leɣi a pɔ̂ri m̀ôi ǹyɛɛ gbɛtɛ nuu fé yɛrɛ ní?

¹⁰Kpalo-ƃêlaai ǹúui ma a m̀o gáa-ƃela dîa ǹyɛɛ, “Ka ŋ́gbɛtɛ pere kɛ̀ léŋ ŋí kpaa máŋ ka ḿaa sɔlɔ ƃò lé mɛni mai?”

¹¹Yâwɛɛ, Eezuɛ Ŋɔɣâla Maa Waai, nyii Eezuɛ-ƃelai kpɛtɛ̂i, a m̀ôi ǹyɛɛi, “Lé ŋuŋ ma ƃo ƃé káyêei ká ḿarê kɛ̀ ŋ́gbɔɔi nuai mɛni ma, kpaa máŋ ká m̀ɛnii ƃó ḿâ ŋa pâi gbɛtɛ̂i a gɛ́ɛ ŋá gɛ́i.

¹²Ŋá ǹɔii kpɛ̂tɛ, ŋá núu-kpune kpɛ̀tɛ, ŋá bú naa mɛi. Ńyãa ƃé ŋ̀elei kpɛ̀tɛ da zu sãa kélee. Ńyãa ƃa vóloi, ŋ̀áloŋ da bɛ́mɛlɛ̂ŋ-kao-ŋai kélee téniŋ tɔ̀ɔ.

¹³Ŋá ńyee kpàmo Sarɔ ma a gɛ́ɛ é kɛ́ a ŋátii kɛ́-nuu. Dɔ̃yâ mɛnii kélee ŋa pâi gɔ́ɔ pîlani ǹɔii ma ƃɛ́i, ŋa pâi gɛ̂i zârai. Ŋa pâi zia pere-ŋai kélee su sã̂ai. Ǹyaa ƃe pâi ŋátaa-lêei Zerusâlɛŋ tɔɔ̂i ŋɔ́nɔ pôlu, é ŋánûai kúla ǹuɛ-laai su. Vé gɛ̂i fela-fei mɛni ma kpaa máŋ yee pɛlɛ ǹá sɛŋ mɛni. Ńyãa Yâwɛɛ ƃé m̀o tí.”

¹⁴Yâwɛɛ è mò Eezuɛ mà ǹyɛɛi, “Ŋa pâi Ize da Itiopia-ƃelai dítɔɔ-sãai kulâi díyêei ŋá dɛɛ kápɔ. Seba kɔ-kuluƃa-ŋa kôya-kôyaa wála-wala-ŋai da pâi kɛ̂i a kápɔɔ. Da pâi kɛ̂i a luɛ-ŋa káyêei. Ka pâi dítoôi yɔlɛ ŋá, ƃɛ́i kélee ka lì naai dí ƃò kápôlu. Da pâi pɛlɛ̂ɛi a kákɔɔ dí kɛ́ mò, dîyɛɛi, ‘Káɣâlai nɔ́ ƃa dɔ̃yâ Ɣalai. Ɣâla da kpɛ́ni fé naa é kúla bôlu.

¹⁵Eezuɛ Ŋɔɣâlai nyii a ŋɔnûai ŋuŋ ma ƃòi, ǹyaa ƃ Ŋ̀âlai nyii a gbîŋ lòoi.

¹⁶Diai da ɣâla pɔkɔɔŋ-ŋa kpɛ̀tɛ, dí díkɛ a díɣâla-ŋai, díkelee da pâi toôi gɔ́ɔ mu. A pâi díkɛ̂i wúlee é ƃâa kula dîa.

¹⁷Kɛ́lɛ Yâwɛɛ a Eezuɛ ŋuŋ ma ƃó. Lɔii-ŋuŋ da fé pâi wɔ́lɔ pɔrîi ǹyée mɛi ɣâlei. Ƃaa kûla maa fé wɔ́lɔ ŋɔ́nɔ pâi sɛ̂lɛnii dîa.’ ”

¹⁸Yâwɛɛ ƃé ŋ̀ele-kɔ̂lɔŋ-ŋai kpɛ̀tɛ. Ǹyaa nɔ́ ƃa ɣâla! Ǹyaa ƃé ǹɔii pù gîe ma, é gbɛ̀tɛ. È gbɛ̀tɛ a gbanaŋɔɔ. Gáa naa wɔ́lɔ-wɔlɔ da wɔlɔ-wɔlɔ. Vé gbɛ̀tɛ ní kpɛ́ni-kpɛni. È gbɛ̀tɛ a núu-kpune kɛ̂i. Ǹyaa ƃé m̀o ǹyɛɛi, “Ńyãa ƃa Yâwɛɛ. Ɣâla da kpɛ́ni fé naa é kúla ḿbôlu.

¹⁹Fé lóno ní loo-pêre su, kpaa máŋ ŋá lóno ƃɛ́i ǹaa kpîniɛi. Ḿve m̀ó ní Zeeka ǹônii dîa a gɛ́ɛ dí ŋ́gɔri kpɛ́ni-kpɛni. Ńyãai a Yâwɛɛi, ŋà tɔ̃yâ ƃò. M̀ɛnii gáa a tɔ̃yâi, ǹyaa ƃé ŋa ǹɛ.”

²⁰Yâwɛɛ è mò ǹyɛɛi, “Káai kélee ŋuŋ ma ƃô sɔlɔ ƃò ǹɔii ŋuŋ kɛ́tɛi toɔ́ɔ pôlu mai, ka lɛɣɛ a kákîe ni. Káai kélee pù ká kúla ǹɔii ŋuŋ-ŋai yêei, ka káŋa lɛ́ɣɛ gîe ma m̀ɛni-sâa ŋá tée ɣenei ŋá! Diai da ɣâla pɔkɔɔŋ-ŋa fɛli nyíi-ŋai díkpɛtɛ̂ɛi a wúru-ŋai, táre fé díŋuŋ su. Da kɛ̂ nɔ́ ɣâla da kpɛ́ni-ŋa fɛlîi ǹyaŋ dífa ŋuŋ ma ƃô sɔlɔ ƃô da yêei.

²¹Ka lɛɣɛ a kákîe, ka kámɛni-ŋai pú gîe ma, ká pá a dia mɛni sâa ƃó kwaai ma. Diai pâi tɔɔ̂i kámɛni mai, dí díwoo ŋá lɛ́ díkîe ni dîa. Gbɛ̂ɛ ƃa m̀ɛnii ƃò kâa pâi kɛ̂i tínaa tuɛ-perei? Gbɛ̂ɛ ƃé wɔ́lɔ m̀ɛnii ŋí ƃò kâa ɣele kûu kpɛ́-kpɛ̂ɛ tɛɛ pôlu mai? Ńyãa Yâwɛɛ nyíi gáa a Ɣâla nyíi ŋɔnûai ŋuŋ ma ƃòi, fé m̀o ní kâa? Ŋ́gaa a teniŋ ƃô Ɣala. Ɣâla da kpɛ́ni fé naa é kúla ḿbôlu.

²²“Ka tínaŋ ḿbɔ naa pere ka ƃálo-laa sɔlɔ ƃó, káai a ŋ̀éniɛi su-ƃelai! Ka tínaŋ ḿbɔ naa pere, kpɛ́ni fêi, ńyãa nɔ́ ƃa Káɣâlai. Ɣâla da kpɛ́ni fé naa é kúla ḿbôlu.

²³M̀ɛnii ŋa mòi, ǹyaa nɔ́ ƃa kɛ̂. M̀aa fa fâleŋ. Ŋ́oo da fa tòo kpɛ́ni-kpɛni. Fúlu-sãa kélee da pâi pîlanii díŋume ŋá ŋ́ɛi túɛ, dí díkono tée a gɛɛ da pâi ƃaa kɛ́-maa tɛɛ̂i ḿbɔ.

²⁴“Da pâi môi a gɛɛ ńyãa tɔnɔ nɔ́ ƃé a gɛ̀ núu kponoi é kpanaŋ, gɛ́ tɔ̃yâ mɛni-ŋa kɛ̀. Diai da tɔ̀ɔ mai, da mɔ̃lɛ dí ŋumɛ.

²⁵Ńyãa Yâwɛɛ, ŋa pâi gɛ̂i Eezuɛ é ǹɔii-ŋûŋ-ŋai kélee pú gɔ́ɔ mu, a gɛ́ɛ Eezuɛ é ńaa maa tɛ́.”