Read Kpelle Azaya 46 Bible Online

Azaya 46 - Kpelle bible

Azaya 46

¹“Babelɔŋ lɔii su-ƃelai díɣâla-ŋai da pɛ̂lɛ díkɔɔ mu dí kɛ́ dífɛ̂lii, díwala-walai kpɛɛ ŋá a seri. Ŋ̀âla-ŋai ŋí ƃa Bɛɛ da Nebo. Da pâi díɣirîi taa-tulɛ-ŋa pôlu dí lí a dia lɔii-ŋuŋ da kpɛ́ni-ŋa su. Ŋ̀âla-ŋai ŋí díkaa a kpîri wuyɛɛ-ŋa daa tûlɛ-ŋai ŋí mɛni ma. Da pâi kɔlɔ kpɛɛ̂i dîa.

²Dífa pɔ̂ri díkpîŋ ŋuŋ ma ƃôi. Dí dísòŋ, dí lí a dia luɛ-lâa su. Babelɔŋ ɣala-ŋai kpɛɛ ŋá ká ŋí.

³“Káai a Eezuɛ-ƃelai pù ká kúla gɔ-sôŋ-laai sui, ka káwoli tɔ́ɔ ḿâ. Ńyãa ƃé kákpɛ̀tɛ. Ŋ́gbaaŋɔɔ̂i kámɛni ma é síɣe kámaa sɔlɔ ƃó tãi ma.

⁴Ŋa pâi lɛɛ̂i kámɛi kâai, é lɛɛ la zu káŋuŋ é poa. Ńyãa ƃa Káɣâlai. Ńyãa ƃé kákpɛ̀tɛ. Ŋa pâi kámɛi kâai, ŋá káŋuŋ ma ƃó.”

⁵Yâwɛɛ ǹyɛɛi, “Gbɛ̂ɛ ƃé ka pɔ̂ri ŋ́gɔɔ̂ni mai? Núu da káa kásama zeriɛ́ɛ ḿbɔ?

⁶Nûa da díyee lɔ̀ díkolâ-ŋai su dí gôo da káne-ŋa kùla naa, dí díwuyɛ kɔ̂ɔŋ, dí kɔli ɣale-ƃela féla fé la a gɛ́ɛ dí ɣâla pɔkɔɔŋ-ŋa kpɛtɛ la dîɛ dí díkɛ a díɣâla-ŋa. À kɛ̀ tí, da pɛ̂lɛ m̀aa ɣâla pɔkɔɔŋ-ŋai ŋí kɔ́ɔ mu díkɛ dífɛli.

⁷Gɔli ɣâle-ƃelai da kpɛ̀ɛ zãâi ŋí kpɛ̂tɛi, da dɛ̀ɛ ǹamela pɔ́, dí ǹáa díkarâŋ ŋá, dí lí a dia dípɛrɛ-ŋai lá, dí dítɔɔ dílôŋpo-ŋai su. Da kɛ̂ tɔɔ̂ni naa, dífa pɔ̂ri díkpono tûmoi. Da dífɛ̀li, dífa díwoo su tòo, kpaa máŋ dí díkula mɛni kpɔ̂lu da su.

⁸“Sɔnyɔ̂ŋ-ƃela, ka kákili ŋá sía é pîlaŋ m̀ɛni-ŋai dîa ŋa wɔ́lɔ gɛ́i. Káfe ǹia dîa.

⁹Ka kákili ŋá sía é pîlaŋ m̀ɛni-ŋai ma ŋá wɔ́lɔ dí kɛ̀ kásamai. Ka gɔ́lɔŋ a gɛ́ɛ ńyãa tɔnɔ nɔ́ ƃa Káɣalai. Ɣâla da kpɛ́ni fé naa é kúla ḿbôlu.

¹⁰M̀ɛni-ŋai pâi kɛ̂i é kúla gɔ́ɔ pîlani é tóo gbɛɛ ŋái mai, ŋá wɔ́lɔ dí maa mɛni ƃò kâa. M̀ɛni-ŋai kɛ̂i ŋá dímaa mɛni ƃò kâa tãi su-kôyaa tɛɛ pôlu ma. Ŋá m̀o kâa a gɛ́ɛ m̀ɛnii kélee ŋa m̀ôi, ŋaa see a kɛ̀. Ŋá m̀o kâa a gɛ́ɛ fa ŋ́oo sìɣe pôlu.

¹¹Ŋa pâi núu da kulâi vóloi kulâi-pere, ŋá pá la. A pâi kɛ̂i pâi, díŋ kɛ̀ tɛ̀ yɛ̂ɛ kuɛ koôŋ su tiŋ. M̀ɛnii kélee ŋá m̀oi ŋ̀aa-see a pâi kɛ̂i. Ńyãa Yâwɛɛ ƃe gbɛ̀tɛ ǹyaŋ ŋa pâi gɛ̂i.

¹²“Wolii-kpɔ̂lɔ-ƃela, ka káwoli tɔ́ɔ ḿâ. Káwolii kpɔ̂lɔi a gɛ́ kákɛ kákili-ŋa sìa a gɛɛ káfe pâi ŋuŋ ma ƃô sɔlɔ ƃôi a maa félaa.

¹³Ŋa pâi káŋuŋ ma ƃôi a maa félaa. Ǹaa su fé ŋɔ́nɔ kôya ní. Sɛŋ da fa pɔ̂ri káŋuŋ ma ƃó mɛnii kperâi. Ŋa pâi Zerusâlɛŋ ŋuŋ ma ƃôi, ŋá Eezuɛ mu-wuyɛ.”