Read Kpelle Azaya 47 Bible Online

Azaya 47 - Kpelle bible

Azaya 47

¹Yâwɛɛ è m̀o Babelɔŋ ma ǹyɛɛi, “Kula gâloŋ-laai su í pîlaŋ ǹɔii ma í sée m̀uluŋ su. Í kɛ̀ a taa-lêe ŋuŋ ma ƃóɔɔ. Núu da fé tá kɔ́ pɛlɛ ní yâ. Kɛ́lɛ lɔii-ŋûŋ-ŋa líi a pá kpelêi yâ. Ya pá kɛ̂i a luɛ.

²M̀ii-sãai táŋ kɔlii síɣe. Ya pá mii-sãa táŋ-nîi. Íŋɛi mɛi pɛlɛ sɛŋ kúla íŋɛi, í ísama ɣiri-seɣe-ƃelai fúloŋ, í ímaa kpôloŋ, í ǹya-lêei tíyeŋ.

³Ya pâi kɛ̂i a íkaŋ, nûa díkɛ íkàa. Ƃâa a pâi kulâi yâ. Ŋa pâi íkula maa kɛ̂i. Núu da fé pâi pɔrîi íkula yêei kɛ̂i.”

⁴Ŋ̀wála-wâla kélee Yâwɛɛ ƃa kúŋuŋ ma ƃó-nuui. Ǹyaa ƃa Eezuɛ Ŋɔɣâla Maa Waai.

⁵Yâwɛɛ è mò Babelɔŋ ma ǹyɛɛi, “See kpînii í ímɛi sáa. Dífe pâi ŋɔ́nɔ wɔ́lɔ ítôlii a lɔii-ŋuŋ da ŋɔkâloŋ-nɛni!

⁶Ŋá ńii ŋwàna ŋánûai dîa, ŋá tûa a dia yɛ̂ɛ ǹyaa ƃé dífe a ŋánûa, ŋá dítɛɛ ípɔ. Kɛ́lɛ ífe díŋɛi malôŋ káa ní. Ífe kpîŋ ǹúu pɔlɔ-ŋai ŋɛ́i malôŋ káa ní. Í kpîri wuyɛɛ-ŋa làa díŋûa.

⁷Íkɛ gâai ya pâi lɛɛ̂i ǹɛni kâloŋ-laai su wɔ́lɔ-wɔlɔ da wɔ́lɔ-wɔlɔ. M̀ɛni ƃé í ínûai sòŋ la a ǹyɔ́mɔɔ. Ífe íkili ŋá sia ní a gɛ́ɛ mɛni kélee kóyaŋ káa ma.

⁸“M̀ɛni ma, íwoli tɔ́ɔ m̀ɛnii ŋí ma. Sɛŋ wɛli kɛ̂tɛi yâ. Yá gâai nɔ́ íŋuŋ ma ƃôɔɔi. Ya gâai nɔ́ yɛ̂ɛ kwa yá kúpɔrîɛɛi, núu fé naa zeríɛɛ ípɔ. Íkɛ̀ gâai ífe pâi wɔ́lɔ kɛ̂i a pɔɔ-nɛni. Kpaa máŋ ílônii da mɛni fé pâi wɔ́lɔ pilîi zu.

⁹Kɛ́lɛ m̀ɛni feerɛi ŋí da pâi kɛ̂i a yá ŋ̀á ma fólo tɔnɔ yée mu. A nɛ̃ɛ ma íponiŋ kɛ́-ƃelai dí póniŋ sii kélee kɛ́, í wúlu kɛ́ í zɔu-zɔu tíyeŋ, ílônii da ípɔ̂ŋ da pâi saâi, ílɛɛ a pɔɔ-nɛni.

¹⁰“Í mɛni nyɔ́mɔɔ támaa kɛ̀. Íkɛ̀ gâai yɛ̂ɛ ǹyaa ƃé íkɛ̀ a íŋuŋ ma ƃóɔɔ m̀ɛni nyɔ́mɔɔ-ŋai ŋí kɛ́ɛi su. Íkɛ̀ gâai yɛ̂ɛ núu da kélee fé íkâai. Íkpîŋ tarei da ímɛni ŋá káai dí íkɛ̀ ípili mɛnîi. Í m̀o íkpîŋ ma yɛ̂ɛi, ‘Ŋ́gaa a ɣâla, ɣâla da fé naa yɛ̂ɛ ńyãa.’

¹¹Kɛ́lɛ mɛni kpɔ̂lu a pâi lâai ya ítɛ̂i-pere. Íponiŋ wala-wala-laai da fé pâi pɔrîi m̀ɛni kpɔ̂lui kperâi. Ísu a pâi karâi a maa félaa, nyíi íkili fé mai.

¹²Kɛ́ nɔ́ íponiŋ mɛni-ŋai da dɛli kpɛ́ mɛni-ŋai kɛ̂i. Ƃa lɛ̀ɛ díkɛ̂i é síɣe íloloŋ tãi ma. Tãi da da pâi kpɔŋ mâa tɛɛ̂i ípɔ. Kpaa máŋ dí kpɔ́ŋ mâa tɛɛ ípɔ í íkpɔara-ƃelai maa yáo.

¹³Wála-wala-laa da fé ŋɔ́nɔ íyêei berei máŋ ya lia-woo támaa sɔlɔ ƃó lai. Ya dáre-ƃelai marê kɛ́ a gɛ́ɛ dí kpɔŋ mâa tɛɛ ípɔ. Dia ƃa ŋ̀elei su mɛnii maa kɔ́ri. Bɛ́mɛlɛ̂ŋ-kao ninai a tɔ̀ɔ, m̀ɛni-ŋai pâi kɛ̂i, da m̀aa mɛ̂ni-ŋai ƃò naa túɛ.

¹⁴“Díkaa nɔ́ yɛ̂ɛ kala kpâla nyii ŋɔŋ a gèreŋ. Núu da fa pɔ̂ri seêi maa ŋɔŋ kɔlɛ é gɔ́lɛ ƃó. Dífa pɔ̂ri díkpîŋ ŋuŋ ma ƃôi ŋ̀ɔŋ lêŋ yêei. Ŋ̀ɔŋ lêŋ ŋɔwála-walai su kpanaŋɔɔ̂i.

¹⁵Dífe pâi m̀ɛni lɛ́lɛɛ da kɛ̂i yɛ̂. Ŋ̀elei su mɛni maa kɔ́ri-ƃelai ƃe íkili tɔɔ̂i wɔ́lɔ dîa íkɛ̀ ɣéniɛi su. Da pâi díyee kulâi kámu dí lí ƃɛ́i pere da naa wɛ̂lii. Dɔnɔ da kpîŋ fé pâi pɔrîi káŋuŋ ma ƃôi.”