Read Kpelle Azaya 49 Bible Online

Azaya 49 - Kpelle bible

Azaya 49

¹Káai a ǹɔii-ŋuŋ su kôya-koya-ŋai su-ƃelai ŋ̀einiɛi gwaa kéleei, ka káwoli tɔ́ɔ ḿâ. Dílɛɛ pâi ḿaa sɔlɔ ƃôi, Yâwɛɛ è ńzìɣe zu é ŋ́gɛ a ŋɔtíi kɛ́ nuu.

²È ŋ́gbɛ̀tɛ, é ḿaa kɔ̃ɔ é gɛ́ ŋ́oo ŋá liɛɛ yɛ̂ɛ ƃóa-sɔ̂kpɔ. È ḿɛi pɛ̂lɛ a ǹyée é ḿaa kɔ̃ɔ. È ŋ́gɛ̀ yɛ̂ɛ tɔ̃a ŋá-seneɛɛ, ŋ́gbɛtɛɛ tíi kɛ́ mɛni ma.

³È m̀o ḿâ ǹyɛɛi, “Eezuɛ, yá ƃa ŋátii kɛ́-nuui. Ísârai ƃé nûa da pâi ŋákɛtɛ-laai kɔ́lɔnîi la.”

⁴Ŋá m̀o ńyɛ̃ɛi, “Ŋaâ tíi kɛ́ kpɔ́ a ŋ̀ánaa fé sɛŋ da sɔlɔ ƃó ní zu. Ŋaâ kôlo nɔ́ kpɛ́ni-kpɛni.” Kɛ́lɛ ńâai a Ŋáɣâlai Yâwɛɛ. A pâi ḿaa kɔ̃ɔ̂i, é ḿvela fé díi mɛni ma ŋa gɛ̂i.

⁵Yâwɛɛ è ńzìɣe zu a gɛ́ɛ ŋá kɛ́ a ŋɔtíi kɛ́-nuu dílɛɛ pâi ḿaa sɔlɔ ƃôi. È gɛ̀ tí a gɛ́ɛ ŋá pá a ŋɔnûai Eezuɛ-ŋai pôlu gono-têe lɔii ma. Yâwɛɛ a ƃaa kɛ́ maa tɛɛ ḿbɔ. Ǹyaa ƃa kponoi kpânaŋ tɛ̀ɛ ḿbɔ.

⁶Yâwɛɛ è m̀o ǹyɛɛi, “Ŋátii kɛ́-nuui, tíi kpânaŋ káa ńyêei ímɛni ma. Vé nɔ́ a gɛɛ ípa a ŋɔnûai Eezuɛ-ŋai pôlu nyii-ŋai kùla gɔ́i zui, kɛ́lɛ ŋa pâi íkɛ̂i a kwaa ponóɔɔ ŋ̀éniɛi gwaa kélee mɛni ma. Ŋ̀éniɛi su-ƃelai kélee da pâi ŋuŋ ma sɔlɔ ƃôi ísârai.”

⁷M̀ɛnii ŋí Yâwɛɛ, Eezuɛ ŋuŋ ma ƃó Ɣala Maa Waai, è mò ŋɔtíi kɛ́-nuui ma. Lɔii-ŋuŋ-ŋa su-ƃela dí díyee kùla ǹúui ŋí mu, dí tɔ́ɔ m̀a, gɛ́ ƃò a ǹúu láa túɛ-ƃelai yée mu nuu. È mò m̀a ǹyɛɛi, “Kâloŋ-ŋa da pâi íkâai íŋuŋ ma ƃóɔɔ, dí ŋumɛ mâa tɛɛ ípɔ. Ǹúu láa túɛ-ƃelai da pâi íkâai dí tóo íkɔɔ mu, dí ƃaa kɛ́ maa tɛ́ɛ ípɔ.” A pâi kɛ̂i tí, kpɛ́ni fêi, Eezuɛ Ŋɔɣâla Maa Waa tɔnɔi, a ziɣe zu a gɛ́ɛ é kɛ́ a ŋɔtíi kɛ́-nuu.

⁸Yâwɛɛ è m̀o ŋɔnûai dîa ǹyɛɛi, “Káŋuŋ ma ƃó ɣelei a seri, ŋa pâi káŋuŋ ma ƃôi. Ŋa pâi káŋɛi malôŋ kâai, ŋá ŋ́oli tɔ́ɔ káwɔlɔ-wooi ma ŋá kpɔ́ŋ kâa. Ŋa pâi kámaa kɔ̃ɔ̂i, ŋá kámaa kpɛ́ pere sîi kélee su. Ŋa pâi gɛ̂i tí, kpɛ́ni fêi, ŋá ŋ́gono tèe káyêei. Ŋa pâi liî a káa pôlu kálɔii ma nyíi ǹaa è wɔ́lɔ lɛ̀ɛ a vóloi.

⁹Ŋa pâi m̀ôi diai dîa díkaa kpini-pɛ̂rɛ mu ńyɛ̂ɛ dîai, ‘Kaŋuŋ ma a ƃó.’ Diai díkaa kpínii ńyɛ̂ɛ dîai, ‘Ka kúla gbínii su ká lí kâa.’ Da pâi kɛ̂i yɛ̂ɛ ƃála-ŋa ƃé yée ma kala ŋûnu ŋá dí kɛ́ dílaa mìi.

¹⁰Puru da kpele wɛ̂li fé pâi wɔ́lɔ dípaâi. Dífe pâi wɔ́lɔ kɛ̂i vɛ̃ɛ-kpâlaŋ su fólo kɛ́ dí kêreŋ. A pâi kɛ̂i tí, kpɛ́ni fêi, dílaa túɛ nuui a pâi kɛ̂i a díwɛliɛɛ. A pâi liî a dia ya-ɣɛ̂li pɛlɛɛ-ŋa ma.

¹¹“Ŋa pâi pere lá ƃôi ŋánûai dîɛ yée-ŋa su, ŋá ǹaa kpɛtɛ a gɛ́ɛ dí tɛ́ɛ naa.

¹²Ŋánûai da pâi kulâi kwaa kôya-ŋa ma. Da-ŋa da pâi kulâi yá-ŋûa pere, da-ŋa dí kúla vóloi liî-pere, da-ŋa dí kúla Asiwaŋ taa-leei su nyii gáa séɣai-pere.”

¹³Ɣele-kɔ̂lɔŋ-ŋa, ka wule tóo! Lɔii, ye láɣi ɣelêi pere a lii-nɛ̃ɛ pere. Yée-ŋa, káa máŋ ka lii-nɛ̃ɛ wule-ŋa too ɣelêi-pere. Yâwɛɛ a ŋɔnûai ŋá-nɛnɛ. Diai mɔ̃lɛ̂i a pâi díŋɛi malôŋ kâai.

¹⁴Kɛ́lɛ Zerusâlɛŋ-ƃelai dí m̀o dîyɛɛi, “Yâwɛɛ a ǹyée kúla kúmu, a nìa kûa.”

¹⁵Nya ƃe Yâwɛɛ è díwoo su tòo ǹyɛɛ dîai, “Lóŋ-lee da a ǹîa ǹóŋ ma nyii è ŋíni tòo ǹái? À kɛ̀ kpîŋ nɛnî da a pɔ̂ri gɛ̂i tí a ǹóŋ, fé pâi gɛ̂i tí a káa.

¹⁶Zerusâlɛŋ, fé pâi wɔ́lɔ ńyee kulâi ímu. Ŋa ílaa pɔ̃yɛ ńyee-lîi.

¹⁷“Da pâi ítɔɔ̂i pôlu a ɣele kûu kpɛ́-kpɛ̂ɛ tɛɛ pôlu ma ílɛlɛ é tɛ́ɛ berei ma íkɛ̀ la a bɔlɔi. Diai tɔ̀ɔ yâi, da pâi pûi.

¹⁸Íŋɛi láa í m̀ɛnii káa kɛ̂i íkɔlɛ mai! Ínûai da díŋaa tɛ́ ma da pâi a ípɔ-taai pere. Tãi nɔ́ ŋ́gaa la a gɛ̀ ɣele-ma Ɣalai, ŋa pâi gɛ̂i ínûai maa mɛni é íŋɛi kúla, yɛ̂ɛ berei ǹɛnîi da pá dɛɛ̂i surɔ̂ŋ pɔ́i, m̀aa ɣiri-sã̂a da ŋ̀ɛ́i kùla lai.

¹⁹“Kálɔii su a kara a lɛɛ a lɔii pûŋ. Kɛ́lɛ ǹaa a pâi kɛ̂i a guro-té ǹûai mɛ̂ni ma pâi kɛ̂i naai. Diai ǹaa su-karai, da pâi pûi.

²⁰Ílônii nyii-ŋai í dímaa sɔlɔ ƃô gɔ-sôŋ laai sui, da pâi m̀ôi yâ a ɣele tɔ̂nɔ da dîyɛɛi, ‘Ǹɔii ŋí kuro-têi kúmaa mɛ̂ni ma. Kwa wɛ̂lii a lɔii ŋáa-waa!’

²¹Gɛ̀ ní ya pâi m̀ôi ílii su pere yɛ̂ɛi, ‘Gbɛ̂ɛ ƃé ǹîa-pɛlɛɛi ŋí maa sɔlɔ ƃô mîi? Ŋánîa-pɛlɛɛi kélee ŋuŋ lá è pìli, da fé ŋɔ́nɔ kɛ́ ní naa. Ŋá kɛ̀ kɔ-sôŋ laai lɔii-ŋuŋ su kôya su. Gbɛ̂ɛ ƃé pà a ǹîa-pɛlɛɛi ŋí? Ŋánîa-pɛlɛɛi kélee maa mɛ̂ni è pìli zu. Ńyãa tɔnɔ nɔ́ ŋa lɛɛ ɣéniɛ. Mí ƃé ǹîa-pɛlɛɛi ŋí dí kùla naai?’ ”

²²Ǹuu-namui Yâwɛɛ ǹyɛɛi, “Ŋa pâi ŋɛi kɛ́-maa sîi-ŋa lɛ̂i ǹɔii-ŋûŋ-ŋai dîa. À kɛ̀ tí, da pâi pâi a kánîa-pɛlɛɛi pôlu dípɔ-taai.

²³Kâloŋ-ŋa da pâi káŋa kɔnîi yɛ̂ɛ kánâŋ-ni. Dínɛyâai dí kámɛi káa yɛ̂ɛ kálee-ni. Da pâi pîlanii díŋume ŋá kákɔɔ mu, dí ƃaa kɛ́-maa tɛ́ɛ kápɔ. À kɛ̀ tí, ka pâi gɔ́lɔnîi a gɛ́ɛ ńyãa ƃa Yâwɛɛ. Ka kákili tɔ̀ɔ ḿâ, ŋumɛ fé pâi kápaâi.”

²⁴Ka pɔ̂ri kɔ-kuluƃa ŋɔtoo-maa sɛŋ kulâi ǹyêei? Kpaa máŋ ká pɔ̂ri kɔ-sôŋ kulâi kâloŋ wála-walaa yêei?

²⁵Yâwɛɛ a m̀arê kɛ̂ɛ-ŋai ŋí su-kula a tɔ̃yâ woo-ŋa ǹyɛɛi, “M̀ɛni-ŋai ŋí ƃé pâi kɛ́ tí-ti ƃôi. Da pâi gɔ-kûluƃai ŋɔkɔ-sôŋ-ŋai kulâi ǹyêei, dí gâloŋ wála-walaai ŋɔtoo maa sãai kélee kúla ǹyêei. Ŋa pâi kɔ̂i diai kélee pɔ́ pâi kɔ̂i kápɔi, ŋá kálônii ŋuŋ ma ƃó.

²⁶Ŋa pâi gɛ̂i kákpɔara-ƃelai dí díkîe ni paa. Da pâi kɛ̂i díkîe ni ŋãa kpelêi gɛ́ díkɛ̀ yɛ̂ɛ ŋwã̂ai. À kɛ̀ tí, ǹûai kélee da pâi gɔ́lɔnîi a gɛ́ɛ ńyãa Yâwɛɛ, káƃalo-nuui da káŋuŋ ma ƃó-nuui, Eezuɛ ŋɔwála-wala Ɣala tɔnɔi.”