Read Kpelle Azaya 55 Bible Online

Azaya 55 - Kpelle bible

Azaya 55

¹Yâwɛɛ a m̀ôi ǹyɛɛi, “Ka pá, káai kélee kpele-wɛ̂li káa kâai. Yá káa ƃɛ́ kámɛni ma! Ka pá káai kélee sɛŋ-kao fé káyêei, ka pá ká mii-sãa yá ká m̀ii. Ka pá ká ŋwã̂ai da niŋa ŋíni-ya yá. Káfe pâi seŋ kâo kpɛɛ̂i dímɛni ma.

²Lé ƃe kà káyêei sɛŋ-kao kɔlɛ̂i la sãâ pôlu, m̀aa sãai dífa kálii laai? Lé ƃe kà mɔ̃lɛ̂i la mii-sã̂a mɛni ma m̀aa mii-sãai dífa kápelai? Ka káwoli tɔ́ɔ ḿâ, ká m̀ɛnii mɛ́ni ŋa pâi m̀ôi kâai. Kà gɛ̀ tí, ka pâi kɛ̂i mii-sã̂a lɛ́lɛɛ-ŋa ŋ̀aa nɛ̃̂ɛ kulâi.

³“Ŋánûa, ka káwoli tɔ́ɔ ḿâ, ká pá ḿbɔ. Kà pà ḿbɔ, ka pâi lɛɛ̂i ɣele ma. Ŋa pâi wɔ́lɔ-wɔlɔ da wɔ́lɔ-wɔlɔ kpanaŋ-woo kɛ̂i káyêei. Ŋa pâi lûwa lâai kâa yɛ̂ɛ berei ŋá wɔ́lɔ ŋ́gono tèe la Deeƃé yêei, a ŋáwɔlɔ-wɔlɔ da wɔ́lɔ-wɔlɔ wɛli kɛ́-maai.

⁴Ŋá gɛ̀ a sêre ǹɔii-ŋûŋ-ŋai mɛni ma, ŋá gɛ́ a nûa láa túɛ-nuu gɛ́ díteniŋ tɔ̀ɔ.

⁵Ŋa pâi gɛ̂i ǹɔii-ŋuŋ da kpɛ́ni-ŋai zu-ƃela dífe kɛ́ ní a íkɔlɔŋɔɔ̂i, dí pá ípɔ a kîrɛ. Ńyãa Yâwɛɛ, Eezuɛ Ɣala Maa Waai, ŋa pâi gɛ̂i é kɛ́ tí. Ŋa pâi gɛ̂i ímu é wuyɛ, ƃaa kɛ́-maa támaa kɛ́ ƃò yâ.”

⁶Ka tínaŋ a Yâwɛɛ pɔ́ naa pere ká kɛ́ vɛ̀li a ɣele kélee. Ka dóli tãi ǹɛɣɛ̂i la a káai.

⁷Ŋwana-lɔ̂ɔ-ƃela, ka kátûa-pere maa fáleŋ. Káai káfe a teniŋ ƃô-ƃelai, ka kákili ŋá sîai nyɔ́mɔɔ-ŋai maa fáleŋ. Ka tínaŋ Yâwɛɛ pɔ-naa pere. Kà gɛ̀ tí, a pâi kámalôŋ kâai, é kásu-mɛ̂ni lɛɛ. Kwaa tínaŋ Yâwɛɛ Kúɣâlai pɔ́naa pêre.

⁸Yâwɛɛ è m̀o ǹyɛɛi, “Ŋákili ŋa-sia-ŋai fé yɛ̂ɛ káwɔ̂-ŋai, kpaa máŋ ńdûa-pere-ŋai kɛ́ ƃò yɛ̂ɛ káwɔ̂-ŋai.

⁹Berei nɔ́ ŋ̀ele-kɔ̂lɔŋ káa la ǹɔii mɛi-pere póŋ-poŋ, bere nɔ́ ƃé ŋákili ŋa-sîa-ŋai da ŋámɛni ŋá káai káa la káwɔ̂-ŋai mɛi-pere.

¹⁰“Ŋ́oo káa yɛ̂ɛ lúu da tuna. Lúu kpaa máŋ tuna a pù lɔii ma, a ǹɔii yɔ̀ɔ. À gɛ̀ sí-sãa dí kpɛ̀tɛ, mii-sã̂a támaa kɛ̀ ƃò naa mìi mɛ̂ni ma.

¹¹Bere ƃé a pâi kɛ̂i la a ŋ̀óoi ŋá mòi. M̀ɛnii kélee ŋá gbɛ̀tɛi, da fa fɛ̂ɣɛ. Ŋ́oo fé pâi pâi pôlu ḿbɔ kpɛ́ni, fɛ̂ɛ é m̀ɛnii kɛ́ ŋá dɛ̀ɛ a gɛɛ é gɛi.

¹²“Ka pâi kulâi Babelɔŋ a lii-nɛ̃ɛ, ka lí lii-sêe su. Ǹyée kpaya-kpayai da bɛlɛ-pɛlɛɛi da pâi kɛ̂i wule-ŋa toôi. Ŋ̀úru-ŋai dia máŋ da pâi kɛ̂i díyee ŋá lôkwai a lii-nɛ̃̂ɛ pere.

¹³Ƃɛ́i-ŋai ɣalêŋ kpɔlɔ-ŋa díkɛ̀ naai, sapɔlɔ-wúru kpanaŋ lɛ́lɛɛ-ŋa da pâi kpɛtɛ̂i naa. Ƃɛ́i-ŋai kala nyɔ́mɔɔ-ŋa da kâa kpɛ̀tɛ naai, matɔ-wuru-ŋa da pâi kpɛtɛ̂i naa. Da pâi kɛ̂i naa a wɔ́lɔ-wɔ́lɔ da wɔ́lɔ-wɔlɔ ŋɛi-kɛ-maa. Da pâi kɛ̂i naa a ńyãa Yâwɛɛ ŋá gɛi, ḿaa kili too-ŋa.”