Read Kpelle Azaya 56 Bible Online

Azaya 56 - Kpelle bible

Azaya 56

¹Yâwɛɛ è m̀o ŋɔnûai dîa ǹyɛɛi, “Ka tɔ̃yâ da teniŋ ƃô mɛni-ŋa kɛ́. Ŋa pâi kápɔ a ƃálo-laa tãi kpua yée mu.

²Ŋa pâi lûwa lâai diai dîa da Vii-tɔɔ-ɣelei mɛi kâai, dífa m̀aa tĩ̂a karai. Ŋa pâi lûwa lâai diai dîa díyee fé ŋwana-lɔ̂ɔ mɛni da kélee sui.”

³Ŋɔ̃́ya nyíi a gbîŋ kɛ́ a Yâwɛɛ ŋɔnûai dai, vé m̀o ǹyɛɛ, “Tɔ̃yâ ma Yâwɛɛ fé pâi ǹɛɛ̂i naa kwa ŋɔnûai kú vɛli kwaa tɔnɔ ma.” Zurɔ̂ŋ nyíi dí m̀elai, vé m̀o ǹyɛɛ, “Lóŋ káa pɔ̂ri da fé ḿî, m̀ɛni ma, fa pɔ̂ri wɔ́lɔ kɛ̂i a Ɣâla ŋɔnûai da.”

⁴Yâwɛɛ a m̀ôi maa surɔ̂ŋ kpîŋ ma ǹyɛɛi, “Yà Ŋáfii-tɔɔ-ɣelei mɛi kâa, í m̀ɛni-ŋai kɛ́ nyíi-ŋai da ńii làai, í ŋákono-têe wooi mɛi káa a teniŋ ƃô pere,

⁵gɛ̀ ní, ŋa pâi ŋɛi kɛ́-maa sɛŋ da tɔɔ̂i ŋápɛrɛi mu a gɛɛ nûa da gàa, ímaa mɛ̂ni kíli é lɛ́ɛ díkili ŋá é tɛ́ɛ la nîa-pɛlɛɛ támaa maa sɔlɔ ƃóɔɔ ma. Ímaa mɛ̂ni kíli fé pâi kpɛɛ̂i nûa kíli ŋá.”

⁶Ŋ̀ɔ̃ya-ŋai nyii-ŋai dí díkpîŋ kɛ̀ a Yâwɛɛ ŋɔnûai dai, dí kɛ́ ƃò a ŋwɛ́liɛɛ, dí kɛ́ tíi kɛ̀ m̀i, dí kɛ́ Ŋɔfii-tɔɔ-ɣelei mɛi kâa, dífa m̀aa tĩ̂a karai, dí kɛ́ ŋɔkono-tee wooi mɛi kâa a teniŋ ƃô perei, è m̀o dîa ǹyɛɛi,

⁷“Ŋa pâi pâi a káa ŋáyee maa waai Zãiyɔŋ ma, ŋá gɛ́ lii-sêe kɛ́ ƃò káyêei ḿvɛli pɛrɛi mu. Géreŋ sâla-ŋai ka pâi gulâi ŋáteƃelei ma da zama-sãai ka pâi pâi la ŋápɛrɛi mui, ŋa pâi ńyee seêi dímu. Nûa da pâi Ŋápɛrɛi tôlii a ɣâla fɛli kwaa ma núu kélee mɛni ma.”

⁸Ŋ̀wála-wâla kélee Ɣalai Yâwɛɛ nyíi ŋɔnûai Eezuɛ-ŋai kûla gɔ-sôŋ laai sui, a góno tée a gɛ́ɛ a pâi pâi a nûa da kpɛ́ni-ŋa é doo ŋɔnûai nyíi-ŋai kɛ̀ naai dîa.

⁹Yâwɛɛ è mò vɛnɛ-sãai dîa nyii-ŋai díkaa gbâlaŋ-ŋai, da nyii-ŋai ǹɔɔi sui, a gɛɛ dí pá dí ŋɔnûai míi.

¹⁰È m̀o dîa ǹyɛɛi, “Ǹúu láa túɛ-ƃelai ŋ́gili káa dîa ŋánûai mɛi káa mɛni mai, díŋɛi pûɔɔi! Táre da fé díŋuŋ su. Díkaa nɔ́ yɛ̂ɛ pɛ́rɛ maa kpɛ́ ɣila nyíi va kpêɣei. A kɛ̂ nɔ́ lâani gɛ́ ǹyii, gɛ́ see ƃô. È wɛ́lini a nyii mɛ̂ni.

¹¹Díkaa yɛ̂ɛ mii-sɛŋ wɛli ɣila-ŋa nyíi-ŋai dílii fa wɔ́lɔ làai. Mɛni ŋá káa târe da kélee fé díŋuŋ su. Dia kpîŋ dílii láa mɛni-ŋa nɔ́ ƃé da gɛ̀. M̀ála mɛi káa-ƃelai máŋ dífa mɛni ŋá kàa. Da tínaŋ díkpîŋ tûa-pere-ŋai pɔ́ pere. Díkelee da kɛ́ nɔ́ a sɛŋ wɛ̂li-ƃela díkɛ sɛŋ kɔ̂ri nɔ́ díkpîŋ mɛni ma.

¹²Díkaa nɔ́ a lɔɔ kpele-ƃela tee-tee. Da kɛ̂ m̀ôi dîyɛɛi, ‘Kwaa ŋwã́ai kpanaŋ támaa kɔ́ri, kú gbele, kúlii é láa. Tínaa a pâi kɛ̂i a ǹɛ́lɛɛ é tɛ́ɛ sâa ma.’ ”