Read Kpelle Azaya 58 Bible Online

Azaya 58 - Kpelle bible

Azaya 58

¹Yâwɛɛ a m̀ôi ǹyɛɛi, “Ká láɣi a zu-kɛ́tɛ yɛ̂ɛ túru woo! Ka Zeeka ŋɔnûai Eezuɛ-ŋai dísɔnyɔ̂ŋ-ŋai maa mɛ̂ni ƃó dîa.

²Da ḿvɛ̀li a ɣele kélee, díkɛ m̀o a gɛ́ɛ da ŋ̀wɛ̂lii kpɔ́ dí ŋásɛŋ lɛ́ɛi kɔ́lɔŋ, dí sía a ŋátɔ̂ŋ-ŋai wóo yɛ̂ɛ ǹyaa ƃé díkaa a teniŋ ƃô lɔii-ŋuŋ-ŋa nyíi-ŋai dífe tá díyee kùla ní ŋátɔ̂ŋ-ŋai mui. Da m̀ôi a gɛ́ɛ da ŋ̀wɛ̂lii ŋá tɔ̃yâ tɔŋ-ŋa tɛɛ dípɔ a gɛ́ɛ da kɛ̀ ḿvɛlîi, díkɛ gɛ̀ a lii-nɛ̃̂ɛ pere.”

³Da kɛ̀ m̀ôi dîyɛɛi, “Kwa kɛ̀ sûŋ siɣêi, Yâwɛɛ fé zu kɔ́lɔŋ lé mɛni ma? Kwa puru siɣêi ǹyaŋ vé ŋ̀óli tɔɔ̂i kûa lé mɛni ma?” Yâwɛɛ è m̀o dîa ǹyɛɛi, “Dɔ̃yâi ƃa kà kɛ̀ sûŋ siɣêi, ka kɛ̂ kánîa mɛni-ŋa kɛ̂i, ká kɛ́ diai lûaŋ da kɛ̂ tíi kɛ̂i kâai.

⁴Kà kɛ̀ sûŋ su, ka kɛ̂ laa-sâa kɛ̂i, kákɛ namu kɔ̀, kákɛ ká kîe-ni tùa a ƃɔtâai. Ka gâai ka kɛ̀ sûŋ siɣêi, kákɛ tùa a bere sîi ŋí, a pɔ̂ri gɛ̂i ńii é láa káyêei, ŋá káfɛli-woo-ŋai su too?

⁵Kà kɛ̀ sûŋ siɣêi, ka kákpîŋ mɔ̃̀lɛ. Ka luu sîa kâa, ká malôŋ tôo-maa sêɣe tòo kâa, ká káŋuŋ ma pîlaŋ yɛ̂ɛ wúru-lâa. Nyíŋi ƃé kà dòli a suŋ siɣɛɛ́i? Ka gâai kà gɛ̀ tí, ńii a pâi lâai káyêei?

⁶“Sûŋ siɣe pêre fe ŋí nyíi a ńii làai. Kɛ́lɛ, kà kɛ̀ sûŋ siɣêi, ka káyee kúla ká ŋwana lɔ̂ɔ tua-ŋai su nyii-ŋai da nûa ɣiri, da ŋ̀ôya mɛni-ŋai nyii gáa yɛ̂ɛ káraŋ doɔ́ɔ nûa kɔŋ mai. Diai ka díluanîi, ká tée dîa dí lí.

⁷M̀ii-sãai káyêei, ka da-ŋa tɛɛ diai pɔ́ puru a dípaâi, ká kwaa ma-ŋa tɛɛ diai pɔ́ díkɛ̂i fé mai. Ka káseɣe-ŋai da-ŋa tɛɛ diai pɔ́ dímaa sêɣe fé m̀ai. Káakaayɔɔ-ŋai da kɛ̀ kpáaŋ su, káfe kápôlu fè dîɛ.

⁸“Kà gɛ̀ tí, gɛ̀ ní, ŋákwaa ponoɔɔi a pâi kámaa ponôi, kásɛŋ sôli-maa-ŋai ŋáa é yéŋ. Ŋa pâi kɛ̂i kákɔlɛ a ɣele kélee a gɛ́ɛ ŋá káŋuŋ ma ƃó. Ŋà kɛ̀ kákɔlɛ, kpéŋ fé pâi ɣâlei ká tà ma.

⁹Kà ḿvɛli, ŋa pâi káwoo su-toôi. Kà ńdòli, ŋa pâi fâai. “Ŋa pâi gɛ̂i tí, à kɛ̀ kà kpèra kákîe-ni lúanîi mɛni pɛlɛ-pɛlɛɛ kélee su, ká kápôlu tɔɔ wóo nyɔ́mɔɔ sii kélee ƃóɔɔ ma, ká kpéra káyee-gbua lɛ̂i nûa dîa.

¹⁰Ka mii-sãa tɛɛ diai pɔ́ puru a dípaâi, diai da mɔ̃́lɛ̂i ká díkula maa mɛni kpɔlui su. Kà gɛ̀ tí, gɛ̀ ní gbínii doôi kâai, a pâi penêi a kwaa ponoɔɔ yɛ̂ɛ pɛ́mɛlɛ̂ŋ-kao ŋɔkwaa ponoɔɔ.

¹¹Ŋa pâi kámɛi kâai, ŋá kánîa sãa kélee tɛ́ɛ kápɔ. Ŋa pâi gɛ̂i kákɔlɔi ponoɔɔ kákponôi kpanaŋɔɔ. Ka pâi kɛ̂i yɛ̂ɛ ya-lêe kɔlɛ sua su si-sãa, ká ƃò yɛ̂ɛ ya-ɣɛ̂li nyíi va wɔ́lɔ kpalai.

¹²Ka pâi kátaa pîleŋ-ŋai tɔɔ̂i pôlu. Ka pâi dítɔɔ̂i yɛ̂ɛ berei dí wɔ́lɔ kɛ̀ la bɔlɔi. À kɛ̀ tí, nûa da pâi kákɔlɔnîi a ǹûia dísĩɣaŋ-ŋai tɔ̂ɔ pôlu, díbɛrɛ-ŋai tɔ́ɔ zui.”

¹³Yâwɛɛ è m̀o ŋɔnûai dîa ǹyɛɛi, “Kà Vii-tɔ̂ɔ-ɣelei mɛi kâa a ɣele kûu maa waa, ká kpéra kákpîŋ nîa mɛni-ŋa kɛ̂i a m̀aa ɣêlei tí, ká kátii-ŋai lɛ́ɛ, ká ziɣe a fólo kûu lɛ́lɛɛ, ká ƃâa kɛ́ m̀a a ká téɛɛ sia-sîa kɛ́ɛ ma, tíi kɛ́ɛ, da kánîa wòo-ŋa ƃóo,

¹⁴gɛ̀ ní, ka pâi lii-nɛ̃̂ɛ kulâi ńyãa Yâwɛɛ ńzarâi. Ŋa pâi gɛ̂i ŋ̀éniɛi gwaa kélee su-ƃelai díkɛ ƃaa kɛ́-maa tɛ̂ɛ kápɔ. Ǹɔii ŋá dɛ̀ɛ kánâŋ pɔlɔ-ŋai pɔ́i, ka pâi ŋ̀úlɔ kpelêi. Ńyãa Zeeka Ŋɔɣâlai ƃé m̀o tí.”