Read Kpelle Azaya 60 Bible Online

Azaya 60 - Kpelle bible

Azaya 60

¹Zerusâlɛŋ, ímu-siɣe í fólo yɛ̂ɛ vóloi. Yâwɛɛ ŋɔkwaa ponoɔɔi a ímaa pono.

²Kpíni a pâi tôoi ǹɔii-ŋûŋ-ŋai dîa, kɛ́lɛ Yâwɛɛ ŋɔfólo-laai a pâi gɛ̂i í fólo. Ŋɔkɛ-naa-laai maa kwaa ponoɔɔi a pâi kɛ̂i ímɛi.

³Lɔii-ŋuŋ-ŋa da pâi pâi íkwaa ponoɔɔi ma. Kâloŋ-ŋa da pâi pâi dí gwaa ponóɔɔ kɛ́tɛi káa bîlaŋɔɔi yâi.

⁴Íkɔlɛ ma káa, ímɛni-ŋai káa díkaa kɛ̂i. Ínûai díkaa díŋa tɛ̂i gîe ma, díkɛ pá dípɔ-taai. Ílônii-sinaai da pâi kulâi kwaa kôyaa ma dí pa. Da pâi liî a ílônii nɛyãai yɛ̂ɛ nîa-pɛlɛɛ.

⁵Ya pâi ǹaa kâai íkoi-nɛ̃̂ɛ kula. Ya pâi kpɛ̃lînii yɛ̂ɛ mɛni a kùla a núu. Da pâi pâi a ǹɔii-ŋuŋ ŋai su tɔɔ-sãai ípɔ. Da pâi kulâi a tɔɔ-sã̂a ǹyái pôlu pere dí pá a dia ípɔ.

⁶Soo-fáleŋ kpulu kɛ́tɛ a pâi kulâi Mediɛŋ da Ɛfa dí ílaa fɛ́ɛ. Da pâi kulâi Siƃa díkɛ pà a gôo da kéreŋ-sɛŋ kúŋ nɛ̃ɛ. Mɛni lɛ́lɛɛi Yâwɛɛ a gɛ́ yɛ̂ɛi, nûa da pâi m̀aa-tûŋ tôoi.

⁷Da pâi pâi ípɔ a Keda ƃala-ŋai kélee. Da pâi pâi máŋ a Nebayo ƃala sirɛ-ŋai ípɔ sâla kula mɛ̂ni ma. Da díkùla a sâla, Yâwɛɛ líi a pâi lâai m̀ɛni ma. Yâwɛɛ a pâi gɛ̂i ƃaa kɛ́-maa kɛ́ ƃò Ŋɔpɛ́rɛ maa waai ma.

⁸Lé-ŋa ƃé tɛɛ̂i ŋí yɛ̂ɛ ɣele-kɔ̂lɔŋ kolei? Díkaa nɔ́ yɛ̂ɛ tòloŋ-ŋa ƃé lenêi pôlu dítaa ŋá.

⁹Díkaa a yá-ŋa keleŋ-ŋa nyii-ŋai kulâi lɔii-ŋûŋ su kôyaa-ŋa su, díkɛ pà a Yâwɛɛ ŋɔnûai dípɔ-taai. Díkaa pâi pôlu a káne da gôo a gɛɛ díƃaa-kɛ-maa tɛ́ɛ la Yâwɛɛ pɔ́, nyii gáa a Eezuɛ Ŋɔɣâla Maa Waai, nyii a gɛ̀ lɔii-ŋuŋ-ŋa díkɛ ƃaa-kɛ́ maa tɛ̂ɛ ŋɔnûai pɔi.

¹⁰Yâwɛɛ è mò Zerusâlɛŋ ma ǹyɛɛi, “Ŋɔ̃́ya-ŋa da pâi kásiɣãŋ-ŋai tɔɔ̂i pôlu. À kɛ̀ tí, díkâloŋ-ŋai da pâi tíi kɛ̂i kâa. Ŋá ńii ŋwàna kâa, ŋá kákula maa kɛ́, kɛ́lɛ, ŋa pâi ŋáwɛli-kɛ maai lɛ̂i kâa, ŋá ká malôŋ káa.

¹¹Kásiɣãŋ lá a pâi kɛ̂i nɔ́ a m̀óɔɔ a kpíni da fólo, a gɛɛ ǹɔii-ŋûŋ-ŋai su kaloŋ-ŋai díkɛ pà a dítɔɔ-sãai ípɔ.

¹²Kɛ́lɛ, ǹɔii-ŋûŋ-ŋai nyii-ŋai dífe ve pâi tíi kɛ̂i kâai, ŋa pâi dísu karâi kpɔ́ kpúŋ. Sɛŋ da fé pâi lɛɛ̂i naa.

¹³“Lɛƃanɔŋ ŋɔfólo-laai a pâi pâi ípɔ, pãai, zunipa da sapɔlɔ wuru-ŋai da pâi pâi díkîe ma, dí gɛ́ ŋákwaa maa waai ma é kɛ́ a ǹɛ́lɛɛ, gɛ́ ŋɔfólo-laai m̀aa tɛ̂. Gɛ̀ ní ŋa pâi gâloŋ-pɛrɛi nyii ŋ́gɔɔ pîlaŋɔɔi naai, kɛ̂i é fólo.

¹⁴Diai tí kɛ̀ íluanîi, dílônii da pâi pâi dí dímaa pɛ́lɛ, díƃaa-kɛ maa tɛ́ɛ ípɔ. Diai nyii kélee wɔ́lɔ dípôlu tɔ̀ɔ yâi, da pâi tínanîi, dí pɛlɛ íkɔɔ mu, dí ífɛli. Da pâi ítôlii a ‘Yâwɛɛ ŋɔtaa-lêei,’ ‘Zãiyɔŋ nyii gáa a Eezuɛ Ŋɔɣâla Maa Waai ŋɔtaa-lêei.’

¹⁵“Íƃɛlɛ fé ŋɔ́nɔ pâi kɛ̂i a gbɛɛ́ díkoi dí íkpɔara yɛ̂ɛ berei dí wɔ́lɔ gɛ̀ lai. Ífe pâi kɛ̂i a taa-lêe nyíi núu da fé ŋɔ́nɔ zui, a lɛ̂ɛ a búŋ. Ŋa pâi íkɛ̂tɛi, ŋá gɛ́ íkɛ ƃò a ílɛlɛɛ. Lii-nɛ̃ɛ a pâi kɛ̂i yâ wɔ́lɔ-wɔlɔ da wɔlɔ-wɔlɔ.

¹⁶Lɔii-ŋuŋ-ŋa da kâloŋ-ŋa da pâi ímɛi kâai, yɛ̂ɛ berei tí kɔ̃ɔ-lee a ŋɔlôloŋ mɛi kâa lai. Ya pâi gɔ́lɔnîi a gɛ́ɛ ńyãa ƃé íŋuŋ-mâ ƃò, í gɔ́lɔŋ a gɛ́ɛ ńyãa Ŋ̀wála-wâla kélee Ɣâlai ƃé íkula m̀ɛni kpɔ̂lui su. Ńyãa ƃa íŋuŋ ma ƃó-nuui, Zeeka Ŋɔɣâla kɛ́tɛi.

¹⁷“Ŋa pâi gôo tɛɛ̂i ípɔ ƃara pɔ́ɔ ŋá, ŋá káne da ƃara tɛ́ɛ ípɔ kɔli da wuru pɔ́ɔ ŋá. Ŋa pâi kɔli tɛɛ̂i ípɔ kɔni pɔ́ɔ ŋá. Kálaa túɛ-ƃelai dífe ŋɔ́nɔ pâi kákîinii. Ŋa pâi gɛ̂i dí ká mɛi káa a tɔ̃yâ-laa da lii-sêe.

¹⁸Núu da fé ŋɔ́nɔ pâi mɛni su kara mɛ̂ni da kɛ̂i kálɔii ma yɛ̂ɛ berei da kâa gɛ̀ lai. Núu da fé ŋɔ́nɔ pâi kálɔii su karâi. Ŋa pâi ká mɛi kâai, ŋá ká maa kɔ̃́ɔ yɛ̂ɛ siɣãŋ. Ya pâi ńaa maa tɛ̂i kpɛ́ni fêi, ŋa íŋuŋ mâ ƃò.

¹⁹“Vóloi fé ŋɔ́nɔ pâi kɛ̂i a íkwaa ponoɔɔi a ɣele-ƃɔ́ɔ, kpaa máŋ ŋáloŋ é kɛ́ a íkwaa ponoɔɔ a kpíni. Ńyãa Yâwɛɛ ƃé pâi kɛ̂i a íwɔlɔ-wɔlɔ kwaa ponoɔɔi. Ŋáfolo-laai ŋɔkwaa ponoɔɔi a pâi kɛ̂i fôloi yá.

²⁰Í maloŋ-too maa ɣêle-ŋai da pâi kpɛɛ̂i. Ńyãa Yâwɛɛ ƃé pâi kɛ̂i a íwɔlɔ-wɔlɔ kwaa ponoɔɔi, nyii pâi tûai é tɛ́ɛ vóloi da ŋ̀áloŋ diai.

²¹Ínûai kɛ́ mɛni kélee a pâi kɛ̂i a zã́a. Ǹɔii a pâi kɛ̂i a dí pɔ́ɔ wɔ́lɔ-wɔlɔ. Ŋá díkpɛ̀tɛ, ŋá dísi, a gɛɛ dí ŋá kɛ́tɛ-laai lɛ́ núu kélee ma.

²²Ínuu-sûui gbɛɛ-ŋai a pâi kɛ̂i a núu-sûu kɛ́tɛ, guro-téi kɛ́ ƃò a lɔii-ŋûŋ wála-wâlaa. M̀aa ɣêlei tí a sèri, ŋa pâi gɛ̂i é kɛ́ a m̀aa félaa. Ńyãa ƃa Yâwɛɛ.”