Read Kpelle Azaya 64 Bible Online

Azaya 64 - Kpelle bible

Azaya 64

¹Eêi kɛ̀ í ŋ̀ele-kɔ̂lɔŋ láa ƃò íyeŋ ǹɔii ma, ǹyée kpaya-kayai dîi yào, díwolo, dí táa-tâa.

²Dîi kɛ̀ kpɛ̃lînii yɛ̂ɛ yá ƃé nɛ́ŋ-nîi ŋɔŋ ŋá. Pá í íwala-wala laai lɛ́ íkpɔara-ƃelai dîa, í gɛ́ ǹɔii-ŋûŋ-ŋai díkɛ kpɛ̃̀liŋ tãi da kɛ̂ la íŋɛi tuɛi.

³Tãi da íwɔlɔ ǹûai maa yâo nyii kɛ̀ a guláa a dîai. Ǹyée kpaya-kpayai dí íkàa, dí kɛ́ yào, díkɛ kpɛ̃liŋ.

⁴Núu da fé ta Ɣâla da káa ní yɛ̂ɛ yá, kpaa máŋ é m̀aa tûŋ mɛni, nyii a m̀ɛni sîi ŋí kɛ̀ diai da díkili tɔ̀ɔ m̀ai mɛ̂ni ma.

⁵Ya íyee sèe ǹûai da díyee see tɔ̃yâ-laa mu a lii-nɛ̃̂ɛ perei mû, berei ya ŋ̀wɛ̂lii dí díkɛ-ɣéniɛi kɛ́ lai, maa mɛ̂ni káa díkili ŋai. Í ílii-ŋwàna kûa, kɛ́lɛ kúkɛ̀ nɔ́ sɔnyɔ̂ŋ kɛ̂i. Berei máŋ í ílii-ŋwàna la a ŋ̀ánaai, kúkaa nɔ́ wɔ́lɔ sɔnyɔ̂ŋ kɛ̂i é síɣe tãi su kôyaa mà. Sɔnyɔ̂ŋ-ƃela kɛ́ɛ yɛ̂ɛ kúa, kwa pɔ̂ri ƃálo-laa sɔlɔ ƃôi.

⁶Sɔnyɔ̂ŋ káa kúkelee kûa. Kútûa-pere lɛ̂lɛɛi káa nɔ́ yɛ̂ɛ seɣe-sâa maa liƃiɛɛ. Kúsɔnyɔ̂ŋ a kúkɛ nɔ́ yɛ̂ɛ láa ƃé a kpála, fãa kɛ́ nâa pà doôi.

⁷Núu da fé naa a gɛɛ é tínaŋ ípɔ naa pêre, é ífɛli. Núu da fé naa é pá ípɔ naa a gɛɛ íkpɔŋ-mâ tɛɛ bɔ́. Ya íŋɛi lóo kûa, ya ípôlu tɔɔ kûa, kpɛ́ni fêi kwa sɔnyɔ̂ŋ kɛ́ a yá.

⁸Kɛ́lɛ, óo Yâwɛɛ, yá nɔ́ ƃa Kúnâŋ. Kúkaa yɛ̂ɛ leɣi-pɔ̂rɔ, ǹyaŋ yá ƃa ǹeɣi-tɔɔ nûui. Yá ƃé kúkpɛ̀tɛ.

⁹M̀ɛni ma, ífe ílii ŋwàna kûa a ŋ̀ánaa, kpaa máŋ kúsɔnyɔ̂ŋ maa mɛ̂ni é lɛ́ɛ kíli ŋa wɔ́lɔ-wɔlɔ. Kúkaa a ínûa. Kúmalôŋ káa.

¹⁰Ítaa Maa Waa-ŋai a nâa kɛ́ yɛ̂ɛ fɛ̃ɛ-kpâlaŋ su. Zerusâlɛŋ káa nâa yɛ̂ɛ taa pîleŋ nyii núu da fé ŋɔ́nɔ zui.

¹¹Kú Ɣâla-pɛrɛ Kɛ́tɛi nyii kɛ̀ a Maa Waa, ǹɛ́lɛɛi, ƃɛ́i kúnâŋ-pɔlɔ-ŋai da kâa ílaa maa tɛ̂ naai da ǹaa kéreŋ. Ƃɛ́i kélee kpɔ́ kú kɛ̀ a ǹaa wéliɛi, ǹaa a lɛɛ a pîleŋ ŋá.

¹²Yâwɛɛ, m̀ɛni-ŋai ŋí dífa pɔ̂ri ílii mu-siɣêi? Ífe pâi mɛni da kɛ̂i, ya pâi nɔ́ ǹɛɛ̂i naa kúkɛ mɔ̃̀lɛ a ŋ̀ánaa kɛ́ɛ ŋí?