Read Kpelle Azaya 65 Bible Online

Azaya 65 - Kpelle bible

Azaya 65

¹Yâwɛɛ è mò ǹyɛɛi, “Ŋá ŋ́gbîŋ lɛ̀ ǹûai dîa nyii-ŋai dífe kɛ́ ní ŋ́gɔ̂rii. Diai dífe kɛ́ ní ŋ́gɔ̂rii, ŋá ŋ́gbîŋ lɛ̀ dîa. Ǹɔii-ŋûŋ nyii vé kɛ́ ní ńdôlii, ŋá fâa ŋ̀óo mu ńyɛɛi, ‘Ńyãa ká ŋí, ŋa pâi kpɔnîi kâa.’

²Ńyee láa ƃôɔɔi nɔ́ ŋánûai perêi nyii-ŋai díŋuŋ su kpanaŋɔ̂ɔi, díkɛ mɛni nyɔ́mɔɔ kɛ̀, díkɛ tùa nɔ́ a dí kpîŋ perei, a gɛɛ dí pá ḿbɔ.

³Ŋumɛ fé dîa a dɔnɔ kpîŋ. Díkaa nɔ́ ńii ŋwânai. Díkaa nɔ́ sâla-ŋa kulâi díɣâla fɛli kwaa-ŋai ma, díkɛ kéreŋ-sɛŋ kúŋ-nɛ̃ɛ kèreŋ ŋ̀âla da kpɛ́ni-ŋai díɣâla teƃele-ŋai ma.

⁴Gbínii à pɛ̀lɛ, da lî gɔni-wôlo-ŋai da m̀olôŋ-saŋ-ŋai su, díkɛ lòno zaa-mɔ̃̂leŋ-ŋai pɔ́. Da ƃoi-sua mìi, díkɛ láo mìi nyii dí ŋ̀ili a sua nyii dí gùla a sâla ɣâla da kpɛ́ni-ŋa dîai.

⁵Ǹûai ŋí da kɛ̂ m̀ôi dí ƃarâi dîa dîyɛɛi, ‘Ka kula kú kɔlɛ, kúmaa wâai, káfa pɔ̂ri lɛɣɛ̂i kûa.’ Ḿva pɔ̂ri ńyee seêi nûa-sii kɛ́ɛ tí mu. Ŋá lii-ŋwânai káa yɛ̂ɛ ŋɔŋ dímɛni ma nyii va nîiŋ.

⁶“Ŋâa gbâa berei kpɛtɛ ŋa pâi díkula maa kɛ̂i lai. Dímɛni ŋá tée wooi káa nâa kɔlɔ ma. Ḿve pâi ŋ́ɛi naɣîŋ nii m̀ɛnii da gɛ̂i, m̀ɛi. Kɛ́lɛ, ŋa pâi dífela fêi m̀ɛnii dí gɛ̀i m̀ɛni ma.

⁷Ŋa pâi dífela fêi díkpîŋ sɔnyɔ̂ŋ da dínâŋ-pɔlɔ-ŋai díwɔ̂i mɛ̂ni ma. Da kéreŋ-sɛŋ kúŋ-nɛ̃ɛ kèreŋ ɣâla da kpɛ́ni-ŋa dîa díɣâla fɛli kwaa-ŋai ma ǹyée-ŋai ma, díkɛ lóno nyɔ́mɔɔ kɛ̀ é pîlaŋ ḿâ. M̀ɛni ma ŋa pâi díkula-maa kɛ̂i yɛ̂ɛ berei dísɔnyɔ̂ŋ pɔlɔ-ŋai kaa lai.”

⁸Yâwɛɛ è m̀o nyɛɛ, “Núu da fa pɔ̂ri kpɔmɔ-ƃa lɛ́lɛɛ karâi, kɛ́lɛ, da ŋwã̂ai kpɛ̀tɛ la. M̀ɛni ma, ḿve pâi ŋánûai kélee su karâi. Diai da tíi kɛ̀ mîi, ŋa pâi díŋuŋ-mâ ƃôi.

⁹Ŋa pâi lûwa lâai Eezuɛ-ŋai nyii-ŋai kùla Zuda ŋɔsuui sui. Gɛ̀ ní ǹɔii gáa ǹyée kpaya-kpayai mai, a pâi lɛɛ̂i a dílônii pɔɔ. Ǹûai nyii-ŋai ŋá dísìɣe zu, da tíi kɛ̂i ḿîi, da pâi seêi naa.

¹⁰Ŋánûai nyii-ŋai kɛ̀ ŋ́gɔ̂rii, díƃala-ŋai da pâi kɛ̂i díláa miî Salɔŋ. Dí niŋa-kpûlu-ŋai da pâi kɛ̂i dífii tɔɔ̂i Akɔ tiŋ-tiŋ su.

¹¹“Kɛ́lɛ, a pâi kɛ̂i a da kpɛ́ni ká mɛni ma káai ka kápôlu tɔ̀ɔ ḿâ, ka nia Zãiyɔŋ ma nyii gáa a ŋá yée maa waai, kákɛ Gâa-ɣalai da Mɛni-ɣalai fɛ̂li ńyii-ŋai dí káa a ŋ̀âla-ŋai nyii-ŋai da lɔku tɛ̀ɛ núu pɔ́ díkɛ mɛni ŋá teei.

¹²Ká mɛni-ŋáteei ƃa ká sáa kɔ́ su, kpɛ́ni fêi tãi ŋá ká tòli lai, káfe fáa ní, kpaa máŋ ká káwoli tɔ́ɔ a tãi ŋálono lai. Ka gbɛ̀tɛ kákili-ŋa a gɛɛ ká ŋ́oo píli a ká kɛ́ mɛni nyɔ́mɔɔ kɛ̀ nɔ́.

¹³M̀ɛni ma ŋa m̀ôi a gɛɛ diai ḿvɛli díkɛ ŋ́oo mɛnii, da pâi mii-sɛ̂ŋ támaa miî, dí díkpele. Kɛlɛ, puru da kpele wɛ̂li da pâi ká kɛ̂i. Diai da ŋ́oo mɛnii, lii-nɛ̃̂ɛ a pâi kɛ̂i dîa, kɛ́lɛ ƃâa a pâi kulâi kâa.

¹⁴Ŋá tíi kɛ́-ƃelai da pâi wule toôi a lii-nɛ̃̂ɛ pere, kɛ́lɛ ka pâi wɔ̂lɔi a lii-too pôlu pere kásɛŋ-sôli maai su.

¹⁵Diai ŋá dísìɣe zui, da pâi kálaa kɛ̂i a nã́aŋ-sɛŋ. Ńyãai ŋ́gaa a Ŋ̀wála-wâla kélee Yâwɛɛi ŋa pâi ká paâi. Kɛ́lɛ, ŋa pâi láa nina seêi diai da ŋ́oo mɛnii dîa.

¹⁶Ǹúui nyii gáa ǹɔii su gɛ́ lûwa fɛlii, a pâi deniŋ ƃô Ɣalai marê kɛ̂i a gɛɛ é lûwa too m̀a. Ǹúui nyii pâi vôoi, a pâi vôoi a deniŋ ƃô Ɣalai láa. Da pâi niâi m̀ɛni kpɔ̂lu pɔlɔ-ŋai da tɛɛi dîa. Gɛ̀ ní ńyãa Yâwɛɛ ŋa pâi ŋ́ɛi loôi m̀ɛni kpɔ̂lu pɔlɔ-ŋai dîa máŋ.”

¹⁷Yâwɛɛ è m̀o ǹyɛɛi, “Ŋ́gaa nâa lɔii nîna da ɣele-kɔ̂lɔŋ nina-ŋa kpɛtɛ̂i. Ŋa pâi niâi kpɔ́ m̀ɛni-ŋai nyii-ŋai wɔ́lɔ kɛ̂i dîa.

¹⁸Ka kɛ́ a kálii-nɛ̃ɛ, ká kɛ́ koi-nɛ̃̂ɛ kùla ŋ̀éniɛ ninai su wɔ́lɔ-wɔlɔ da wɔ́lɔ-wɔlɔ. Lii-nɛ̃̂ɛ a pâi Zerusâlɛŋ ninai ŋa pâi gbɛtɛ̂i láa fɛ̂ɛi. Ǹyaŋ diai pâi kɛ̂i naai, da pâi kɛ̂i koi-nɛ̃̂ɛ kulâi.

¹⁹Ńyãa kpîŋ ŋa pâi kɛ̂i a ńii-nɛ̃ɛ Zerusâlɛŋ mɛni ma da ŋánûai. Wɔ́lɔ-wóo fé ŋɔ́nɔ pâi tɛ̂i naa. Lii tòo pôlu da fé pâi kɛ̂i naa.

²⁰Kwátara-ŋa dífe ŋɔ́nɔ wɔ́lɔ pâi saâi a dí kwatara tãi. Ǹyaŋ núu-pɔ̂lɔ-ŋai da pâi lɛɛ̂i ɣele ma dí pɔlɔ kpɔ́ a ŋ̀ánaa. Diai pâi kɛ̂i ɣele ma a kóraŋ ŋuŋ tɔ̂nɔi (100), da pâi dítôli a núu-tɔ̂ɔ-ŋa. À kɛ̀ núu da a sàa tãi tí é lɛ́ɛ pâi serîi, gɛ̀ ní gáa a ŋɛi-kɛ-maa maa a gɛ́ɛ ńyãa ƃé gùla maa kɛ̂.

²¹Nûa da pâi pɛ́rɛ-ŋa tɔɔ̂i dí kɛ́ ƃò dí mû. Núu da kpɛ́ni fé ŋɔ́nɔ pâi kɛ̂i dípɛrɛ-ŋai mû. Da pâi kpɔmɔ-ƃa kpalaŋ-ŋa sîi dí m̀á míi. Núu da kpɛ́ni fé ŋɔ́nɔ pâi díkpɔmɔ-ƃâ kpalaŋ m̀á miî. Ŋánûai da pâi nâmui ɣele ma yɛ̂ɛ wúru-ŋa. Zãâi ńyii kélee da pâi tíi kɛ̂i mài, da pâi ŋ̀aa-nɛ̃̂ɛ kulâi.

²³Díi-ŋai kélee kpɔ́ da pâi gɛ̂i, da pâi sɛŋ da sɔlɔ ƃôi zu. Mɛni kpɔ̂lu da fé pâi lâai dínîa-pɛlɛɛi da ma. Ŋa pâi lûwa lâai dínîa-pɛlɛɛi dîa é pɛlɛ díwɔ̂ nia-pɛlɛɛi dîa.

²⁴Ŋa pâi fâai dílɛɛ pâi ńdôlii. Da pâi lɛɛ̂i ḿvɛlii ŋá díwoo su too.

²⁵Lɔɔ-ɣîla-ŋa da ƃála-lônii-ŋa da pâi kɛ̂i dílaa miî gîe ma. Yala-sûlu-ŋa da pâi kɛ̂i kala miî yɛ̂ɛ berei tí niŋa-ŋa da gɛ̀ lai. Kali-ŋa dífe ŋɔ́nɔ pâi kɛ̂i a sɛŋ nyɔ́mɔɔ. Sɛŋ-nyɔ́mɔɔ sîi da fé ŋɔ́nɔ pâi kɛ̂i ŋáyee-maa waai Zãiyɔŋ ma kpaa máŋ mɛni nyɔ́mɔɔ da.”