Read Kpelle Azaya 7 Bible Online

Azaya 7 - Kpelle bible

Azaya 7

¹Gâloŋ Eeɣa è wɔ́lɔ kɛ̀ a Gâloŋ Uzia ǹóŋ-surɔ̂ŋ Zotaŋ ǹóŋ. È wɔ́lɔ kɛ̀ a kâloŋ Zuda lɔii mɛi. Tãi è wɔ́lɔ kɛ̀ la a kâloŋ, kâloŋ feerɛ dí kɔ́ pɛ̀lɛ Zerusâlɛŋ taa-leei ma, kɛ́lɛ díyee fé pɔri ní m̀a. Gâloŋ-ŋai ŋí ƃé kɛ̀ a Siria Kaloŋ Lesiŋ, da Limalia ǹóŋ Peka nyíi kɛ̀ a kâloŋ Eezuɛ lɔii mɛi a maa tãi tí.

²Tãi Zuda kaloŋ è m̀ɛni la a gɛɛ Siria kɔ kɔ́-ƃelai da Eezuɛ kɔkɔ́-ƃelai da díyee pú gîei a gɛɛ dí kɔ́ pɛ́lɛ mai, ǹyaa da ŋɔnûai dílii è tùmo-tumo yɛ̂ɛ fãa su-kpanaŋɔɔ a sɔ̀ɔ wolâ wuru-ŋa dîa.

³Nya ƃe Yâwɛɛ è m̀o Azaya ma ǹyɛɛi, “Ka íloŋ-surɔŋ Sɛɛ Zasu[1] ka lí Gâloŋ Eeɣa pɔ́ naa ka dîa-ni ká koyâŋ. Ka pâi gâai berei ma ƃɛ́i ǹûai da seɣe wâa naai. Ǹaa káa ǹya-ɣɛ̂lii kwára nyíi a kûla bóai su ǹyéei ŋûa-perei.

⁴Ka m̀ó m̀a a gɛɛ é ǹíi kpéle, é m̀ɛi káa. Vé yào a ŋ̀ánaa Gâloŋ Lesi da Gâloŋ Peka-ni díkɔi ma kpɛ́ni fêi díkaa nɔ́ yɛ̂ɛ ŋume-kpua feerɛ ƃé kérenîi.

⁵Siria da Eezuɛ da mɛni nyɔ́mɔɔ kpɛtɛ dílii su é pîlaŋ ma.

⁶Díkaa kɛ̂i dîyɛɛ, ‘Kwaa lí kú kɔ́ pɛ́lɛ Zuda ma kú ŋɔnûai maa yao kú naa soŋ é lɛ́ɛ a kúpɔɔ, kú Tabee ǹóŋ sée naa a kâloŋ.’

⁷“Kɛ́lɛ ńyãa Ǹuu-namui Yâwɛɛ ŋa môi a gɛɛ vé pâi wɔ́lɔ kɛ̂i tí.

⁸Vé pâi wɔ́lɔ kɛ̂i tí, kpɛ́ni fêi, Siria taa-leei ƃa Dɛmɛika. Siria ŋɔwála-walai fé tɛɛ ní Dɛmɛika ma. Dɛmɛika ǹyaŋ ŋɔwála-walai fé tɛɛ ní Gâloŋ Lesiŋ ma. Kóraŋ buu lɔ́ɔlu mɛi da káo lɔ́ɔlu yée mu, Eezuɛ a pâi wôloi. Vé pâi ŋɔ́nɔ pɔrîi tɔɔ̂i gbîŋ yee ma yɛ̂ɛ lɔii-ŋuŋ.

⁹Eezuɛ ŋɔtaa-lêei ƃa Sameria. Eezuɛ fé wála-wala ní é tɛ́ɛ Sameria ma. Sameria ǹyaŋ fé wála-wala ní é tɛ́ɛ Gâloŋ Peka ma. “Tɔ̃yâ ma núu da à kɛ̀ ŋ̀wɛ̂lii ŋá m̀aa kɔ̃ɔ, fɛ̂ɛ laa-laa kpanaŋɔɔ à kɛ̀ m̀aa nuui yêei ḿɛni ma.”

¹⁰Yâwɛɛ è ŋɔ́nɔ worɛ̂-woo da kpɛ́ni tɛ̀ɛ a Azaya a gɛɛ é mó Eeɣa ma ǹyɛɛi,

¹¹“Ŋɛi-kɛ-maa sîi da mare kɛ̂ɛ kɛ́ Íɣâlai Yâwɛɛ ma. É kɛ́ yɛ̂ɛ saa-taa ŋɛi-kɛ-maa, kpaa máŋ ŋɛi-kɛ-maa nyíi pâi kulâi ŋ̀elei su póŋ-poŋ.”

¹²Kɛ́lɛ Eeɣa è m̀o m̀a ǹyɛɛi, “Fé pâi gɛ̂i tí. Fé pâi su-kɔ̂ɔŋ tɛɛ̂i Yâwɛɛ pɔ́.”

¹³Azaya è mò m̀a ǹyɛɛi, “Deeƃé ǹônii, ka káwoli tɔ́ɔ. Vé lɛ́lɛ ní núu da líi à kɛ̀ a gbeleɛɛ, ká gɛ́ m̀aa nuui fíi é kpɛ́ɛ ŋɔlii-kpêlei su. Kà gɛ̀ tí, káfe gɔ́lɔŋ ka pɔ̂ri gɛ̂i Ɣâla ǹyaa máŋ fíi é kpɛ́ɛ ŋɔlii-kpêlei su?

¹⁴M̀ɛni ma, Ǹuu-namui ǹyaa kpîŋ a pâi ŋɛi-kɛ-maa sîi da kɛ̂i káŋɛi. Nɛnî-kpela tɔnɔ da a pâi koo siɣêi é lóŋ-surɔ̂ŋ maa sɔlɔ ƃó. Da pâi ǹáa seêi a Imayuwɛ.[2]

¹⁵Ǹôloŋ ŋí a ƃɔ̀lɔ, a pâi mɛni lɛ́lɛɛ da mɛni nyɔ́mɔɔ loai kɔ́lɔnîi. Nûa da pâi kɛ̂i niŋa-ŋini ya kpelêi da kɔ̃́iŋ-wulɔ.

¹⁶É lɛ́ɛ pâi kɛ̂i a núu gbîŋ mɛni ma, Eezuɛ da Asiria kaloŋ feerɛi ŋí ka yaôi dîai, da fé pâi kɛ̂i ɣele ma. Núu tɔnɔ kpîŋ fé pâi lɛɛ̂i ǹɔii-ŋai da mà da dímɛi a kâloŋ-ŋai.

¹⁷“Yâwɛɛ a pâi mɛni kpɔ̂lu su kɛ́tɛ lâai yâ, ínûai da ínâŋ ŋɔpɛ́rɛi mu-ƃelai. M̀ɛni kpɔ̂lui ŋí a pâi kɛ̂i a dɛɛ́ m̀ɛni kpɔ̂lu-ŋai dîa kɛ̀ a ŋ̀ele-ŋai Eezuɛ kaloŋ lɔii-kpiniŋ da Zuda dí díŋa kɔ̀lɛ lai. M̀ɛni kpɔ̂lu kɛ́tɛi ŋí a pâi kulâi Asiria kaloŋ yêei.

¹⁸“Maa ɣêlei tí a sèri, Yâwɛɛ a pâi koro fɛ̂ɛi a ŋɛi kɛ́-maa a gɛɛ Ize-ƃelai dí kúla Ǹâai Ya-leei ma-pere yɛ̂ɛ lilî-ŋa dí pá. Asiria-ŋai da pâi kulâi dílɔii su yɛ̂ɛ kɔ̃́iŋ dí pá dí pú dîa.

¹⁹Da pâi pâi dí kpɔ́ŋ ǹyée-ŋai loai, da-ŋa dí lɔ́ gɔni-wôlo-ŋai su, da-ŋa díkɛ ƃò ǹɔɔ-ŋai su, da-ŋa dí kɛ́ ƃò ŋ̀alêŋ kpɔlɔ-ŋai su da daa-tûlɛ-ŋai láa-mii kâla-ŋai su.

²⁰“Maa ɣêlei tí a sèri, Ǹuu-namui a pâi ŋuŋ-ƃô kɛ́-nuu siɣêi Yufeletii Ya-leei pôlu nyii pâi kɛ̂i a Asiria kaloŋ a gɛɛ é ká ŋuŋ kpɛ́ɛ gayoŋ ma, é kákɔlɔ-lêɣa kálaŋ kákpono ma, é ká lá-leɣa pú.

²¹“Maa ɣêlei tí a sèri, à kɛ̀ kpîŋ niŋa lôŋ tɔnɔ da ƃoli feerɛ káa taa-tûlɛ tɔɔ nûu da yêei,

²²niŋa ŋini-ya támaa a pâi kɛ̂i maa nuui yêei. Niŋa ŋini-ya da kɔ̃́iŋ-wulɔ támaa da pâi kɛi naa diai kélee mɛni ma kùla gɔ́i sui.

²³“Maa ɣêlei tí a sèri, ƃɛ́i-ŋai kélee kpɔmɔ-ƃa kpalaŋ lɛ́lɛɛ nyii kpɔmɔ-ƃa wuru wála tɔnɔ (1,000) è kɛ̀ naa nyii dɔnɔ sɔ̃ɔ a pɔ̂ri kɛ̂i a káne wála tɔnɔi (1,000), ǹaa kélee a pâi kɛ̂i a kala da ɣalêŋ kpɔlɔ tee-tee.

²⁴Ǹaa a pâi lɛɛ̂i a lɔɔ kɛ̂lɛi. Kerâŋ pili-ƃela nɔ́ ƃé pâi kɛ̂i liî naa lɔɔ kɛ̂lɛi. Ǹaa a pâi lɛɛ̂i nɔ́ a kala da ɣalêŋ kpɔlɔ tee-tee.

²⁵Ǹyée-ŋai kélee ma ƃɛ́i nûa da kâa sí-sãa sì naai, naa a pâi lɛɛ̂i a kala da ɣalêŋ kpɔlɔ tee-tee. Ǹaa a pâi lɛɛ̂i nɔ́ a taa-tûlɛ-ŋa láa miî.”