Read Kpelle Levetekɔ 11 Bible Online

Levetekɔ 11 - Kpelle bible

Levetekɔ 11

¹Yâwɛɛ è mò Mose ma da Eelɔŋ ǹyɛɛi,

²“Ka m̀ó Eezuɛ-ŋai dîa kâai, zua-ŋai ŋí ƃé ka pɔ̂ri miî ǹɔ́ɔ fɛnɛ-sãai kélee sáma ǹɔii mai.

³Ka pɔ̂ri fɛnɛ-sɛŋ miî nyii zôlo ƃelai, gɛ́ ǹáa mii-sɛŋ miî kɛ̀ gîei feerɛi.

⁴Zua-ŋai sáma nyii-ŋai da dílaa mii-sɛŋ miî kɛ̀ gîei feerɛ, kɛ́lɛ dísolo fé béla níi, káfe da miî. Fɛnɛ-sɛŋ kɛ́ɛ yɛ̂ɛ soo-fáleŋ, a ǹáa mii-sɛŋ miî kɛ̀ giei feerɛ, kɛ́lɛ zolo fé ƃela ní. Mɛni ma, maa fé waa ní.

⁵Fɛnɛ-sɛŋ kɛ́ɛ yɛ̂ɛ wâra, a ǹáa mii-sɛŋ miî kɛ̀ gîei feerɛ, kɛ́lɛ zolo fé ƃéla ní, mɛni ma maa fé waa ní.

⁶Fɛnɛ-sɛŋ kɛ́ɛ yɛ̂ɛ ŋ̀ela a ǹáa mii-sɛŋ miî kɛ̀ gîei feerɛ, kɛ́lɛ zolo fé ƃéla ní. Mɛni ma maa fé waa ní. Fɛnɛ-sãa kɛ́ɛ yɛ̂ɛ soo-fáleŋ, wâra da ŋ̀ela, da dílaa mii-sɛŋ miî kɛ̀ gîei feerɛ, kɛ́lɛ dísolo fé ƃéla ní. Mɛni ma dímaa fé waa ní.

⁷Káfe ƃoi mîi. Zôlo ƃelâi, kɛ́lɛ va ǹáa mii-sɛŋ miî kɛ̀ gîei feerɛ. Mɛni ma maa fé waa ní.

⁸Káfe vɛnɛ-sãai ŋí dísua da m̀ii kpaa máŋ ka lɛɣɛ dípoma ma. Dímaa fé waa ní.

⁹“Ka pɔ̂ri nyɛ̃́ɛ sîi kélee miî nyii gala káa m̀a da vilii.

¹⁰Káfe yái fɛnɛ-sɛŋ sii kélee da miî nyii gala fé ma da vilii. Káfe vɛnɛ-sã̂ai ŋí da mii. Dí káa a kátĩ̂a.

¹¹Vɛnɛ-sãai ŋí maa fé waa ní. Káfe da miî a dɔnɔ kpîŋ, kpaa máŋ ká lɛ́ɣɛ dípoma ḿâ.

¹²Ya fɛnɛ-sɛŋ nyii kélee gala fé ma da vilii, káa a kátĩ̂a.

¹³“Kuɛ, gɔ̃ɔ, kuɛ-kpãaŋ,

¹⁴Korô soŋ kpãaŋ da dísîi kélee,

¹⁵pôna ŋɔni da dísîi kélee,

¹⁶sòloŋ-kɔ̃nɔ, lawɔ-kpɔ̂lui muu, ya kɔrɔ-kɔrɔ, kpãaŋ da dísîi kélee.

¹⁷Mûu da maa sîi kélee, kwíi-tɛɛ da maa sîi kélee, niŋa pôlu lɛɛŋ-kpɛŋ

¹⁸da dísîi kélee.

¹⁹Ŋɔni-ŋai ŋí kélee da dísîi kélee, fɔ̂ŋ da lɔfu.

²⁰“Káfe koôŋ kolo sii kélee da miî nyii gɔ́ɔ tâmaai é tɛ́ɛ feerɛ mai.

²¹Kɛ́lɛ ka pɔ̂ri goôŋ koloi miî nyii a pili-pilii.

²²Ka pɔ̂ri gotó sii kélee miî, zɛ̃ɛ sii kélee da gba-gba toniŋ sii kélee.

²³Káfe koôŋ kolo sii kélee mii nyii a tɔarai. Maa fé waa ní.

²⁴“Ǹúui kélee a lɛ̂ɣɛ zãâi ŋí da poma mai, maa nuui fé pâi kɛ̂i a m̀aa waa é lɛ́ɛ la zu ɣele wulii é kɛ́.

²⁵Ǹúui kélee a tela da poma siɣei, fɛ̂ɛ maa nuui é ŋɔseɣei waa ǹyaŋ maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́.

²⁶Vɛnɛ-sãai nyii kélee zôlo su fé ƃéla ní, va téla ǹáa mii-sɛŋ miî kɛ̀ gîei feerɛi maa fé waa ní kámɛni ma. Ǹúui kélee a lɛɣɛ diai, maa fé waa ní.

²⁷Vɛnɛ-sãai nyii kélee a sia gɔ́ɔ lîi maa fé waa ní kámɛni ma. Ǹúui kélee a lɛɣɛ da poma mai, maa nuui maa fé pâi kɛ̂i a ŋ̀wáa é lɛ́ɛ la zu ɣele wulii é kɛ́.

²⁸Ǹúui a téla lɛ̀ɣɛ poma mai, fɛ̂ɛ maa nuui é ŋɔseɣei wáa. Maa nuui fé pâi kɛ̂i a maa waa é lɛ́ɛ la zu ɣele wulli é kɛ́. Díkaa a vɛnɛ-sãai nyii-ŋai dímaa fé waa ní kámɛni mai.

²⁹“Vɛnɛ-sãai ŋí maa fé waa ní kámɛni ma tɔara fɛnɛ-sãa sáma. Turî, ŋína, korô da dísîi kélee.

³⁰Ŋũyɛ, fale, korô kole da dísîi kélee da lolô.

³¹Vɛnɛ-sãai ŋí maa fé waa ní kámɛni ma tɔara-sãa-ŋa sáma. Ǹúui a lɛɣɛ da poma mai, maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́.

³²Sɛŋ nyii kélee vɛnɛ-sãai ŋí da poma a lɛɣɛ mai, maa sɛŋ maa fé pâi kɛ̂i a ŋ̀waa. E máŋ kɛ́ yɛ̂ɛ sɛŋ nyii kélee gbɛtɛɛi a wúrui, seɣe, sua kɔlɔ, ƃɔrɔ-saa kpaa máŋ sɛŋ-folo sii kélee da. Fɛ̂ɛ í maa sɛŋ maa waa yá su. Kɛ́lɛ, maa fé pâi kɛ̂i a ŋ̀waa é lɛ́ɛ la zu ɣele wulii é kɛ́.

³³Ǹyaŋ à kɛ̀ da poma a tòo pɔ̂rɔ leɣi da su, zãai kélee maa pɔ̂rɔ leɣii sui maa fé waa ní, fɛ̂ɛ í maa pɔ̂rɔ leɣii wólo.

³⁴Ǹeɣii ŋí su ya da a pù mii-sɛŋ da ma, maa mii-sɛŋ maa fé waa ní. Ǹeɣii sîi ŋí su ya kélee da maa fé waa ní gbèle mɛni ma.

³⁵Sɛŋ nyii kélee vɛnɛ-sãai ŋí da poma a tôo mai, maa sɛŋ maa fé waa ní. E máŋ kɛ́ a kpólo kpɛtɛ sɛŋ, kpaa máŋ leɣii ɣíli sɛ́ŋ kpɛtɛɛ a pɔ̂rɔ, fɛ̂ɛ í maa sɛŋ wólo. M̀aa fé waa ní kámɛni ma.

³⁶Kɛ́lɛ à kɛ̀ da poma a tòo ya-tôŋ da ma, kpaa máŋ ya-lôa da su, maa yâi maa waâi, berei máŋ da poma a lɛɣɛ la sɛŋ da ma maa fé waa níi.

³⁷Da à tòo mii-sɛŋ da ma nyii ya pâi zîi, maa sí-sɛŋ kaoi maa waai.

³⁸Kɛ́lɛ da poma a lɛɣɛ sí-sɛŋ kao da ma nyii ǹyɔɔ̂i, maa sí-sɛŋ kaoi maa fé waa ní.

³⁹“Ǹyaŋ vɛnɛ-sɛŋ nyii kélee m̀aa waai m̀ii mɛ̂ni mai da à saa, ǹúui a lɛ̀ɣɛ buma mai, maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́.

⁴⁰À kɛ̀ núu da a vɛnɛ-sɛŋ ŋí zua da mii, fɛ̂ɛ maa nuui é ŋɔseɣei wáa ǹyaŋ maa nuui maa fé pâi kɛ̂i a ŋ̀wáa é lɛ́ɛ la zu ɣele wúlii é kɛ́. Núu da a tela da poma siɣe fɛ̂ɛ maa nuui é ŋɔseɣei waa, kɛ́lɛ maa fé pâi kɛ̂i a waa é lɛ́ɛ la zu ɣele wulii é kɛ́.

⁴¹“Káfe vɛnɛ-sãa pɛlɛɛ-ŋai ŋí da kélee mii nyii-ŋai da tɔara ǹɔii mai. Díkaa a kátĩ̂a.

⁴²Sɛŋ nyii-ŋai kélee da ɣâla ǹɔii ma yɛ̂ɛ kali-ŋa, nyii kélee a tɔ̀ara ǹɔii ma yɛ̂ɛ korô-ŋa, kpaa máŋ nyii-ŋai díkɔɔ tâmaai yɛ̂ɛ gbɔlɔ-keleŋ-ŋai, káfe da mii. Díkaa a kátĩ̂a.

⁴³Ka zãai ŋí da miî, kámaa fé pâi kɛ̂i a ŋ̀wáa.

⁴⁴Ńyãa ƃa Yâwɛɛ ka Ɣâlai. Fɛ̂ɛ ká kákpîŋ maa waa, kpɛ́ni Ḿaa waâi.

⁴⁵Ńyãa ƃa Yâwɛɛ nyii kákùla Ize lɔii sui a gɛɛ ŋá kɛ́ a Káɣâlai. Fɛ̂ɛ ká kɛ́ a kámaa waa, kpɛ́ni fêi, ḿaa waâi.

⁴⁶“Dɔ̂ŋ-ŋai ká ŋí nyii bîlaŋɔɔi fɛnɛ sàa kélee dîa, ŋɔni-ŋai kélee, zãai kélee da sìa ǹyái sui da nyii ŋai kélee da tɔara ǹɔii mai diai.

⁴⁷Fɛ̂ɛ ka zãai ŋí loai kɔ́lɔŋ. Nyii-ŋai dímaa waâi da nyii-ŋai dímaa fé waa ní. Vɛnɛ-sãai nyii-ŋai maa nɛ̃ɛ̂i kà mìi, kpaa káfe dí mîi.”