Read Kpelle Levetekɔ 15 Bible Online

Levetekɔ 15 - Kpelle bible

Levetekɔ 15

¹Yâwɛɛ è mò Mose ma da Eelɔŋ ǹyɛɛi,

²“Ka m̀ó Eezuɛ-ŋai dîa, à kɛ̀ yá a kùla surɔ̂ŋ da ḿâ nɛnî mɛni kɛ́ɛ ŋɔ pere su, maa surɔ̂ŋ tí maa fé waa ní.

³Dɔ̂ŋ ká ŋí bîlaŋɔɔi maa nuui maa waa mɛni mai, a nɛ̃ɛ ma ǹyái é kpera kpaa máŋ gɛ́ kùla nɔ́ niî gbonôi, maa waa fé waa ní.

⁴Gbìŋ nyii kélee ǹúui tí a lâa ŋ̀ái kpaa máŋ é see ŋ̀ái, maa gbìŋ maa fé waa ní. Sɛŋ nyii kélee a see mɛi, maa sɛŋ maa fé waa ní.

⁵Ǹúui kélee a lɛɣɛ maa nuui ŋɔgbìŋ mai, maa nuui é gbîŋ waa da ŋɔseɣei, ǹyaŋ vé pâi kɛ̂i a maa waa é lɛ́ɛ la zu ɣele wulii é kɛ́.

⁶Nuui kélee a sêe sɛŋ da mɛi nyii ǹúui ǹyái a kulâi mai è sèe mɛi, fɛ̂ɛ maa nuui é gbîŋ waa da ŋɔseɣei, ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

⁷Ǹúui kélee a lɛɣɛ maa nuui mai fɛ̂ɛ maa nuui é gbîŋ maa wáa é ŋɔseɣei waa, ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

⁸Ǹúui ǹyái a kulâi m̀ai a ǹá-ya pù ǹúui da ḿâ maa waai, fɛ̂ɛ ǹúui maa waai é gbîŋ waa é ŋɔseɣei waa ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

⁹Ǹúui ǹyái a kulâi mai a sèe see-sɛŋ kélee da ŋá nyii núu a see ŋ̀á gɛ̀ sɛŋ da siai, maa sêe-sɛŋ maa fé pâi kɛ̂i a waa.

¹⁰Ǹúui nyii kélee a lɛɣɛ zɛŋ ḿâ maa nuui è kɛ̀ see-ni mɛi, vé pâi kɛ̂i a maa waa é lɛ́ɛ la zu ɣele-wulii é kɛ́. Fɛ̂ɛ é gbînŋ waa da ŋɔseɣei ǹyaŋ vé pâi kɛ̂i a maa waa é lɛɛ la zu ɣele-wulii é kɛ́.

¹¹Ǹúui ǹyái káa kulâi mai à wàla ǹyée ŋá, waa à lɛɣɛ núu da ḿâ, fɛ̂ɛ maa nuui é gbîŋ waa da ŋɔseɣei, ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

¹²Maa nuui a lɛɣɛ pɔ̂rɔ leɣi da ma fɛ̂ɛ dí maa pɔ̂rɔ leɣii wólo. À lɛɣɛ sɛŋ-fólo da ḿâ nyii gbɛtɛɛi a wurui, dí maa sɛŋ foloi waa.

¹³“À kɛ̀ ǹyái a kpera kulâi ǹúui ma fɛ̂ɛ é maa kpɛ̂ŋ kɛ́ fólo lɔ́ɔlu mɛi feerɛ é tɛ́ɛ. Gɛ̀ ní a pâi ŋɔseɣei wâai, é gbîŋ waa ya ɣilîŋ lɛ́lɛɛ su, ǹyaŋ a pâi kɛ̂i a maa waa.

¹⁴Ŋ̀ele kûui ǹɔ́ɔlu mɛi saaƃa ɣelei a pâi pâi a tòloŋ feerɛ kpaa máŋ popôo feerɛ Yâwɛɛ ŋɔpɛ́rɛi láƃelei é dɛ́ɛ zâla láa soŋ nuui pɔ́.

¹⁵Zâla láa soŋ nuui a pâi zãai ŋí kulâi sâla. Dɔnɔ kɛ́ ƃò zɔnyɔ̂ŋ salai kula mɛni ma. Ǹyaŋ a pâi nuui ŋí ŋɔsɔnyɔ̂ŋ maa sâla kulâi Yâwɛɛ ŋɛ́i-tuɛ ǹyái kɛ̀ kulâi m̀ai mɛni ma.

¹⁶“À kɛ̀ surɔ̂ŋ da yá a kúla ma dɛ́i pere, fɛ̂ɛ maa surɔ̂ŋ é gbîŋ waa, ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

¹⁷Maa yâi tí a lɛ̀ɣɛ sɛŋ da ma nyii gbɛtɛɛi a seɣe kpaa máŋ sua kɔlɔi, fɛ̂ɛ dí maa sɛŋ tí wáa, ǹyaŋ vé pâi kɛ̂i a m̀aa waa lɛ́ɛ la zu ɣele-wulii é kɛ́.

¹⁸À kɛ̀ surɔ̂ŋ a lɔ̀-pɔrɔŋ a nɛnî, fɛ̂ɛ dífeerɛŋɔɔ dí díwaa, ǹyaŋ dífe pâi kɛ̂i a dímaa waa é lɛ́ɛ la zu ɣele-wulii é kɛ́.

¹⁹“Nɛnî a ǹyée tɛ́ ɣelêi, m̀aa fé waa ní fólo lɔ́ɔlu mɛi feerɛ yée mu. Ǹyaŋ ǹúui kélee a lɛɣɛ maa nɛ̂nii tí mai, maa fé pâi kɛ̂i a ŋ̀wáa é lɛ́ɛ la zu ɣele-wulii é kɛ́.

²⁰Sɛŋ nyii kélee ǹɛnîi ŋí a see mɛi kpaa máŋ é laa mɛi tãi ŋí yée mui maa sɛŋ tí maa fé pâi kɛ̂i a ŋ̀waa.

²¹Ǹúui kélee a lɛɣe ǹɛnîi ŋí ŋɔgbìŋ mai, maa nuui maa fé pâi kɛ̂i a ŋ̀waa é lɛ́ɛ la zu ɣele-wulii é kɛ́.

²²Núu da a lɛ̀ɣɛ zɛŋ ma nyii ǹɛnîi a sèe mɛi, fɛ̂ɛ maa nuui é ŋɔseɣei wáa é gbîŋ waa, ǹyaŋ vé pâi kɛ̂i a maa waa é lɛ́ɛ la zu ɣele-wulii é kɛ́.

²³A nɛ̃ɛ ma kpîŋ é kɛ́ a gbìŋ kpaa máŋ sɛŋ nyii kélee nɛnîi ŋí a see mɛi nuu da a lɛɣɛ ma maa nuui maa fé pâi kɛ̂i a ŋ̀waa é lɛ́ɛ la zu ɣele-wulii é kɛ́.

²⁴Tãi nɛnî ta a ǹyée tɛ́ la ɣelêi, surɔ̂ŋ da a lɔ̀ la pɔ̂rɔŋ, maa surɔ̂ŋ tí ḿaa fé pâi kɛ̂i a ŋ̀waa fólo lɔ́ɔlu mɛi feerɛ yée mu. Gbìŋ kélee maa surɔ̂ŋ tí a làa ŋ̀ái maa gbîŋ maa fé pâi kɛ̂i a ŋ̀waa.

²⁵“À kɛ̀ ŋãa a kɛ̀ kulâi nɛnî ḿa a ɣele kûu támaa nyii vé ǹyée tɛ́ ní ɣelêi, kpaa máŋ ǹaa é namu é tɛ́ɛ tãi ḿâ a ǹyée tɛ̀ la ɣelêi ḿâ, maa nɛnii maa fé pâi kɛ̂i a ŋ̀waa tãi nɔ́ ŋãai a niî kulâi la m̀ai.

²⁶Gbìŋ kélee maa nɛnii a lâa ŋ̀ái maa gbîŋ maa fé pâi kɛ̂i a ŋ̀waa. Zɛŋ nyii kélee a tela lɛɣɛ mai, maa sɛŋ maa fé pâi kɛ̂i a ŋ̀waa.

²⁷Núui a lɛɣɛ zãai ŋí da mai, maa nuui fé pâi kɛ̂i a maa waa. Fɛ̂ɛ maa nuui é ŋɔseɣei wáa é gbîŋ waa, ǹyaŋ vé pâi kɛ̂i a maa waa é lɛ́ɛ la zu ɣele-wûlii é kɛ́.

²⁸Kɛ́lɛ à ŋãa a kpera kulâi m̀a, fɛ̂ɛ é maa kpɛ̂ŋ kɛ́ fólo lɔ́ɔlu mɛi feerɛ é tɛ́ɛ. Naa pôlu ma a pâi kɛ̂i a m̀aa waa.

²⁹Ŋ̀ele kûui ǹɔ́ɔlu mɛi saaƃa ɣelei a pâi pâi a tòloŋ feerɛ kpaa máŋ popôo feerɛ zâla láa soŋ nuui pɔ́ Yâwɛɛ ŋɔpɛ́rɛi láƃelei.

³⁰Zâla láa soŋ nuui a pâi ŋɔni-ŋai ní dɔnɔ kulâi a sɔnyɔ̂ŋ sala, é gbelii kúla a kéreŋ sala. A pâi ǹɛnîi maa sâla kulâi Yâwɛɛ ŋɛ́i-tuɛ ŋãai kùla m̀ai mɛ̂ni ma.

³¹“Ǹyaŋ Yâwɛɛ è mò Mose da Eelɔŋ dîa a gɛɛ dí Eezuɛ-ŋai lîa-woo ƃó pîlaŋ dímaa waa-laai mɛ̂ni ma, a gɛɛ dífa lâa Yâwɛɛ ŋɔ́ pɛ́rɛi maa tĩa kara la nyii kɛ̀ mûui sámai. À kɛ̀ da gɛ̀ tí, gɛ̀ ní da pâi saâi.”

³²Dɔ̂ŋ-ŋai ká ŋí é pîlaŋ surɔ̂ŋ ma nyii yá a kulâi mai kpaa máŋ yá è kùla ma dɛ́i perei da

³³ǹɛnîi nyii ǹyée tɛ ɣelêi, kpaa máŋ surɔ̂ŋ da é lɔ-pɔ̂rɔŋ a m̀aa nɛniî nyii ǹyée è kɛ̀ ɣelêi diai.