Read Kpelle Levetekɔ 16 Bible Online

Levetekɔ 16 - Kpelle bible

Levetekɔ 16

¹Yâwɛɛ è lòno Mose pɔ́ Eelɔŋ ǹônii veerɛi saâ pôlu ma nyii-ŋai pà a ŋɔŋ Yâwɛɛ ŋɛ́i-tuɛ nyii maa fé kɛ́ ní a ŋ̀waai.

²È mò Mose ma ǹyɛɛi, “M̀ó ílîa Eelɔŋ ma a gɛɛ vé pà nɔ́ gwaa ma waai ma nyii zeɣe belai káa sɛlɛnii naa ŋɛ́i tuɛ maloŋ kaa see-sɛŋ ŋɛ́i-tuɛ, nyii gáa see-ni gono-tee gâlai mɛi. Da pâi yenii maloŋ kaa see-sɛŋ ŋí mai ŋ̀ele kɔlɔŋ kolei su. À gɛ̀ tí a pâi saâi.

³Bere sîi ŋí ƃe Eelɔŋ a pɔ̂ri pâi la Gwaa ma Waai Ma. É pá a niŋa loŋ zɔnyɔ̂ŋ salai kula mɛni ma da ƃála sîrɛ géreŋ salai kula mɛni ma.

⁴“É lɛ́ɛ pâi pâi Gwaa Maa Waai ma, fɛ̂ɛ é ŋ̀waa é ŋɔsâla láa soŋ tii kɛ́ maa ɣiri sãai too m̀a. Ŋɔseɣe mu seɣei, ŋɔyokpoi, ŋɔbatii da ŋɔƃɔrɔi.

⁵“Eezuɛ-ŋai da pâi ƃoli sirɛ feerɛ tɛɛ̂i Eelɔŋ pɔ́ sɔnyɔ̂ŋ sala kula mɛni ma da ƃála sirɛ tɔnɔ géreŋ salai kula mɛni ma.

⁶Eelɔŋ a pâi niŋa loŋ kulâi a sala ǹyaa kpîŋ ŋɔsɔnyɔ̂ŋ su mɛni-lɛɛ mɛni ma da ŋɔpɛ́rɛi mu-ƃelai.

⁷Gɛ̀ ní a pâi mòli veerɛ siɣêi é lí la Yâwɛɛ ŋɔpɛ́rɛi lá.

⁸Eelɔŋ a pâi kpɛɛŋ toôi é gáa m̀oli feerɛi ŋí nyii gáa a Yâwɛɛ pɔ́ɔi da nyii gáa a vɛ̃ɛ-kpâlaŋ su nyînaŋ pɔ́ɔi.

⁹M̀olii nyii gbɛɛŋ a pâi ǹɛ̂i a gɛɛ gáa a Yâwɛɛ pɔ́ɔi, Eelɔŋ a pâi gulâi Yâwɛɛ ma a sɔnyɔ̂ŋ sala.

¹⁰Kɛ́lɛ mòlii nyii gbɛɛŋ a pâi ǹɛ̂i a gɛɛ gáa a vɛ̃ɛ-kpâlaŋ su nyînaŋ pɔ́ɔi, Eelɔŋ a pâi pâi la Yâwɛɛ ŋɛ́i-tuɛ sɔnyɔ̂ŋ su mɛni lɛɛ mɛni ma, a gɛɛ dí ƃó ma é ǹûai dí sɔnyɔ̂ŋ siɣe é lí la vɛ̃ɛ-kpâlaŋ su nyînaŋ pɔ́ naa.

¹¹“Eelɔŋ a pâi ǹiŋa loŋ kulâi a sâla gbîŋ ŋɔsɔnyôŋ su mɛni lɛɛ mɛni ma da ŋɔpɛ́rɛi mu-ƃelai, é báa.

¹²A pâi ŋ̀ɔŋ siɣe sɛŋ-foloi siɣêi é géreŋ-sɛŋ kéreŋ teƃelei nyii gáa Yâwɛɛ ŋɛ́i-tuɛi ŋá ŋɔŋ teŋai da pú zu é ǹyée lâa fɛ́ɛ feerɛ a kéreŋ-sɛŋ kúŋ nɛ̃ɛ fũa é pá a dîa Gwaa Ma Waai ma.

¹³Eelɔŋ a pâi géreŋ sɛŋ kúŋ nɛ̃ɛi pûi ŋ̀ɔŋ ŋá Yâwɛɛ ŋɛ́i-tuɛ a gɛɛ ǹurii é Gono-tee Gãlai perêi kpíni a gɛɛ vâa lá saa la.

¹⁴A pâi niŋa ŋãai da siɣêi é gbɛ́mɛŋ a ǹyée gbua maloŋ kâa see-sɛŋ ŋɛ́i-tuɛ vóloi kulâi pere gîe lɔ́ɔlu mɛi feerɛ.

¹⁵“Gɛ̀ ní a pâi m̀olii paâi nyii gáa a ǹûai dísɔnyɔ̂ŋ maa sâla-sɛŋ é pá a ŋãa Gwaa ma Waai ma é gbɛ́mɛŋ m̀aloŋ kâa see-sɛŋ ma é da é kpɛ́mɛŋ ŋ̀ɛ́i yɛ̂ɛ berei è gɛ̀ la a niya ŋãai.

¹⁶Bere sîi ŋí su a pâi Gwaa ma Waai maa waâi Eezuɛ-ŋai dísɔnyɔ̂ŋ mɛni ma. Fɛ̂ɛ é mɛni sîi tɔnɔi ŋí kɛ́ a Yâwɛɛ ŋɔpɛ́rɛi, kpɛ́ni fêi gáa tɔɔ-ni m̀ûui sâmai ƃɛ́i naa ma fé waa nii.

¹⁷Tãi Eelɔŋ a lɔ̂ la Yâwɛɛ ŋɔpɛ́rɛi mu ǹaa maa waa mɛ̂ni mai, núu da fé lɔ̀ naa é lɛ́ɛ la zu é kúla. A pâi sâla kulâi naa ǹyaa kpîŋ ŋɔsɔnyɔ̂ŋ su mɛ̂ni lɛɛ mɛni ma da ŋɔpɛ́rɛi mu-ƃelai é pɛ́lɛ Eezuɛ-ŋai kélee dîa.

¹⁸A pâi kulâi é lí géreŋ sala kula têƃelei ma é m̀aa waa. A pâi ǹiŋa ŋãai da m̀oli ŋãai da siɣêi é bú géreŋ sala kula teƃelei ŋɔsonôŋ su wuru-ŋai kélee dîa é dínaŋ dîa.

¹⁹A pâi ŋãai da kpɛmɛ̂nii teƃelei ma a ǹyée gbua gîei lɔ́ɔlu mɛi feerɛ. Bere sîi ŋí su a pâi ŋ̀âla teƃelei maa waai Eezuɛ-ŋai dísɔnyɔ̂ŋ mɛni ma a gɛɛ é kɛ a m̀aa waa.

²⁰“Eelɔŋ a kpɛ̀ɛ a zâlai kulâi Gwaa Ma Waai ma da Yâwɛɛ ŋɔpɛ́rɛi mu gwaai kpéli-ŋai ma, a pâi m̀olii fului tɛɛ̂i Yâwɛɛ pɔ́ nyii gbɛɛŋ è nɛ̀ a gɛɛ gáa a vɛ̃ɛ-kpâlaŋ su nyinaŋ pɔ́ɔi.

²¹Eelɔŋ a pâi ǹyée veerɛ pɛlɛ̂i mòli ŋuŋ ma é Eezuɛ-ŋai dítua-pere nyɔŋ-ŋai kélee, dítɔɔ ma pere sĩi nyɔ́mɔɔ-ŋai kélee ƃói. A pâi gélee pûi mòli ŋûa. Núu nyii dí-dí yée lɛ̀ mai a maa ƃolii siɣe é li la Vɛ̃ɛya kpâlaŋ su é tee ma é lí.

²²M̀olii a pâi liî a ǹûai dísɔnyɔ̂ŋ-ŋai kélee lɔii da su ƃɛ́i núu da fé naa Kɔ́lɔŋ.

²³“Gɛ̀ ní Eelɔŋ a pâi pâi Yâwɛɛ ŋɔpɛ́rɛi mu é ŋɔsâla láa soŋ tiî kɛ́ m̀aa ɣiri sãai kula ma nyii-ŋai è dòo ma tãi è kɛ̀ lɔ̂i la Gwaa ma waai mai.

²⁴Fɛ̂ɛ é ŋ̀waa kwaa ma waai ma é gbîŋ seɣe-ŋai tòo ma. Naa pôlu ma, é kéreŋ sala kulâi da Eezuɛ-ŋai dísɔnyɔ̂ŋ su mɛni lɛɛ mɛni ma, woo kɛ su tɔnɔ mɛni ma.

²⁵A pâi géreŋ salai maa taa-tulɛi ŋ̀úlɔ kêrenii ŋ̀âla-teƃelei ŋá.

²⁶Ǹyaŋ ǹúui lì a ǹyínaŋ ŋɔƃolii vɛ̃ɛ-kpâlaŋ sui a pâi ŋɔseɣei waâi é gbîŋ waa é lɛ́ɛ pâi pôlu m̀ûui su.

²⁷Ǹiŋai da m̀olii dí díkula a zɔnyɔ̂ŋ salai dí lí a díŋãa Gwaa Ma Waai Ma, sɔnyɔ̂ŋ su mɛni lɛɛ mɛni mai, da pâi kulâi a dípoma m̀ûui su. Da pâi díkɔlɔ, díluu da díkoi sãai kêrenii.

²⁸Ǹúui pâi díkêreŋii fɛ̂ɛ é ŋɔseɣe-ŋai waa é gbîŋ waa é lɛ́ɛ pâi pâi pôlu m̀ûui su.

²⁹“Dɔ̂ŋ-ŋai ká ŋí ká dí mɛi káa wɔlɔ-wɔlɔ da wɔlɔ-wɔlɔi. Ŋ̀áloŋ ǹɔ́ɔlu mɛi feerɛi ŋɔfólo puu ɣelei káfe tíi da kélee kɛ̀. Ka sûŋ siɣe káai a Eezuɛ-ŋai ká ŋɔ̃ya-ŋai kélee díkaa kásamai.

³⁰Vóloi ŋí ƃe zâla láa soŋ nuui a pâi ká sɔnyɔ̂ŋ maa sâla kulâi la a gɛɛ kásɔnyɔ̂ŋ su mɛni é lɛ́ɛ kámaa é kɛ́ a ŋ̀waa Yâwɛɛ ŋɛ́i.

³¹Ŋ̀ele kûui ŋí káa a ɣele kûu maa waa kɛ́tɛ nyii fɛ̂ɛ ká sûŋ siɣe ká káfii tɔɔ ka fé tii kélee da kɛ̀. Gàa a tɔ̂ŋ kámɛni ma wɔlɔ-wɔlɔ da wɔlɔ-wɔlɔ.

³²Zâla láa soŋ nuui nyii dí ziɣe zu dí wúlɔ pú ŋûa a gɛɛ é kɛ́ a sâla láa soŋ nuu ǹâŋ pɔ́ɔ ŋái, fɛ̂ɛ é ŋɔsâla láa soŋ tîi kɛ́ seɣei tóo mà é zɔnyɔ̂ŋ su mɛni lɛɛ sâlai kúla.

³³A pâi sâla kulâi Gwaa Ma Waai maa waâi mɛni ma, Yâwɛɛ ŋɔpɛ́rɛi mu gwaa kpeli-ŋai da ŋ̀âla-teƃelei, zâla láa soŋ-ƃelai da Eezuɛ-ŋai kélee.

³⁴Dɔ̂ŋ ŋí káa dímɛni ma. Fɛ̂ɛ dím̀ɛi káa wɔlɔ-wɔlɔ da wɔlɔ-wɔlɔ. Fɛ̂ɛ dí zâlai ŋí kúla kóraŋ ma tɔnɔɔ Eezuɛ-ŋai kélee dísɔnyɔ̂ŋ, su mɛni lɛ̀ɛ mɛni ma.” Eelɔŋ è m̀ɛnii kélee kɛ̀ yɛ̂ɛ berei Yâwɛɛ è m̀o la Mose mai.