Read Kpelle Levetekɔ 26 Bible Online

Levetekɔ 26 - Kpelle bible

Levetekɔ 26

¹Yâwɛɛ è m̀o ǹyɛɛi, “Káfe ɣâla-pɔkɔɔŋ da kpɛ̀tɛ kámɛni ma. Káfe sɛŋ da pɔkɔɔŋ kpɛ̀tɛ a kɔni ká dɔ̀ɔ kálɔii su kákɛ vɛ̀li. Káfe kɔni-ŋa saá ká dítɔɔ kákɛ dífɛ̀li. Ńyãa ƃa Káɣâlai Yâwɛɛ.

²Ka ŋ̀âla mɛni kɛ́ kuu-ŋai mɛi káa ká ƃaa kɛ́ maa tɛ́ɛ ƃɛ́i ma ka ḿvɛli naai. Ńyãa ƃa Yâwɛɛ.

³“Ka ŋátɔ̂ŋ-ŋai mɛi kâa ká ŋ́oo mɛni,

⁴ŋa pâi gɛ̂i tuna é pú ǹɔii ma a bú tãi é ǹɔii yɔɔ zí-sãai dí kpɛtɛ dí ƃá a zu kɛ́tɛ.

⁵Kási-sãai da pâi ƃâi a zu kɛ́tɛ kálɛɛ díƃa kulâi dísi tãi é seri ŋɔ́nɔ. M̀ii-sãai kélee ǹɛ̂lɛɛi kámɛni mai da pâi kɛ̂i naa kákɛ m̀ii ŋuŋ ma ƃo kɛ́ ƃô káyêei ǹɔii su.

⁶“Ŋa pâi gɛ̂i lii-see kɛ́ ƃò káyêei ǹɔii su. Ŋa pâi vɛnɛ-sãa nyɔ́mɔɔ-ŋai kélee kpɛ̂i kákɛ̂i. Kɔ́ mɛni fé ŋɔ́nɔ pâi kɛ̂i ǹɔii su.

⁷Kákpɔara-ƃelai da yée fé pâi tɛɛ̂i kâa.

⁸Ka kɛ̀ a núu lɔ́ɔlu ka pâi pɔrîi kákpɔara-ƃelai ŋuŋ tɔnɔ (100) yée mɛi ɣâlei. Kà kɛ̀ a núu ŋuŋ tɔnɔ (100) ka pâi pɔrîi díwála puu (10,000) yée mɛi ɣâlei.

⁹Ŋa pâi lûwa lâai kâa ká nîa-pɛlɛɛ támaa maa sɔlɔ ƃó. Ŋa pâi tɔɔ̂i gbanaŋ-wooi pôlu ŋá gɛ̀ káyêei.

¹⁰M̀ii-sãai ka pâi bûi kɛ̂i ka pâi lɛɛ̂i m̀iî góraŋ é kpɛ́ɛ ká gbeli píli a gɛɛ kwaa ḿâ kɛ́ ƃò naa ninai mɛni ma.

¹¹Ŋa pâi kɛ̂i kásama ŋásua-kɔlɔ seɣe pɛrɛi maa waai ḿu. Fé pâi wɔ́lɔ ḿbôlu fêi kâa.

¹²Ŋa pâi kɛ̂i kásama ŋ́gɛ ƃò a Káɣâla, káa máŋ ká kɛ́ ƃò a ŋánûa.

¹³Ńyãa ƃa Káɣâlai Yâwɛɛ. Ŋá kákùla Ize lɔii su ŋá pá a káa a gɛɛ káfe ŋɔ́nɔ kɛ̀ luɛ-laa su. Ŋ̀wála-wâla-laai kɛ̀ kásonîi ŋá ŋ̀áa yèŋ ŋá gɛ́ kákula ǹɔii su ka kɛ siai, kákoôŋ tɔɔ kâa.”

¹⁴Yâwɛɛ è m̀o ǹyɛɛi, “Ka wàla ŋ́oo mɛni ŋa pâi kákula maa kɛ̂i.

¹⁵Ka wàla káwoli tɔ́ɔ ŋɔtɔ̂ŋ-ŋai dîa ká m̀ɛni-ŋai kɛ́ ŋa m̀o kâai, ká káyee kúla gbanaŋ-wooi mu ŋá gɛ̀ ŋá gɛ̀ káyêei,

¹⁶ŋa pâi kula maa kɛ̂i. Ŋa pâi kɔlɔ-fela nyɔ́mɔɔ pilîi é káŋɛi pú, kákɔlɔ é kara-kara kâa. Zí-sãai ka pâi zîi káfe pâi mɛni lɛ́lɛɛ da sɔlɔ ƃôi zu. Kákpɔara-ƃelai da pâi kákpɛ̂i m̀ɛi dí m̀á kélee míi.

¹⁷Ŋa pâi ḿbôlu fêi kâa a gɛɛ kákpɔara-ƃelai dí káyee mɛi ɣále díkɛ ƃò kámɛi. Ká pâi yaôi kpɔ́ ká pɛ́lɛ pûi yɛ̂ɛ ǹyaa ƃe núu da a kákpɛ̂i.

¹⁸“Nyíŋi kélee kpɛɛ ŋá, ka wàla kámaa fáleŋ ŋa pâi kátɔ̂ŋ kpɛ́ maai su kɛ̂tɛi gîei lɔ́ɔlu mɛi feerɛ.

¹⁹Ŋa pâi kásu mɛni kɛ̂tɛi kperâi. Tuna fé ŋɔ́nɔ pâi pûi. Ǹɔii ḿâ a pâi kpâlai é kpanaŋ yɛ̂ɛ kɔni.

²⁰Káfe pâi mɛni lɛ́lɛɛ da kélee sɔlɔ ƃôi kátii kpanaŋ kɛ́ɛi su, kpɛni fêi, ǹɔii fé ŋɔ́nɔ pâi sí-sãa kpɛtɛ̂i. Káƃa wuru-ŋai dífa ŋɔ́nɔ ƃà káyêei.

²¹“Ka wàla kálii maa fáleŋ nyíŋi pôlu ma, ŋa pâi kámɛni kúla maai su kɛ̂tɛi gîei lɔ́ɔlu mɛi feerɛ.

²²Ŋa pâi gɛ̂i fɛnɛ-sãa nyɔ́mɔɔ-ŋa dí tóo kásama dí kálônii paa, dí kátama ɣele su kara da kátaa tulɛ-ŋai kálɛɛ nɔ́ a kákpulu lôŋ.

²³“M̀ɛni kúla maai ŋí pôlu m̀a, ka wàla kálii pene, ká kɛ́ nɔ́ ḿaa fôo,

²⁴ŋa pâi kákula maa kɛ̂i a ŋ̀ánaa gîei lɔ́ɔlu mɛi feerɛ é tɛ́ɛ bɔlɔi ḿâ.

²⁵Ŋa pâi gɛ̂i nûa dí kɔ́ pɛ́lɛ kâa, kpɛni-fêi kà ŋákpanaŋ wooi síɣe dɔɔ̂i. Kà pù ká lì kátaa lee-ŋai su, ŋá kɔlɔ-fela píli naa kâa, ká kákpîŋ tɛ̀ɛ kákpɔara-ƃelai pɔ́ a kpala ǹá pere.

²⁶Ŋa pâi kákɔ̃nɔŋ mɛi têei. Nɛyâa puu da pâi kɛ̂i kpólo kpɛtɛ̂i kpólo kpɛtɛ sɛŋ-folo tɔnɔ su, da ŋ̀áa kɔ̀lɛ kâa va kápela.

²⁷“Nyíŋi kélee su kà kɛ̀ nɔ́ ḿaa fôoi káfe ŋ́oo mɛnîi,

²⁸ŋa pâi kámɛni kpɔ̂lui su kɛ̂tɛi a ŋ̀ánaa gîei lɔ́ɔlu mɛi feerɛ é tɛ́ɛ bɔlɔi ḿâ.

²⁹Ŋa pâi gɛ̂i púru é kápaa kákɛ kákpîŋ lonii mîi.

³⁰Ŋa káɣâla pɔkɔɔŋ-ŋai fɛli kwaa-ŋai ḿâ su karâi, ŋá kákereŋ sãa kúŋ nɛ̃ɛ-ŋai kéreŋ teƃele-ŋai wólo, ŋá kápoma-ŋai pú káɣâla-pɔkɔɔŋ-ŋai mɛi a yao-maa pere.

³¹Ŋa pâi kátaa lee-ŋai su kara, ŋá káɣâla-pɔkɔɔŋ-ŋai fɛli kwaa-ŋai ḿâ su kara. Ŋa pâi ńyee kúlai kásâla-ŋai mu. Kákereŋ-sãa kúŋ nɛ̃ɛi da ƃɛlɛ fé pâi kɛ̂i ŋ́goi.

³²Ŋa pâi kálɔii su karâi kákpɔara-ƃelai díkaa naai dí kpɛ̃lîŋ a ǹaa kɛ́ pere.

³³Ŋa pâi gɛ̂i kákpɔara-ƃelai dí kɔ́ pɛ́lɛ kâa kátaa-tàa lɔii ŋuŋ da kpɛni-ŋa su. Ŋa pâi kálɔii su karâi kátaa-lee-ŋai dílɛɛ a pilêŋ ŋá.

³⁴Gɛ̀ ní ǹɔii a pâi lɛɛ̂i lâani a vólo, gɛ́ víi tɔ̀ɔ a tãi kákaa la kákpɔara-ƃelai yée mu lɔii-ŋuŋ da kpɛni-ŋai sui.

³⁵Tãi nɔ́ gáa lâani lai a pâi kɛ̂i víi tɔɔ̂i é tɛ́ɛ la tãi ḿâ kákɛ̀ la m̀a ká kɛ́ tíi kɛ̂i.

³⁶“Káai pâi kɛ̂i gɔ-pu-laai sui, ŋa pâi gɛi káyao a ŋánaa kákɛ pú a láa kpâla too tîŋ. Ka pâi pûi yɛ̂ɛ ǹyaa ƃe kákpɔara-ƃelai da kɛ̀ kákpɛ̂i kɔ́ su.

³⁷Ka pâi kɛ̂i karênii a kákîe-ni nyaŋ núu da fé kákpɛ̂i. Káfa pɔ̂ri kɔ̂i kákpɔara-ƃelai pɔ́.

³⁸Ka pâi saâi lɔii-ŋuŋ da kpɛni-ŋa su káƃolôŋ é lɛ́ɛ lɔii pôlu.

³⁹Káai kpulu-loŋ pâi lɛɛ̂i ka pâi saâi kásɔnyɔ̂ŋ da kánâŋ-ni díwɔ̂i su.

⁴⁰“Kɛ́lɛ kálônii da pâi dísɔnyɔ̂ŋ-ŋai ƃôi da dínâŋ-ni díwɔ̂-ŋai nyii-ŋai ŋ́oo pìli dí tɔ́ɔ ḿâ,

⁴¹dí gɛ́ ŋá ḿbôlu fé dîɛ ŋá dítɛɛ lɔii ŋuŋ da kpɛni-ŋa su díkpɔara-ƃelai pɔ́i. Gbɛɛ ŋái, kálônii da dílii maa fàleŋ da díyee sèe m̀ɛni kula maai mu dí zɔlɔ ƃò dísɔnyɔ̂ŋ mɛni mai mu,

⁴²gɛ̀ ní, gbanaŋ-wooi ŋá gɛ̀ Zeeka, Aise da Eberaɣɛ̃ɛ ni yêei ǹɔii mɛni mai ŋa pâi ŋɔ́nɔ gɛ̂i é lɛ́ɛ dɔɔ̂i.

⁴³Kɛ́lɛ fɛ̂ɛ dí mɔ̃lɛ zɔnyɔ̂ŋ dí gɛ̀i da ŋ̀oo pilii dí gɛ̀i m̀ɛni ḿâ ǹɔii kɛ́ víi tɔ̀ɔ a tãi díkaa la lɔii-ŋuŋ da kpɛni-ŋa sui.

⁴⁴Kɛ́lɛ a nɛ̃ɛ ma kpîŋ díkɛ lɔii ŋuŋ da kpɛni-ŋa su, fé pâi wɔ́lɔ ńyee kulâi dímu kpaa máŋ ŋá dísu kara. Fé pâi wɔ́lɔ ŋákpanaŋ-wooi siɣêi dɔɔ̂i díyêei, Ńyãa ƃa Díɣâlai Yâwɛɛ.

⁴⁵Ŋá pâi ŋɔnɔ gbanaŋ-wooi kɛ̂i díyêei a nina yɛ̂ɛ berei ŋá gɛ̀ la a tãi ŋá ŋáwala-wala laai lɛ́ la a díkulaa lɔii ŋuŋ da kpɛni-ŋa da Ize lɔii sui a gɛ́ɛ Ńyãa Yâwɛɛ ŋá kɛ́ a Díɣâlai.”

⁴⁶Yâwɛɛ è dɔ̂ŋ-ŋai ŋí tɛ̀ɛ Mose pɔ́ é m̀ɛni-ŋai ŋí ƃó ma Eezuɛ-ŋai mɛni ma Sana Yeei mâ.