Read Kpelle Levetekɔ 5 Bible Online

Levetekɔ 5 - Kpelle bible

Levetekɔ 5

¹À kɛ̀ da núu da tòli a gɛɛ é sêre faa kɛ́ mɛni ma nyii è gàa gɛ̀ ƃò a gɔ́lɔŋɔɔi, à wàla maa sêre faai kɛ́, gɛ̀ ní fɛ̂ɛ dí maa nuui tí kula maa kɛ́.

²Kpaa máŋ à kɛ̀ núu da a lɛ̀ɣɛ sɛŋ da ma nyii maa liƃiɛ̂i Yâwɛɛ ŋɛ́i, kpɛ́ni fêi gáa a bomai, é máŋ kɛ́ yɛ̂ɛ fɛ̃nɛ-sɛŋ, taa-tûlɛ, kpaa máŋ ɣála-sɛŋ, berei máŋ è lɛ̀ɛ la ma dɛ̂i perei, gɛ̀ ní a sɔnyɔ̂ŋ kɛ́.

³Kpaa máŋ à kɛ̀ núu da a lɛ̀ɣɛ núu kponôi sɛŋ da ma nyii maa liƃiɛ̂i Yâwɛɛ ŋɛ́i, berei máŋ è lɛ̀ɛ la ma dɛ̂i perei, tãi nɔ́ maa nuui a gɔ̀lɔŋ lai, gɛ̀ ní a sɔnyɔ̂ŋ kɛ́.

⁴A kɛ̀ núu da a góno-tèe a ŋá kpɛ̂ɛ maa-pere a nɛ̃ɛ ma é kɛ́ a ǹɛ́lɛɛ kpaa máŋ nyɔ́mɔɔ, tãi nɔ́ a gɔ̀lɔŋ lai, gɛ̀ ni a sɔnyɔ̂ŋ kɛ́.

⁵À kɛ̀ núu da a zɔnyɔ̂ŋ-ŋai ŋí da kɛ̀ maa nuui é fáa ŋɔsɔnyɔ̂ŋ ma,

⁶é pá a ƃála-sâa kpaa máŋ ƃoli-sâa Yâwɛɛ pɔ́ a ŋɔsɔnyɔ̂ŋ maa sâla sɛŋ. Zâla láa soŋ nuui é ǹúui ŋí ŋɔsɔnyɔ̂ŋ ḿaa sâla kula a m̀álai kpaa m̀ólii ŋí.

⁷À kɛ̀ va pɔ̂ri ƃála kpaa máŋ ƃoli sɔlɔ ƃoi é pá la Yâwɛɛ pɔ́ ŋɔsɔnyɔ̂ŋ ḿaa sâla kula mɛni ma, a pɔ̂ri pâi a tòloŋ feerɛ kpaa máŋ popôo feere, dɔnɔ kɛ̀ ƃô a ŋɔsɔnyɔ̂ŋ maa sâla sɛŋ, gbélii kɛ́ ƃò a kéreŋ sala sɛŋ.

⁸É pá a ŋ̀ɔni-ŋai ŋí zâla láa soŋ nuui pɔ́. Zâla láa soŋ nuui é zɔnyɔ̂ŋ salai kúla a maa-ŋuŋ. Zâla láa soŋ nuui é dòloŋ kpaa máŋ bopôoi kɔŋ kpĩlaŋ kɛ́lɛ vé gùla ŋ̀á.

⁹É zɔnyɔ̂ŋ sala sɛŋ ŋí ŋãa da kpɛ́mɛŋ ŋ̀âla-teƃelei kpono ḿâ, é gbéli pú têƃelei kɔ́ɔ mu. Gáa a sɔnyɔ̂ŋ su mɛni lɛ̀ɛ sama-sɛŋ.

¹⁰Gɛ̀ ní é dòloŋ kpaa máŋ bopôoi veerɛ ɣelei kúla a kéreŋ sâla yɛ̂ɛ berei maa nɛ̃ɛi é gɛ́ lai. Ǹyaŋ zâla láa soŋ nuui é ǹúui ŋí maa sâla kula zɔnyɔ̂ŋ mɛni ma è gɛ̀i. A kɛ̀ tí, ŋɔsɔnyɔ̂ŋ su-mɛni a pâi lɛɛ̂i.

¹¹Kɛ́lɛ à kɛ̀ ǹúui fé pɔrîi tòloŋ feerɛ kpaa máŋ popôo feerɛ sɔlɔ ƃôi, gɛ̀ ní é pá a felaƃa fũa pãi feerɛ a ŋɔsɔnyɔ̂ŋ maa sâla sɛŋ. Vé ɔle-wulɔ pù ma kpaa máŋ kéreŋ-sɛŋ kúŋ nɛ̃ɛ, kpɛ́ni fêi, gáa a sɔnyɔ̂ŋ maa sâla sɛŋ.

¹²É pá la zâla láa soŋ nuui pɔ́, nyii pâi ǹyée láa fɛ́ɛ tɔnɔ siɣêi zu a gélee pɔɔ ŋá tôoi é géreŋ ŋ̀âla-teƃelei ŋá Yâwɛɛ mɛni ma. Gáa a sɔnyɔ̂ŋ su mɛ́ni lɛ̀ɛ maa sâla sɛŋ.

¹³Gɛ̀ ní zâla láa soŋ nuui a pâi ǹúui ŋí maa sâla kulâi zɔnyɔ̂ŋ mɛni ma è gɛ̀i. Nyaŋ Ɣâla a pâi ŋɔsɔnyɔ̂ŋ su mɛni lɛɛ̂i. Felaƃai ŋí gbéli káa a zâla láa soŋ nuui pɔ́ɔ yɛ̂ɛ berei gáa la a m̀ii-sɛŋ sala sɛŋ.

¹⁴Yâwɛɛ è mò Mose ma ǹyɛɛ.

¹⁵À kɛ̀ núu da a Yâwɛɛ ŋɔtɔ̂ŋ-ŋai da kàra dɛ̂i pere nyaŋ vé sama-sɛŋ maa waa tɛɛ ní nyii maa nɛ̃ɛi é dɛɛi, fɛ̂ɛ maa ǹúui é pá a ƃála-siɣɛ kpaa máŋ ƃoli-siɣɛ nyii pɔɔ́ fé mai. Daa-tulɛi ŋí bâa tée Ŋ̀âla-pɛrɛ Kɛ́tɛi ŋɔtɔ̂ŋ lá-wooi ma.

¹⁶Fɛ̂ɛ é zɛŋ fela-fei kɛ́ nyii vé dɛ̀ɛ ní zâla láa soŋ nuui pɔ́i. É tela zɔ̃ɔ gbua buu feerɛ láa m̀a. Gɛ̀ ní zâla láa soŋ nuui a pâi nuui ŋɔsɔnyɔ̂ŋ waa m̀a salai kulâi a ƃála. A kɛ̀ tí, ŋɔsɔnyɔ̂ŋ su mɛni a pâi lɛɛ̂i.

¹⁷À kɛ̀ núu da à sɔnyɔ̂ŋ kɛ̀ a Yâwɛɛ ŋɔtɔ̂ŋ-ŋai da kàra nyii vé gili níi, berei máŋ vé gili ní lai, ŋɔsɔnyɔ̂ŋ káa ŋ̀ûa, ǹyaŋ fɛ̂ɛ é vela fêi kɛ́.

¹⁸Fɛ̂ɛ é pá a ƃála-sirɛ kpaa máŋ ƃoli-sirɛ nyii pɔ́ɔ fé mai zâla láa soŋ nuui pɔ́ a ŋɔsɔnyɔ̂ŋ maa kpa kula sâla sɛŋ. Daa-tulɛi ŋí bâa tée ŋ̀âla-pɛrɛ kɛ́tɛi ŋɔtɔ̂ŋ lá-wooi ma. Zâla láa soŋ nuui é ǹúui ŋí maa sâla kula ŋɔsɔnyɔ̂ŋ mɛni ma è gɛ̀i. A kɛ̀ tí, ŋɔsɔnyɔ̂ŋ su mɛni a pâi lɛɛ̂i.

¹⁹Gáa a sɔnyɔ̂ŋ maa kpa kula sâla sɛŋ zɔnyɔ̂ŋ mɛni ma è gɛ̀ a Yâwɛɛ.