Read Kpelle Levetekɔ 8 Bible Online

Levetekɔ 8 - Kpelle bible

Levetekɔ 8

¹Yâwɛɛ è mò Mose ma ǹyɛɛi,

²“Eelɔŋ siɣe da ǹônii, í zâla láa soŋ-ƃelai maa ɣîri seɣe-ŋai síɣe, wúlɔ dísee mɛni ma, zɔnyɔ̂ŋ sala kula taa-tulɛi, m̀ála sîrɛ feerɛi da dɛ́-sɛŋ féu gbóloi gbɔ̂lɔ tɔnɔ.

³Gɛ̀ ní Eezuɛ-ŋai kélee ŋãa tɛ̀ ma Yâwɛɛ ŋɔpɛ́rɛ maa waai lá.”

⁴Ǹyaŋ Mose è gɛ yɛ̂ɛ berei Yâwɛɛ è mò la mai. È Eezuɛ-ŋai kélee ŋáa tɛ̀ ma Yâwɛɛ ŋɔpɛ́rɛ maa waai lá.

⁵Nya ƃe Mose è mò dîa ǹyɛɛi, “Mɛnii ŋai Yâwɛɛ è mòi nyaa ká ŋí ŋa pá gɛ̂i.”

⁶Mose è pà a Eelɔŋ da ǹônii gbɔŋ ŋɛ́i-tuɛ é gɛ́ dí díwaa.

⁷È yɛkɛ tòo Eelɔŋ ma é nyokpoi too mɛi é mɛi ɣíri a bɛ̂ti, é ɛfɔi too ma é mɛi ɣíri a seɣe ƃela bɛti palaa lɛ́lɛɛ.

⁸È geŋe lá seɣe-kpuai too ma é mɛni-ŋa tee sãai pú zu nyii da dòli a Uliŋ da Tumiŋ.

⁹È m̀ɔrɔi sèe ŋ̀ûa, é gôo pɔkɔɔŋ pú m̀ɔrɔi ŋɛ́i-tuɛ a gɛɛ é kɛ́ a ŋɛ́i kɛ́-maa maa waa zâla láa-soŋ-nuui ŋɔtíi kɛ́ mani ma, yɛ̂ɛ berei Yâwɛɛ è mò la Mose mai.

¹⁰Gɛ̀ ní Mose è ŋ̀úlɔi sìɣe é bú Yâwɛɛ ŋɔpɛ́rɛ maa waai ma da m̀u sãa kélee. È Yâwɛɛ ŋɔpɛ́rɛi maa waai da m̀u sãa kélee maa-wâa bere sîi ŋí su.

¹¹È ŋ̀úlɔi da sìɣe é gbɛ́mɛŋ zâla kula teƃelei ma, ŋ̀á sãai, m̀ara sɛŋ foloi da gɔ́ɔ mu sɛŋ gîei lɔ́ɔlu mɛi feerɛ a gɛɛ é dítɛɛ Yâwɛɛ pɔ́.

¹²È ŋ̀úlɔi da pù Eelɔŋ ŋûa a gɛɛ é kɛ́ a maa waa é tela zèe ŋɔtíi kɛ́ɛi su.

¹³Naa pôlu ma Mose è Eelɔŋ ǹônii tòli é yokpo too dîa, é m̀ɛi ɣiri a bɛti é ƃɔrɔ sîi da see díŋûa gɛɛ yɛ̂ɛ Eelɔŋ ŋ̀ɔi yɛ̂ɛ berei Yâwɛɛ è mò la mai.

¹⁴Gɛ̀ ní Mose è pà a zɔŋyɔ̂ŋ sala kula niŋa sirɛi. Eelɔŋ da ǹônii dí díyee pɛ̀lɛ niŋai ŋuŋ ma.

¹⁵Mose è daa-tulɛi paa é ǹyée gbua lɔ́ ŋãa su é gbɛ́mɛŋ ŋ̀âla-teƃelei ŋ̀owo-ŋai dísoŋo-ŋai su é dínaŋ ma a gɛɛ é gbɛtɛ tíi kɛ́ mɛni ma. É ŋãai kpéli pù zâla kula teƃelei kɔ́ɔ mu. Bere sîi ŋí ƃé è maa waa la é dɛ̀ɛ tíi kɛ́ mɛni ma.

¹⁶Mose è daa-tulɛi ŋ̀úlɔ kélee kùla, goi sãai ḿâ wulɔi, ŋɔba-paai da goi kɔni káo ma wulɔi kélee é géreŋ ŋ̀âla-teƃelei ma.

¹⁷Kɛ́lɛ è zuai gɔlɔ siɣe, ǹúu da gbó é kula la m̀ûui su, é géreŋ yɛ̂ɛ berei Yâwɛɛ è mò la m̀ai.

¹⁸Nya ƃe è pà a mála sirɛi géreŋ sâlai kula mɛni ma. Eelɔŋ da ǹônii dí díyee pɛ̀lɛ m̀álai ŋuŋ ma.

¹⁹Mose è m̀álai pàa, é ŋãa kpɛ́mɛŋ ŋ̀âla-teƃelei ma é dínaŋ ma.

²⁰Tãi è kpɛ̀ɛ la a daa-tulɛi su teɛɛ a gbua-kpuai, è ŋ̀uŋ sìɣe, ŋ̀úlɔ da maa kpua-kpuaai é géreŋ.

²¹Tãi dí goi sãai da gbɔ̂rɔ-ŋai maa waa lai, Mose é gélee kèreŋ ŋ̀âla-teƃelei ma a kéreŋ sɛŋ kúŋ nɛ̃ɛ Yâwɛɛ mɛni ma.

²²Nya ƃe è pà a m̀álai kpéli zâla láa soŋ-ƃelai see mɛni ma. Eelɔŋ da ǹônii dí díyee pɛlɛ m̀álai ŋuŋ ma.

²³Mose è m̀álai pàa, é ŋãa da siɣe é zia Eelɔŋ láa mii yee mɛi wôli kpɛrɛi ma, é da sia ǹáa mii yee kpua kɛ́tɛi mai, é da sia ǹáa mii kɔɔ-kpua zɛ-kponoi ḿâ.

²⁴Nya ƃe Mose è Eelɔŋ ǹônii tòli é m̀ála ŋãai da sìa dílaa mii yee mɛi wôli kpɛrɛ-ŋai dîa, é da sìa dílaa mii kɔɔ-kpua zɛ-kponoi ŋai dîa. Mose è ŋãai kpéli sìɣe é gbɛ́mɛŋ ŋ̀âla-teƃelei ma é dínaŋ ma.

²⁵Nya ƃe è zuai ŋ̀úlɔ sìɣe, ŋ̀óŋ tɔɔi wulɔi, goi sãai ma wulɔi kélee, ŋɔba-paa, goi kɔni káo feerɛi da maa wulɔi da ǹáa mii yee mɛi wɛrɛi.

²⁶È kpólo kpua tɔnɔ kùla dɛ́-sɛŋ féu kpoloi maa kpɔlɔi su nyii gbɛtɛ̂ɛi Yâwɛɛ mɛni mai, é kpólo kpûa tɔnɔ siɣe nyii gbɛ́tɛ̂ɛi a wúlɔi da kpólo kpala ƃela é dípu zuai wulɔi da zuai láa mii yee mɛi wɛrɛi mɛi.

²⁷È mii-sãai ŋí kélee pù Eelɔŋ yêei da ǹônii dí dɛɛ Yâwɛɛ pɔ́ a dísama sɛŋ gbîŋ-kpiŋ.

²⁸Nya ƃe Mose è zãai ŋí sòŋ pôlu díyêei é géreŋ ŋ̀âla-teƃelei ŋá dísee mɛni ma dítii mɛi. Ǹyaŋ è kɛ̀ a mii-sɛŋ sâla-sɛŋ nyii géreŋ kùŋ nɛ̃ɛ̂i Yâwɛɛ mɛni mai.

²⁹Nya ƃe Mose è zuai keɣe-la sìɣe é dɛ̀ɛ Yâwɛɛ pɔ́ a zama-sɛŋ gbîŋ. Mose ŋɔmii ƃe kɛ̀ a zâla láa soŋ-ƃelai dísee ƃala-sirɛi keɣe-la. Mose è mɛnii kélee kɛ̀ nɔ́ yɛ̂ɛ berei Yâwɛɛ è mò la m̀ai.

³⁰Gɛ̀ ní Mose é ŋ̀úlɔ maa-waai da sìɣe da zua ŋãai nyii kɛ̀ ŋála-teƃelai ŋái é gbɛ́mɛŋ Eelɔŋ da ǹônii dîa, é da kpɛ́mɛŋ díseɣe-ŋai dîa. Bere sîi ŋí su è dí maa wâa da díseɣe-ŋai Yâwɛɛ ŋɔtíi kɛ́ mɛni ma.

³¹Nya ƃe Mose è mò Eelɔŋ ma da ǹônii ǹyɛɛi, “Ka zuai síɣe ká lí la Yâwɛɛ ŋɔpɛ́rɛi laƃelei, ka ɣíli ká m̀ii naa da gbóloi nyii gáa gbôlɔi su ka-see mɛni mai yɛ̂ɛ berei Yâwɛɛ è mo lai.

³²Zuai da gbóloi nyii da lɛ̂ɛi, ka géreŋ.

³³Káfe kúla Yâwɛɛ ŋɔpɛ́rɛi lá é lɛ́ɛ la zu fólo lɔ́ɔlu mɛi feerɛi nyii gáa a kásee kúui é tɛ́ɛ.

³⁴Mɛnii Yâwɛɛ è mò a gɛɛ kú gɛ̂i, nyaa ká ŋí kwa gɛ̂i a gɛɛ kásɔnyɔ̂ŋ su mɛni é lɛ́ɛ.

³⁵Ka lɛɛ Yâwɛɛ ŋɔpɛ́rɛi lá a fólo lɔ́ɔlu mɛi feerɛ da kpíni lɔ́ɔlu mɛi feerɛ, ka kɛ́ mɛnii kɛ̀ nyìi Yâwɛɛ è mòi. A wàla kɛ́ tí, ka pâi sâai. Bere ƃe Yâwɛɛ è mò la ḿâ.”

³⁶Eelɔŋ da ǹônii dí mɛnii kélee kɛ̀ nyii Yâwɛɛ è mò Mose ma, Mose é m̀ó diai.