Read Kpelle Levetekɔ 9 Bible Online

Levetekɔ 9 - Kpelle bible

Levetekɔ 9

¹Eelɔŋ-ni see kûui kpɛɛ pôlu ma, nyii kɛ̀ a ŋ̀ele kûu ǹɔ́ɔlu mɛi saaƃa ɣelei, Mose è Eelɔŋ tòli da ǹônii é pɛlɛ Eezuɛ nuu-pɔlɔ-ŋai dîa.

²È mò Eelɔŋ ma ǹyɛɛi, “Niŋa sirɛ loŋ siɣe zɔnyɔ̂ŋ salai kula mɛni ma, í ƃálo sirɛ loŋ siɣe gereŋ salai kula mɛni ma. Dífeerɛ dí kɛ́ a daa-tulɛi nyii pɔ́ɔ fé diai í pá a dîa Yâwɛɛ pɔ́.

³M̀ó Eezuɛ-ŋai dîa dí ƃoli-sîrɛ siɣe zɔnyɔ̂ŋ salai kula mɛni ma, dí kóraŋ tɔnɔ niŋa loŋ da kóraŋ tɔnɔ ƃála loŋ nyii-ŋai pɔ́ɔ fé diai siɣe géreŋ salai kula mɛni ma,

⁴dí niŋa sîrɛ da ƃála sîrɛ siɣe gɛ-gie pôlu laa maa salai kula mɛni ma. Ka daa-tulɛ-ŋai ŋí da m̀ii-sɛŋ nyii zumoɔɔ̂i a wulɔi kúla a sâla Yâwɛɛ ma, kpɛ́ni fei, Yâwɛɛ a pâi sâa pâi kápɔ.”

⁵Zãai Mose è mɛni ƃó diai dí pà a gélee Yâwɛɛ ŋɔpɛ́rɛ maa waai ŋɛ́i-tuɛ. Eezuɛ-ŋai kélee dí díŋaa tɛ̀ ma naa dí kɛ̀ Yâwɛɛ fɛli.

⁶Nya ƃe Mose è mò dîa ǹyɛɛi, “Yâwɛɛ a mɛnii ŋí ƃó a gɛɛ ká gɛ́ a gɛɛ ŋɔfólo-laai é pá kápɔ.”

⁷Gɛ̀ ní Mose è mò Eelɔŋ ma ǹyɛɛi, “Lí ŋ̀âla-teƃelei ma í zɔnyɔ̂ŋ sala sɛŋ da géreŋ sâla-sɛŋ tɛ́ɛ ísɔnyɔ̂ŋ su mɛni lɛɛ mɛni ma ka ǹûai. Zâla sɛŋ tɛ́ɛ a gɛɛ ǹûai dísɔnyɔ̂ŋ su mɛni é lɛɛ yɛ̂ɛ berei Yâwɛɛ è mò lai.”

⁸Nya ƃe Eelɔŋ è lì ŋ̀âla-teƃelei ma é m̀álai páa nyii kɛ̀ a gbîŋ ŋɔsɔnyɔ̂ŋ sâla-sɛŋ.

⁹Eelɔŋ ǹônii dí pà a daa-tulɛi ŋãai Eelɔŋ pɔ́, é ǹyée gbua lɔ́ zu é gbɛ́mɛ́ŋ ŋ̀âla-teƃelei zôwo-ŋai su é gbeli pú ŋ̀âla-teƃelei kɔ́ɔ mu.

¹⁰Kɛ̀lɛ è daa-tulɛi ŋ̀úlɔ, goi kɔni káo feerɛi da maa wulɔi da ŋɔba-paai kereŋ ŋ̀âla-teƃelei ŋá yɛ̂ɛ berei Yâwɛɛ è mò la Mose mai.

¹¹Kɛ́lɛ è kùla a zuai gbîŋ da gɔlɔ m̀ûui su é géreŋ.

¹²È daa-tulɛi nyii kɛ̀ a gbîŋ kereŋ sâla-sɛŋ pâa. Nónii dí pà a zua ŋãai bɔ́ é gbɛ́mɛŋ ŋ̀âla-teƃelei ƃela náaŋɔɔ m̀a.

¹³Dí zua ŋuŋ tɛ̀ɛ bɔ da maa kpûa-kpuai kélee, é géreŋ ŋ̀âla-teƃelei ma.

¹⁴Gɛ̀ ní è goi sãai maa wâa da gbɔrɔ-ŋai é géreŋ ŋ̀âla-teƃelei ma.

¹⁵Nyíŋ pôlu ma è ǹûai dísála-sɛŋ láa seri. E m̀olii láa seri ǹûai dísɔnyɔ̂ŋ mɛni ma, é báa yɛ̂ɛ berei è gɛ̀ la a gbîŋ sɔnyɔ̂ŋ sala-sɛŋ.

¹⁶È pà a géreŋ sala sãai é zâlai kúla yɛ̂ɛ berei dɔ̂ŋ è mò lai.

¹⁷È m̀ii-sɛŋ salai kúla nyii a gɛ̀ a ɣele-wala kéleei, è ǹyée lá fɛ́ɛ tɔnɔ kula zu é géreŋ ŋ̀âla-teƃelei ma.

¹⁸È ǹiŋai da m̀alai pàa ǹûai dílii-see salai kula mɛni ma. Eelɔŋ ǹônii dí pà a zua ŋãai bɔ́ é gbɛ́mɛŋ ŋ̀âla-teƃelei ma é dínaŋ ma.

¹⁹Eelɔŋ è ǹiŋai da m̀álai wúlɔ kélee kùla, díŋoŋ tɔɔi wulɔi, díkoi sãai ma wulɔi, díkoi kɔni káo ma wulɔi da díba-paai ma wulɔi.

²⁰É bú ǹiŋai da m̀ála keɣe-la-ŋai m̀ɛi é lí la ŋ̀âla-teƃelei ma, é zua wulɔi kéreŋ teƃelei.

²¹Kɛ́lɛ è zua keɣe-la-ŋai da dílaa mii yee mɛi wɛrɛ-ŋai tɛ̀ɛ a dísama sâai gbîŋ-kpîŋ Yâwɛɛ pɔ́ a zâla láa soŋ-ƃelai dîwɔ mii, yɛ̂ɛ berei Mose è mò lai.

²²Tãi Eelɔŋ è kpɛ̀ɛ la a zâla-ŋai ŋí kúlaai, è ǹyée sãa ǹûai mɛi é lûwa tòo dîa, é kúla teƃelei ma.

²³Mose da Eelɔŋ dí lɔ̀ Yâwɛɛ ŋɔpɛ́rɛ maa waai mu. Tãi dí kula lai, dí lûwa tòo ǹûai dîa, ǹyaŋ ǹûai dí Ɣâla ŋɔfólo-laai kàa.

²⁴Nya ƃe ŋɔŋ è kùla Yâwɛɛ yêei é zama-sɛŋ kéreŋ da zua wulɔi nyii kɛ̀ teƃelei ŋái. Ǹyaŋ tãi ǹûai dí m̀ɛnii ŋí naa kàa lai, dí làɣi a zu kɛ́tɛ, dí díŋuŋ maa pîlaŋ ǹɔii ma.