Read Kpelle Zɛlemaya 13 Bible Online

Zɛlemaya 13 - Kpelle bible

Zɛlemaya 13

¹Yâwɛɛ è mò ḿâ a gɛɛ ŋá lí ŋá sêɣe-kole nɛnɛ-fɛfɛ yá ŋá bú ḿâ a kpasa bɛ̂rɛ. È mò ḿâ a gɛɛ ḿve zeɣei ŋí wàa.

²Nya ƃe ŋá lì ŋá zeɣei ŋí yá yɛ̂ɛ berei è mò la ḿâi, ŋá bú ḿâ.

³Ǹaa kɛ́ɛ tíi, è ŋɔ́nɔ lòno ḿbɔ a tãi veerɛi ǹyɛɛi,

⁴“Lí Yufeletii Ya-leei kɔlɛ í gbasa bɛ̂rɛi ŋí lóo naa gɔni wôloi su.”

⁵Nya ƃe ŋá lì ŋá gbasa bɛ̂rɛi lóo Yufeletii Ya-leei kɔlɛ.

⁶Tãi kpulu da, Yâwɛɛ è ŋɔ́nɔ mò ḿâ a gɛɛ ŋá lí pôlu ǹyái kɔlɛ ŋá gbasa bɛ̂rɛi kúla gɔni wôloi su.

⁷Ŋá lì ǹaa ŋá gwaai ḿâ káa ƃɛ́i ŋá gbasa bɛ̂rɛi lôo naai. Ŋá ǹaa kàa ŋá gáa naa. Kɛ́lɛ, è kɛ̀ kpɔ́ a garáa nyii núu fa ŋɔ́nɔ pɔ̀ri bûi m̀a.

⁸Nya ƃe Yâwɛɛ è ŋɔ́nɔ lòno ḿbɔ ǹyɛɛi,

⁹“Bere ƃé ŋa pâi Zuda da Zerusâlɛŋ ŋáa yeniî la dí su mɛni kɛ̂tɛi mɛni ma.

¹⁰Ŋ̀wana lɔ̂ɔ-ƃelai ŋí ƃé da díyee kúla ḿù. Ǹûai ŋí wôlii kpɔ̂lɔɔi, dí ŋwana lɔ̂ɔ kpɔ́ nɔ́ dí kɛ́ ɣâla da kpɛ́ni-ŋa fɛ̀li, dí kɛ̀ tíi kɛ̀ dîɛ. M̀ɛni ma da pâi kɛ̂i nɔ́ yɛ̂ɛ gbasa bɛ̂rɛ-kpuai ŋí nyíi kɛ̂i fé ŋɔ́nɔ m̀a a dɔnɔ kpîŋ.

¹¹Berei kpasa bɛ̂rɛ a kânaŋ la núu lèŋei, bere ƃé ŋá kɛ̀ ŋ̀wɛ̂li a gɛɛ Eezuɛ da Zuda-ƃelai díkanaŋ la ḿâ kpáŋ-kpaŋ. Ŋá gɛ̀ tí a gɛɛ dí kɛ́ a ŋánûa, dí gɛ́ nûa dí ńaa maa tɛ́, díƃâa kɛ́ ḿâ. Kɛ́lɛ, dífe díwoli tɔɔ ní ḿâ.”

¹²Eezuɛ Ŋɔɣâlai Yâwɛɛ è ŋɔ́nɔ lòno ḿbɔ ǹyɛɛi, “Zɛlemaya, mó Eezuɛ-ƃelai kélee dîa a gɛɛ dí díŋwã̂ai sua-kɔlɔ gonoŋ-ŋai kélee kpɔ́ láa fɛ́ɛ a ŋwã̂ai. Da pâi m̀ôi yâ a gɛɛ dí gɔ́lɔŋ a gɛɛ maa-nɛ̃ɛ̂i ŋwã̂ai sua-kɔlɔ gonoŋ-ŋai kélee láa é kɛ́ a vɛ́ɛ a ŋwã̂ai.

¹³Gɛ̀ ní, mó dîa a gɛɛ Ńyãa Yâwɛɛ ŋa pâi ǹɔii ŋí su-ƃela kélee kpɔ́ kɛ̂i dí kɛ́ a ŋwã̂ai kpele-ƃela ŋánaa é lɛ́ɛ la zu ŋwã̂ai é gâloŋ-ŋai díkaa a Deeƃé ŋɔsuui su-ƃelai, zâla láa soŋ-ƃelai, ɣâla ŋɔlóno kɛ́-ƃelai da Zerusâlɛŋ-ƃelai kélee kpɔ́ kɛ́.

¹⁴À kɛ̀ tí, ŋa pâi dítôoi ŋá díwolo yɛ̂ɛ gònoŋ-ŋa da sɔ̀ɔ díkîe-ni dîa. Ŋa m̀ɛni ŋí kɛ̂i a ǹúu pɔ̂lɔ-ŋai da ǹyáŋkpa-ŋai kélee. Ḿve pâi díŋɛi malôŋ kâai a dɔnɔ kpîŋ. Ŋa pâi dípaâi.”

¹⁵Yâwɛɛ a lônoi kápɔ ǹyɛɛ, ká káwoli tɔ́ɔ. Káfe kɛ̀ a su-mɛni kɛ̂tɛ-ƃela.

¹⁶Ka ƃaa kɛ́-maa tɛ́ɛ Káɣâlai Yâwɛɛ pɔ́, va lâ kpíni kɛ́tɛ too lâ kâa, kákɛ kàreŋ ǹyée kpaya-kpayai dîa nyíi-ŋai pâi kɛ̂i a dímaa kpiniɛi. Va lâ gwaa ponoɔɔi nyíi kákili káa mai kɛ́ lá yɛ̂ɛ tuna-ya kpini maa pɔlɔ-pɔlɔɔ.

¹⁷Kɛ́lɛ, à kɛ̀ ká fé pâi ká wóli tɔɔ̂i, gɛ̀ ní ŋa pâi wɔ̂lɔi loo-pere su ká su-mɛni kɛ̂tɛi mɛ̂ni ma. Ŋá pâi wɔ̂lɔi kpɔ́ a ŋánaa, ŋ́ɛi-ya kɛ́ pù, kpɛ́ni fêi, Yâwɛɛ ŋɔnûai da pâi liî kɔ-sôŋ pere su.

¹⁸Yâwɛɛ è mò ḿâ ǹyɛɛi, “Mó gáloŋ da ǹee dîa a gɛɛ díkula díkâloŋ see-sãai ŋá dí pîlaŋ. Kpɛ́ni fêi díkâloŋ ƃɔrɔ lɛ́lɛɛ-ŋai da kula díŋûa da too.

¹⁹Daa-lee-ŋai dí káa Zuda kwára-perei, kɔkuluƃa-ŋa da tínaŋ dîa. Ǹyaŋ pere fé naa a gɛɛ núu da é lí naa. Diai kélee díkaa Zudai, da dísoŋ a kɔ soŋ-ŋa da lí a dia lɔii da kpɛ́ni-ŋa su.”

²⁰Íŋɛi tɛ́ yá-ŋua-pere í íkpɔara-ƃelai káa pâi. Ǹûai ŋá dítɛ̀ɛ ípɔi dia kɔɔ, ínûai nyíi-ŋai íkɛ yoka têei a dímaa mɛnii?

²¹Ya pâi kɛ̂i lé à kɛ̀ diai íkɛ̀ yɛ̂ɛ díkaa a íƃarâai da pà dí ísoŋ a kɔ-sôŋ dí kɛ́ ƃò ímɛi a kâloŋ? Ya pâi kɛ̂i mɛni sôli su yɛ̂ɛ nɛnî a kɛ koi-têe su.

²²Ǹyaŋ à kɛ̀ ya marê-kɛ̂ɛ kɛ̀ a gɛɛ lé mɛni ƃé m̀ɛnii ŋí è kɛ̀ la a yái, lé mɛni ƃé da íseɣei fála la da gùla yâ, da í tée perêi, zukulâi ƃa, kpɛ́ni fêi, ya sɔnyɔ̂ŋ támaa kɛ́.

²³Núu-kpune a pɔ̂ri gɔlɔ maa fálenîi, kpaa máŋ kɔ́li é bɔ̃yɛɛ maa fáleŋ? À kɛ̀ da pɔ̂ri gɛ̂i tí, gɛ̀ ní yái íkaa a sɔnyɔ̂ŋ kɛ́tɛ kɛ́ nuui, ya pɔ̂ri ísɔŋ maa fálenîi.

²⁴“Ŋa pâi kátaa-taai yɛ̂ɛ bere tí fɛ̃ɛ kpalaŋ-su fãa a kala tàa-taa lai.

²⁵Bere ƃé ŋa pâi ímɛnii-ŋa têei la, ńyãai ŋ́gaa a Yâwɛɛ ńyãa ƃé mò tí, kpɛ́ni fêi, ya nîa ḿâ ya láa a ɣâla-da kpɛ́ni-ŋa.

²⁶Ŋa pâi íseɣei tɛ̂i a íŋuŋ ŋá íƃɛlɛ tóo.

²⁷Ŋá íkàa íkɛ ŋumɛ tûa támaa kɛ̀ nyíi m̀ɛlɛ kpɛɛ̂i ŋ́goi. Ŋá íkàa íkɛ ɣâla-da-kpɛni-ŋa fɛ̀li ǹyée-ŋai dîa ǹɔɔi-su, yɛ̂ɛ berei sinaa da kɛ̂ la díƃarâai dínɛyâai pôlui. Kpaa máŋ yɛ̂ɛ berei soo-sîrɛ a kɛ̂ la soo sâa-ŋa pôlui. Káai a Zerusâlɛŋ-ƃelai, kpalo ƃêlaai kâa. Lé tãi ƃé ka pâi kɛ̂i la a ká maa-waai?”