Read Kpelle Zɛlemaya 15 Bible Online

Zɛlemaya 15 - Kpelle bible

Zɛlemaya 15

¹Nya ƃe Yâwɛɛ è mò ḿâ ǹyɛɛi, “Eêi kɛ̀ Mose da Samia dîi kɛ̀ tɔɔ̂-ni ŋ́ɛi túɛ, dí kɛ́ ǹûai ŋí maa kpêra-fei kɛ̀, ḿvei ŋ́gili-ŋa sìa é pîlaŋ ǹûai ŋí dîa. Dí kúla ŋ́ɛi. Ǹɛɛ náa dí lí.

²À kɛ̀ da ímarê kɛ̀, ‘Mí ƃé kwa liî naa?’ M̀ó dîa, m̀ɛnii Yâwɛɛ è mòi ƃa: ‘Diai gbɛtɛɛ̂i dímɛni ma a gɛɛ dí sáai, dísaa. Diai pâi lɛɛ̂i kɔ́-sui, dílɛɛ kɔ́ su. Diai gáa a sɛŋ puru é dípâai, é dípaa. Diai da pâi liî a dia kɔ-sôŋ laa sui, dí lí kɔ-sôŋ laa su.’

³Ŋa pâi mɛni kpɔ̂lu sii náaŋ lâai dîa. Ńyãa Yâwɛɛ ƃé mò tí. Da pâi saâi kɔ́ su, ɣila-ŋa dí dípoma ɣála-ɣala, ŋ̀ɔni-ŋai da vɛ̃nɛ-sãa-ŋai dí nyíi-ŋai pâi lɛɛ̂i su-kara kâra.

⁴Ŋa pâi gɛ̂i gâloŋ-laa-ŋai díkaa ŋ̀éniɛi sui, díɣɛlɛ-maa kúla díkponôi, m̀ɛnii Zuda kaloŋ Ɛsekaya nyíi kɛ̀ a Manasɛ ǹóŋ è wɔ́lɔ gɛ̀ Zerusâlɛŋ mɛ̂ni ma.”

⁵Yâwɛɛ è mò ǹyɛɛi, “Zerusâlɛŋ-ƃela, gbɛ̂ɛ ƃé pâi ká ŋɛ́i-malôŋ kâai? Gbɛ̂ɛ ƃé pâi ká maa wɔ̂lɔ kɛ̂i? Gbɛ̂ɛ ƃé pâi kperâi é tɔ́ɔ é kámarê kɛ́ ǹyɛɛ lé ƃé kâai?

⁶Ka káyee kúla ḿù, ká kápôlu tɔɔ ḿâ. M̀ɛni ma, ŋa pâi ńyee pɛlɛ̂i kâa, ŋá ká kúla maa kɛ́. Ḿvii a nâa kpɛɛ a gɛɛ ŋá káŋɛi malôŋ káa.

⁷Ŋa pâi ká fɛ̂ɛi ká táa-taa yɛ̂ɛ fãa a kala tàa-taa, daa-lee-ŋai su ǹɔii su. Ŋánûa, ŋa pâi ká paâi, ŋá kánîa-pɛlɛɛi páa, kpɛ́ni fêi, káfe niî kpera ní kátua-pere nyɔ̂ŋ-ŋai dîa.

⁸Ŋa gɛ́ kápɔɔ-nɛyãai da táma, da tɛɛ ŋãyai ma gáa nyuoi koo mai. Ŋá kánîa-pɛlɛɛ-ŋai pâa a díŋunu tãi, a vólo-tɛɛ-ŋuŋ mâ tãi, dílee-ni dí kɛ́ mɔ̃́lɛ-laa sɔlɔ ƃô. Ŋ̀á gɛ̀ lii-too pôlu da mɛni kpɔ̂lu dílaa kâa a m̀aa félaa.

⁹Ǹee-nuui nyíi ŋɔnîa-pɛlɛɛ lɔ́ɔlu-mɛi feerɛi dí sàai, a pâi fôai, gɛ́ ǹá tâa ǹɛ̂wo mɛni ma. Ŋɔkwaa ponoɔɔi a pâi penêi a kpíni. A pâi ŋumɛ̂i a ƃaa-kula-maa pere. Diai pâi lɛɛ̂i a dífului, ŋa pâi gɛ̂i díkpɔara-ƃela dí dípaa kɔ́ su. Ńyãa Yâwɛɛ ƃé mò tí.”

¹⁰Lé mɛni ƃé lii-nɛ̃ɛ fé la ǹyêei? Lé mɛni ƃé ńee è ḿaa-sɔlɔ ƃô la ŋ̀éniɛi ŋí sui? Laa sâa da sîa káa nɔ́ kúloai kwa nûa. Ḿve niî kpà pili ní núu da ma, kpaa máŋ ŋá kpa soŋ núu da ma. Kɛ́lɛ, ǹûai kélee da ńaɣaŋ lâai.

¹¹Nya ƃe Yâwɛɛ è zu tòo ǹyɛɛi, “Ŋa ŋ́gono tée a gɛɛ ŋa pâi ímaa kɔ̃ɔ̂i. Tãi mɛni kpɔ̂lu a pâ lai, íkpɔara-ƃelai kpîŋ da pâi íkpera-fei kpɔŋ mâa mɛni ma.

¹²Zuda-ƃela, yɛ̂ɛ berei nɔ́ ífa pɔ̂ri kɔli su ɣâlei la nyii zumôɔi a ƃarai, berei ƃé káfe pâi pɔ̂ri kákpɔara-ƃelai yée mɛi ɣâlei la nyii-ŋai pâi kulâi yá ŋûa-perei.

¹³“Ŋa pâi ŋánûai kpɔara-ƃela tɛɛ̂i dípa dí díkɔ̂liŋ da dí laai kɛ̂ sãai kélee síɣe kpɛ́ni-kpɛni, kpɛ́ni fêi, da sɔnyɔ̂ŋ kɛ́ ǹɔii gwaa kélee ma.

¹⁴Ŋa pâi kátɛɛ̂i kɔ-sôŋ-laa su kákpɔara-ƃelai pɔ́ ǹɔii su ƃɛ́i káfe ǹaa kɔ́lɔŋ. Ŋálii ŋwânai kɔ́ɔ a pâi pîlani yɛ̂ɛ da ŋɔŋ tôo, nyíi pâi kákerenîi wɔ́lɔ-wɔlɔ da wɔlɔ-wɔlɔi.”

¹⁵Nya ƃe ŋá mò, “Yâwɛɛ, ya m̀ɛnii ŋá káa. Ŋ́gili é lɛ́ɛ íŋa í kpɔ́ŋ ḿâ. Tɔ́ɔ diai da mɛni kpɔ̂lu làa ḿâi, ŋá ŋ́ɔ̂i gbà kùla. Ífe í líi kpèle é lɛ́ɛ la zu díyee é tɛ́ɛ ḿâ. Gíli é lɛ́ɛ íŋa a gɛɛ ímaa mɛ̂ni ƃé da ƃâa kulâi la ḿâ.

¹⁶Tãi ŋá íwoo mɛ̀ni lai, ŋá ńyee sèe mù. Nya ƃe íwooi è gɛ̀ níi é nɛ̃ɛ, kpɛ́ni fêi, ŋ́gaa a ípɔɔ óo Ŋ̀wála-wâla kélee Yâwɛɛ.

¹⁷Kwa nûa kúfe sèe ní kúkîe ma kúkɛ ɣɛ̀lɛ, kúkɛ kúnîa mɛni kɛ̀. Ŋá íwoo mɛ̀ni, ŋá lɛ́ɛ see-ni ńyãa tɔnɔ kwaa maa, ńii ŋwánaa.

¹⁸Lé mɛni nɔ́ ƃé ŋa pâi kɛ̂i nɔ́ mɔ̃lɛ̂i lai? Lé mɛni ƃé ḿa pala fa kpɛ̂ɛ lai? Ya pâi gɛ̂i ńii é tóo pôlu yɛ̂ɛ ya-ɣɛli nyíi a kpâla a fólo-ɣêlei?”

¹⁹Nya ƃe Yâwɛɛ è ŋ́oo su tòo ǹyɛɛi, “À kɛ̀ yà tìnaŋ ḿbɔ naa-pere, ŋa pâi ńyee seêi ímu a gɛɛ í ŋɔ́nɔ tíi kɛ́ ḿî. À kɛ̀ ífe lɛ́ɛ lôno kɛ́ ní ńaai su, kɛ́lɛ í tɔ̃yâ lono kɛ́, ya pâi kɛ̂i a ŋálono kɛ́-nuu. Ǹûai ŋí da pâi pâi ípɔ-pere, kɛ́lɛ, ífe pâi pâi dípɔ pere.

²⁰Ŋá pâi íkɛ̂i a ƃara-siɣãŋ kpanaŋɔɔ ǹûai ŋí mɛni ma. Da pâi kɔ́ pɛlɛ̂i yá, kɛ́lɛ díyee fé pâi pɔrîi yâ, kpɛ́ni fêi, ŋ́gaa ípôlu. Yâwɛɛ ƃé mò tí.

²¹Ŋa pâi íŋuŋ maa ƃôi ŋ̀wana lɔ̂ɔ-ƃelai yêei, ŋá í kúla kwaa ma kara-ƃela yêei. Ńyãa Yâwɛɛ ƃé mò tí.”