Read Kpelle Zɛlemaya 18 Bible Online

Zɛlemaya 18 - Kpelle bible

Zɛlemaya 18

¹Yâwɛɛ è mò ḿâ ǹyɛɛi,

²“Lí ǹeɣi-tɔɔ-nuui ŋɔpɛ́rɛi la. Ǹaa ƃé ŋa pâi lônoi naa ípɔ.”

³Nya ƃe ŋá lì naa ŋá ǹeɣi-tɔɔ-nuui káa gɛ́ tíi kɛ̀ ŋɔleɣi-tɔɔ kwaai ma.

⁴Tãi a kâa kɛ̀ ǹeɣii kpɛtɛɛ̂i lai, à kɛ̀ ǹeɣi-pɔrɔi fé gîe-ni sòŋ ní a ǹɛ́lɛɛ, a ŋ̀olo é ŋɔ́nɔ dɔ̀ɔ pôlu a berei a kɛ̀ ŋ̀wɛ̂lii lai.

⁵Nya ƃe Yâwɛɛ è mò ḿâ ǹyɛɛi,

⁶“Pɔri ḿâ fé ḿî a gɛɛ ŋátûa a Eezuɛ-ƃela yɛ̂ɛ berei ǹeɣi-tɔɔ-nuui a tûai la a ǹeɣi pɔ̂rɔi? Kákaa nɔ́ ńyee-ŋa yɛ̂ɛ berei tí ǹeɣi pɔ̂rɔi káa la ǹeɣi-tɔɔ-nuui yêei.

⁷À kɛ̀ ŋà mò ńyɛ̃ɛ ŋa pâi lɔii-ŋuŋ da ƃúlenîi, ŋá kâloŋ-laa da su kara,

⁸à kɛ̀ m̀aa lɔii-ŋuŋ tí a bôlu tɔ̀ɔ m̀ɛni nyɔ́mɔɔi ma, gɛ̀ ní ḿve pâi m̀ɛnii kɛ̂i la é pîlaŋ mai.

⁹Kɛ́lɛ, à kɛ̀ ŋà mò a gɛɛ ŋa pâi lɔii-ŋuŋ da ŋɔkâloŋ-laai su kpananiî, ŋá dɔ́ɔ,

¹⁰kɛ́lɛ m̀aa lɔii-ŋuŋ tí fé ŋ̀óli tɔɔ ní ŋ́oo ma, gɛ́ mɛni nyɔ́mɔɔ kɛ̀ nɔ́, gɛ̀ ní ḿve m̀ɛni lɛ́lɛɛi kɛ̂i nyii ŋá gbɛ̀tɛ a gɛɛ gɛ́ m̀ii.

¹¹Mó Zuda da Zerusâlɛŋ-ƃelai dîa a gɛɛ ŋ́gaa mɛni kpɛtɛ̂i a gɛɛ ŋá dí kula maa kɛ́, ŋá mɛni kpɔ̂lu láa dîa. M̀ó dîa a gɛɛ dí kpéra zɔnyɔ̂ŋ tùa-ŋai kɛ̂i dí dítua-pere-ŋai pɛ́ŋ-pɛlɛ.

¹²Kɛ́lɛ, da pâi íwoo su toôi dîyɛɛi, ‘Kpao, lé mɛni ƃé kwa pâi gɛ̂i tí lai? Kwa pâi tûai kpɔ́ nɔ́ a woli kpɔ̂lɔ-pere, kú sɔŋ nyɔ́mɔɔ kpɔ́ nɔ́ yɛ̂ɛ berei kwa ŋ̀wɛ̂lii kú tûa lai.’ ”

¹³Yâwɛɛ è mò ǹyɛɛi, “Ǹɔii-ŋuŋ-ŋai kélee marê kɛ́. M̀ɛnii sîi ŋí da a tá kɛ́ a bɔlɔ? Eezuɛ-ƃelai da mɛni nyɔ́mɔɔ kɛ́tɛ kɛ́!

¹⁴Ka tá gáa kɔlɛ-kâne é kpɛ́ɛ Lɛƃanɔŋ kɔni yee kpaya-kpaya-ŋai tôŋ su? Ka tá gáa ǹyá-ɣɛli-ŋai da kûla ǹyée ŋí tôŋ sui díkpala?

¹⁵Kɛ́lɛ, ŋánûai da nia ḿâ. Da kéreŋ-sɛŋ kúŋ-nɛ̃ɛ kéreŋ ɣâla-pɔkɔɔŋ-ŋa dîa. Da kɛ̂ karênii dísia perei su. Dífe ŋɔ́nɔ siâi a berei dínâŋ pɔlɔ-ŋai da kâa sìa lai. Da kula berei lɛ́lɛɛi ma, da lɛɛ berei ma nyii dífe gɔ́lɔŋ.

¹⁶Da ǹɔii ŋí kɛ́ a kwaa ma mĩli-miliɛɛ, naa ƃɛlɛ-kpɛɛ núu koi. Diai pâi tɛɛ̂i naai, mĩli-mili a pâi pûi dîa a berei ǹaa káa lai. Da pâi díŋuŋ kpɛ́mɛnîi a ǹaa kɛ́-pere.

¹⁷Ŋa pâi ŋánûai táa-taai díkpɔara-ƃelai ŋɛ́i túɛ, yɛ̂ɛ muluŋ ƃé fólo kulâi-pere fãa a vɛ́ɛ. Ŋa pâi ḿbôlu tɔɔ̂i dîa. Ḿve pâi kpɔŋ mâa tɛɛ̂i dípɔ tãi mɛni kpɔ̂lu a pâ la dípɔi.”

¹⁸Nya ƃe ǹûai dí mò dîyɛɛi, “Kwaa mɛni kpɛtɛɛ kɛ́ é pîlaŋ Zɛlemaya ma. Sâla láa-soŋ-ƃela da pâi wɔ́lɔ kɛ̂i nɔ́ naa dí kɛ̀ kúteniŋ tɔ̀ɔ. Táre-ƃela da pâi wɔ́lɔ kɛ̂i nɔ́ naa dí kɛ̀ kúlia-woo ƃò. Ɣâla ŋɔlóno kɛ́-ƃelai da pâi wɔ́lɔ kɛ̂i nɔ́ naa dí kɛ̀ Ɣâla ŋɔwóo ƃò kûa. Ka pá kú kɔ́ bɔ́ a kúwoo, kú kpéra kúwoli tɔɔ̂i ŋ̀óo ma.”

¹⁹Nya ƃe ŋá Yâwɛɛ fɛ̀li, “Yâwɛɛ, íwoli tɔ́ɔ ŋ̀óoi ma í m̀ɛnii mɛ́ni nyíi-ŋai ŋ́gbɔara-ƃelai da m̀ôi é pîlaŋ ḿâi.

²⁰Mɛni lɛ́lɛɛ fela-fei káa a mɛni nyɔ́mɔɔ? Kɛ́lɛ, da lóa tée ḿberêi a gɛɛ ŋá tóo zu. Gáa, ŋa pâ íŋɛi túɛ ŋá dímaa lôno kɛ́ a gɛɛ ífe díkula-maa kɛ̂ a lii ŋwâna-pere.

²¹M̀ɛni ma, Yâwɛɛ, ǹɛɛ naa dílônii dí fôa a puru dísaa. Tɔ́ɔ dí lɛ́ɛ kɔ́ su. Tɔ́ɔ nɛ̃yâai, dísinâai da dínîa-pɛlɛɛi dísaa. Tɔ́ɔ kɔlɔ-fela é dísinâai páa, dí yáŋkpa-ŋai dí lɛ́ɛ kɔ́ su.

²²Yóo-yoo kpɔŋ tɛɛ é dípɛrɛi mu-sãai síɣe dí lɛ́ɛ pâi díkpîŋ kpɛtɛ̂i. Ǹɛɛ naa díwɔ́lɔ mɛni kpɔ̂lu su. Da lóa tée ḿberêi a gɛɛ ŋá tóo zu. Da ƃáre tɛ́ ḿberêi a gɛɛ ŋá kɔ́ la.

²³Kɛ́lɛ, Yâwɛɛ, dímɛni kpɛtɛɛi dí gɛ̀ a gɛɛ dí ḿbaai, í gélee kɔ́lɔŋ. Ífe dísɔnyɔ̂ŋ-ŋai su mɛ̂ni lɛ̀ɛ, kpaa máŋ í díŋɛi malôŋ káa dísɔnyɔ̂ŋ mɛ̂ni ma. Dí tóo kpɔ́ a yee-tɛɛ-maa pêre, í ílii ŋwána, í díkula maa kɛ́.”