Read Kpelle Zɛlemaya 24 Bible Online

Zɛlemaya 24 - Kpelle bible

Zɛlemaya 24

¹Babelɔŋ kaloŋ Nɛbukinaza è wɔ́lɔ Zɛoakiŋ ǹóŋ Zɛoasiŋ nyíi kɛ̀ a kâloŋ Zudai sôŋ a kɔ-sôŋ, é pɛ́lɛ ŋɔtíi kɛ́-ƃela kpaya-kpayai, dáre-ƃelai, da ǹyɛlɛ-ƃelai kɛ̀ Zudai dîa, é lí a dia Babelɔŋ. Ǹaa pôlu ma, ŋá zĩ̂a kàa. Zĩ́ai ŋí su, ŋá kpɔ̂lɔ feerɛ kàa nyii kɛ̀ a ǹáa fɛ́ɛ a fîi wuru-ƃai Yâwɛɛ Ŋɔpɛ́rɛ Kɛ́tɛi ŋɛ́i túɛ.

²Gbɔ̂lɔi ŋí dɔnɔ è kɛ̀ a ǹáa fɛ́ɛ a fîi wuru-ƃa nyíi kɛ̀ a ǹɛ́lɛɛi. Fîi-wuru-ƃai ŋí è kɛ̀ nɔ́ yɛ̂ɛ fîi wuru-ƃai nyíi kpɔ̀lu a maa-ŋuŋ. Kɛ́lɛ, gbéli è kɛ̀ kpɔ́ a ǹuu-laa. È kɛ̀ kpɔ́ a garáa a sɛŋ núu da fa pɔ̂ri da miî.

³Nya ƃe Yâwɛɛ è ḿarê kɛ̀ ǹyɛɛ ḿâ, “Zɛlemaya, lé ƃé ya gâai?” Ŋá mò m̀a ńyɛ̂ɛi, “Fîi-wuru-ƃa. Da lɛ̂lɛɛi kpɔ́, da nyɔ́mɔɔ. Nyii ǹyɔmɔ̂ɔi, ǹulâi kpɔ́ núu da fa pɔ̂ri da miî.”

⁴Yâwɛɛ è ŋɔ́nɔ lòno ḿbɔ ǹyɛɛi,

⁵“M̀ɛnii ńyãai a Eezuɛ Ɣalai Yâwɛɛ ŋa môi ƃa, Zuda-ƃelai nyíi-ŋai ŋa pâi dítɛɛ̂i kɔ-sôŋ pere su Babelɔŋ, díkaa yɛ̂ɛ fîi wuru-ƃa lɛ́lɛɛi.

⁶Ŋa pâi dímɛi kâai a ǹɛ́lɛɛ é lɛ́ɛ la zu ŋá pá a dia pôlu ǹɔii ŋí su. Ŋa pâi gɛ̂i dí tɔ́ɔ. Ḿve pâi mɛni ŋánaa da kɛ̂i a dia. Ŋa pâi dísame pîlanii. Ḿve pâi díƃulenîi.

⁷Ŋa pâi gɛ̂i ḿaa mɛ̂ni é lɛ́ɛ díkili ŋá dí gɔ́lɔŋ a gɛɛ ńyãa ƃa Yâwɛɛ. À kɛ̀ tí, da pâi kɛ̂i a ŋánûa, ńyaŋ ŋ́gɛ ƃò a Díɣâla, kpɛ́ni fêi, da pâi tínanîi ḿbɔ naa pere a dí líi kélee.

⁸“Berei fîi wuru-ƃa nyɔ́mɔɔi káa la miî fé mài, bere ƃé ŋa pâi tûai la a Zɛdikaya nyíi gáa a Zuda kaloŋ da ŋɔtíi kɛ́-ƃelai, é pɛ́lɛ ǹúu-kpului ma nyíi pâi lɛɛ̂i Zerusâlɛŋ taa-leei ŋí sui, da ǹûai nyíi-ŋai díkaa Ize lɔii sui.

⁹Ŋa pâi mɛni kpɔ̂lu lâai dîa a gɛɛ ŋ̀éniɛi su-ƃelai da dí kâa, dí yao kpɔ́ a ŋánaa. Nûa da pâi ɣɛ́lɛ-maa kulâi díkponôi, dí kɛ́ wóo nyɔ́mɔɔ-ŋa ƃò dîa, dí kɛ́ dílaa kɛ̀ a kpalo-sɛŋ ƃɛ́i kélee ŋa pâi dítaa-tâai naai.

¹⁰Ŋa pâi kɔ́ toôi dísama, ŋá puru tóo dîa, ŋá tela kɔlɔ-fela nyɔ́mɔɔ píli dîa é lɛ́ɛ la zu ŋá díkelee kpɔ́ dípaa díkula ǹɔii ŋí su nyíi ŋá wɔ́lɔ dɛ̀ɛ dínâŋ pɔlɔ-ŋai pɔi.”