Read Kpelle Zɛlemaya 26 Bible Online

Zɛlemaya 26 - Kpelle bible

Zɛlemaya 26

¹Zosaya ǹóŋ Zɛoakiŋ kɛ́ɛ a ŋɔkâloŋ-laai kɔ́ɔ pîlaŋ Zuda lɔii mɛi, Yâwɛɛ è lòno ḿbɔ.

²È lòno ḿbɔ ǹyɛɛi, “Zɛlemaya, ye tɔɔ Ŋ̀âla-pɛrɛ Kɛ́tɛi ŋɔkóraŋ su, í ŋ̀orɛ̂-wooi ŋí ƃó ǹûai dîa nyíi-ŋai kulâi daa-ŋai su Zuda-lɔii su dí kɛ́ pà Ɣâla fɛliî Yâwɛɛ Ŋɔpɛ́rɛ Kɛ́tɛi mui. M̀ɛni nyíi kélee ŋa m̀ôi yâi, ífe da lɛ̀ɛ pôlu.

³Tãi da, da pâi díwoli tɔɔ̂i, díkpera dítûa-pere nyɔ̂ŋ ma. Da gɛ̀ tí, gɛ̀ ní ŋa pâi ńii maa fálenîi é pîlaŋ m̀ɛni kpɔ̂lui ŋa ŋ̀wɛ̂lii ŋá ǹáa dîai dímɛni nyɔ́mɔɔi mɛni ma.”

⁴M̀ó dîa yɛ̂ɛi, “M̀ɛnii Yâwɛɛ è mòi ƃa: Ka káwoli tɔ́ɔ ŋ́oo ma, ká káyee sée ŋásɛŋ-lɛɛi mu nyíi gáa ká mɛ̂ni mai.

⁵Ka káwoli tɔ́ɔ m̀ɛnii ŋálono kɛ́-ƃelai da môi kâai ma. Ŋá dítɛ̀ɛ kápɔ a tãi támaa, kɛ́lɛ káfa káwoli tɔ̀ɔ díwoo ma.

⁶À kɛ̀ kawala káwoli tɔ́ɔ ḿâ, gɛ̀ ní ŋa pâi Ŋápɛrɛ Kɛ́tɛi nyíi gáa Zerusâlɛŋ wôloi yɛ̂ɛ berei ŋá ŋásua kɔ̂lɔ-pɛrɛi m̀aa-ŋuŋ wòlo la Siloi. Ǹyaŋ, tãi ŋa pâi gɛ̂i tí lai, núu kélee a pâi Zerusâlɛŋ láa kɛ̂i a ǹaaŋ-lâa-sɛŋ.”

⁷Nya ƃe zâla láa-soŋ-ƃelai da ɣâla ŋɔlóno kɛ́-ƃelai, é pɛlɛ ǹûai kélee dîa dí Zɛlemaya wóo mɛ̀ni gɛ́ ŋ̀orɛ̂-wooi ŋí ƃò Yâwɛɛ Ŋɔpɛ́rɛ Kɛ́tɛi mu.

⁸Zɛlemaya kɛ́ɛ a kpɛɛ a m̀ɛnii ƃóɔɔ nyíi Yâwɛɛ è mò m̀a a gɛɛ é mói, zâla láa-soŋ-ƃelai da Ɣâla ŋɔlóno kɛ́-ƃelai, é pɛlɛ ǹúai gbéli-ŋai dîa, díkelee dí Zɛlemaya sòŋ dîyɛɛ mai, “Fɛ̂ɛ nɔ́ ya saa!

⁹Lé ƃa yá a gɛɛ í ɣâla-woo ƃó a gɛɛ Ŋ̀âla-pɛrɛ Kɛ́tɛi ŋí a pâi wôloi yɛ̂ɛ nyíi kɛ̀ Siloi? Lé ƃa yá a gɛɛ í mò yɛ̂ɛ Zerusâlɛŋ a pâi lɛɛ̂i a taa pîleŋ, núu da fa ŋɔ́nɔ sèe naai?” Nya ƃe ǹûai kélee dí tìnaŋ Zɛlemaya ma Ŋ̀âla-pɛrɛ Kɛ́tɛi mu.

¹⁰Tãi Zuda kaloŋ-ŋai dí m̀ɛnii ŋí mɛ̂ni lai, dí kùla díkâloŋ-pɛrɛ kɛ́tɛi lá a kîrɛ dí pá Ŋ̀âla-pɛrɛ Kɛ́tɛi lá dísee dímɛni ŋáa tée-kwaai mâ Ziɣãŋ Ninai láƃerei.

¹¹Nya ƃe zâla láa-soŋ-ƃelai da ɣâla ŋɔlóno kɛ́-ƃelai dí mò gâloŋ-ŋai da ǹûai kɛ̀ naai dîa dîyɛɛi, “Fɛ̂ɛ Zɛlemaya a sàa, kpɛ́ni fêi è ɣâla-woo ƃò a gɛɛ da pâi Zerusâlɛŋ su karâi nyíi kákaa a maa sêre-ŋai.”

¹²Zɛlemaya è mò zâla láa-soŋ-ƃelai da ǹûai kélee dîa ǹyɛɛi, “Yâwɛɛ è ńdɛ̀ɛ a gɛɛ ŋá m̀ɛnii ŋí ƃó é pîlaŋ Ŋ̀âla-pɛrɛ Kɛ́tɛi da Zerusâlɛŋ ma, m̀ɛni kpɔ̂lui a pâi ǹâai dîa berei ká mɛ̀ni lai.

¹³M̀ɛni ma, ka kátûa-pere maa fáleŋ a ǹɛ́lɛɛ, ká Káɣâlai Yâwɛɛ wóo mɛ́ni. Kà gɛ̀ tí, gɛ̀ ní a pâi ǹíi maa fálenîi. Vé pâi kákula-maa kɛ̂i a m̀ɛni kpɔ̂lui nyíi-ŋai è mò a gɛɛ a pâi ǹâai kâai.

¹⁴Kɛ́lɛ, mɛni a kpera ḿâ, ŋáfulu-laai káa káyêei. M̀ɛnii nyíi kélee ǹɛ̂lɛɛi, gɛ́ ƃò a tɔ̃yâ a gɛɛ ká gɛ́ a ńyãai, ka gɛ́.

¹⁵É lɛ́ɛ kákili ŋá a kɛ̀ kà ḿbàa, gɛ̀ ní mɛni-ŋaa téɛɛ a pâi kɛ̂i naa ká mɛ̂ni ma. Kpɛ́ni fêi m̀ɛnii ka pâi ḿbaâi m̀ɛni mai, vé a ńzɔŋ. Kà ḿbàa, gɛ̀ ní ka pâi mɛni lɛɛ̂i daa lêei ŋí su-ƃela kélee dîa. Tɔ̃yâ ma, Yâwɛɛ ƃé ńdɛ̀ɛ a gɛɛ ŋá ŋ̀orɛ̂-wooi ŋí ƃó kâa.”

¹⁶Nya ƃe ǹúu láa túɛ-ƃelai da ǹûai kélee dí mò zâla láa-soŋ-ƃelai da ɣâla ŋɔlóno kɛ́-ƃelai dîa, dîyɛɛi, “Káfe pâi Zɛlemaya paâi, kpɛ́ni fêi, m̀ɛnii a môi kûai, a kulâi Kúɣâlai Yâwɛɛ yêei.”

¹⁷Zuda nuu-pɔlɔ-ŋai dí dímu sìɣe dítɔɔ dîyɛɛi,

¹⁸“Tãi Maka nyíi kùla Morɛsɛ taa-leei sui è wɔ́lɔ kɛ̀ la a ɣâla ŋɔlóno kɛ́-nuui, maa tãi tí Ɛsekaya ƃé wɔ́lɔ kɛ̀ a gâloŋ Zuda lɔii mɛi. Nya ƃe Maka è mò ǹûai dîa ǹyɛɛ, ‘M̀ɛnii Ŋ̀wála-wâla kélee Yâwɛɛ è mòi ká ŋí: Da pâi Zerusâlɛŋ siniî yɛ̂ɛ núu ƃé kwaa sîi. Ǹaa a pâi kɛ̂i yɛ̂ɛ da kɔni ŋáa tɛ̀ gîe ma. À kɛ̀ tí, ǹyéei nyíi Ŋ̀âla-pɛrɛ Kɛ́tɛi tɔɔ̂i mai, a pâi kɛ̂i a lɔɔ pûŋ.’

¹⁹Tãi m̀ɛnii ŋí è kɛ̀ lai, Ɛsekaya da ǹûai dífe Maka paa ni. Ka gɔ́lɔŋ a gɛɛ Ɛsekaya a kâa yào Yâwɛɛ ma, gɛ́ kɔ̀ a gɛɛ é Yâwɛɛ nîa mɛni kɛ́. M̀ɛni ma, Yâwɛɛ è ǹíi maa sôŋ vé mɛni kpɔ̂lu láa ní Zuda ma yɛ̂ɛ berei è mò la a maa-ŋuŋ. À kɛ̀ kwa kpéŋ ɣàle Zɛlemaya ma, gɛ̀ ní kwa pâi mɛni kpɔ̂lu lâai kúa kpîŋ kûa!”

²⁰Ǹaa pôlu ma, nalôŋ tɔnɔ è kɛ̀ naa, ǹáa ƃé kɛ́ a Yuraya. Ǹâŋ láa ƃé kɛ̀ a Simaya. Ǹalôŋ ŋí è wɔ́lɔ kɛ̀ a Kiria-Zeriŋ nuu. Ǹyaa máŋ è wɔ́lɔ ŋ̀âla-woo sii tɔnɔi nyíi Zɛlemaya è mòi, da ƃò é pîlaŋ Zuda da Zerusâlɛŋ dîa.

²¹Tãi gâloŋ Zɛoakiŋ da ŋɔtíi kɛ́-ƃelai, é pɛ́lɛ ǹûai dîa dí Yuraya ŋɔɣâla-wooi mɛ̂ni lai, dí kɛ̀ ŋ̀wɛ̂lii a gɛɛ dí Yuraya pàa. Kɛ́lɛ, tãi Yuraya è m̀ɛnii ŋí kɔ̀lɔŋ lai, è yào kpɔ́ a ŋánaa. M̀ɛni ma, è pù é lí Ize.

²²Nya ƃe Gâloŋ Zɛoakiŋ è ǹalôŋ nyíi da kâa kɛ̀ ma Ɛnatâŋ nyíi kɛ̀ a Abɔ ǹóŋ, da núu da-ni tɛ̀ɛ Ize a gɛɛ dí Yuraya soŋ.

²³Dí Yuraya sòŋ dípa la Gâloŋ Zɛoakiŋ pɔ́. Zɛoakiŋ è Yuraya pàa a ƃóa-sɔ̂kpɔ. Dí boma sîɣe dí bili ƃɛ́i da gôlo-ƃelai poma lôo-naai.

²⁴Kɛ́lɛ, tãi Safaŋ ǹóŋ Aikaŋ è kɛ̀ la Zɛlemaya pôlui, vé Zɛlemaya tɛ̀ɛ ní ǹûai pɔ́ a gɛɛ dí baa.