Read Kpelle Zɛlemaya 27 Bible Online

Zɛlemaya 27 - Kpelle bible

Zɛlemaya 27

¹Tãi dí Zosaya ǹóŋ Zɛdikaya kɛ̀ la a kâloŋ Zuda lɔii mɛi, Yâwɛɛ è lòno ḿbɔ.

²È mò ḿâ ǹyɛɛi, “Ye niŋa kɔŋ-ma kàraŋ kpɛtɛ a wúru í doo íkɔŋ pôlu, í gbulɔ̂ŋ íkɔŋ lá-pere a sua-kɔlɔ-ɣɛli.

³Yà gɛ̀ tí, gɛ̀ ní worɛ̂ tɛɛ Idɔŋ, Môa, Amɔŋ, Taya da Sidɔŋ kaloŋ-ŋai pɔ́ naa. Ŋ̀orɛ̂-wooi ŋí tɛ́ɛ a géla-ŋai kùla ǹɔii-ŋai ŋí su nyíi-ŋai pà Zerusâlɛŋ, Zuda kaloŋ Zɛdikaya pɔi.

⁴Mó dîa a gɛɛ dí mó dímɛi-ƃelai dîa a gɛɛ Ŋ̀wála-wâla kélee Yâwɛɛi nyíi gáa a Eezuɛ Ŋɔɣâlai ǹyɛɛ ká mó kámɛi-ƃelai dîa kâa Yâwɛɛ ǹyɛɛi,

⁵Ŋá ŋ̀éniɛi kpɛ̀tɛ da zu-ƃela kélee é pɛ́lɛ vɛnɛ-sãai kélee dîa a ŋáwala-wala laa kɛ́tɛi. Ŋa pɔ̂ri dɛɛ̂i núu sîi kélee da pɔ́ nyíi ŋa ŋ̀wɛ̂lii.

⁶M̀ɛni ma, ŋâa nâa ǹɔii ŋí kélee tɛ́ɛ ńyee mu-nuui Nɛbukinaza pɔ́ nyíi gáa a Babelɔŋ kaloŋ. Ŋa pâi gɛ̂i vɛnɛ-sãai kélee dí díwoli tɔ́ɔ m̀a.

⁷Ǹɔii-ŋuŋ-ŋai kélee da pâi tíi kɛ̂i Nɛbukinaza da ǹônii díwɔ̂ lònii dîɛ. À kɛ̀ tí, tãi a pâi pâi a gɛɛ núu da é Babelɔŋ yée mɛi ɣále. À kɛ̀ tí, lɔii-ŋuŋ támaa da kâloŋ kpaya-kpaya támaa da pâi Babelɔŋ kɛ̂i a díyee ŋá-ƃela.

⁸“Kɛ́lɛ lɔii-ŋuŋ da, kpaa kâloŋ-laa nyíi vé pâi fâai a gɛɛ é tíi kɛ́ Babelɔŋ kaloŋ Nɛbukinaza mii, ŋa pâi maa nuui tí kula ma kɛ̂i a kɔ́, puru, da kɔlɔ-fela nyɔ́mɔɔ. Ŋa pâi Nɛbukinaza kɛ̂i é m̀aa lɔii tí su kara kpɔ́ kpúŋ.

⁹M̀ɛni ma, káfe káwoli tɔ̀ɔ kálɛɛ ɣala lá-woo ƃó-ƃelai dîa. Ǹûai ŋí da póniŋ kɛ̀ a gɛɛ dí tuɛ-mɛni ƃó. Ǹûai ŋí da see-woo su kùla, dí kɛ́ lòno zaa-ƃelai pɔ́, dí kɛ́ ƃò a póniŋ kɛ́-ƃela. Da mò kâa dîyɛɛi, ‘Káfe pâi kɛ̂i a Babelɔŋ ŋɔluɛ-ŋa.’

¹⁰Díkaa lɛ́ɛ kɛ̂i kâa. Da lɛ́ɛ pâi gɛ̂i ká lí lɔii-ŋuŋ su kôyaa su, ká kúla ká pɔ-taai. Ŋa pâi ká kulâi ká kpɔɔi lɔii su ŋá lí a káa lɔii da kpɛ́ni su ƃɛ́i ka pâi lɛɛ̂i naa ká sáai.

¹¹Kɛ́lɛ, Yâwɛɛ è mò ǹyɛɛ, ǹɔii-ŋuŋ nyíi pâi fâai ma a gɛɛ é kɛ́ Nɛbukinaza yée mù gɛ́ tíi kɛ̀ mii, ŋa pâi gɛ̂i m̀aa lɔii tí su-ƃela dí lɛ́ɛ díkpɔɔi lɔii su. Da pâi lɛɛ̂i díkpɔɔi lɔii su, dí kɛ́ tíi kɛ̀ naa. Ńyãa Yâwɛɛ ƃé mò tí.”

¹²Ŋá m̀ɛni tɔ̂nɔi ŋí ƃò Zuda kaloŋ Zɛdikaya ma ńyɛ̂ɛ mai, “Íkpîŋ kɛ́ a Babelɔŋ kaloŋ yée-mu nuu, íkɛ tíi kɛ̀ mì, gɛ̀ ní ya pâi lɛɛ̂i ɣele ma.

¹³Lé mɛni ƃé ka ínûai ká pâi saâi la kɔ́ su, puru, kpaa máŋ a kɔlɔ-fela nyɔ́mɔ yɛ̂ɛ berei Yâwɛɛ è mò la a m̀ɛnii pâi kɛ̂i a lɔii-ŋuŋ da nyíi ve pâi ǹyée seêi Babelɔŋ kaloŋ mûi?

¹⁴Kɛ́lɛ, ǹɛ́ɛ ɣala-woo ƃó-ƃelai da m̀ôi kâa a gɛɛ káfe pâi kɛ̂i a Babelɔŋ kaloŋ ŋɔluɛ-ŋa a dɔnɔ kpîŋ! Káfe káwoli tɔ̀ɔ dîa, kpɛ́ni fêi, díkaa lɛ́ɛ ɣala-woo ƃôi kâa!

¹⁵Yâwɛɛ è mò ǹyɛɛ, ‘Ḿve dí tɛɛ ní. Díkaa lɛ́ɛ ɣala-woo ƃôi dí kɛ̀ mò dîyɛɛ, ńyãa ƃé dítɛ̀ɛ. M̀ɛni ma, ŋa pâi Zuda kulâi zeêi. À kɛ̀ tí, ka diai ǹɛ́ɛ ɣala-wooi ƃôi, ka pâi saâi.’ ”

¹⁶Nya ƃe ńyãa, Zɛlemaya ŋa mò zâla láa-soŋ-ƃelai da ǹûai gbéli-ŋai dîa a gɛɛ m̀ɛnii Yâwɛɛ è môi ƃa: “Ɣâla ŋɔlóno kɛ́-ƃelai tí da môi dîyɛɛ, ‘Babelɔŋ-ƃelai da pâi pâi a zãâi dí gùla Ŋ̀âla-pɛrɛ Kɛ́tɛi mui a maa félaa! Káfe káwoli tɔ̀ɔ dîa! Díkaa lɛ́ɛ ɣala-woo ƃôi kâa.

¹⁷Káfe káwoli tɔ̀ɔ ǹɛ́ɛ ɣala-woo ƃó-ƃelai tí dîa. Kɛ́lɛ, ká tíi kɛ́ Babelɔŋ kaloŋ mî a gɛɛ ká lɛ́ɛ ɣele ma. Mɛni da káa naa nyii ka pɔ̂ri gɛ̂i a gɛɛ daa-lêe ŋí fé lɛ̀ɛ a bûŋ? Kpao, m̀aa mɛni da fé naa.

¹⁸Kɛ́lɛ, à kɛ̀ díkaa a tɔ̃yâ ɣâla fɛli-ƃela, tɔɔ dí lóno Ŋ̀wála-wâla kélee Yâwɛɛi pɔ́ a gɛɛ é ǹɛɛ naa zɛŋ fôlo-ŋai díkaa Ŋ̀âla-pɛrɛ Kɛ́tɛi mui, é pɛ́lɛ nyíi-ŋai díkaa gâloŋ-pɛrɛ kɛ́tɛi mu Zerusâlɛŋ dílɛɛ naa, dífe lì a dia Babelɔŋ.’ ”

¹⁹Ŋ̀wála-wâla kélee Yâwɛɛi è mò ǹyɛɛ, “Tãi Nɛbukinaza nyíi wɔ́lɔ kɛ̀ a Babelɔŋ kaloŋ è wɔ́lɔ Zuda kaloŋ Zɛoasiŋ nyíi kɛ̀ a Zɛoakiŋ ǹóŋ da ŋɔtíi kɛ́-ƃelai sôŋ la a kɔ-sôŋ-ŋai, vé lì ní a Ŋ̀âla-pɛrɛ Kɛ́tɛi mu-sãai kélee nyíi-ŋai kɛ̀ Zerusâlɛŋ. Kɛ́lɛ, è Ŋ̀âla-pɛrɛi yée-mu wurii, ǹyá-soŋ sɛŋ-folo kɛ́tɛi nyíi da kâa kɛ̀ ma ǹyuoi, da têƃelei nyíi da kâa ziai, é pɛ́lɛ zãâi gbéli-ŋai dîa lɛ̀ɛ naa gâloŋ ŋɔkâloŋ-pɛrɛi mu.

²¹“Zãâi tí da zãâi nyíi lɛ̀ɛ gâloŋ ŋɔpɛ́rɛi mu Zerusâlɛŋ ƃé Ńyãai a Ŋ̀wála-wâla kélee Yâwɛɛi nyíi gáa a Eezuɛ Ŋɔɣâlai ŋa lônoi é pîlaŋ dîa a zãâi nyíi-ŋai lɛ̂ɛ pôlui.

²²Da pâi liî a zãâi ŋí kélee Babelɔŋ dílɛɛ naa é lɛ́ɛ la zu ŋá lí dí kânai. À kɛ̀ tí, ŋa pâi pâi a dia pôlu, ŋá lí a dia pôlu ƃɛ́i díwɔ́lɔ kɛ̀ naai. Ńyãa Yâwɛɛ ƃé mò tí.”