Read Kpelle Zɛlemaya 28 Bible Online

Zɛlemaya 28 - Kpelle bible

Zɛlemaya 28

¹Zɛdikaya kɛ́ɛ a kâloŋ Zuda lɔii mɛi ŋɔkóraŋ ǹáaŋ, ŋɔŋáloŋ ǹɔ́ɔlui su, Ɣâla ŋɔlóno kɛ́-nuu tɔnɔ è kɛ̀ naa ǹáa ƃé kɛ̀ a Ananaya. Ananaya ŋí è wɔ́lɔ kɛ̀ a Azɔ ǹóŋ. Ananaya ŋí seɛ́ɛ è kɛ̀ Giƃiyɔŋ taai su. Nalôŋ ŋí è wɔ́lɔ lòno ḿbɔ Ŋ̀âla-pɛrɛ Kɛ́tɛi mu zâla láa-soŋ-ƃelai da ǹûai kélee kɛ̀ naai díŋɛi túɛ ǹyɛɛi,

²“Ŋ̀wála-wâla kélee Yâwɛɛi nyíi gáa a Eezuɛ-ŋai Díɣâlai ǹyɛɛ, ‘Ŋa niŋa gɔŋ-ma karaŋ kúla Zuda kɔŋ mâ nyíi Babelɔŋ kaloŋ è dòo gɔŋ mâi.

³Kóraŋ feerɛ à tɛ̀ɛ, ŋa pâi pâi pôlu a zãâi kélee Babelɔŋ kaloŋ Nɛbukinaza è wɔ́lɔ gùla Ŋ̀âla-pɛrɛ Kɛ́tɛi mu é lí a Babelɔŋ.

⁴Ŋa pâi pâi a Zuda kaloŋ Zɛoasiŋ pôlu nyíi gáa a Zɛoakiŋ ǹóŋ é pɛ́lɛ Zuda-ƃelai kpéli-ŋai kélee dîa nyii-ŋai Babelɔŋ kaloŋ è wɔ́lɔ lì a dia Babelɔŋ, ŋá ǹiŋa kɔŋ-ma karaŋ kúla díkɔŋ mâ nyíi Babelɔŋ kaloŋ è dòo díkɔŋ mai.’ ”

⁵Nya ƃe Zɛlemaya è lòno Ɣâla ŋɔlóno kɛ́-nuui Ananaya pɔ́, zâla láa-soŋ-ƃelai da ǹûai kɛ̀ Ŋ̀âla-pɛrɛ Kɛ́tɛi mui díkelee díŋɛi ǹyɛɛ,

⁶“Tɔɔ é kɛ́ tí. Tɔ́ɔ Yâwɛɛ é gɛ́ yɛ̂ɛ berei ya môi lai. Tɔɔ m̀ɛnii ya môi, Yâwɛɛ é gɛ́ tí a tɔ̃yâ. Tɔɔ Yâwɛɛ é pá pôlu a zãâi kélee díwɔlɔ gùla Yâwɛɛ Ŋ̀ɔpɛrɛi mui é pɛ́lɛ ǹûai díwɔlɔ dí kùla Zuda dí lí a dia Babelɔŋ díkelee dîa.

⁷Kɛ́lɛ ka ǹûai kélee ka káwoli tɔ́ɔ m̀ɛnii mâ ŋa pâi môi kâai.

⁸Ɣâla ŋɔlóno kɛ́-ƃela díwɔlɔ kɛ̀ naa kúlɛɛ pâi kɛ̂i a Ɣâla ŋɔlóno kɛ́-ƃela. Ǹûai ŋí díwɔlɔ ɣâla-woo ƃò a gɛɛ kɔ́, puru, é pɛ́lɛ kɔlɔ-fela nyɔ́mɔɔ-ŋa dîa, da pâi toôi lɔii-ŋuŋ támaa su da kâloŋ-laa támaa dîa.

⁹Kɛ́lɛ à kɛ̀ Ɣâla ŋɔlóno kɛ́-nuu da a sâa mò a gɛɛ kwa pâi kɛ̂i lii-see su, à kɛ̀ ŋ̀óo a kɛ̀ a tɔ̃yâ, gɛ̀ ní da pâi maa ɣâla-woo ƃó ǹúui tí siɣêi a Yâwɛɛ ŋɔlóno kɛ́ núu kpîŋ.”

¹⁰Nya ƃe Ɣâla ŋɔlóno kɛ́-nuui Ananaya è ǹiŋa kɔŋ-ma karaŋ kûla Zɛlemaya kɔŋ mâ é ŋ̀ále-ɣale.

¹¹Ananaya è mò ǹûai kélee ŋɛ́i ǹyɛɛ, “M̀ɛnii ŋí ƃé Yâwɛɛ è mò. Bere sîi ŋí ƃé ŋa pâi Babelɔŋ kaloŋ Nɛbukinaza ɣále-ɣâlei la. Nɛbukinaza è gáraŋ ŋí tòo lɔii-ŋuŋ támaa kɔŋ ma ŋ̀éniɛi su. Kɛ́lɛ ŋa pâi gélee kpɔ́ ɣále-ɣalei kóraŋ feerɛ yée mu.” Ananaya kɛ́ɛ a kpɛɛ a lónoɔɔi, Zɛlemaya è kùla Ŋ̀âla-pɛrɛ Kɛ́tɛi mu.

¹²Ananaya kɛ́ɛ a ǹiŋa kɔŋ-ma karaŋ kúla Zɛlemaya kɔŋ-mai, Yâwɛɛ è lòno Zɛlemaya pɔ́.

¹³Yâwɛɛ è mò Zɛlemaya ma ǹyɛɛ, “Lí í m̀ó Ananaya ma a gɛɛ Yâwɛɛ ǹyɛɛ ǹiŋa kɔŋ-ma sɛŋ nyíi í ŋ̀ale-ɣalei, dí gbɛ̀tɛ a wúru, kɛ́lɛ ŋa pâi niŋa kɔŋ-ma karaŋ kpɛtɛ̂i a kɔli ŋá doo nyíti pɔ́ɔ ŋá.

¹⁴Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò ǹyɛɛ: Ŋa pâi ǹiŋa kɔŋ-ma karaŋ nyíi gáa a kɔlii, toôi ǹɔii-ŋuŋ-ŋai tí kɔŋ-ma a gɛɛ dí kɛ́ tíi kɛ̀ Babelɔŋ kaloŋ Nɛbukinaza mì. Da pâi kɛ̂i a ŋɔluɛ-ŋa. Ŋa pâi máŋ wála-wala laa tɛɛ̂i Nɛbukinaza pɔ́ vɛnɛ-sãai kélee mɛi.”

¹⁵Nya ƃe ŋá mò ɣâla ŋɔlóno kɛ́-nuui Ananaya ma ńyɛ̃ɛi, “Ananaya, íwoli tɔ́ɔ! Yâwɛɛ fé í tɛ̀ɛ ní a gɛɛ í Ɣâla-woo ƃó. Kɛ́lɛ ya gɛ́ Zuda-ƃelai dí kɛ́ díwoli tɔ̀ɔ ílɛɛ ɣala-wooi ma.

¹⁶M̀ɛni ma, Yâwɛɛ ǹyɛɛ, ‘Ǹaa fé pâi tûai ŋ́gɛ íkùla ǹɔii ŋí ma. Ya pâi saâi góraŋ ŋí su. Kpɛ́ni fêi ya sɛŋ lɛ́ ǹûai dîa nyíi a gɛ́ da tɔɔ Yâwɛɛ ma.’ ”

¹⁷Nya ƃe Ananaya è sàa a maa kôraŋ tɔnɔi tí. È sàa a góraŋ tí ŋɔɣáloŋ ǹɔ́ɔlu mɛi-feerɛi.