Read Kpelle Zɛlemaya 3 Bible Online

Zɛlemaya 3 - Kpelle bible

Zɛlemaya 3

¹Yâwɛɛ è mò ǹyɛɛi, “À kɛ̀ núu da a ŋɔnɛnîi lɛ̀ɛ, m̀aa nɛ̂nii tí é surɔ̂ŋ da kpɛ́ni kúla, va ŋɔ́nɔ pɔ̀ri kulâi ŋɔsurɔ̂ŋ ninai yêei da ŋɔsurɔ̂ŋ duɛ-tuɛi dí ŋɔ́nɔ tûa. Da gɛ̀ tí, m̀aa tûa-laai tí a ǹɔii maa tĩ̂a kara ŋ́ɛi. Kɛ́lɛ, Eezuɛ, yaâ wɛ́li támaa sóŋ, íkɛ ŋɔ́nɔ ŋ̀wɛli a gɛɛ í ŋɔ́nɔ pá pôlu ḿbɔ naa.

²Ye ǹyée-ŋai tôŋ su káa í ƃɛ́i káa ya kɛ̂ lâai naa berei kɔlɛ íkɛ íwɛli-ŋai maa kpɛ̂ŋ yɛ̂ɛ Arebi-nuu ƃé ǹoɔ̂ɔi vɛ̃ɛ-kpâlaŋ su gɛ́ tɛɛ-a-pere núu maa kpɛ̂ŋ a gɛɛ é gɔ̃̂liŋ kula ǹyêei. Ya ǹɔii maa tĩ̂a kara a wulu-wulu kɛ́ɛ ŋánaa.

³M̀ɛni ma, Ńyãa Yâwɛɛ ŋá dunai kpêra a gɛɛ vé pu. Kɛ́lɛ, ífe niî kpera ní wulu-wulu kɛ̂i. Ŋumɛ kpîŋ fa ísòŋ.

⁴“Íkaa ńdôlii a ínâŋ, íkɛ mò yɛ̂ɛ, ‘Ya wɔ́lɔ ŋ́wɛli é síɣe ǹoloŋ tãi ma é tóo sâa ma.

⁵Ya pâi kɛ̂i nɔ́ a í líi ŋwánaa ḿâ a tãi kélee? Ífe pâi kɛ̂i nɔ́ a í líi ŋwánaa ḿâ a tãi kélee.’ Eezuɛ, bere ƃé í mò la kɛ́lɛ í zɔnyɔ̂ŋ-ŋai kélee kɛ̀ íkɛ̀ ŋ̀wɛ̂lii í gɛ́i.”

⁶Tãi Zosaya è wɔ́lɔ kɛ́ la a kâloŋ, Yâwɛɛ è mò ḿâ ǹyɛɛi, “Ya zɛŋ kâai Eezuɛ nyíi vé téniŋ ƃô níi káa gɛ̂i? A kula ḿbôlu gɛ́ lì ǹyée tɔɔ-ŋai tôŋ-su ŋ̀úru-ŋai mu gɛ́ lɔ-pɔ̂rɔŋ kɛ̀ naa ŋɔɣâla da kpɛ́ni-ŋa fɛliɛi su.

⁷Ŋá kɛ̀ gâai yɛ̂ɛ berei aâ m̀ɛni-ŋai ŋí kɛ́ lai, a pâi tínanîi ḿbɔ naa pere. Kɛ́lɛ vé lene ní pôlu. Ǹyaŋ ŋɔkáyɔɔi Zuda nyíi vé teniŋ ƃô-nii, è m̀ɛnii kâa è gɛ̀i.

⁸Tãi ŋá ǹaa kàa lai, ŋá ŋ̀ulu-wulu kɛ́ Eezuɛi lɛ̂ɛ ŋá táa-laa kɔlɔ tɛɛ bɔ́, ŋá dɛɛ pôlu, kpɛ́ni fêi, è wulu-wulu kɛ̀. Kɛ́lɛ ŋɔkáyɔɔi Zuda nyíi vé teniŋ ƃô-nii, vé yao ní a gɛɛ ŋa pâi gula maa kɛ̂i. Ǹyaa máŋ è bôlu tɔ̀ɔ ḿâ, gɛ́ wulu-wulu kɛ̀, é pɛ́lɛ ɣâla da kpɛ́ni-ŋa fɛlîi.

⁹Ŋɔwulu-wulu kɛ́ɛi fé kɛ́ ní ŋ̀ɛ́i a sɛŋ-da. M̀ɛni ma è ǹɔii maa tĩ̂a kàra a gɛɛ sɛŋ kɛ́ɛ yɛ̂ɛ kɔni-ŋa da wúru-ŋa fɛliɛɛ.

¹⁰M̀ɛni-ŋai ŋí pôlu ma, Eezuɛ ŋɔkáyɔɔi Zuda nyíi ve kɛ́ ní a deniŋ ƃôɔɔi, vé tínaŋ ní ḿbɔ naa a ǹíi kélee, vé tûa ní a téniŋ ƃô pere. Ńyãa Yâwɛɛ ƃé mò tí.”

¹¹Nya ƃe Yâwɛɛ è mò ḿâ a gɛɛ berei Eezuɛ fé teniŋ ƃô ní lai, è tùa a zã́a é tɛ́ɛ ŋɔkáyɔɔi Zuda ma nyíi vé teniŋ ƃô-nii.

¹²È mò ḿâ a gɛɛ ŋá m̀ó ŋ̀orɛ̂-wooi ŋí ƃó Eezuɛ ma ńyɛ̃ɛi, “Eezuɛ, yái ífe teniŋ ƃô níi, ye tínaŋ pôlu ḿbɔ naa pere. Ḿve pâi ǹíi ŋwânai yâ. Ŋà núu malôŋ kàa. Ḿve pâi ŋ́ɛi ɣirîi íperêi wɔ́lɔ-wɔ́lɔ da wɔ́lɔ-wɔ́lɔ.

¹³Kɛ́lɛ, m̀ɛnii nɔ́ ya pɔ̂ri gɛ̂i ƃá fɛ̂ɛ í gɔ́lɔŋ a gɛɛ ya sɔnyɔ̂ŋ kɛ́ a Íɣâlai Yâwɛɛ. Í mó a gɛɛ íkɛ̀ ɣâla da kpɛ́ni-ŋa fɛlîi ŋ̀úru-ŋai mu ífe íwoli tɔɔ ní ŋ̀óo ma. Ńyãa Yâwɛɛ ƃé mò tí.”

¹⁴Yâwɛɛ è mò ǹyɛɛi, “Ka tínaŋ ká pá ḿbɔ naa. Kákaa a ḿbɔɔ. Ŋ́gaa a kánuu-namu. Ŋa pâi ká kulâi daa-ŋai su tɛi-tɛi, ŋ́gɛ ká kùla ǹɔii-ŋai su feerɛ-feerɛ. Ŋa pâi pâi a káa Zãiyɔŋ Yeei ma.

¹⁵Ŋa pâi ká mɛi káa ǹuu tɛɛ̂i nyíi ŋɔkili-ŋa-sîai káa yɛ̂ɛ ŋ́ɔ̂i, nyíi pâi ká mɛi kâai a táre da mɛni ŋá káai.

¹⁶Tãi ka pâi ƃûu ƃôi la ǹɔii tí sui, núu da fé ŋɔ́nɔ pâi gbanaŋ-woo-kɛɛi maa gãlai mare kɛ̂ɛ kɛ̂i, kpaa m̀aa mɛ̂ni kíli fé pâi lɛɛ̂i núu da ŋá. Núu da fé ŋɔ́nɔ pâi da kpɛtɛ̂i.

¹⁷Tãi ŋí à sèri, da pâi Zerusâlɛŋ tôlii a ‘Yâwɛɛ ŋɔkâloŋ-see-sɛŋ.’ Ǹyaŋ ǹɔii-ŋai kélee da pâi díŋa tɛ̂i gîe ma naa dí kɛ́ ǹáa maa tɛ̀. À kɛ̀ tí, dífe ŋɔ́nɔ pâi lɛɛ̂i díkpɔɔi lii-su-kpanaŋ nyɔ́mɔɔi pôlu.

¹⁸Maa tãi tí ma, Eezuɛ da Zuda da pâi kulâi yá-ŋua pere dípa ǹɔii su ŋá dɛ̀ɛ dínâŋ ni pɔ́ a dípɔɔi.”

¹⁹Yâwɛɛ ǹyaa kpîŋ è mò ǹyɛɛi, “Ŋá kɛ̀ ŋ̀wɛ̂lii a gɛɛ ŋá ká síɣe a ǹônii sinaa, ŋá lɔii lɛ́lɛɛ tɛ́ɛ ká pɔ́, nyíi pâi kɛ̂i a ká pɔ́ɔ nyíi pâi kɛ̂i a ǹɛ́lɛɛ é tɛ́ɛ ŋ̀éniɛi su lɔii kélee mai. Ŋá kɛ̀ ŋ̀wɛ̂lii a gɛɛ ká ńdoli a kánâŋ, a gɛɛ káfe ŋɔ́nɔ kùla ḿbôlu.

²⁰Kɛ́lɛ, yɛ̂ɛ berei nɔ́ nɛnî nyíi vé teniŋ ƃô-nii a tûa lai, bere ƃé ka tûa la a ńyãa káai a Eezuɛ-ƃelai. Ńyãa Yâwɛɛ ƃé mò tí.”

²¹Yóo-yoo woo káa tɛ̂i ǹyéei tôŋ-su. Gáa a Eezuɛ-ƃelai wɔ́lɔ-woo da díkpera fêi wòo, kpɛ́ni fêi, da dítûa-pere maa fáleŋ, da nia Díɣâlai Yâwɛɛ ma.

²²Ka tínaŋ ká pá Yâwɛɛ pɔ́ káai káfe teniŋ ƃô-nii, a pâi ká ƃâloi é kákɛ a teniŋ ƃô-ƃela. Ká mó kâai, “Oei, Yâwɛɛ, kwa pâi ípɔ, kpɛ́ni fêi, yá ƃé íkaa a Kúɣâlai.

²³Tɔ̃yâ ma kúfe sɛŋ da káa ní ŋ̀âla da kpɛ́ni-ŋai fɛliɛi su. Yâwɛɛ Ɣala ǹyaa tɔ̂nɔ nɔ́ ƃé a Eezuɛ ŋuŋ ma ƃò.

²⁴Kɛ́lɛ é síɣe kú lòloŋ tãi ma, kwa wɔ́lɔ tûa ŋ̀umɛ tûai ŋí kɛ̂i, kúkɛ Bêe ɣalai fɛ̂li nyíi gɛ̀ zɛŋ kélee kúnâŋ-ni dí mɔ̃̀lɛ mai dí láŋ, díƃala-ŋai, dítaa-tûle-ŋai é pɛ́lɛ dílônii sinaai da dílônii-nɛyãai dîa.

²⁵Tɔ́ɔ kúlaa kú-ŋumɛi su, kú ƃaa-kula maa tûai é kúmɛi pɛ́lɛ. Kpɛ́ni fêi, kwa kúnâŋ-ni kwa sɔnyɔ̂ŋ kɛ́ a Kúɣâlai Yâwɛɛ é síɣe kúlòloŋ tãi ma. Ǹyaŋ kúfe tá kúwoli tɔɔ ní ŋ̀óo ma.”