Read Kpelle Zɛlemaya 30 Bible Online

Zɛlemaya 30 - Kpelle bible

Zɛlemaya 30

¹Yâwɛɛ è lòno ŋɔ́nɔ Zɛlemaya pɔ.

²Yâwɛɛ nyíi gáa a Eezuɛ Ŋɔɣâlai è mò ḿâ ǹyɛɛi, “Zɛlemaya, ye ŋ̀óo-ŋai ŋa môi yâi pɔ̃yɛ kɔlɔ ma.

³Ɣele da a pâi pâi tãi ŋa pâi Eezuɛ da Zuda-ƃelai kɛ̂i la dí lene pôlu ǹɔii su ŋá wɔ́lɔ dɛ̀ɛ dínûa pɔlɔ-ŋai pɔ́i. Ǹyaŋ a pâi kɛ̂i a dípɔɔ. Ńyãa Yâwɛɛ ƃé mò tí.”

⁴Ŋ̀orɛ̂-wooi ŋí ƃé Yâwɛɛ è dɛ̀ɛ é pîlaŋ Eezuɛ da Zuda-ƃelai dîa ǹyɛɛi,

⁵“Ŋà wɔ́lɔ-woo ŋánaa mɛnîi. Gáa a yao-wɔlɔ-woo. Vé a lii-see woo.

⁶Í mɛi sáa, í íkili-ŋa sía! Kpakolo a lôloŋ maa sɔlɔ ƃô yɛ̂ɛ nɛnî? Kpao! Lé mɛni ƃé ŋaŋ ŋa ǹúui kélee kâai la díyee pɛlɛ́ɛ díkoi yɛ̂ɛ nɛnî a kɛ̀ koi têe sui? Lé mɛni ƃé ǹûai kélee ŋ̀ɛ́i kolôŋɔɔi lai?

⁷Mɛni kpɔ̂lu ɣele maa pɔlɔ-pɔlɔɔ káa pâi. Ŋ̀elei ŋí gɔɔŋ-maa fé ma. A pâi kɛ̂i a lii-too pôlu tãi ǹûai mɛ̂ni ma. Kɛ́lɛ dífe pâi lɛɛ̂i zu.”

⁸Ŋ̀wála-wâla kélee Yâwɛɛ è mò ǹyɛɛ, “Tãi ŋ̀elei tí a pâi serîi lai, ŋa pâi m̀ɔ̃lɛ-laa karaŋ ɣâlei ŋá gula dí kɔŋ ma. À kɛ̀ tí, ŋa pâi gɔli-yɔlɛ kɛ́tɛi têei, ŋá gula dí kɔŋ ma ǹyaŋ dífe ŋɔ́nɔ pâi tíi kɛ̂i ŋɔ̃ya-sii kélee da yée mu.

⁹À kɛ̀ tí, gɛ̀ ní da pâi kɛ̂i tíi kɛ̂i ḿî, ńyãai ŋ́gaa a Yâwɛɛ nyíi gáa a Díɣâlai. Da pâi kɛ̂i tíi kɛ̂i Deeƃé ŋɔsuui mî nyíi ŋa pâi gɛ̂i a díkâloŋ.

¹⁰M̀ɛni ma, ŋánua, káfe yào. Káai a Eezuɛ-ƃelai kálii fé kpɛ̃̀liŋ kákoi. Ŋa pâi káŋuŋ-maa ƃôi ká kúla ǹɔii kôyaai tí su, ǹɔii nyíi kákaa zu a kɔ-sôŋ-ŋai. Ka pâi lenêi pôlu kálɔii su kásee naa lii-see su. Ka pâi kɛ̂i a káŋuŋ maa ƃóɔɔ, núu da fé pâi ká maa yaôi.

¹¹Ŋa pâi pâi ŋá ka ŋuŋ-maa ƃó. Ŋa pâi ǹɔii-ŋuŋ-ŋai kélee kpɔ́ su karaâi ƃɛ́i ŋá kátaa-taa naai, kɛ́lɛ, ḿve pâi kákelee ká su karâi. Ḿve pâi ǹɛɛ̂i naa ká lí kpɛ́ni-kpɛni. Kɛ́lɛ ŋa pâi kákula ma kɛ̂i a pere sîi sã́a. Ńyãa Yâwɛɛ ƃé mò tí.”

¹²Yâwɛɛ è mò ŋɔnûai dîa ǹyɛɛ, “Kpɛɛ fé ká palai ma, kasɛŋ-soli maai fa pɔ̂ri kpɛɛ̂i.

¹³Núu da fé naa a gɛɛ é ká mɛi káa, ká palai zále fé mà, kili-kɛ-zu fé naa ká ƃálo mɛni ma.

¹⁴Káwɛli kɛ-maa-ƃelai kélee da nia kâa. Dífe ŋɔ́nɔ kpáani a ká maa mɛ̂ni. Ŋa kákula maa kɛ́ a ŋánaa, kpɛ́ni fêi, ká sɔnyɔ̂ŋ támaa kɛ̀. Ǹyaŋ, ká ŋwãna-lɔɔi su a kɛ́tɛ.

¹⁵Lé mɛni ƃé ka wɔ̂lɔi la kasɛŋ-soli maai yêei? Kásɛŋ-soli maai sále fé ma. Ŋá m̀ɛni-ŋai ŋí kɛ̀ a káa, kpɛ́ni fêi, ká sɔnyɔ̂ŋ támaa kɛ̀. Ǹyaŋ ká ŋwãna-lɔɔi su a kɛ́tɛ.

¹⁶Kɛ́lɛ ǹɔii-ŋuŋ-ŋai nyíi-ŋai ká paâi, ŋa pâi dípaâi. Kákpɔara-ƃelai dia máŋ da pâi kɛ̂i a kɔ-sôŋ-ŋa lɔii-ŋuŋ da kpɛ́ni-ŋa su. Diai nyíi kélee ŋúma kɛ̀ kâai, dia máŋ núu da a pâi dísãai ŋûmai. Diai nyíi kélee sãâ kùla káyêei kɔ́-sui, nûa da pâi díwɔ̂i kulâi díyêei máŋ.

¹⁷Kákpɔara-ƃelai dí mò dîyɛɛ, ‘Káfe sɛŋ su, núu da fé kpáaŋ ní ká maa mɛ̂ni ma.’ Kɛ́lɛ ńyãa Yâwɛɛ ŋa môi a gɛɛ. Ŋa pâi kákɔlɔ̂i ponôi, ŋá kápalai sále. Ńyãa Yâwɛɛ ƃó tí.”

¹⁸Yâwɛɛ è mò ǹyɛɛi, “Ŋa pâi ŋánuai seêi kulâi díkpɔɔi lɔii su, ŋá ǹúu-suui kélee malôŋ káa. Da pâi Zerusâlɛŋ tɔɔ̂i pôlu dí ǹúu maa kɔ̃ɔ kwaa ma kpanaŋɔɔ-ŋai tɔ́ɔ pôlu dítɔɔ̂i.

¹⁹Ǹûai pâi kɛ̂i naai, da pâi kɛ̂i laa-maa-tɛ wule-ŋa toôi. Ɣɛ́lɛ-woo a pâi kɛ̂i tɛ̂i naa. Ŋa pâi nîa-pɛlɛɛ támaa tɛɛ̂i dípɔ a gɛɛ dí kɛ́ a dítamaa. Ŋa pâi ƃaa-kɛ-ma kɛ̂i dîa, a gɛɛ núu da fé ŋ̀ɛ́i nàɣiŋ dí mɛi.

²⁰Ŋa pâi dínîa-pɛlɛɛi kɛ̂i yɛ̂ɛ dínâŋ pɔlɔ-ŋai dí tãi. Ŋa pâi dí kɛ̂i a wála-wala-ƃela ŋ́ɛi-tuɛ. Ǹɔii-ŋuŋ-ŋai nyíi-ŋai mɛni ŋánaa làa dîai, ŋa pâi díkula maa kɛ̂i.

²¹Díkpɔɔi nuu a pâi kɛ̂i dílaa túɛ. Dílaa túɛ-nuui a pâi kulâi dísama. Tãi ŋa pâi dôlii lai, da pâi pâi ŋ́gɔlɛ. Ǹúui nênɛ ƃé pâi pâi ŋ́gɔlɛ mâ à kɛ̀ ḿve dòli nii? M̀ɛni ma, ka pâi kɛ̂i a ŋánûa, ńyaŋ ŋ́gɛ ƃò a Káɣâla. Ńyãa Yâwɛɛ ƃé mò tí.”

²³Ka gáa, Yâwɛɛ ŋɔlii-ŋwânai káa yɛ̂ɛ fãa kɛ́tɛ. A ǹíi ŋwàna, m̀ɛni ma, a ŋɔnûai kula ma kɛ̂. Mɛni kula ma kɛ́ɛ a pâi yɛ̂ɛ fãa kɛ́tɛ. Gɛ́ sɔ̂ɔ zɔnyɔ̂ŋ-ƃelai dîa.

²⁴Yâwɛɛ a pâi lɛɛ̂i a ǹíi ŋwána é lɛ́ɛ la zu é ŋɔnûai kula maa kɛ́. Tãi ŋ̀elei ŋí a pâi pâi lai, a pâi lɛɛ̂i a ǹíi ŋwánaa é lɛ́ɛ la zu m̀ɛnii kélee a gbɛtɛ a gɛɛ é gɛ́i, é gɛ́. Tãi ŋ̀elei ŋí a pâi pâi lai, ka pâi târei m̀ɛnii ŋí su.